KAOBAK 7
7
1 #
2 Pet 2.5 Kheijinei Bunyubouei Noa to laukei, “No hoba kaibü chemdang pendou longchem to atashi; aieilausi ho metena no saopobü dogo chühena. 2Nyi saopobü meisiau weko ka pi si paang tang nyetbang hoba asaopobü meisiau weko ka pi si paang tang nyibang; 3mühkabü aushuong kaakei pi si paang tang nyetbang kaodak pendoua lilabü lang kitila shanga ka yoto leibashi. 4Aieilausi tat ka jaüan chalou nyet phaia ngei kaodak to lang chalou saonyi hoba langyang saonyi loutilabü; hoba ngei kümbü langkei kibü pendou ngei kaonyudak ka mautilabü.” 5Hobaje Noaei Bunyubouei hao la sakkubü pendou kümbei.
6Kaodak to yungsen loujinei Noa po 600 jailean kikei. 7Yungsen ka satenla Noa longchem to atkei, hoba hao yoa haoeibü shousi shuong, hao yak hoba hao shousi shuongeibü yaksi shuong dogo atkei. 8Saopobü meisiau yo ka hoba asaopobü meisiau yo ka hoba au shuong yo ka hoba kaoa shanbü pendou ka, 9penyibang, pi si paang Mühghaüei Noa la sakkubü tegü longchem to atkei. 10Hobaje nyetbounyet kaodak to deinyu yungsen loukei.
11Noa langkei salang saongao lakboubü, litnyu nyetboubü chalou anthük nyetbouatham yungnyu yaangbü deikük pendou paknyinkei hoba müh koukhün ipbei. 12Hobaje lang kho kaodaka chalou saonyi hoba langyang saonyi kikei. 13Hobaje khünyettham Noa hoba hao shousi shuong, Shem, Ham, Jafet hoba Noa yak hoba haoen yoa shousieibü yaksi sem kho longchem to atkei. 14Haoen hoba yamkabü meisiau pendou phang weko, hoba samkeisamuk pendou phang weko hoba kaoa shanbü pendou phang weko hoba au pendou phang weko, kaakyembü pendou phang weko, 15hoba langkei hakhinbü phe pendou ka haoen penyibang Noa yoa longchem to atkei. 16Hobaje Mühghaüei sakkubü tegü meisiau yangsikok pendou ka pi si paang Noa yoa atkei hoba Bunyubouei longchem kho khinkei.
17Hobaje yungsen kho kaodaka chalou saonyinyet kikei; hoba dei kho aei aei yeisije longchem kho phongjung angkei, hoba kao ka tonenkei. 18Hobaje kaodaka yungsen kho aei haukiko yeisije longchem kho deitaka phongkei. 19Dei kho hau kiko yeisije müh phanga shongh suokbü pendou nyembei. 20Dei kho iknop anthükngao sühko angsije shongh shuong danglepbei. 21Kaonyudaka lang kibü pendou, topeibü yangsikok, meisiau, müt khunakshousi phang pendou shembei. 22Kao ulangbüa ai ong hakhinbü soushou langkei kikeije khübü pendou haikei. 23#Mt 24.39 Bunyubouei kaonyua kibü lang kibü pendou - müt, meisiau, ausiyuk pendou mautikei, lausikei Noa hoba hao yoa longchem to atbü dan ong joukei. 24Dei kho kaodaka chalou saongao to anjinsem sühko dangyoan khüpbei.
موجودہ انتخاب:
KAOBAK 7: CHANGBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.