MATIUS 9
9
Yesus paget ca usa iaʹ sakit lemaʹ
(Un te neng Markus 2.1-12; Lukas 5.17-26)
1Tai Yesus kaʹ alut ngan penco pelawat leteng ina. Sulo tai ie ngeliwet kaʹ lepoʹ o. 2Nai dulu ngkin ca usa iaʹ sakit lemaʹ palaʹ ia. Bang meken le ia neng usun pat te. Yesus tisen kudaʹ bioʹ ban pengelan nte, sulo dau ue pisiu ngan laki iaʹ sakit lemaʹ ina: “Anak keʹ, nyalet ne kimet coʹ. Mung penyalaʹ koʹ lepa pesau ne.”
3Un palai guru Katuk Adet pisiu neng ata re tengen: “Aheʹ kelunan ini taʹin, inu ue pejaʹat dau neng Tuhan Allah.”
4Tisen ne Yesus neng kimet de, un dau ue neng ida: “Moʹ inu hem ngimet puyan diaʹ jaʹat pekina tupe? 5Iaʹ mpi melai akeʹ pisiu: ‘Penyalaʹ koʹ lepa pesau ne,’ neng ʹo heʹ kuma ha: ‘Beteʹ ne tai masat’? 6Akeʹ keʹ peluhaʹ mikem ca tedanaʹ Anak Sio ini lan ne un nyingan neng usun tanaʹ ini ke senteng sau penyalaʹ.”
Un dau Yesus neng iaʹ sakit lemaʹ ina: “Beteʹ ne ikoʹ, ngkin ne pat coʹ, ngan tai ne ikoʹ uleʹ.”
7Sulo kenai ie beteʹ, penco tai ie uleʹ kamin ne. 8Tegoʹ dulu diaʹ ca taʹan seʹ puyan ina, takut ne tekaʹ de, mentung nte pempau Allah iaʹ lepa mencai puyan nyingan iaʹ pekina bioʹ palaʹ ilu kelunan.
Yesus mengin Matius
(Un te neng Markus 2.13-17; Lukas 5.27-32)
9Tai Yesus puke cen ukoʹ o kina. Dalau ketai ie masat, kun ne taʹan ca usa iaʹ alaʹ pupu, ngadan ne Matius, dalau ue madung kaʹ upis e te. Un dau Yesus neng ia: “Nai ne ikoʹ bayaʹ akeʹ.”
Sulo beteʹ ne Matius ngan tai bayaʹ Yesus.
10Dalau Yesus uman kaʹ amin Matius, kadoʹ kelunan diaʹ alaʹ pupu, ngan kelunan diaʹ dulu kuma jaʹat, pemung uman ngan Yesus peging ngan diaʹ bayaʹ katuk ke. 11Un palai kelunan Perisi taʹan seʹ puyan ina, sulo re lemutu diaʹ bayaʹ katuk Yesus dina: “Moʹ inu guru hem pemung uman ngan kelunan diaʹ alaʹ pupu, ngan kelunan diaʹ dulu kuma jaʹat tupe?”
12Kun Yesus kenahan dau isiu re, sulo ho mipa ida: “Abeʹ kelunan diaʹ maget titin duktun ke naban ida, di lareʹ dulu idaʹ sakit le iaʹ ke mita duktun. 13Tai ne mita sen dau kitap ini: ‘Abeʹ keʹ ubaʹ liwa. Pengelesau iaʹ akeʹ ubaʹ.’ Abeʹ keʹ nai mengin kelunan diaʹ kuma ida lepa teneng, di lareʹ akeʹ nai ke mengin kelunan diaʹ dulu kuma jaʹat.”
Putu neng puyan lemalan abeʹ un uman
(Un te neng Markus 2.18-22; Lukas 5.33-39)
14Lepa ina diaʹ bayaʹ katuk Yaya Guru Batis nai palaʹ Yesus ngan lemutu ia: “Uban inu meʹ ngan kelunan Perisi lemuto lemalan abeʹ un uman, kumpin sepe diaʹ bayaʹ katuk koʹ, nyahut de lemalan abeʹ un uman ne?”
15Un dau Yesus mipa ida: “Kumpin baʹan kimet cem dalau kenai dulu nuʹa diaʹ pepeto dina, un nte ke jaʹat tawai ngajan laki iaʹ alaʹ leto ina un ngan nte kina tupe? Nyahut te pekina ne. Nai lete jakaʹ a ʹo, tegoʹ dulu kenai magang laki iaʹ alaʹ leto ina cen ahang ida. Uʹo ina ne ida ke lemalan abeʹ un uman.
16“Abeʹ un aheʹ iaʹ mimum sapai ie iaʹ puʹun man ca berit apeʹ iaʹ mading. Ban ne imum me ina iaʹ ke ngkin sapai ina berit, tai ubo ho bioʹ kuʹo ne berit te. 17Ngan pekina pe, abeʹ un aheʹ iaʹ mubeʹ telang anggur iaʹ tumpak kaʹ dalem bahan anit iaʹ puʹun. Buk ke uyan ne pekina, bahan ne ke pesu, ngan telang anggur ina bura pelaʹa, ngan bahan ne pe jaʹat. Bang telang anggur iaʹ tumpak le dulu ke meseʹ kaʹ dalem bahan anit iaʹ mading, apan ne bahan anit ina ngan telang anggur ina tiga mung.”
Anak leto ca laki paren Yahudi ngan leto iaʹ ngkang sada sapai Yesus
(Un te neng Markus 5.21-43; Lukas 8.40-56)
18Dalau Yesus pisiu ngan nte, nai ca laki paren Yahudi. Sulo ho sutlep kaʹ juma ia. Un dau ue: “Un anak leto heʹ lepa matai ne ia uʹo re. Nai ne ikoʹ, napoʹ ujoʹ koʹ neng ia, atek ke ke mudip lete.”
19Sulo nai Yesus beteʹ, penco tai serengan ia. Diaʹ bayaʹ katuk ke pe tai peging ngan nte dua.
20Lepa ina nai ca leto iaʹ lepa puloʹ dua uman majan ne sakit dahaʹ, ngenyeng Yesus cen tahaʹ likut ia. Sulo ho ngkang sapai ie. 21Uban un dau leto ina pisiu neng ata ha tengen are: “Ahaʹ akeʹ tai ngkang sapai ie ne, atek keʹ ke maget lete.”
22Sulo Yesus pupa ngan taʹan ia. Un dau Yesus neng ia: “Nyalet ne kimet coʹ, anak keʹ. Pengelan ncoʹ lepa paget ikoʹ.” Dalau ina sulo nai leto ina maget.
23Tai sabeʹ Yesus kaʹ amin laki paren Yahudi ina. Kun Yesus taʹan seʹ dulu ti kedingut tidau ngan maho dau dulu. 24Penco dau Yesus neng ida: “Tai mung ne ikem kawang ading. Mpi anak leto ini matai lepe. Seʹ e luntoʹ lepe ini.”
Dalau ina ida ngetepet dau neng Yesus. 25Dalau kenai re kawang, penco tai Yesus kedalem ngan man ujoʹ anak leto ina. Sulo kenai anak leto ina beteʹ. 26Denga ina tai purat ne pa tipo lepoʹ ina.
Yesus paget dua usa kelunan butaʹ
27Yesus mecin cen ina. Dalau ketai ie masat, nai dua re usa kelunan diaʹ butaʹ bayaʹ ia. Sulo re ngelengap, un dau re dua: “Ahaʹ Anak Daut, lesau ne ameʹ ading.”
28Lepa Yesus abeʹ kaʹ dalem amin, sulo kenai kelunan butaʹ dua dina are ngenyeng ia, penco Yesus lemutu ida dua: “Un ncem dua ke ngelan akeʹ senteng ke uyan ini mo?”
“Ahaʹ Amai,” kun nte dua mipa ia.
29Sulo Yesus napen ujoʹ o neng mata re dua, mentung nge kuma ha: “Nuyan ne ini pekuaʹ ngan iaʹ ikem dua ngelan.” Dalau ina mata re dua penco tiga. 30Penco Yesus naten cuk ida, un dau ue: “Ayen ncem dua peletoʹ ke badaʹ puyan ini me kelunan aheʹ aheʹ pe.”
31Un sepe ida dua ʹo tai pedenga puyan Yesus pa tipo dale ina.
Yesus paget ca kelunan ameng
32Dalau ketai kelunan dina mecin ia, un palai kelunan nai ngkin palaʹ Yesus ca laki ameng iaʹ ban bali nelasek. 33Uʹo ketai bali ina karap, ina tading laki ina mencam pisiu. Kadoʹ kelunan diaʹ salam taʹan seʹ puyan ina. Un dau re: “Nyahut meʹ un taʹan puyan iaʹ pekini kaʹ lepoʹ Israil lepe.”
34Un sepe dau isiu kelunan Perisi dina: “Penguloʹ bali ina iaʹ naʹ nyingan mia man ne pekarap bali jaʹat dina.”
Yesus lesau neng kelunan kadoʹ
35Yesus tai masat teliling neng mung lepoʹ bioʹ ngan lepoʹ iʹut, mentung nge pekatuk dulu neng singket amin sebayang, ngan badaʹ denga tiga neng puyan pengaren Allah ke ngaren ilu kelunan. Kun ne paget mung naʹan penyakit ngan penginteʹ usa le kelunan. 36Dalau ue taʹan kelunan kadoʹ dina, bioʹ tekaʹ pengelesau ue neng ida, ban ne ida iʹut tawai re, ngan abeʹ un tebelum nte, koʹ baʹan dumba diaʹ are un iaʹ ke nubo ida. 37Un dau Yesus neng diaʹ bayaʹ katuk ke dina: “Bioʹ lepe ajau ini, un sepe diaʹ majau ue bang kediʹut le. 38Lemameʹ ne palaʹ Tuhan iaʹ un ajau ini, apan ne cuk kelunan diaʹ mencam pegayeng tai majau uma haʹ.”
موجودہ انتخاب:
MATIUS 9: KNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Kenyah New Testament © Bible Society of Malaysia, 1984.
