Luk, echî 20

Obhasi nâ a karê Jisos ikom a yimá iyîm

(Mat 21.23-27; Mak 11.27-33)

1Ofú bhə́t Jisos a ri ka etím ókʉ́rí achot Obhasi, a kí kpi ane, a sə́rá ábho otîp ogyebhá-ḿbə́ŋé Obhasi. Nji á kpik áno, ane-echî akará-agore Obhasi na atóŋá-ebhín á chə̂m na ane-akúí eték, 2á bhâ bhə̂p yê sê, “Sə́re êt kpá, o yimî nan o kí yim iyîm mbí? Énê a karê wâ ikom?”

3Jisos a táme ábho se, “Deê ó táme ên ə̂m kpá ebhə̂p njí. Sə́re ên ə̂m, 4ikom mfi Jon a fonê a fúghá ane ayép, í dʉ̂ mbâ Obhasi kən mbâ atem-ane?”

5Nji a bhə́bhe nná ebhə̂p njí, ane mbá á róghe echoróm ábho-ábhô sê, “Ájoé é tame sê Obhasi nâ a karê Jon ikom, a ri a bhə́p echî nji e rô kam na Jon. 6Kən é tame sê í dʉ̂ mbâ atem-ane, ekam ane njí ndə́m tîk á tûp êt na atáé. Ábho chénchén á kâm sê Jon a ri nkara-otîp Obhasi.”

7Á táme mân sê, “É ka məŋé.”

8Jisos a táme ábho fə́ne se, “Mme eróŋ, ḿ bó səre ên mbâ ikom ifámé í dʉ̂ kən n yimá ntûm nnyí.”

Ane mba á kóe etûm ka ebhin í nkap i grêp

(Mat 21.33-46; Mak 12.1-12)

9Jisos a bhâ sə́re mân ane egan etat se, “Nne yót a fôn ebhin í nkap ejê, a kô a káre ane se á yîm á kará yê obhê orʉrí. A yə̂p mân a jak ejen nji a kí ka.#Asa 5.1. 10Nji ebhú nkap é síi, mfone ebhin nnyó a yíghi ḿgbán owe yót a tûm se a ji mbâ ane mba á yíma ebhin ejê, a jí ko eye nkiri ebhin. Kən nji ane mbá á yéne ḿgbán nnyó á fî yê á tə̂m, a jak abhô-ábhô. 11Mfone nnyó a kpô yighí ḿgbán nnyo tat a tûm, kən ane mbá á tə̂m nnyó, á káre yê ekpatə́m ísonê, á bhîm a jak, abhô-ábhô. 12Ka osúí ágbán ásá, ane etûm mbá á tə̂m, á kâk bifú, á bhîm a jak.

13“Mfone nnyó a bhâ kére se, n kí yim nan eé? Tîk n tûm mmon okot omé. Ebhú ane mbá á yen yê, tîk á káre yê ejík.

14“Kən a kpo to a túm mmon, ayimá-etûm mbá á yên yê, á kúbhi sê, ‘Ńgyê ndígha-ekʉ̂, é yúí yê. Tîk iyîm í ńsé í kə̂t ibhə́ré.’ 15Á bhâ fî mmon nnyó á yúi, á bhûm ka etə́m.”

Jisos a bhə̂p mân ane se, “Ó kere ên mân sê mfone ebhin nnyó a kí yim jen mbâ ane mbá?”

16A táme yê ḿfoné se, “A kí yui ane mbá a tábhe ebhin njí a káre mbâ ane etat.”

Nji ane á yúghi nchot nnyí, á chôt sê, “Deê ntʉ́ghi ejûm njí é kâ fâp.”

17Jisos a kêp ábho nyamḿ, a bhə̂p se, “Echî esə́re njí a ri jen mân? Á séŋe sê,

Isôk mfi agbeghá-ojû á bhúmi

sê í ká nop njû egbeém,

ḿfə́ne nâ í bhâ chə́bhe

mfoné-mfoné isôk mfi í fíi njû.#Nkôn 118.22.

18Kpe énê nnyo á gbo ka isôk mfí, a kí bhom biji í mân oman, kən isôk áfi í gbo nne ka biji, nne a kí joghe a mân oman.”

Ntí-echî ekarám

(Mat 22.15-22; Mak 12.13-17)

19Nji Jisos a chorê achot mmá, atóŋá-ebhín na ane-echî akará-agore Obhasi á nôk ekpak nji á kí wubhi yê ka ngyím ányi, ka á məŋe sê a túbhi egan njí a káre ábho. Kən á fôn efup na ane eték. 20Á fî biji ábho á chighá mfoné ebhú é bhîk. Á chîŋ obhô-njəm á káre ane etat sê á yîm noŋ ábho á fon ḿbə́ŋé jáé na Jisos, kən tîk á wáp yê ka akát. Ebhú yê á gbo, tîk á fî yê mân á káre mbâ ntûfâm nnyo a fonê ikom eték. 21Ane mba á túmi nná sê á bhá gáe Jisos á sə́re yê sê, “Ńsé, é məŋe sê nji ó chorá o kpík ane, é rî ka echî. É məŋe sê ó bhó kep nne ka ochî, ó səra ane ka etʉri ejûm nji Obhasi a wóme nne a yim. 22Sə́re êt kpá, ebhín ejə́ré é kam kən é ká kam sê é káre ntí-echî mbâ Ntûfâm i Rom?”

23Kən Jisos a yên oka nchot ábho, a sə́re ábho se, 24“Kó ên ntí bhá tóŋé ə̂m.” Nji á kóe á bhak, a bhə̂p ábho se, “Efóŋé énê na mbiŋ énê nâ í rî áno ka ntí mmí?”

Á táme sê, “Ntûfâm i Rom.”

25A sə́re mân ábho se, “Karê ên mbâ Ntûfâm i Rom iyîm í Ntûfâm i Rom, o káre ên mbâ Obhasi iyîm Obhasi.”

26Nji Jisos a táme áno, kpe ekpak nji á kí fi yê áfo ka ochî ane eték sê a gbô cháŋ. Biji í mân ábho, kpe eyum á ká kpo rəbhé.

Enyəmə́m ka ekʉ̂

(Mat 22.23-33; Mak 12.18-27)

27Etʉ̂ ane echəme Sadusi á bhak á bhá bhə́p Jisos ebhə̂p. Ane mbá nâ á ká kam sê nne á kpo, tîk a nyə́me ka ekʉ̂.#Etûm 23.8. 28Á bhə̂p yê sê, “Ńsé, Mosis nâ a séŋe ebhín a káre êt se ebhú nne á ko nkáé kən a kpô, kpe mmon á ka maghé, deê mmon-i-nnyen i ndûm a kó nne-nkáé ányo a jí abhon ka mbiŋ i mmon-i-nnyen.#Otira 25.5. 29Kən ofú bhə́t abhon-í-nnyen á rî mfá anígisá. Nnyo nne-nkúí a kô nkáé, kən a kpô, kpe mmon á ka maghé. 30Enyeré a bhâ kô nne-nkáé nnyó, a kpô fə́ne, kpe mmon á ka maghé. 31Osúí ásá a yîm ekan-ékân. Áno-áno, tata chénchén ábho anígisá á kpô, kpe mmon á ká maghé. 32Nne-nkáé ányo a bhâ jéghe okpó fə́ne. 33Ka ofú mbi ane chénchén á kí nyəmé ka ekʉ̂, nne-nkáé nnyó a kí joé nnyo énê, ka ábho anígisá á kô yê ebhú á rî mbít.”

34-35Jisos a táme ábho se, “Ane-arûm na ane-akáé ka ngun nnyí, á kí ko bibháé. Kən ane mba á bhik enyəmə́m ka ekʉ̂, á kpîn ka ngun nnyi a kə́ bha mbá-ochî, á bhó ko ebháé. 36Á kí joé noŋ baénjel, ekʉ̂ á bhó kpo. Nji á nyə́me ka ekʉ̂, á chəbhe nâ abhon Obhasi. 37Ebhú Mosis a séŋe a kpê na erəmta-ngûn nji a yéne ka ájé, a tóŋe jáé se nne á kpo, tîk a nyə́me ka ekʉ̂. Ka eji erəmta-ngûn njí, Mosis a bhiŋî Ńtâ Obhasi se, Obhasi Abraham, Obhasi Isak na Obhasi Jakop.#Ane 3.6. 38Nâ é toŋe sê Obhasi á ka joé Obhasi ekʉ̂, kən a ri Obhasi ekpin. Nâ é fap sê ka ochî Obhasi, chénchén ane á rî ka ekpin.”

39Etʉ̂ atóŋá-ebhín á kâm na Jisos sê, “Ńsé, ó tame.” 40Nâ ntə̂m, kpe nne yót á ka kpó gaé a bhə́p Jisos ebhə̂p.

Krayis, nne nnyo a bháe oyim ngun á sém, a ri mmon énê?

(Mat 22.41-46; Mak 12.35-37a)

41Jisos a bhə̂p mân ábho se, “É yími nan kən ane á kí səre sê Krayis, nne nnyo Obhasi a túmi se a bhá yim ngun á sém, a ri mmon i Debhit? 42Debhit yê ḿfoné a séŋe ka Nwet i Nkôn se,

‘Ńtâ Obhasi a sə́re ntûfâm omé,

se kumî ə̂m mfá ka eji ejík mkpe obhô-orûm,

43ta n yîm ane-ebhan abhâ á kə̂t ekíghá-akát ejâ.’#Nkôn 110.1.

44Debhit a kí bhiŋ Krayis se Ntûfâm. Krayis a kí kpo yim nan a jóe mmon owe?”

Kô ên ebhú na atóŋá-ebhín

(Mat 23.1-36; Mak 12.38-40)

45Nji ane chénchén á kí yuk achot mma Jisos á chorá, a sə́re atóbhá abhê se, 46“Kô ên ebhú na ane abhə́né mba á tóŋa ebhín. Á kóra á jená á fará na awubha-wubha okʉ̂, á korá sê ane á káre ábho ejík ka ndûm éré. Á korá ekumúm ka ngûm ekumi nnyi ejík ka erom na ka óchâm Obhasi. 47Á móa ane-akáé ekə́t amoe, kən ngun á yen sê á kí saé ábho. Á yim mân á gyê Obhasi egoróm ntə̂m cháŋ. Na ntʉ́ghi ekpin njí, Obhasi tîk a kpə́re ábho nnyen ekpərə́m.”

موجودہ انتخاب:

Luk, echî 20: ETUNT

سرخی

شئیر

کاپی