San Marcos 7

Nataꞌ Jesús cheꞌé se ꞌyaj chiꞌi̱i̱ man yuvii̱ a

1Ga̱a ne̱ nichrunꞌ taꞌa̱j nij síí fariseo do̱ꞌ, nij síí naquiꞌyaj cu̱u stucua̱nj Moisés do̱ꞌ, rihaan Jesús, ne̱ síí cavii chumanꞌ Jerusalén me nij soꞌ a. 2Ne̱ queneꞌen nij soꞌ se vaa ga̱a chá nij síí tucuꞌyón snana̱ Jesús, ne̱ ne naꞌya̱ꞌ nij soꞌ, ne̱ cheꞌé dan vaa ri̱nꞌ raꞌa nij síí tucuꞌyón snana̱ Jesús niꞌya̱j Yaꞌanj, rá nij síí fariseo ga̱ nij síí naquiꞌyaj cu̱u stucua̱nj Moisés a. 3ꞌO̱ se xa̱ꞌ nij síí fariseo ga̱ cunuda̱nj ꞌó nij síí israelitá, tza̱j ne̱ a̱ doj ne chá nij soꞌ sese ataa naꞌya̱ꞌ nij soꞌ maꞌ. Da̱nj ꞌyaj nij soꞌ, cheꞌé se ꞌo̱ xraan nocoꞌ nij soꞌ tucuáán cuchruj nij síí uun chij cayáán ga̱a naá a. 4Ne̱ ga̱a ꞌnaꞌ nique nij soꞌ rihaan yuꞌvee, ne̱ sese ataa cane̱ nij soꞌ, ne̱ ne chá nij soꞌ a̱ maꞌ. Ne̱ vaa uxrá doj tucuáán nica̱j nij soꞌ, ne̱ nda̱a vaa tucuáán cheꞌé tazá do̱ꞌ, cheꞌé xruj do̱ꞌ, cheꞌé agaꞌ do̱ꞌ, da̱j quiꞌya̱j nij soꞌ ga̱a naꞌnuꞌ nij soꞌ man nij rasu̱u̱n vaa nacaj yoꞌ a.

5Ga̱a ne̱ xnáꞌanj nij síí fariseo ga̱ nij síí naquiꞌyaj cu̱u stucua̱nj Moisés man Jesús a:

―Nij síí tucuꞌyón snana̱ so̱ꞌ me se me cheꞌé ne nocoꞌ nij soꞌ tucuáán cuchruj nij síí uun chij cayáán ga̱a naá, ne̱ nihánj me se chá nij soꞌ, ne̱ ne naruvii raꞌa nij soꞌ niꞌya̱j Yaꞌanj a̱ maꞌ ―taj nij soꞌ a.

6Ga̱a ne̱ cataj Jesús rihaan nij soꞌ a:

―Cuna̱j uxrá vaa nana̱ nataꞌ Isaías ga̱a naá ga̱a caꞌmii soꞌ cheꞌé nij soj si̱j nucuiꞌ rá, ne̱ dan me se caꞌmii soꞌ snana̱ Yaꞌanj, ne̱ cataj soꞌ a:

Yuvii̱ nihánj me se ma̱an tuꞌva u̱u̱n nij soꞌ aráj cochro̱j nij soꞌ mán ꞌu̱nj,

tza̱j ne̱ ga̱nꞌ uxrá nicunꞌ nimán nij soꞌ ga̱ ꞌu̱nj na̱nj ado̱nj.

7Aráj gue̱e̱ rmaꞌa̱n nij soꞌ rihanj na̱nj á.

ꞌO̱ se tucuáán nataꞌ nij soꞌ roꞌ, me suun cavii raa̱ na̱nj yuvii̱ na̱nj ado̱nj,

taj snana̱ Yaꞌanj nataꞌ Isaías ga̱a naá a. 8ꞌO̱ se a̱j tanáj xco̱ soj suun caꞌneꞌ Yaꞌanj rihaan níꞌ, ne̱ na̱nj tucuáán cuchruj yuvii̱ u̱u̱n nocoꞌ soj na̱nj á ―taj Jesús a.

9Ne̱ cataj uún soꞌ a:

―Cuna̱j uxrá vaa ꞌyaj soj, rá soj, ne̱ utaꞌ yaníj soj suun caꞌneꞌ Yaꞌanj rihaan níꞌ, cheꞌé rej caꞌve̱e canoco̱ꞌ soj stucua̱nj maꞌa̱n soj asânj.

10’ꞌO̱ se caꞌneꞌ Moisés suun ne̱ cataj soꞌ a: “Cara̱a̱ co̱chróó so̱ꞌ rihaan réé so̱ꞌ do̱ꞌ, rihaan nií so̱ꞌ do̱ꞌ á.” Ne̱ cataj uún Moisés a: “Síí aꞌmii chre̱e cheꞌé rej do̱ꞌ, cheꞌé nii do̱ꞌ, me se yu̱u̱n cheꞌe̱ cavi̱ꞌ soꞌ quiꞌya̱j nii á.” Da̱nj cataj Moisés a. 11Tza̱j ne̱ taj soj se vaa sese cata̱j ꞌo̱ soꞌ rihaan rej soꞌ do̱ꞌ, rihaan nii soꞌ do̱ꞌ, se vaa a̱j rqué soꞌ nu̱ꞌ siꞌyaj soꞌ rihaan Yaꞌanj ne̱ cheꞌé dan se̱ caꞌvee ra̱cuíj soꞌ man rej soꞌ do̱ꞌ, man nii soꞌ do̱ꞌ, taj soj a. 12Ne̱ ne caꞌve̱j soj ra̱cuíj soꞌ man rej soꞌ do̱ꞌ, man nii soꞌ do̱ꞌ maꞌ. 13Dan me se da̱nj ina̱nj aꞌmii soj ga̱a tucuꞌyón soj snana̱ nij síí ma̱n ga̱a naá, ne̱ axríj yuve̱ soj man snana̱ Yaꞌanj na̱nj ado̱nj ―taj Jesús rihaan nij síí fariseo ga̱ nij síí naquiꞌyaj cu̱u stucua̱nj Moisés a.

14Ga̱a ne̱ canacúún uún Jesús man cunuda̱nj nij yuvii̱ caꞌna̱ꞌ nij yuvii̱ rihaan soꞌ, ga̱a ne̱ cataj soꞌ rihaan nij soꞌ a:

―Cuno̱ ta̱ranꞌ soj nana̱ nihánj, ne̱ xca̱j soj cuentá á: 15A̱ doj rasu̱u̱n atúj tuꞌva yuvii̱ se̱ caꞌvee quiꞌya̱j chiꞌi̱i̱ nimán yuvii̱ maꞌ. Tana̱nj se avii nimán yuvii̱ roꞌ, ꞌyaj chiꞌi̱i̱ nimán yuvii̱ ado̱nj. 16Sese ta̱j yuꞌuj xréé soj, ne̱ cuno̱ soj nana̱ nihánj á ―taj Jesús a.

17Dan me se ga̱a caꞌanj yaníj Jesús ga̱ nij síí tucuꞌyón snana̱ soꞌ rihaan nij yuvii̱ ri̱i̱, ne̱ catúj nij soꞌ rá veꞌ, ga̱a ne̱ xnáꞌanj nij soꞌ man soꞌ me se me raj cata̱a nana̱ caꞌmii soꞌ a. 18Ga̱a ne̱ cataj Jesús rihaan nij soꞌ a:

―Vaa soj vaa, ne̱ ne xca̱j maꞌa̱n soj do̱ꞌ cuentá a̱ naꞌ. Ne̱ ne neꞌen soj se vaa nu̱ꞌ se atúj tuꞌva yuvii̱ roꞌ, se̱ caꞌvee quiꞌya̱j chiꞌi̱i̱ yoꞌ man yuvii̱ a̱ naꞌ. 19ꞌO̱ se ne atúj yoꞌ nda̱a nimán yuvii̱ maꞌ. Tana̱nj achén yoꞌ rque yuvii̱, ne̱ uriha̱nj yoꞌ ga̱a reꞌé yuvii̱ na̱nj á ―taj Jesús a.

Ne̱ nana̱ yoꞌ taj se vaa caꞌve̱e cha̱ yuvii̱ me maꞌa̱n rasu̱u̱n ne̱ né cacunꞌ me yoꞌ rihaan Yaꞌanj maꞌ. 20Ne̱ cataj uún soꞌ a:

―Tza̱j ne̱ se uriha̱nj nimán yuvii̱ roꞌ, me se ꞌyaj chiꞌi̱i̱ ndoꞌo man yuvii̱ ado̱nj. 21ꞌO̱ se nihánj me se chiꞌi̱i̱ avii nimán yuvii̱ a. Se nij me rá yuvii̱ do̱ꞌ, yan coto̱j yuvii̱ ga̱ ꞌó yuvii̱ sese né ni̱ca̱ yuvii̱ me do̱ꞌ, yan ticavi̱ꞌ man tuviꞌ do̱ꞌ, 22yan quiꞌya̱j itu̱u̱ siꞌyaj tuviꞌ do̱ꞌ, yan gu̱un rá ni̱caj siꞌyaj tuviꞌ do̱ꞌ, yan quiꞌya̱j da̱j a̱ se chiꞌi̱i̱ do̱ꞌ, yan tiha̱ꞌ yuꞌunj man tuviꞌ do̱ꞌ, yan ni̱ꞌyaj ndoꞌo man ꞌó chana̱ do̱ꞌ, yan gu̱un xco̱j ruva̱a̱ rá ni̱ꞌyaj tuviꞌ do̱ꞌ, yan caꞌmi̱i̱ nij cheꞌé tuviꞌ do̱ꞌ, yan caꞌmi̱i̱ xta̱ꞌ do̱ꞌ, yan quiꞌya̱j rmaꞌa̱n na̱j guun se nij do̱ꞌ, me nu̱ꞌ se avii nimán yuvii̱ a. 23Ne̱ nu̱ꞌ yoꞌ me se avii nimán yuvii̱ ne̱ ꞌyaj chiꞌi̱i̱ man yuvii̱ na̱nj ado̱nj ―taj Jesús a.

Cuchumán rá ꞌo̱ chana̱ sirofenicia se vaa ra̱cuíj Jesús man noꞌ a

24Ga̱a ne̱ naxuma̱a̱n Jesús, ne̱ curiha̱nj soꞌ rej yoꞌ, ne̱ caꞌanj soꞌ rej na̱j chumanꞌ cuꞌna̱j Tiro ga̱ Sidón a. Ne̱ catúj soꞌ rá ꞌo̱ veꞌ, ne̱ ne caꞌve̱j rá soꞌ queneꞌe̱n nij yuvii̱ me rej vaj soꞌ a. Tza̱j ne̱ ne caꞌve̱e qui̱ꞌnij yuve̱ soꞌ maꞌ. 25Tana̱nj raꞌya̱nj cuchiꞌ nana̱ rihaan ꞌo̱ chana̱ me rej yáán soꞌ, ne̱ taꞌníí chana̱ roꞌ, me níí nu̱u̱ nana̱ chre̱e nimán, ne̱ caꞌnaꞌ chana̱, ne̱ quinij ru̱j chana̱ yoꞌ rihaan Jesús a. 26Dan me se chana̱ sirofenicia aꞌmii xnaꞌánj griego me chana̱ yoꞌ, ne̱ rquee̱ noꞌ man Jesús se vaa quiri̱i̱ Jesús nana̱ chre̱e nimán taꞌníí noꞌ a. 27Ga̱a ne̱ cataj Jesús rihaan noꞌ a:

―Dan me se cha̱ asino nij xnii tucua̱ á. Se̱ caꞌvee ta̱ꞌaa níꞌ coꞌoo ma̱n rihaan nij xnii ne̱ go̱ꞌ níꞌ cha̱ nij chuvee maꞌ ―taj Jesús a.

28Ga̱a ne̱ cataj noꞌ a:

―Veé da̱nj vaa gue̱e̱, Señor. Tza̱j ne̱ nij chuvee nicu̱nꞌ rque chruun mesá roꞌ, chá nij xoꞌ tachruu̱ ayuu tuꞌva nij xnii na̱nj á ―taj chana̱ yoꞌ a.

29Ga̱a ne̱ cataj Jesús rihaan noꞌ a:

―Cheꞌé nana̱ caꞌmii so̱ꞌ nihánj roꞌ, caꞌve̱e cavi̱i̱ so̱ꞌ caꞌa̱nj so̱ꞌ, ne̱ a̱j curiha̱nj nana̱ chre̱e nimán taꞌníí so̱ꞌ na̱nj á ―taj soꞌ a.

30Ga̱a ne̱ nucuiꞌ chana̱ tucuá noꞌ, ne̱ queneꞌen noꞌ se vaa dínj naj taꞌníí noꞌ rihaan camá, ne̱ a̱j curiha̱nj nana̱ chre̱e nimán taꞌníí chana̱ ado̱nj.

Nahuun sa̱ꞌ ꞌo̱ síí soꞌo̱ yaꞌmi̱i, quiꞌyaj Jesús a

31Ga̱a ne̱ curiha̱nj uún Jesús rej na̱j chumanꞌ Tiro, ne̱ cachén soꞌ scaꞌnúj chumanꞌ cuꞌna̱j Sidón, ne̱ cachén soꞌ scaꞌnúj rej cuꞌna̱j Chi̱ꞌ Chumanꞌ, ne̱ caꞌanj uún soꞌ tuꞌva na laguaná Galilea a. 32Ne̱ nica̱j nij yuvii̱ man ꞌo̱ síí soꞌo̱ yaꞌmi̱i caꞌnaꞌ nij yuvii̱ rihaan Jesús, ne̱ rquee̱ uxrá nij yuvii̱ rihaan Jesús se vaa cuta̱ꞌ raꞌa Jesús xráá síí soꞌo̱ yaꞌmi̱i yoꞌ a. 33Ga̱a ne̱ nica̱j Jesús man soꞌ caꞌanj yaníj Jesús rihaan ꞌó nij yuvii̱, ga̱a ne̱ tucuaꞌanj Jesús raꞌa Jesús yuꞌuj xréé soꞌ, ga̱a ne̱ quirii talúj Jesús raꞌa Jesús, ne̱ canó raꞌa Jesús daa soꞌ a. 34Ga̱a ne̱ niꞌya̱j Jesús rej xta̱ꞌ, ga̱a ne̱ caráchej Jesús, ne̱ cataj Jesús rihaan soꞌ a:

―Efata ―taj Jesús, ne̱ nana̱ Efata me raj cata̱a a: Nachugu̱u̱n xréé so̱ꞌ á.

35Ga̱a ne̱ nachuguu̱n xréé soꞌ, ne̱ nahuun sa̱ꞌ daa soꞌ, ga̱a ne̱ caꞌmii sa̱ꞌ soꞌ a. 36Ga̱a ne̱ caꞌneꞌ Jesús suun se vaa se̱ guun cata̱j xnaꞌanj nij soꞌ rihaan a̱ ꞌó yuvii̱ a. Dan me se doj a̱ naꞌvej rá Jesús cata̱j xnaꞌanj nij soꞌ rihaan tuviꞌ nij soꞌ, tza̱j ne̱ doj a̱ nataꞌ nij soꞌ rihaan tuviꞌ nij soꞌ da̱j guun a. 37Ga̱a ne̱ caꞌanj uxrá rá nij yuvii̱ xcaj cuentá da̱j quiꞌyaj Jesús, ne̱ cataj nij yuvii̱ se vaa sa̱ꞌ uxrá vaa nu̱ꞌ se vaa quiꞌyaj Jesús, ne̱ nda̱a nachuguu̱n xréé nij síí soꞌo̱ do̱ꞌ, nda̱a aꞌmii sa̱ꞌ nij síí yaꞌmi̱i do̱ꞌ, ꞌyaj Jesús, taj nij yuvii̱ yoꞌ a.

موجودہ انتخاب:

San Marcos 7: trc

سرخی

شئیر

کاپی