MATIUS 11
11
Diaʹ lawa cen Yaya Guru Batis
(Un te neng Lukas 7.18-35)
1Uʹo lepa Yesus peteneng dau me diaʹ puloʹ dua usa diaʹ bayaʹ katuk ke dina, sulo tai ie mecin cen ina, ngan pekatuk dulu ngan pedenga Injil neng mung lepoʹ diaʹ um pipa kina.
2Dalau Yaya Guru Batis un kaʹ dalem amin sepin, ia kenahan dau denga gayeng Keristus. Sulo Yaya cuk palai diaʹ bayaʹ katuk ke tai palaʹ Yesus. 3Un dau re neng Yesus: “Badaʹ ne me ameʹ ading, un ikoʹ iaʹ Yaya badaʹ ke nai idai tupe? Buk ke abeʹ un pekina, ameʹ mengaʹ kenai ca laʹa mo?”
4Un dau Yesus mipa ida: “Tai ne ikem uleʹ ngan badaʹ me Yaya inu iaʹ ikem kenahan ngan taʹan: 5kumpin dulu diaʹ butaʹ lepa taʹan, ngan dulu diaʹ apet sukat tai masat, ngan dulu diaʹ sakit bekayen tai maget, ngan diaʹ dengen sukat kenahan, ngan diaʹ matai nai mudip, ngan pekina pe Denga Tiga ini dulu pedenga me kelunan jaʹat. 6Bangen saheʹ ne kelunan iaʹ abeʹ un luʹap ke ngelan neng akeʹ.”
7Dalau ketai diaʹ bayaʹ katuk Yaya dina ngeliwet, un dau Yesus pisiu me kelunan kadoʹ dina neng puyan Yaya. Un dau ue: “Dalau ketai hem palaʹ Yaya kaʹ tanaʹ lenga are, inu iaʹ ikem nebelum ke taʹan? Ca udu iaʹ liung kuʹun bahiu mo? 8Inu iaʹ ikem tai naʹat? Ca kelunan iaʹ un gelam tiga mo? Diaʹ un gelam pekina, idi kelunan diaʹ ngelineʹ neng amin paren. 9Badaʹ ne, inu iaʹ ikem tai naʹat? Ca kelunan pegawa mo? Ini dau heʹ mikem, ca kelunan iaʹ pelapa bioʹ neng ʹo ca pegawa. 10Ban ne Yaya ne iaʹ tugen neng jo Kitap iaʹ kuma haʹ: ‘Un dau tebadaʹ Allah, ini ne lawa heʹ. Akeʹ ke cuk ia tai tahaʹ tena neng ikoʹ, apan ne mesik janan mikoʹ.’
11“Nawai tiga le, Yaya Guru Batis ina un pelapa bioʹ neng ʹo mung kelunan diaʹ lepa mudip kusun tanaʹ ini. Un sepuʹo kelunan diaʹ iʹut dalem puyan pengaren Allah, ia iaʹ ke tisen peniga iaʹ pelapa bioʹ neng ʹo Yaya. 12Cen tading Yaya pedenga katuk ke pabeʹ naʹkini, un palai diaʹ taten ke mita puyan pengaren Allah ke ngaren ilu. Un palai diaʹ busek ngan aseʹ le ketai kedalem me. 13Kena kenai Yaya, lepa ne mung pegawa ngan Katuk Adet Musa badaʹ neng puyan pengaren Allah ke ngaren ilu kelunan. 14Buk kem ubaʹ ke ngelan neng dau katuk de dina, Yaya sereket Ilia iaʹ kenai baʹan dau tebadaʹ Allah cen naʹaʹ are. 15Aheʹ iaʹ un telinga, tiga hem ngeringa.
16“Kumpin seʹ keʹ ke pekata udip kelunan naʹkini? Ban ne ida koʹ baʹan palai anak diaʹ madung kaʹ pasen te. Un ca mpun nte ngelengap palaʹ mpun nte diaʹ ca, kun dau re: 17‘Kun meʹ ti sampeʹ pekiban mikem, abeʹ pe ikem ubaʹ tai kancet kidi pe. Kun meʹ ti kedingut tidau, abeʹ pe ikem ubaʹ ke nange pe.’ 18Yaya nai lemalan abeʹ un uman, ngan pekina pe abeʹ e nisep telang anggur. Kadoʹ dulu diaʹ kuma ha: ‘Baliʹ nelasek Yaya.’ 19Un sepuʹo Anak Sio iaʹ nai ini, uman pe ia ngan nisep pe ia. Ina tuman ne kadoʹ dulu diaʹ kuma ha: ‘Naʹat ne, diseʹ kelunan ini mekum, mabuk, ngan tai tugung dulu diaʹ alaʹ pupu ngan kelunan jaʹat.’ Naʹ pe pekina, ilu tisen penudi kimet Allah iaʹ uban un teneng, ban le taʹan puyan iaʹ nuyan kuʹun ne, un teneng lete.”
Lepoʹ diaʹ abeʹ un ngelan
(Un te neng Lukas 10.13-15)
20Cen ina ne tading Yesus ngenca lepoʹ diaʹ ukoʹ o lepa uyan puyan nyingan, uban kelunan dina abeʹ un ubaʹ ke nyepuleʹ kimet de cen penyalaʹ de. 21Un dau ue: “Siʹau pe ikem lepoʹ Kurasim, ngan pekina pe siʹau ne ikem lepoʹ Bit-saida, ban puyan nyingan ini lepa ne nuyan neng ahang ikem. Buk ke ban nuyan kaʹ lepoʹ Tirus ngan kaʹ lepoʹ Sidun cen naʹaʹ are, atek de un gelam karung mentung ngabu usa re, nedanaʹ uban ida lepa nyepuleʹ kimet de cen penyalaʹ de. 22Nawai tiga le, uban tegoʹ Tau Bioʹ Allah ke pebetep ukum kusun tanaʹ ini ʹo, atek bioʹ pengelesau ue neng kelunan lepoʹ Tirus ngan Sidun neng ʹo ikem. 23Ngan pekina pe ikem lepoʹ Kapernaum. Seʹ kem ubaʹ ketai kempau pabeʹ kaʹ surga mo? Ikem iaʹ dulu ke pet kentaʹ neng ukum luten. Buk puyan nyingan iaʹ lepa nuyan neng ahang ikem ini, nuyan kaʹ lepoʹ Sudum cen naʹa, ke un lepe Sudum pabeʹ naʹkini. 24Nawai tiga le, tegoʹ Tau Bioʹ Allah ke pebetep ukum kusun tanaʹ ini, atek bioʹ pengelesau ue neng kelunan lepoʹ Sudum neng ʹo ikem.”
Nai ne penteng jengan ncem palaʹ Yesus
(Un te neng Lukas 10.21-22)
25Dalau ina, un dau Yesus: “Ahaʹ Amai, Tuhan iaʹ ngkang langit ngan tanaʹ, akeʹ nyuaʹ tiga saheʹ palaʹ ikoʹ ban inu iaʹ ikoʹ nyuhuk neng kelunan diaʹ tudi ngan diaʹ mencam, idi iaʹ ikoʹ ban peluhaʹ me kelunan diaʹ are un pengencam. 26Ahaʹ Amai, puyan ini ne bayaʹ pengubaʹ koʹ, ngan iaʹ sihoʹ neng kimet coʹ tengen.
27“Ketoʹ inu pe lepa ne Amai Bioʹ naʹ a makeʹ. Ca kelunan pe abeʹ un tisen Anak Sio pit Amai Bioʹ. Ngan pekina pe ca kelunan pe abeʹ un tisen Amai Bioʹ pit Anak Sio peging ngan kelunan diaʹ Anak Sio ina ubaʹ ke peluhaʹ Amai Bioʹ.
28“Nai ne ikem palaʹ akeʹ, mung ngkem diaʹ jengan tuman mpin ncem iaʹ bahat. Akeʹ ke naʹ udip denaʹ mikem. 29Mecuk ne ulu hem kentaʹ sebakui heʹ, ngan pekalai bayaʹ akeʹ, moʹ keʹ lemaʹ kimet ngan libaʹ tawai, idi hem ke tisen denaʹ. 30Ban ne melai le sebakui iaʹ akeʹ ke naʹ mikem ina, ngan mpin iaʹ akeʹ naʹ mikem ina ca mpin iaʹ nyiʹan le.”
موجودہ انتخاب:
MATIUS 11: KNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Kenyah New Testament © Bible Society of Malaysia, 1984.
