MATIUS 13
13
Kata katuk neng puyan ca laki iaʹ mula beneʹ
(Un te neng Markus 4.1-9; Lukas 8.4-8)
1Tau ina lete Yesus mecin cen amin ina, penco tai kaʹ sada bahi leteng te. Kina ha madung ngan pekatuk dulu. 2Moʹ kadoʹ laleʹ dulu pempun teliling Yesus, ina tuman ne tai ngedung neng ca alut, ngan madung kidi. Dulu diaʹ kadoʹ un nekejeng kaʹ sada bahi kina. 3Ia alaʹ kudaʹ kata neng katuk keʹ, uban kadoʹ naʹan katuk iaʹ ia ke badaʹ mida.
Un dau ue: “Un ca kelunan iaʹ tai mula beneʹ. 4Dalau ue miwet beneʹ dina, un palai laboʹ kaʹ sada janan, sulo sui uman ne. 5Un pe palai diaʹ laboʹ kaʹ tanaʹ bere, kukoʹ tana a nyipe. Abeʹ majan mudip ne beneʹ ina, moʹ abeʹ tanaʹ a kapan. 6Dalau kenai mpau tau, bang ke tai kuko tung nge ne, moʹ abeʹ pakat te kumpin dalem, laho ke tai ie maʹang. 7Un pe palai laʹa diaʹ laboʹ kaʹ dalau suhaʹ. Nai suhaʹ dina mudip, sulo nekuleng nambun inan padai dina are. 8Un sepe palai laboʹ kaʹ tanaʹ iaʹ tiga, ngan penco re un buʹan: un diaʹ tai mato buʹan ne, ngan un pe diaʹ tai nem puloʹ, ngan un pe diaʹ tai telu puloʹ.”
9Kun dau Yesus neng kebayaʹ a: “Aheʹ iaʹ un telinga, tiga ne ia ngeringa.”
Iaʹ tuman ban kata katuk
(Un te neng Markus 4.10-12; Lukas 8.9-10)
10Sulo kenai diaʹ bayaʹ katuk Yesus palaʹ ia ngan lemutu ia: “Moʹ inu hoʹ alaʹ kata tegoʹ koʹ pisiu dulu?”
11Un dau Yesus mipa ida: “Puyan pengaren Allah diaʹ un linget neng dulu. Ca naʹan pe ikem, moʹ lepa ne Tuhan Allah naʹ mikem penisen neng iaʹ linget ina. 12Kelunan iaʹ un ca puyan inu, palaʹ ia lete Tuhan ke naʹ pit puyan inu mia laʹa, apan kelunan ina ke un suheʹ inu ue ne. Un sepuʹo kelunan iaʹ abeʹ un ca puyan inu ue, cen ia lete Tuhan ke sau inu iaʹ ia un, naʹ pe ia kediʹut le. 13Tuman ini heʹ alaʹ kata dalau heʹ pisiu ngan dulu. Kun nte naʹat, abeʹ pe ida taʹan. Kun nte ngeringa, abeʹ sepe ida kenahan ngan tisen kidi. 14Pekini ne tai nuyan tebadaʹ pegawa Yesaya neng puyan nte:
‘Kun ncem ngeringa ngan ngeringa reʹ, abeʹ pe ikem tisen kidi.
Kun ncem naʹat ngan naʹat pe, abeʹ pe ikem un taʹan.
15Uban ne kimet kelunan dini mahing,
ida lepa meseng telinga re,
ngan mekep mata re.
Buk ke abeʹ un pekina, mele ke taʹan pe mata re,
ngan telinga re ke kenahan,
sulo kimet de ke ngetisen.
Ngan ida ke nai ngeliwet palaʹ akeʹ,
ngan akeʹ ke paget ida. Pekina dau Tuhan Allah.’
16“Un sepuʹo tiga laleʹ le ban ncem dini, moʹ mata hem taʹan ngan telinga hem kenahan. 17Nawai tiga le ini, uban cen naʹaʹ kadoʹ pegawa ngan kelunan diaʹ ngelan Allah ubaʹ ke taʹan puyan iaʹ ikem lepa taʹan naʹkini. Abeʹ pe ida senteng taʹan ne. Ngan pekina pe ida ubaʹ ke kenahan inu iaʹ ikem kenahan naʹkini. Abeʹ pe ida kenahan ne.”
Yesus badaʹ sen kata katuk neng puyan laki iaʹ mula beneʹ
(Un te neng Markus 4.13-20; Lukas 8.11-15)
18Ngeringa ne, ngan nawai tiga le sen kata katuk neng puyan laki iaʹ mula beneʹ ina. 19Kelunan diaʹ kenahan dau katuk neng puyan pengaren Allah ke ngaren ilu kelunan, ngan abeʹ un tisen sen ne, ida dina ne diaʹ koʹ baʹan beneʹ diaʹ ban laboʹ kaʹ sada janan are. Nai ne kun Bali Jaʹat ʹo, magang katuk iaʹ Tuhan lepa mula dalem kimet de. 20Beneʹ diaʹ ban laboʹ kaʹ dalau tanaʹ bere, ina ne koʹ baʹan kelunan diaʹ alaʹ katuk ina, ngan bangen tawai re dalau re kenahan ne. 21Un sepuʹo katuk ina abeʹ e detem dalem kimet de, ngan abeʹ de majan un ne. Midan nte sihoʹ taru, ngan dulu nyakit ida ban suaʹ katuk ina, laho tai luʹap ne tekaʹ kimet de. 22Ngan beneʹ diaʹ ban laboʹ kaʹ dalau suhaʹ, koʹ baʹan kelunan diaʹ ngeringa katuk ina are, un sepuʹo moʹ de mawaʹ pengudip usun tanaʹ ini, ngan malaʹ neng kayaʹ de, pa re nampun katuk ina, pa ha abeʹ un buʹan. 23Un sepe beneʹ diaʹ laboʹ kaʹ tanaʹ iaʹ tiga, koʹ baʹan kelunan diaʹ ngeringa katuk ina ngan mentung nte ngetisen sen ne. Penco re un buʹan. Un pe diaʹ tai mato, ngan un pe diaʹ nem puloʹ, ngan un pe diaʹ telu puloʹ.”
Kata katuk neng udu jaʹat neng ahang padai gandum
24Yesus badaʹ ca kata katuk me ida laʹa. “Puyan pengaren Allah, ilu pekata ukoʹ baʹan layan ca kelunan iaʹ tai mula beneʹ iaʹ tiga neng uma ha. 25Neng ca alem me, dalau dulu luntoʹ, nai ca bunoʹ mula udu jaʹat dalau padai gandum ina, penco ho kelap. 26Midan beluluk ke nai dadoʹ, ngan tading padai ina lemaleʹ, ina le dulu taʹan udu iaʹ jaʹat ina. 27Nai kun ulaʹ laki bioʹ ina palaʹ ia, un dau ue: ‘Amai, beneʹ iaʹ ikoʹ mula are, atek ca beneʹ iaʹ tiga ina. Cen mpi ban kenai udu jaʹat dina tupe?’ 28Un dau laki bioʹ ina mipa ida: ‘Uban bunoʹ le iaʹ uyan puyan ini.’ Sulo ulaʹ dina lemutu ia pelaʹa: ‘Ubaʹ koʹ ameʹ ke tai mubit udu diaʹ jaʹat dina?’ 29‘Naʹun,’ kun ne: ‘Buk kem ketai mubit udu diaʹ jaʹat dina, masaʹ ke pubit padai gandum dina peging ngan nte ʹo. 30Talan ne udu jaʹat dina mudip serengan ngan padai gandum dina pa ketai tegoʹ ajau tuʹo. Dalau ina akeʹ ke badaʹ me dulu diaʹ majau ue ʹo, un dau heʹ ʹo: Ikem pempun ne udu jaʹat dini ading, sulo lemeka ha apan le ke nutung nge. Uʹo ina hem tai ngkin padai gandum dina ngan tai pedemun ne kaʹ lepubung keʹ ʹo.’ ”
Kata katuk neng puyan ca luang ampeʹ
(Un te neng Markus 4.30-32; Lukas 13.18-19)
31Yesus badaʹ ca kata me ida pelaʹa: “Puyan pengaren Allah, ilu pekata man ca luang ampeʹ, iaʹ dulu alaʹ ngan mula ha neng uma. 32Ilu taʹan luang ina, atek iʹut neng mung luang beneʹ. Un sepuʹo dalau kenai ie mudip, bioʹ neng ʹo kujau diaʹ ca, koʹ baʹan ca inan kayu are, pa sui senteng tai uyan sala neng sangat te.”
Kata katuk neng ca ala lamut
(Un te neng Lukas 13.20-21)
33Yesus badaʹ ca kata katuk me ida pelaʹa: “Puyan pengaren Allah ke ngaren ilu kelunan un pekuaʹ ngan ca ala lamut are. Kun ca leto alaʹ a, sulo ho pekelet te dalau napu telu tukaʹ, pa mung napu ina tai bat kuʹun lamut ca luʹung ina are.”
Tuman ban Yesus alaʹ kata neng katuk
(Un te neng Markus 4.33-34)
34Yesus badaʹ mung puyan dina me dulu man kata katuk ke. Abeʹ e ubaʹ ke pisiu ngan nte buk ke abeʹ un alaʹ kata. 35Yesus uyan puyan iaʹ pekini, apan tai palup ne dau isiu pegawa cen naʹaʹ iaʹ pekini dau ue:
“Man kata katuk keʹ ke penco isiu heʹ me ida.
Akeʹ ke peluhaʹ mida puyan iaʹ kelunan abeʹ un tisen cen penading usun tanaʹ ini.”
Yesus badaʹ sen kata katuk neng udu iaʹ jaʹat
36Uʹo ina tai Yesus mecin kelunan kadoʹ dina, penco tai ie kaʹ amin. Nai kun diaʹ bayaʹ katuk ke palaʹ ia, ngan un dau re: “Kata cen puyan udu jaʹat neng ahang padai gandum didai are, tiga Amai badaʹ sen ne mameʹ ading.”
37Un dau Yesus: Laki iaʹ mula beneʹ iaʹ tiga ina, ia ne iaʹ Anak Sio ini. 38Uma ina, ina ne usun tanaʹ ini. Beneʹ diaʹ tiga, ida ne kelunan diaʹ lepa kahum neng puyan pengaren Allah. Ngan udu jaʹat dina, kelunan diaʹ malaʹ neng Bali Jaʹat. 39Bunoʹ diaʹ mula udu diaʹ jaʹat dina, ia ne Sitan. Ngan tegoʹ ajau, iaʹ ina tegoʹ ketai kuʹo udip ini. Laʹa ida diaʹ majau dina are, ida ne diaʹ melikat Tuhan. 40Koʹ baʹan udu diaʹ jaʹat iaʹ dulu pempun ngan nutung, pekina ne tegoʹ ketai kuʹo udip ini. 41Anak Sio ini ke cuk melikat te nai ke pempun mung kelunan diaʹ ngkin dulu uyan penyalaʹ, ngan pekina pe mung diaʹ uyan jaʹat, ke ngecoʹ ida neng puyan pengaren Allah. 42Penco ho ke pet kelunan dina kaʹ dalem lubang luten. Kina ne ida ke nange ngan dau taret jipen nte. 43Dalau ina ketoʹ kelunan diaʹ teneng ngan Tuhan Allah ke nyerema koʹ baʹan seʹ mata tau dalem puyan pengaren Amai re. Aheʹ iaʹ un telinga, tiga ne ida ngeringa.”
Kata katuk neng ca galen iaʹ senuhuk dalem tanaʹ
44“Puyan pengaren Allah ilu pekata man ca inu iaʹ mpau suaʹ a, iaʹ suhuk dalem tanaʹ. Asin ca kelunan taʹan ne. Moʹ bangen laleʹ kaʹ kimet te, sulo ho mekep pe laʹa. Penco tai ie matu ketoʹ inu iaʹ un neng ia, sulo tai ie ngeliwet ngan lemeli tanaʹ ina are.”
Kata katuk neng ca lukut sekalaʹ
45“Laʹa ilu pekata puyan pengaren Allah man puyan ca kelunan iaʹ pebeli are, iaʹ tai mita lukut sekalaʹ iaʹ tiga. 46Lepa ha taʹan ca lukut sekalaʹ iaʹ atek tiga, penco tai ie matu ketoʹ inu iaʹ un neng ia, sulo ho lemeli lukut sekalaʹ ina.”
Kata katuk neng ca pukat
47“Un pe ca laʹa ilu pekata puyan pengaren Allah man ca pukat iaʹ dulu pelenca dalem ca leteng. Kadoʹ naʹan atuk nalan kuʹun ne. 48Lepa pukat ina sangan, sulo diaʹ pegayeng dina ngkin ne kaʹ sada bahi. Sulo re madung ngan lemileʹ atuk dina. Diaʹ tiga, ida pedemun kaʹ dalem belanyet de, ngan un diaʹ jaʹat ida pet. 49Pekina ne puyan tegoʹ ketai kuʹo udip ini ʹo. Dalau ina, kenai melikat kawang ke pempun mung kelunan diaʹ ti iaʹ jaʹat cen ahang kelunan diaʹ ti iaʹ teneng, 50sulo pet diaʹ jaʹat dina kaʹ dalem lubang luten. Kina ne ida ke nange ngan dau taret jipen nte.”
Katuk telit iaʹ mading ngan iaʹ puʹun
51Un dau Yesus lemutu ida: “Kumpin tupe, lepa ne ikem tisen mung tiraʹ ini?”
Un dau re mipa ia: “Ahaʹ, tisen te ameʹ kidi.”
52Sulo dau Yesus pelaʹa: “Uban pekina ne singket guru Katuk Adet Musa diaʹ nai pekalai bayaʹ katuk puyan pengaren Allah ini, un pekuaʹ ngan ca kelunan iaʹ un amin. Cen lepubung nge ia mencam ke peluhaʹ inu ue diaʹ mading ngan diaʹ puʹun.”
Lepoʹ Nasarit nyekang Yesus
(Un te neng Markus 6.1-6; Lukas 4.16-30)
53Tegoʹ Yesus lepa badaʹ kata katuk dina, tai kun ne puke cen ina, 54sulo ho tai uleʹ kaʹ lepoʹ o tengen. Kun ne pekatuk dulu kaʹ dalem amin sebayang. Salam ne dulu diaʹ ngeringa dau ue. Un dau re: ‘Cen mpi ie alaʹ penudi diaʹ pekini, ngan kumpin ne uyan puyan nyingan ini tupe? 55Abeʹ ia ini iaʹ dulu naʹ anak tukeng kayu idai tupe? Abeʹ Mariam iaʹ ueʹ e? Ngan diaʹ cenganak ke Yakup, Yusup, Simun ngan Yudas? 56Ngan pekina pe moʹ abeʹ diaʹ cenganak leto ho diaʹ pemung ngan le kini mo? Cen mpi ie alaʹ puyan ini tupe?” 57Ngan pekina ne dau re nyekang ia.
Un dau Yesus neng ida: “Ca pegawa Tuhan, kempi ketai ie, kina dulu nyelama alaʹ ia. Bang lepoʹ o tengen ngan pengamin ne tengen iaʹ abeʹ un alaʹ ia.” 58Abeʹ e uyan kudaʹ puyan nyingan kina, moʹ abeʹ un pengelan nte.
موجودہ انتخاب:
MATIUS 13: KNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Kenyah New Testament © Bible Society of Malaysia, 1984.
