MATIUS 4
4
Bali Sitan iaʹ ten Yesus
(Un te neng Markus 1.12-13; Lukas 4.1-13)
1Lepa ina, Berua Buheʹ penco ngkin Yesus kaʹ tanaʹ lenga apan Bali ke ten ia. 2Pat puloʹ tau ngan pat puloʹ alem Yesus abeʹ un uman. Uʹo ina, laʹu ne tekaʹ a. 3Un dau kenai Bali neng ia: “Buk koʹ Anak Tuhan Allah, tiga hoʹ cuk batu dini ngaliu kanen.”
4Un dau ipa Yesus neng Bali ina: “Un ca jo isiu dalem Kitap iaʹ kuma ha: ‘Abeʹ e kuʹun penguman tuaʹ le kelunan senteng ke mudip, un sepuʹo kuʹun singket luʹung tiraʹ iaʹ Tuhan Allah pisiu milu.’ ”
5Uʹo ina tai Bali ngkin Yesus kaʹ Yerusalim, naʹ ia kukoʹ iaʹ mpau kaʹ belubung Umaʹ Palan Allah. 6Kun dau Bali mia: “Buk lan ncoʹ Anak Tuhan Allah, nai ne ikoʹ petuhun kentaʹ, moʹ un dau isiu dalem Kitap iaʹ kuma ha: ‘Un Tuhan Allah ke cuk melikat te ke jagaʹ ikoʹ, ngan ke nahek ikoʹ man ujoʹ de, apan taket coʹ abeʹ un ke pegoʹ neng batu.”
7Un dau Yesus mipa ia: “Un pe laʹa dau isiu dalem Kitap iaʹ kuma ha: ‘Ayen ncoʹ ten Allah, Tuhan ncoʹ.’ ”
8Lepa ina tai Bali ngkin Yesus neng usun ca mudung iaʹ atek mpau. Kina ha badaʹ mia mung seʹ puyan pengaren usun tanaʹ ini, ngan seʹ pengebioʹ de. 9Sulo dau Bali neng Yesus: “Mung dini akeʹ ke naʹ mikoʹ buk koʹ sutlep ngan lemameʹ palaʹ akeʹ.”
10Dau Yesus mipa ia: “E Sitan, tai nikoʹ kelap. Un dau isiu dalem Kitap: ‘Tekep koʹ lemameʹ palaʹ Allah iaʹ Tuhan ncoʹ. Bang tunuk ne palaʹ ia tengen le.’ ”
11Uʹo ina ne Bali tai mecin Yesus, sulo nai kudaʹ kadoʹ melikat mepo ia.
Yesus nading gayeng nge kaʹ tanaʹ Galilia
(Un te neng Markus 1.14-15; Lukas 4.14-15)
12Tegoʹ Yesus kenahan dau denga dulu nyepin Yaya, penco ketai ie kaʹ tanaʹ Galilia. 13Abeʹ e majan ngelineʹ kaʹ lepoʹ Nasarit, un sepuʹo penco tai ie ngelineʹ kaʹ lepoʹ Kapernaum, ca lepoʹ bioʹ kaʹ sada bahi leteng Galilia dalem dale Sebulun ngan Naptali. 14Puyan ini tai nuyan apan isiu pegawa Yesaya cen naʹaʹ ketai palup, iaʹ pekini dau:
15“Ahaʹ tanaʹ Sebulun ngan tanaʹ Naptali,
iaʹ jo sileʹ tahaʹ leteng bioʹ, ngan tahaʹ dipa sungai Yardin,
tanaʹ Galilia, dulu diaʹ ca iaʹ nganun ne.
16Kelunan diaʹ mudip dalau ntem ke taʹan ca serema iaʹ bioʹ.
Neng usunida diaʹ mudip dalau ntem neng tanaʹ jaka, serema inaʹ iaʹ ke ngedema ida.”
17Cen dalau ina Yesus nading ke penco badaʹ katuk ke, pekini dau ue: “Nyepuleʹ ne kimet cem cen penyalaʹ kem, ban abeʹ majan laʹa kenai luhaʹ ne puyan pengaren Tuhan Allah ke ngaren ilu kelunan.”
Yesus mengin pat usa diaʹ pegayeng mita atuk
(Un te neng Markus 1.16-20; Lukas 5.1-11)
18Tegoʹ tai Yesus masat kaʹ sada bahi leteng Galilia, kun ne taʹan dua re padeʹ diaʹ pegayeng mita atuk. Simun iaʹ dulu pisiu Peterus, ngan Anderias iaʹ sadin ne. Dalau re nejalaʹ, 19un dau Yesus neng ida dua: “Nai ne ikem dua tugung akeʹ. Akeʹ ke pekatuk ikem kumpin puyan ke nejalaʹ kelunan.” 20Sulo re dua padeʹ mahung tejalaʹ re dua, penco tai bayaʹ Yesus.
21Tai Yesus penco asat te laʹa, kun ne taʹan dua re padeʹ pelaʹa, ngadan nte dua Yakup ngan Yaya anak Sapdi, kaʹ dalem alut lepe ida dua peging ngan amai re dua, dalau seʹ re petenup tejalaʹ de. Sulo Yesus mengin ida. 22Dalau ina lete ida dua mecin alut de ngan amai re dua, penco tai bayaʹ Yesus.
Yesus penco katuk ke mentung pekatuk ngan paget kelunan
(Un te neng Lukas 6.17-19)
23Yesus tai masat pa tipo tanaʹ Galilia, mentung nge pekatuk dalem singket amin sebayang. Kun Yesus badaʹ denga tiga neng puyan pengaren Tuhan Allah ke ngaren ilu kelunan. Sulo Yesus paget dulu neng ketoʹ naʹan penyakit. 24Purat ne denga Yesus pa libut tanaʹ Siria, pabeʹ kenai dulu ngkin kadoʹ kelunan diaʹ sihoʹ kadoʹ naʹan penyakit palaʹ ia. Un palai diaʹ keta ngan tuyen. Un palai diaʹ bali nelasek. Un palai sepen. Un palai diaʹ sakit uhat. Sulo Yesus paget ida mung. 25Kadoʹ dulu nai bayaʹ ia cen tanaʹ Galilia ngan cen dale puloʹ lepoʹ, cen Yerusalim, cen Yudia, ngan cen tanaʹ tahaʹ dipa sungai Yardin.
موجودہ انتخاب:
MATIUS 4: KNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Kenyah New Testament © Bible Society of Malaysia, 1984.
