Madiu 23
23
Loina 'ana toe'itao be Palisiyao Yesu 'i'enapa'alidi
(Maki 12:38-40; Luke 11:37-52, 20:45-47)
1'Enega Yesu boda be 'ina tononoyao 'ediya 'iona, 'igwae, 2“Lowaenei Mosese me Isileli 'iloiloinedi ta batuwa loina 'ana toe'itao be Palisiyao nadigega siloiloina'esemi. 3'Enega to'ase nadigega sie'itami wada muliyedi, ta esi 'idi guinuwao geya'abo waetoetotowanedi, manuna taudi sie'itamo ta nigeya 'idi e'ita nidi sida guinuwedi.
4“Taudi 'aa'aala mwaudi tomota si'ebwa'ebwa'edi, ta taudi nigeya sa'i sida tagwala be 'aa'aala nidi 'ediyega sida lemedi.
5 #
Md 6:1; Sia 13:9 “'Idi guinuwa maibo'ana siguiguinuwedi be 'aene tomota si'itadi be situpudi, nate onao Buki Tabu 'enega 'eto'etoladidi debadiya be nimadiya sigiepa'iyedi, ta 'adi 'oamao duduladi si'ote'otedi, 6ta sagali 'adi tutaya nuwanuwadi be bwaimaya sida miyatowa, be wate anuwa tapwalolo 'ediya 'ebemiya bobo'adi nuwanuwadi, 7be 'eguma 'ebe gimwane 'ena sitatauya, nuwanuwadi be tomota yaudi sida lokagutokiyedi nai sida 'awa toe'itaedi. 8Ta 'omi 'etamo geya'abo tomota si'awa'awa toe'itaemi, manuna 'imi toe'ita 'ebweuna namo, ta maibo'ami waeleleleya.
9“Wate geya'abo 'ebweu yaita bale'uya 'ena wa'awa'awa tamana, manuna Tamami 'ebweuna namo galewaya 'imiyami. 10Geya'abo wate tomota si'awa'awa 'inapwanaemi, manuna Keliso tauna tebweunamo 'imi 'Inapwana. 11#Mk 9:35; Lu 22:26Ta 'abo yaita 'emiyega 'ietoanugana 'ida e'ali'ei 'emiya; 12#Ona 29:23; Lu 18:14be 'abo yaita 'emiyega 'inuwatu'e 'iabe 'iebusi, ta 'abo yaita 'inuwamwa'uta 'iabe 'itutu'e.
13“'Omi loina 'ana toe'itao be Palisiyao nuwa'ole'olemi sa'i, manuna 'imi kaboega tomota wa'etobodedi be 'enega Yaubada 'ina 'ebeloina 'ena geya'abo silugulugu. 'Omi geya'abo walugulugu, ta tomota wate yaisigedi nuwanuwadi be silulugu waegagaledi. 14(-)
15“'Omi loina 'ana toe'itao be Palisiyao nuwa'ole'olemi sa'i, manuna 'ebweu wate gete 'imi loegesi. Tuta yauna wa'ada'adau sakowasi 'asa yaudi 'ediya be 'aene 'ami tomuliya 'ebweu wada loba, be muliyega tomotai nina wae'ita be nadigega 'omi waguiguinuwa Seitani 'enaya, tauna nadigega 'ida guinuwa, ta 'ida guinuwa wawasae.
16“Nuwa'ole'olemi sa'i, manuna 'omi toanuganao matakebokebomi, wagwae, ‘'Eguma yaita Anuwa Tabu 'ana esanega 'isawa tamatamana nate nigeya 'ebweu to'ase, ta esi 'eguma yaita goula nidi Anuwa Tabu solanaya 'ediyega 'isawa tamatamana nate yage sinabwana, 'enega 'ilobwenena be yage nina 'ida guinuwe.’ 17Ona'ai'aila, 'omi uwauwami ta matakebokebomi! To'ase 'iloetana sana? Anuwa Tabu 'ana goula? nai Anuwa Tabu? tauna 'enega goula 'ietabuna.
18“Ta wate wagwae 'aene ‘'Eguma yaita 'ebe taliya 'ana esanega 'isawa tamatamana, nate nigeya 'ebweu to'ase, ta esi 'eguma 'isawa tamatamana 'ebwayadaita nina 'ebe taliya 'enaya nate yage sinabwana, 'enega to'ase 'iona upaupaena 'ilobwenena be 'ida guinuwe.’ 19'Omi uwauwami! To'ase sinabwana? 'Ebwayadaita nina? nai 'ebe taliya? tauna 'enega 'ebwayadaita 'igietabuna.
20“'Enega 'abo yaita 'ebe taliya 'ana esanega 'isawa tamatamana, tauna wate yage maibo'ana 'ebe taliya 'enaya 'ediyega 'isawa tamatamana. 21Ta wate 'abo yaita Anuwa Tabu 'ana esanega 'isawa tamatamana, tauna wate Anuwa Tabu 'ana tomiya 'ana esanega 'isawa tamatamana. 22#Md 5:34Ta 'abo yaita galewa 'ana esanega 'isawa tamatamana, tauna Yaubada be wate 'ina 'ebemiya 'adi esanega 'isawa tamatamana.
23“'Omi loina 'ana toe'itao be Palisiyao nuwa'ole'olemi sa'i, manuna 'omi tokabo. Ona'ai'aila 'imi 'ebwayadaita bobo'ana, manuna 'imi 'ebwayadaitao nidi 'imi yage maibo'adi 'ediyega, gwegwe sinabwadi ta wate yage gidalidi nadigega mali pai be mali pai 'ediyega, ta esi loina 'etoi sinabwadi wanuwa pupuledi, nate bubuna palupaluna be nuwa'ole'ole be emisa. 'Ilobwenemi be yage gete sinabwadi wada guinuwedi, ta wate geya'abo yage gidalidi wanuwanuwa pupuledi. 24Ta 'omi toanuganao matakebokebomi, 'ami kwayai 'enega manumanuwa wa'ewa'ewa yauledi, ta esi yobai sinabwana, kameli 'atuwa, watonetonedi.
25“'Omi loina 'ana toe'itao be Palisiyao nuwa'ole'olemi sa'i, manuna 'imi kaboega keiga be gaeba apwesaya wagie'esasedi ta esi soladi baibailidi, nate 'ipwala be bubuna to'umalidi siloemaedi. 26'Omi Palisiyao matakebokebomi, 'imi keiga be 'imi gaeba soladi wagie'esasa nuganedi, ta 'enega apwesaya wate si'esasadi.
27“'Omi loina 'ana toe'itao be Palisiyao nuwa'ole'olemi manuna 'omi tokabo, 'atuwa nadigega 'ali'ali wakewakekedi ta 'esasedi, etanaya 'adi 'ita kausala wawasae, ta esi soladiya tomota luludi ta yage baibailidi simiyami. 28#Lu 16:15'Omi 'ami 'ita tomota matadiya 'aene toanuganao bobo'ami, ta solamiya kabo be to'umalina yauna simiyami.
29“'Omi loina 'ana toe'itao be Palisiyao nuwa'ole'olemi ta tokabo, manuna gimi palopitao 'adi 'ali'ali 'ediya 'adi 'ebe nuwa'i'ita wa'abidi ta wate topalupaludi lowaenei 'adi 'ebe nuwa'i'itao wagibubudi, 30ta wagwae, ‘'Eguma lowaenei tamiyami tubudao 'idi tutaya, geya'abo talemelemedi palopitao 'adi loemwawasa manuna.’ 31#Gu 7:52'Imi ona gete 'enega wasimana 'aene palopitao 'adi toloemwawasao tubudiyao 'omi. 32'Enega taudi 'idi guinuwa nidi 'iabe walosaloni. 33#Md 3:7'Omi mwata natunao, ta nigeya sawesawenaya be 'asagabugabu 'enega wadedena. 34#1 Te 2:15'Enega palopitao be tomwalatoiyao be loina 'ana toe'itao yaetunediwa be 'enega 'aidi wada loemwawasidi, nai kelose 'ediya wada tutu epa'iyedi, be 'aidi 'imi anuwa tapwalolo 'ediya balaeyega wada unudi, be 'asa 'ebweuna 'ebweuna 'ediyega wada pa'idi. 35#Nug 4:8; Ib 11:4Ta 'ana 'ebe losalowa 'enaya topalupaludi 'adi loemwawasa 'ana e'isa maibo'ana 'omi wada loba. Gimi tai Ebeli tauna topalupaluna siloemwawasina ga 'enega siloeloemwawasa ga 'ana laba Balakaya natuna Sakalaya wate siloemwawasina Anuwa Tabu ta 'ebe taliya gamwagamwanidiya. 36Ona'ai'aila, loemwawasa nidi maibo'adi 'adi e'isa 'epata getemi waloba.
Yesu 'idedoi Yelusalema manuna
(Luke 13:34-35)
37 #
Gu 7:59
“Yelusalema ye! Mwa'adega ga palopitao 'uloemwawasidi ta wate Yaubada 'ina toepilialealeyao gulewega 'uloibweibwedi. Tuta yauna nuwanuwagu be 'imu tomotaiyao yabwau egogonedima 'atuwa kakaleko natunao papenega 'i'aubodebodedi, ta sa'i siguitoyasegu. 38'Enega Yaubada 'iabe 'ipilisineyo be ma imu to'umalina tuga 'uda miyami. 39#Sam 118:26Ta yaeonayo 'aene geya'abo wate 'u'ita'ita limagu be 'ana laba 'imu tomotaiyao sitatagwala 'eguya be sida gwae, ‘Tauna Yaubada 'ana esanega 'imeemai tada tupu.’”
موجودہ انتخاب:
Madiu 23: dob
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.
