 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

جُولْدٜ تَمْسٜىٰجٜ طٜ عُڢْنَاکَ، وِعٜتٜىٰندٜ ݠَسْکَ ࢡَدَکٜ يٛتَّاغٛ؞ مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ طٛنْ طَࢡَّ دَبَرٜ حَا ࢡٜمبَرَ عِيسَى، عَمَّا ࢡٜطٛنْ کُلَ يِمْࢡٜ؞


ندٜنْ سَيْطَانُ نَسْتِ ندٜرْ يَحُودَ، بِعٜتٜىٰطٛ عِسْکَرِيٛتْ، غٛوتٛ ندٜرْ سَݠّٛ عٜ طِطٛ؞ عٛيٜحِ، عٛنَرِّ بٜى مَوْࢡٜ لِمَنْعٜنْ عٜ مَوْࢡٜ عَيْنٛوࢡٜ حَيْکَلِيرُ، دٛوْ دَبَرٜ نَنغُغٛ عِيسَى؞ ࢡٜشٜيِ، ࢡٜنَرِّ حٛکُّغٛ مٛ شٜىٰدٜ؞ يَحُودَ جَࢡِ، عٛڢُطِّ طَࢡُّغٛ دَبَرٜ نٛ ࢡٜنَنغِرَ عِيسَى بٜى سِرِّ نغَمْ تَا مٛوࢡْرٜ يِمْࢡٜ حٜࢡْتَ؞


ࢩَلَادٜ تَمْسٜىٰجٜ طٜ عُڢْنَاکَ، ندٜ ࢡٜکِرْسَتَ جَوْغٜلْ ݠَسْکَ يٛتَّکٜ؞ عِيسَى نٜلِ ݠِيٜرْ عٜ يُحَنَّ، عٛوِعِ ࢡٜ‏: «نجٜحٜ، تَاسْکِتِنَنٜ عٜنْ ࢩَامْدُ ݠَسْکَ حَا ࢩَامٜنْ» ࢡٜࢨَمِ‏: «تٛيْ نغِطَّ مِنْ تَاسْکِتِنَ ندُ؟» عٛجَابِ ࢡٜ‏: «ندَا، تٛ عٛنْ نَسْتِ بٜرْنِوٛلْ، عٛنْ ݠٛتَّنْ بٜى غٛطّٛ دٛونْدِيطٛ مبُلْکُ ندِيَمْ؞ تٛکّٜ مٛ حَا سَارٜ ندٜ عٛنَسْتَتَ، مبِعٜ جَوْمُ سَارٜ مَنْ‏: مٛودِبّٛ وِعِ‏: تٛيْ سُودُ حَا مِࢩَامَ کِيرْتَارِ ݠَسْکَ بٜى ݠُکَرَعٜنْ عَمْ؟ عٛحٛلَّنْ عٛنْ سُودُ مَوْندُ، دٛوْرُ، مٛعِّتِنَاندُ، حَا تٛنْ عٛنْ نغَطَتَ تَاسْکَرَ؞» ࢡٜنجٜحِ، ࢡٜتَوِ کُوجٜ مَنْ بَنَ عٛوِعِ ࢡٜ، ࢡٜتَاسْکِتِنِ کِيرْتَارِ ݠَسْکَ؞


ندٜ وَکَّتِ مَنْ وَطِ، عِيسَى ڢُطِّ ࢩَامُغٛ بٜى نٜلَاࢡٜ؞ عٛوِعِ ࢡٜ‏: «مِيٜلِ مَسِنْ ࢩَامُغٛ ࢩَامْدُ ݠَسْکَ ندُ بٜى مٛوطٛنْ حِدّٜکٛ مِتٛرّٛ؞ نغَمْ مِطٛنْ وِعَ عٛنْ، مِمٜىٰتَتَا ࢩَامُغٛ ࢩَامْدُ ݠَسْکَ حَا تٛ مَانَ مَارُ وَنغِنَامَ ندٜرْ لَامُ اَللَّه؞» ندٜنْ عٛحٛوعِ جَرْدُغٜلْ، عٛيٜتِّ اَللَّه، عٛوِعِ‏: «کٛوعٜ جَرْدُغٜلْ نغٜلْ، شٜنْدٜ حَکُّندٜ مٛوطٛنْ، نغَمْ مِطٛنْ وِعَ عٛنْ، يٜىٰسٛ طٛ مِمٜىٰتَتَا يَرُغٛ عِنَبٛوجَمْ سٜيْ تٛ لَامُ اَللَّه وَرِ؞» ࢡَاوٛطٛنْ عٛحٛوعِ تَمْسٜىٰرٜ، عٛيٜتِّ اَللَّه، عٛيٜوِ ندٜ، عٛحٛکِّ ࢡٜ، عٛوِعِ‏: «طٛ طُمْ ࢡَنْدُ عَمْ حٛکَّاندُ نغَمْ مٛوطٛنْ، مبَطٜ طُمْ نغَمْ حَا عٛنْ شِڢْتٛرَمِّ؞» بَنَ نٛنْ بٛو، عٛحٛوعِ جَرْدُغٜلْ ࢡَاوٛ ࢩَامْدُ، عٛحٛکِّ ࢡٜ نغٜلْ، عٛوِعِ‏: «جَرْدُغٜلْ نغٜعٜلْ طُمْ عَلْکَوَلْ کٜسَلْ؞ اَللَّه تَبِتِنِرِ نغَلْ بٜى ࢨِيࢨَمْ عَمْ ندُڢَاطَمْ نغَمْ مٛوطٛنْ؞
«عَمَّا ندَا زَمْبٛتٛوطٛ يَمْ طٛنْ ࢩَامْدَ بٜى عَمْ حَا طٛ؞ ڢَکَتْ، ࢡِي-نٜطّٛ مَايَنْ بَنَ نٛ اَللَّه تَبِتِنِرِ طُمْ، عَمَّا بٛنٜ لَاتَنْتٛ نٜطّٛ زَمْبٛتٛوطٛ مٛ‏! ࢡٜݠُطِّ ࢨَمْࢨَمْتِرْغٛ، مٛيْ شَکَ مَࢡّٜ تَمِّيطٛ وَطُغٛ طُمْ»؞

نغَابَ عُمِّ حَکُّندٜ نٜلَاࢡٜ دٛوْ مٛيْ شَکَ مَࢡّٜ تَمِّيطٛ لَاتَاغٛ مَوْطٛ، ࢡُرْدُطٛ؞ عِيسَى وِعِ ࢡٜ‏: «لَامِيࢡٜ عُمَّاتٛوجٜ طٛنْ لَامَنٛ طٜ، مَرْࢡٜ بَاوْطٜ دٛوْ مَࢡّٜ بٛو طٛنْ عٜوْنٛ کٛعٜ مُوطُمْعٜنْ سَاحِيࢡٜ؞ عَمَّا نغَمْ مٛوطٛنْ کَمْ، نَا بَنَ نٛنْ؞ مٛ ࢡُرْدِ مَنغُ شَکَ مٛوطٛنْ لَاتٛ مٛ ࢡُرْدِ ڢَمْطُغٛ، مٛ طٛنْ لَامٛ بٛو لَاتٛ بَنَ جَغِّيطٛ؞ مٛيْ ࢡُرْدِ مَنغُ، جٛوطِيطٛ طٛنْ ࢩَامَ نَا مَلَّ جَغَّنٛووٛ مٛ؟ نَا جٛوطِيطٛ طٛنْ ࢩَامَ نَ؟ عَمَّا مِنْ، مِطٛنْ شَکَ مٛوطٛنْ بَنَ جَغّٛووٛ؞
«عٛنٛنْ نغٛنِ وٛنْدُࢡٜ بٜى عَمْ تُمْ ندٜرْ جَرِّبٛوجٜ عَمْ؞ مِحٛکِّ عٛنْ لَامُ بَنَ بَابِرَاوٛ عَمْ حٛکِّرِ يَمْ؞ ندٜنْ عٛنْ ࢩَامَنْ، عٛنْ نجَرَنْ حَا ࢩَامْرُدٜ عَمْ ندٜرْ لَامُ عَمْ، عٛنْ نجٛوطٛتٛ دٛوْ لٜىٰسٜ لَامُ نغَمْ حِيتَاغٛ لٜعِ إِسْرَاءِيلَ سَݠّٛ عٜ طِطِ؞»


جَوْمِرَاوٛ وِعِ‏: «سِمٛنْ‏! سِمٛنْ‏! سَيْطَانُ ࢨَمِ دُنغَيٜىٰرٜ نغَمْ دِمْبُغٛ عٛنْ، جَارْتُغٛ عٛنْ بَنَ ࢡٜنجَارْتِرْتَ عَلْکَمَارِ نغَمْ سٜنْدُغٛ ندِ بٜى ࢩَاندٜ؞ عَمَّا مِتٛرَکٜ نغَمْ مَاطَ، نغَمْ تَا نُطِّنْکِ مَ تَمْݠَ؞ عَنْ، تٛ عَتُوبِ، سٜمْبِطِنْ دٜىٰرْطِرَاࢡٜ مَ؞» ݠِيٜرْ وِعِمٛ‏: «جَوْمِرَاوٛ، مِطٛنْ تَاسْکِ يَحُغٛ بٜى مَ، کٛو حَا ڢُرْسِنَ، کٛو حَا مَايْدٜ بٛو؞» عِيسَى وِعِ‏: «ݠِيٜرْ، مِطٛنْ وِعٜ، حَنْدٜ حِدّٜکٛ عَسْغُمْرِ عُعَ، عَوِعَنْ ندٜ تَتِ عَعَنْدَا يَمْ؞»

عِيسَى وِعِ ࢡٜ ڢَحِنْ‏: «ندٜ مِنٜلْنٛ عٛنْ بِلَا بٛورٛ شٜىٰدٜ، بِلَا بٛورٛ نجٛوࢡَارِ، بِلَا ݠَطٜ، وٛودِ کٛ عٛنْ شٛويِنٛ نَ؟» ࢡٜنجَابِمٛ‏: «وَلَا کٛو طُمٜ مِنْ شٛويِ؞» عٛوِعِ ࢡٜ‏: «عَمَّا جٛنْتَ نَا نٛنْ؞ مَرْطٛ بٛورٛ شٜىٰدٜ حٛوعَ نغٛ، مَرْطٛ بٛورٛ نجٛوࢡَارِ بٛو حٛوعَ نغٛ؞ مٛ مَرَايْ کَاڢَحِ، سٛورَّ لِمْشٜ مُوطُمْ، سٛودَ کَاڢَحِ؞ نغَمْ مِطٛنْ وِعَ عٛنْ، سٜيْ بِنْدَاطُمْ دٛوْ عَمْ غٛونغْطَ‏: عٛلِمَامَ شَکَ حَلُّࢡٜ؞ نغَمْ کٛ وَاجِبِ دٛوْ عَمْ طٛنْ لَاتٛ؞» ࢡٜمبِعِ‏: «جَوْمِرَاوٛ، ندَا کَاڢَاجٜ طِطِ؞» عٛوِعِ ࢡٜ‏: «طُمْ حٜعِ؞»


ندٜنْ عِيسَى وُرْتِ، عٛدِلِّ حَا حٛوسٜىٰرٜ جَيْتُنْجٜ بَنَ نٛ عٛوٛووِ؞ ݠُکَرَعٜنْ مَاکٛ تٛکِّمٛ؞ ندٜ عٛيٛتِّ نٛکُّورٜ مَنْ، عٛوِعِ ࢡٜ‏: «تٛرٜ اَللَّه نغَمْ تَا عٛنْ ندٛعّٛ ندٜرْ جَرِّبٜىٰکِ؞» ندٜنْ عٛدَايْتِ ࢡٜ بَاکِنْ سَکِّنَنْدٜ حَيْرٜ، عٛتُغِّ کٛݠِّ، عٛوَطِ دٛعَ، عٛوِعِ‏: «بَابِرَاوٛ، تٛ عَمُويِ، عِتَّنَمْ جَرْدُغٜلْ تٛرَّ نغٜعٜلْ؞ عَمَّا تَا وَطْ کٛ مُويٛ عَمْ يِطِ، سٜيْ کٛ نغٛ مَ يِطِ؞» ندٜنْ مَلَاعِکَاجٛ وَنغَنِمٛ دِغَ عَسَمَ نغَمْ سٜمْبِطِنغٛ مٛ؞ ندٜ طُمْ سُنِمٛ مَسِنْ، عٛوَطِ دٛعَ بٜى تِينَارٜ، وُلْوٜىٰندٜ مَاکٛ لَاتِ بَنَ تٛࢡّٜ ࢨِيࢨَمْ دٛوْ لٜسْدِ؞
ࢡَاوٛ وَطُغٛ دٛعَ، عٛعُمِّ، عٛلٛرْتِ حَا ݠُکَرَعٜنْ، عٛتَوِ ࢡٜطَانِ نغَمْ شٛمْرِ سُنٛ؞ عٛوِعِ ࢡٜ‏: «نغَمْ طُمٜ طَانٛتٛوطٛنْ؟ عُمّٜ، تٛرٜ نغَمْ تَا عٛنْ نَسْتَ جَرِّبٜىٰکِ‏!»


ندٜ عِيسَى طٛنْ وٛلْوَ تَوٛنْ، يِمْࢡٜ نغَرِ؞ بِعٜتٜىٰطٛ يَحُودَ، غٛوتٛ ندٜرْ سَݠّٛ عٜ طِطٛ غٛ طٛنْ عَرْدِ ࢡٜ؞ عٛࢡَدِتِ عِيسَى نغَمْ عٛحٜبّٛ طُمْ؞ عِيسَى وِعِمٛ‏: «يَحُودَ، بٜى کٜبَّاکِ زَمْبٛرْتٛوطَ ࢡِي-نٜطّٛ نَ؟» ندٜ وٛنْدُࢡٜ بٜى عِيسَى نغِعِ کٛ تَمِّ لَاتَاغٛ، ࢡٜمبِعِ‏: «جَوْمِرَاوٛ، مِنْ شٛݠَّ ࢡٜ بٜى کَاڢَحِ نَ؟» غٛوتٛ مَࢡّٜ سٛݠِّ سُکَ حٛورٜىٰجٛ لِمَنْعٜنْ، تَعِمٛ نٛڢْرُ ࢩَامْرُ؞ عَمَّا عِيسَى وِعِ‏: «عَشّٜ طُمْ‏!» عٛمٜىٰمِ نٛڢْرُ غٛرْکٛ غٛ، عٛيَمْطِتِنِمٛ؞
ࢡَاوٛطٛنْ عِيسَى وِعِ مَوْࢡٜ لِمَنْعٜنْ عٜ مَوْࢡٜ عَيْنٛوࢡٜ حَيْکَلِيرُ عٜ ندٛتِّعٜنْ وَرْࢡٜ نَنغُغٛ مٛ‏: «کٛنِ عٛنْ نغَرِ بٜى کَاڢَاجٜ عٜ شَبِّ نغَمْ نَنغُغٛ يَمْ بَنَ مِ ݠَسٛووٛ؟ ࢩَلْطٜ ڢُو مِ طٛنّٛ بٜى مٛوطٛنْ ندٜرْ حَيْکَلِيرُ، عٛنْ نَنغَايْ يَمْ؞ عَمَّا جٛنْتَ طُمْ سَاعِيرٜ مٛوطٛنْ عٜ بَاوْطٜ ࢩِࢡْرٜ؞»


ࢡٜنَنغِ عِيسَى، ࢡٜنجَحْرِمٛ حَا سَارٜ حٛورٜىٰجٛ لِمَنْعٜنْ؞ ݠِيٜرْ طٛنّٛ تٛکِّ ࢡٜ دَايِيطُمْ؞ ࢡٜکُࢡِّ يِيتٜ شَکَ دَلْدَلْ سَارٜ، ࢡٜ ڢُو ࢡٜنجٛوطٛدِ؞ ݠِيٜرْ بٛو جٛوطِ شَکَ مَࢡّٜ؞ ݠَاࢩٛ دٜبّٛ، کٛرْطٛ ندٜرْ سَارٜ مَنْ يِعِ عٛطٛنْ جٛوطِ کٛمْبِ يِيتٜ، لَارِمٛ، وِعِ‏: «غٛرْکٛ عٛو بٛو طٛنّٛ وٛنْدِ بٜى مَاکٛ؞» عَمَّا ݠِيٜرْ يٜدِّ طُمْ، وِعِ‏: «کَيْ دٜبّٛ، مِعَنْدَا مٛ سَمْ؞» ࢡَاوٛ سٜطَّ غٛطّٛ ڢٜىٰرٜ بٛو يِعِمٛ، وِعِ‏: «عَنْ بٛو، عَ غٛوتٛ مَࢡّٜ؞» عٛوِعِ‏: «کَيْ‏! غٛرْکٛ، مِوٛنَايْ ندٜرْ مَࢡّٜ؞» ࢡَاوٛ سَاعِيرٜ وٛورٜ غٛطّٛ ڢٜىٰرٜ تَبِتِنِ حَالَ مَنْ، وِعِ‏: «ڢَکَتْ غٛرْکٛ عٛو طٛنّٛ وٛنْدِ بٜى مَاکٛ، عٛ غَلِيلِيجٛ مَا‏!» ݠِيٜرْ جَابِ‏: «غٛرْکٛ، مِعَنْدَا کٛ نغِطَّ وِعْغٛ؞» دِغَ عٛتِمِّنَايْ وٛلْوُغٛ، عَسْغُمْرِ عُعِ؞ جَوْمِرَاوٛ يٜىٰسِتِ، لَارِ ݠِيٜرْ؞ ندٜنْ ݠِيٜرْ سِڢْتٛرِ کٛ جَوْمِرَاوٛ وِعْنٛ مٛ‏: «حِدّٜکٛ عَسْغُمْرِ عُعَ حَنْدٜ، عَوِعَنْ ندٜ تَتِ عَعَنْدَا يَمْ؞» ݠِيٜرْ وُرْتِ حَا يَاسِ، وٛيِ مَسِنْ؞


يِمْࢡٜ عَيْنٛوࢡٜ عِيسَى نجَنْشِمٛ، ࢡٜݠِيِمٛ؞ ࢡٜشُدِّ غِتٜ مَاکٛ، ࢡٜࢨَمِ‏: «حٜࢡْتُ، مٛيْ ڢِيِ مَ؟» ࢡٜمبٛلْوَنِمٛ بٛلّٜ کُطٛوجٜ غٛطّٜ طُوطّٜ؞


ندٜ وٜىٰتِ، ندٛتِّعٜنْ يَحُودُعٜنْ عٜ مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ مٛوࢡْتٛتِرِ، ࢡٜنغَدِّ عِيسَى حَا دَوْرِيندٜ مَࢡّٜ؞ ࢡٜمبِعِ‏: «تٛ عَنْ وٛنِ اَلْمَسِيحُ، وِعْ مِنْ؞» عِيسَى جَابِ ࢡٜ‏: «تٛ مِوِعِ عٛنْ طُمْ، عٛنْ نُطِّنْتَا؞ تٛ مِࢨَمِ عٛنْ بٛو عٛنْ نجَابَتَاکٛ؞ يٜىٰسٛ طٛ ࢡِي-نٜطّٛ جٛوطٛتٛ حَا ࢩَامٛ اَللَّه بَاوْطٛ؞» ࢡٜ ڢُو ࢡٜمبِعِ‏: «عَنْ کَمْ عَ ࢡِطّٛ اَللَّه نَ؟» عٛجَابِ ࢡٜ‏: «نٛنّٛنْ بَنَ عٛنْ مبِعِ؞» ندٜنْ ࢡٜمبِعِ‏: «عٜنْ نغٛودِ حَاجٜ سٜىٰدَمْکُ ڢَحِنْ نَ؟ عٜنٜنْ بٜى کٛعٜ مٜىٰطٜنْ عٜنْ نَنِ طُمْ دِغَ حُنْدُکٛ مَاکٛ‏!»

Feti si لُکَ 22