Mbula- Bwazza for Nigeria 2016 NBTT/WBT - Non-Drama (NT)

Mbula

Ado ka, pwari Ɗire mala Bǝredi mana kǝ lo raka, mǝnana à tunǝki ama “Ɗire Yalimuru” ka gbashina. Agbani pǝris andǝ amalǝm Nggurcau mala Musa came arǝ alta njargula mǝnana à nǝ̀ walna Yesu nǝi aɓa sǝmbǝrǝa ka, acemǝnana ɓangciu kǝ pakkia wia arǝ aɓwana malea.
Pǝlǝa Shetan kutio arǝ Yahuda mǝnana à tunǝki ama Iskariyoti ka. Yì ka, nda aɓalǝ alaggana mala Yesu mana lum-nong-ɓari ka. Yahuda wario aban agbani pǝris andǝ aɓwana-mǝgule mala amǝ yal Ndàmǝgule mala Ɓakuli, à na cau andǝia, amur njar mǝnana nǝ̀ pana Yesu nǝi a buia ka. Banɓoaria wia, kara à eare ama à nǝ̀ pe wi boalo. Yì ka, eare, pǝlǝa kutio a alta njar mǝnana nǝ̀ kumo sǝ nǝ̀ pea wia Yesu nǝi a pwari mǝnana ɓwabunda pà kàm raka.


Lang Lamsan mala Bǝredi mana kǝ lo raka tinate, a pwari walki anzur mala Ɗire Yalimuru ka, Yesu tasǝ Bitǝrus andǝ Yohana, nea wia ama, “Wu kyane wu kya gilǝkia sǝm girlina mala Ɗire Yalimuru mǝnana sǝm nǝ̀ li ka.”
À ɗi ama, “A ya ban sǝ ɓǝ̀ sǝm kya pak turo girline?”
Nea wia ama, “Kutio ma'wun a nggeala ani ka, wu nǝ̀ je wunǝ ɓe ɓwabura nǝ bàng-mùr amuri. Wu kya ate a ɓala mǝnana nǝ̀ kuti kam ngga. Wu ne mǝtala-ɓalae ama, ‘Malǝm nǝ̀ tur sǝm ɓǝ̀ sǝm ɗio ama: Bansulǝo mǝnana nǝ̀ li girlina Ɗire Yalimuru kam andǝ alaggana male ka, nda a ya ban?’ Nǝ̀ lǝmndǝa wun rǝ ɓe ndakuli mǝgule, à gilǝkina ɓālǝi. A kam sǝ wu nǝ̀ pak turo girlina.”
Pǝlǝa à wario à kya kum girbunda kǝla mǝnana Yesu nea wia ka. Pǝlǝa à pak turo girlina Ɗire Yalimuru.


Lang pwari karǝna ka, Yesu andǝ amǝ'mishan male do aban li girlina. Pǝlǝa nea amǝ'mishan male ama, “Ən earǝna ce li girlina Ɗire Yalimuru mǝnia ka kǝrkǝr sǝnǝa wun, sǝ ɓǝn kutio a tanni! Sǝ ǝn nggǝ na wun, pa mǝ nǝ li ɗǝm ɗang, she ɓǝ̀ kya lumsǝna a Domurǝm mala Ɓakuli ka.”
Pǝlǝa Yesu twal kwap mala mur ɓǝlanggun anap, sǝ pakki Ɓakuli yàwá, sǝ na ama, “Wu ak mǝnia ka, wu gaki arǝ wun. Ən nggǝ na wun ama, twal ado ka pà mǝ nǝ nu mur ɓǝlanggun anap ɗǝm ɗang, she ɓǝ̀ Domurǝm mala Ɓakuli yina ka.”
Pǝlǝa twal bǝredi, pakki Ɓakuli yàwá, ɓwani, sǝ pea wia, nea wia ama, “Mǝnia ka nda nggūrǝam, mǝnana ǝn pa ace wun ngga, wu kǝ pak mǝnia ka, ace ɗenyi nǝ mim.”
Anzǝm girlina ka, twal ɓe kwap mala mùr ɓǝlanggun anap a bui, sǝ na ama, “Kwap mǝnia ka, nda bǝsa kurcau a nre Ɓakuli andǝ aɓwana male, mǝnana à kurrì nǝ nkilem mana à sukki ace wun ngga. Sǝ wu sǝni! Ɓwa mǝnana nǝ̀ kurkuro nǝ mim ngga nda aɓalǝ sǝm aban li kani atam! Lú mala Muna mala Ɓwa ka nǝ̀ pa kǝla mǝnana Ɓakuli kani ka, sǝ caukwanban na nǝ ɓwa mǝnana me ka!”
Alaggana tita ɗiki rǝarǝia ko yana ɓwe na aɓalǝia mǝnana nǝ̀ pak mǝnia yì gir ka.

Makgir pǝlǝa lo a nrea amur ko yana aɓalǝia nda ɓwamǝgule malea kat. Yesu nea wia ama:
Amurǝma mala amǝɓanza ka à kǝ lǝmndǝ rǝcandǝa amur aɓwana, sǝ amǝ'lǝmndǝ gulo amur aɓwana ka à kǝ tunǝ ɓamuria ama, “agyajam mala ɓwapǝndǝa.” Sǝ wun ngga, anggo sǝ wu nǝ̀ pak ɗang. Ma'wun ngga, ɓwa mǝnana gula wun kat ka nda nǝ̀ dupa wun kǝla muna kat ka, gbani gbal ka nda rítǎu. Yana nda ɓwamǝgule, ɓwa mǝnana do aban li ka le, ko ɓwa mǝnana kǝ gaki girlina ka? Nda ɓwa mǝnana do aban li ka re? Sǝ mim ngga ǝn do aɓalǝ wun kǝla mǝ gau girlina.
Wu ndaka aɓwana mǝnana wu came a nzǝmam aɓa karǝkiban mǝnana kumam ngga. Ace mani ka, ǝn pana wun garamurǝm, kǝla mǝnana Tárram pam ngga. Wu nǝ̀ li sǝ wu nǝ̀ nu atam a Domurǝm mem, sǝ wu nǝ̀ do amur abuno-murǝm aban ɓashia atau mala Amǝ Isǝrayila mǝnia lum-nong-ɓari ka.


Yesu banggi Bitǝrus ama, “Shiman, Shiman! Kwaki kiro! Shetan kǝ alte ama nǝ̀ sarǝki wun kǝla sarǝ mǝsǝsa. Sǝ mim ngga ǝn pangŋa hiwi aceo we Shiman, ace mǝnana paɓamuru mo ɓǝ̀ kǝa kpa ɗang. Sǝ ɓǝa longŋa ka, ɓak ɓabum amǝ'eambǝo.”
Bitǝrus eari wi ama, “Mǝtalem, ǝn shamna bumam mǝ nǝ o ato a ndàkurban, sǝ mǝ nǝ wu ato!”
Yesu pǝlǝi wi ama, “Ən nggǝ no we Bitǝrus, yalung mǝnia ka kaniama nggu nǝ̀ ɓua ka, a nǝ tǝmcem kusǝ tārú ama a surǝam ɗang!”

Yesu pǝlǝa ɗi alaggana male ama, “A pwari mǝno ǝn tur wun wu kya hamnǝ cau mem, sǝ wu pànǝ ndaboalo, ko luru-gya, ko ankura raka, wu ɗwanyi kǝgir le?”
À eare ama “Awo!”
Pǝlǝa nea wia ama, “Sǝ ado ka, koyana sǝ ndanǝ ndaboalo ko luru ka, ɓǝ̀ twali. Sǝ ɓwa mǝnana pànǝ nggeabyau raka, ɓǝ̀ mak daura-murɓe ɓǝ̀ kuro. Mǝ ndaban bangga wun ama cau mǝnana à gilǝì aɓa Malǝmce ama, ‘À oasǝi ata amǝ'cauɓikea’ ka, nǝ̀ lumsǝo a muram pup. E, gir mǝnana à gilǝì a muram ngga nda kǝ yiu a lumsǝo ka.”
Pǝlǝa alaggana male ne wi ama, “Mǝtalabangŋo! Sǝni! Anggea-byau nia ɓari ka.”
Pǝlǝa Yesu banggia wia ama, “Karǝna ana!”


Yesu lo o amur Nkono Olif kǝla mǝnana pakkiyi pwari-pwari ka. Pǝlǝa alaggana male o a te. À kya bwalǝna banì ka, Yesu nea wia ama, “Wu pak hiwi, ace mǝnana ɓǝ̀ wu kǝa kpa aɓa karǝkiban raka.”
Pǝlǝa upia wia zak, kya kūndǝo pak hiwi, ama, “Dâ, ɓǝ̀ a wu nǝ ear ka, twalam mǝnia yì kwap mala tanni ka: sǝ mǝnia ka kane mem ma ɗang, ɓǝ̀ do ama kane mo na.”
Kara mǝturonjar sulǝo abani, ɓak ɓabumi. Sǝ acemǝnana nda aɓa bumkiɗikea mǝgule ka, kutio arǝ hiwi nǝ rǝcandǝa. Piban mǝnana pur a rǝì ka kǝ surkio kǝla nkila.
Lang Yesu loapi ban hiwi ka, nyare aban alaggana male kya kumia a ntulo, acemǝnana à nda aɓa bumkiɗikea, mǝnana ɓunggi rǝia ka. Pǝlǝa nea wia ama, “Mana tsǝa sǝ wu kutia nong'ntulo? Wu lo, wu pak hiwi, ace mǝnana ɓǝ̀ wu kǝa kpa aɓa karǝkiban ɗang.”
Kuni malaká pwal arǝ cau ɗang, kara ɓwabunda yi tusǝna. Yahuda, mwashat aɓalǝ alaggana Lum-nong-ɓari ka, nǝ̀ yinǝia. Pǝlǝa sung aban Yesu, mǝn abui kùrrì nui a nki. Yesu pǝlǝa ɗi ama, “Yahuda, a ndarǝ kurkuro nǝ Muna Mala Ɓwa nǝ nuban a nkiu?”
Lang alaggana mala Yesu mǝnana ate sǝn gir mǝno nǝ̀ kumban ngga, pǝlǝa à ɗi ama, “Ɓǝ̀ sǝm pak turo nǝ anggea-byau ma'sǝm le, Mǝtalabangŋo?” Kara mwashat aɓalǝ alaggana mala Yesu kwar guro mala Pǝris Mǝgule, kasǝ kiri mǝli kpat.
Pǝlǝa Yesu na ama, “Ɓǝ̀ go anggo!” Pǝlǝa je kir ɓwabure, twali wi banì.
Yesu pǝlǝa ne agbani pǝris andǝ aɓwana-mǝgule mala amǝyal Ndàmǝgule mala Ɓakuli, mǝnana à yiu a rǝì ka ama, “Wu yiu a rǝam nǝ anggea-byau andǝ agara-kwalta kǝla mǝ nda ɓwamǝgule mala amǝ'soakitau? Ko aya pwari ka mǝ nda ata wun aɓa Ndàmǝgule mala Ɓakuli, sǝ wu loasǝ kun wun a rǝam ɗang. Sǝ bu-pwari man she ka ma'wun na, andǝ mala rǝcandǝa mala pǝndǝa.”


À bwal Yesu, sǝ à dǝshina ɓala mala Pǝris Mǝgule nǝi. Sǝ Bitǝrus ka, tarǝte kǝ o atea. Amǝyal palta ka à bwalǝna bǝsa a cengge à dumǝna akuni. Pǝlǝa Bitǝrus yi do atea. Ɓe muna-ɓwama, mǝturo-ɓala sǝni aban do a kun bǝsa. Sǝni kyap-kyap sǝ na ama, “Mǝnia yì ɓwa ka, nda ate.”
Bitǝrus pǝlǝa tǝmce ama, “Mɓwama, ǝn surǝ ɓwe ɗang.”
Zuku ka, ɓeɓwa sǝn Bitǝrus sǝ na ama, “We ka, a nda tea!”
Bitǝrus eare ama, “Ɓwabura! Mǝ nda ɗang!”
Anzǝm kǝla bu-pwari mwashat ka, ɓeɓwa cam kingging ama, “Ɓafo, mǝnia yì ɓwa ka nda ate, acemǝnana yì gbal ka ɓwa Galili na.”
Bitǝrus ama, “Ɓwabura! Ən surǝ cau mǝnana a banggiyi ka ɗang!” Kuni malaká pwal ɗang, kara nggu ɓua. Mǝtalabangŋo pǝlǝ mǝsǝì sǝn Bitǝrus. Ɓalǝ Bitǝrus kasǝa arǝ cau mǝnana Mǝtalabangŋo ne wi ama: “Kaniama nggu nǝ̀ ɓua a bu du man yalung ngga, a nǝ tǝmce surǝam kusǝ tārú.” Pǝlǝa puro a nza kya ɓwa kǝrkǝr.


Aɓwana mǝnana à cia ɓǝa yal Yesu ka, à oali, oalban kyauwikiban sǝ à walki. À kur amǝsǝì; pǝlǝa à tullì sǝ à ɗi ama, “Na sǝm, yana mǝnana tullo ka, we mǝɓangna?” À naki wi acau mǝkwanrui sǝ à kǝ sanggì.


Lang ban fana ka, aɓwana-mǝgule, amǝkurcau mala amǝ Yahudi, agbani pǝris andǝ amalǝm Nggurcau mala Musa, yi rambǝa, pǝlǝa à yinǝ Yesu a ɓadǝmbǝia. À ne wi ama, “Ɓǝ̀ a nda Kǝrǝsti, Mǝ'amsǝban mǝnana Ɓakuli turi ka, na sǝm.”
Yesu earia wia ama, “Ɓǝ̀ ǝn bangga wun ngga, pà wu nǝ̀ earnǝ mim ɗang. Sǝ ɓǝ̀ ǝn ɗi wun ngga, pà wu nǝ̀ pam eare ɗang. Twal ado aban ká ka, Muna Mala Ɓwa nǝ̀ do a bu-mǝli mala Ɓakuli mǝnana Karmur gulo kat ka.”
Pǝlǝa yia kat à sàrǝi ama, “A ndarǝ bangŋa ama a nda Muna mala Ɓakuli le?”
Pǝlǝa pea wia eare ama, “Kǝ ndo wu na ka, Mǝ nda.”
Pǝlǝa à na ama, “Ya cau ɗǝm sǝm alta oe? Sǝm ongŋǝni àkǝ̀ mburkuni!”

Feti si Luka 22