San Marcos 14

ꞌO̱ guun rá nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, se vaa cavi̱ꞌ Jesús a

1Dan me se rque vi̱j güii ca̱nuû Chaꞌanj Pascuá chaꞌanj chá nij yuvii̱ israelitá rachrúún ne atúj levadura, ne̱ dan me se ꞌo̱ guun rá nij xrej ata̱ suun noco̱o ga̱ nij síí naquiꞌyaj cu̱u stucua̱nj Moisés se vaa tiha̱ꞌ yuꞌunj nij soꞌ man Jesús, ne̱ ta̱ꞌaa yuve̱ nij soꞌ man Jesús, ne̱ cavi̱ꞌ Jesús, quiꞌya̱j nij soꞌ, rá nij soꞌ a. 2Ne̱ cataj nij soꞌ a:

―Se̱ taꞌaa níꞌ man soꞌ ga̱a anuû chaꞌanj maꞌ. Sese da̱nj quiꞌya̱j níꞌ, ne̱ caꞌma̱an rá nij yuvii̱, ne̱ gu̱un sayuun, quiꞌya̱j nij yuvii̱ na̱nj ado̱nj ―taj nij soꞌ a.

Cutáj ꞌo̱ chana̱ casté raa̱ Jesús a

3Dan me se yáán Jesús chumanꞌ Betania, ne̱ ne soꞌ rá ꞌo̱ veꞌ tucuá Simón síí quiranꞌ luj riꞌyuj a. Ne̱ yáán Jesús rihaan mesá, ne̱ cuchiꞌ ꞌo̱ chana̱ rihaan soꞌ, ne̱ nica̱j chana̱ ꞌo̱ agaꞌ catzi̱i̱ nu̱u̱ casté gunꞌ da̱j rii nii man coj cuꞌna̱j nardo, ne̱ casté tuꞌve̱e̱ ndoꞌo me yoꞌ a. Naxraꞌ chana̱ yoꞌ agaꞌ, ne̱ cutáj chana̱ casté raa̱ Jesús a. 4Ne̱ caꞌmaan rá taꞌa̱j nij síí queneꞌen, ne̱ cataj nij soꞌ rihaan tuviꞌ nij soꞌ a:

―Me cheꞌé tiriꞌ rmaꞌa̱n chana̱ nihánj casté sa̱ꞌ ga̱. 5Me cheꞌé ne cutuꞌve̱e̱ noꞌ casté, ne̱ quiri̱ꞌ noꞌ saꞌanj ase vaa ꞌyaj canaán yuvii̱ rque ꞌo̱ yoꞌ táá doj, ne̱ caxri̱i̱ noꞌ saꞌanj yoꞌ ston nij síí nique̱ ga̱ ―taj nij soꞌ rihaan tuviꞌ nij soꞌ, ga̱a ne̱ guun cheꞌe̱ nij soꞌ caxríj yuva̱a̱ nij soꞌ man chana̱ yoꞌ a.

6Ga̱a ne̱ cataj Jesús rihaan nij soꞌ a:

―Me cheꞌé aꞌmii soj da̱nj niꞌya̱j soj man chana̱ ga̱. Caꞌne̱ꞌ rá nij soj na̱nj á. ꞌO̱ se veꞌé uxrá quiꞌyaj noꞌ manj ado̱nj. 7ꞌO̱ se da̱j a̱ güii mán nij síí nique̱ ga̱ soj, ne̱ me maꞌa̱n güii gu̱un rá soj, ne̱ caꞌve̱e quiꞌya̱j soj se lu̱j ga̱ nij soꞌ ado̱nj. Tza̱j ne̱ ꞌu̱nj me se vaa güii caꞌa̱nj ꞌu̱nj, ne̱ se̱ caꞌvee quiꞌya̱j soj se lu̱j cheꞌej maꞌ. 8Ne̱ chana̱ nihánj quiꞌyaj nu̱ꞌ nda̱a vaa caꞌvee quiꞌyaj noꞌ, ne̱ dan me se ga̱a ataa cavi̱ꞌ ꞌu̱nj ne̱ a̱j caxríj noꞌ casté gunꞌ da̱j manj cheꞌé rej xca̱j soj cuentá se vaa nichrunꞌ güii cachi̱nꞌ nii manj ado̱nj. 9Ne̱ cata̱j yá yá ꞌu̱nj rihaan nij soj cuano̱ se vaa me rej maꞌa̱n caꞌmi̱i̱ natáj yuvii̱ snana̱j nana̱ sa̱ꞌ rihaan nij yuvii̱ ma̱n rihaan nu̱ꞌ chumii̱ nihánj roꞌ, ne̱ cata̱j xnaꞌanj uún yuvii̱ rihaan tuviꞌ yuvii̱ cheꞌé se vaa quiꞌyaj chana̱ nihánj manj, ne̱ se̱ niꞌyón yuvii̱ man noꞌ maꞌ ―taj Jesús a.

Cutuꞌvéj Judas man Jesús rihaan nij síí ta̱j riꞌyunj man Jesús a

10Ga̱a ne̱ Judas Iscariote ꞌo̱ chuvi̱j nij síí tucuꞌyón snana̱ Jesús me se caꞌanj soꞌ rihaan nij xrej ata̱ suun noco̱o, cheꞌé rej ra̱cuíj soꞌ man nij soꞌ ta̱ꞌaa nij soꞌ man Jesús a. 11Ne̱ ga̱a cuno nij xrej ata̱ suun noco̱o, ne̱ guun niha̱ꞌ uxrá rá nij soꞌ, ne̱ cataꞌ tuꞌva nij soꞌ se vaa rque̱ nij soꞌ saꞌanj man Judas a. Ga̱a ne̱ guun cheꞌe̱ Judas nuchruj ra̱a̱ soꞌ aman caꞌve̱e ra̱cuíj soꞌ man nij soꞌ ta̱ꞌaa nij soꞌ man Jesús a.

Cataj Jesús se vaa ta̱cuachén ꞌo̱ nij síí tucuꞌyón snana̱ soꞌ man soꞌ rihaan nij síí ta̱j riꞌyunj man soꞌ a

12Dan me se quisíj güii guun cheꞌe̱ Chaꞌanj Pascuá ga̱a chá nij yuvii̱ israelitá rachrúún ne atúj levadura, ne̱ güii ticaviꞌ nij soꞌ matzinj leꞌe̱j rihaan Yaꞌanj cheꞌé Pascuá me yoꞌ a. Ne̱ dan me se xnáꞌanj nij síí tucuꞌyón snana̱ Jesús man soꞌ a:

―Me rej caꞌa̱nj núj quiꞌya̱j chuvi̱i núj cha̱ xtiꞌno̱ níꞌ Chaꞌanj Pascuá, rá so̱ꞌ ga̱ ―taj nij soꞌ a.

13Ga̱a ne̱ caꞌnéé Jesús man vi̱j nij síí tucuꞌyón snana̱ soꞌ, ne̱ cataj soꞌ rihaan ro̱j soꞌ a:

―Cavi̱i̱ ro̱j so̱j, ne̱ catu̱u̱ ro̱j so̱j chumanꞌ Jerusalén nihánj, ne̱ nari̱ꞌ tuviꞌ ro̱j so̱j ga̱ ꞌo̱ síí ata̱ ꞌo̱ cacuaj na, ne̱ canoco̱ꞌ ro̱j so̱j man soꞌ a. 14Ne̱ rihaan síí tucua̱ veꞌ catu̱u̱ soꞌ me se cata̱j ro̱j so̱j a: “Xnáꞌanj se‑maestro̱ níꞌ mán so̱ꞌ me rej ne veꞌ cha̱ xtiꞌno̱ maestró ga̱ nij síí tucuꞌyón snana̱ soꞌ cheꞌé Chaꞌanj Pascuá, taj soꞌ a”, cata̱j ro̱j so̱j rihaan síí tucua̱ veꞌ yoꞌ á. 15Ga̱a ne̱ ti̱haa̱n soꞌ ꞌo̱ cuartó xi̱j vaa rej xta̱ꞌ rque veꞌ nataꞌ rihaan ro̱j so̱j, ne̱ a̱j vaa chuvi̱i chruun rá cuartó yoꞌ a. Yoꞌ me rej quiꞌya̱j chuvi̱i ro̱j so̱j cha̱ níꞌ á ―taj Jesús rihaan ro̱j soꞌ a.

16Ga̱a ne̱ curiha̱nj ro̱j nij síí tucuꞌyón snana̱ Jesús, ne̱ catúj ro̱j soꞌ chumanꞌ Jerusalén, ne̱ nariꞌ ro̱j soꞌ nu̱ꞌ nda̱a vaa cataj xnaꞌanj Jesús rihaan ro̱j soꞌ, ga̱a ne̱ quiꞌyaj chuvi̱i ro̱j soꞌ cha̱ xtiꞌno̱ nij soꞌ cheꞌé Chaꞌanj Pascuá, ne̱ canica̱j ro̱j soꞌ a.

17Ne̱ rej tiꞌnuu, ne̱ caꞌnaꞌ Jesús ga̱ chuvi̱j nij síí tucuꞌyón snana̱ soꞌ a. 18Dan me se yáán nij soꞌ rihaan mesá, chá nij soꞌ, ne̱ cataj Jesús a:

―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa ꞌo̱ nij soj me síí ta̱cuachén manj rihaan nij síí ta̱j riꞌyunj manj, ne̱ síí chá ga̱ ꞌu̱nj cuano̱ me síí quiꞌya̱j da̱nj ado̱nj ―taj Jesús a.

19Ga̱a ne̱ guun cheꞌe̱ nij síí tucuꞌyón snana̱ soꞌ quinanó ndoꞌo rá nij soꞌ, ne̱ xnáꞌanj ꞌo̱ ꞌo̱ nij soꞌ man Jesús, cataj ꞌo̱ ꞌo̱ nij soꞌ a:

―ꞌU̱nj me síí quiꞌya̱j da̱nj naꞌ ―taj ꞌo̱ ꞌo̱ nij soꞌ a.

20Ga̱a ne̱ cataj Jesús rihaan nij soꞌ a:

―ꞌO̱ nij tuvi̱ꞌ chuvi̱j nij soj si̱j tucuꞌyón snana̱j me síí ta̱cuachén manj rihaan nij síí ta̱j riꞌyunj manj, ne̱ síí tiguíj rachrúún ga̱ ꞌu̱nj rá coꞌoo me soꞌ ado̱nj. 21ꞌO̱ se taj Danj Yaꞌanj se vaa caꞌa̱nj ꞌu̱nj cavi̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ ya̱ da̱nj qui̱ránꞌ ꞌu̱nj ado̱nj. Tza̱j ne̱ nique̱ ndoꞌo síí ta̱cuachén manj rihaan nij síí ta̱j riꞌyunj manj na̱nj á. Quira̱nꞌ uxrá soꞌ sayuun na̱nj á. Snóꞌo yoꞌ me se sese ne caꞌnga̱a̱ soꞌ, ne̱ cavii sa̱ꞌ soꞌ doj tza̱j ado̱nj ―taj Jesús a.

Rqué Jesús rachrúún cha̱ nij síí tucuꞌyón snana̱ soꞌ do̱ꞌ, na vinó coꞌo̱ nij soꞌ do̱ꞌ a

22Ne̱ ga̱a chá nij soꞌ, ne̱ taꞌaa Jesús ꞌo̱ rachrúún, ne̱ cataj soꞌ guun niꞌya̱j níꞌ rihaan Yaꞌanj, ne̱ cuxraꞌ taꞌa̱j soꞌ rachrúún, ne̱ rqué soꞌ rihaan nij síí tucuꞌyón snana̱ soꞌ, ne̱ cataj soꞌ a:

―Ta̱ꞌaa soj rachrúún nihánj á. Nee̱ manj me rachrúún nihánj ado̱nj ―taj soꞌ a.

23Ga̱a ne̱ taꞌaa Jesús agaꞌ tazá nu̱u̱ na vinó, ne̱ cataj soꞌ guun niꞌya̱j níꞌ rihaan Yaꞌanj, ne̱ tacuachén soꞌ agaꞌ nu̱u̱ na vinó rihaan nij soꞌ, ne̱ coꞌo cunuda̱nj nij soꞌ a. 24Ga̱a ne̱ cataj Jesús rihaan nij soꞌ a:

―Ton manj me na nihánj, ne̱ cheꞌé ton manj roꞌ, cataꞌ tuꞌva Yaꞌanj rihaan soj da̱j quiꞌya̱j Yaꞌanj ga̱ soj a. Dan me se caya̱nj ton manj cheꞌé rej tinavi̱j Yaꞌanj cacunꞌ cheꞌé ri̱i̱ yuvii̱ ado̱nj. 25Ne̱ cata̱j yá yá ꞌu̱nj rihaan soj cuano̱ se vaa se̱ coꞌo uún ꞌu̱nj na vinó nihánj nda̱a quisi̱j güii coꞌo̱ naca̱ ꞌu̱nj rej uun chij Réé ꞌu̱nj ado̱nj ―taj Jesús a.

26Ga̱a ne̱ cachráá ta̱ranꞌ nij soꞌ ꞌo̱ chraꞌ rihaan Yaꞌanj, ne̱ cavii nij soꞌ, caꞌanj nij soꞌ tacaan cuꞌna̱j Tacaan ma̱n Chruun Olivó a.

Cataj Jesús se vaa cata̱j Pedró se vaa né si̱j noco̱ꞌ man Jesús me soꞌ a

27Ga̱a ne̱ cataj Jesús rihaan nij soꞌ a:

―Nii̱ cuanꞌ nihánj roꞌ, gu̱un naꞌa̱j ta̱ranꞌ soj ne̱ ta̱náj nij soj manj, cheꞌé se taj danj Yaꞌanj a: “Go̱ꞌ ꞌu̱nj man síí tumé matzinj, ne̱ cuna̱nj nij matzinj chaꞌnu̱u̱ nij xoꞌ a”, taj Danj Yaꞌanj a. 28Tza̱j ne̱ asa̱ꞌ quisíj cunuu iꞌna̱ꞌ uún ꞌu̱nj, ne̱ quita̱j ya̱a̱n ꞌu̱nj rihaan soj caꞌa̱nj ꞌu̱nj estadó Galilea, ne̱ nari̱ꞌ tuviꞌ níꞌ estadó Galilea na̱nj ado̱nj ―taj Jesús rihaan nij soꞌ a.

29Ga̱a ne̱ cataj Pedró rihaan soꞌ a:

―Caꞌve̱e se ta̱náj ta̱ranꞌ nij soꞌ mán so̱ꞌ, tza̱j ne̱ daj chiha̱a̱ míj se̱ tanáj ꞌu̱nj mán so̱ꞌ maꞌ ―taj Pedró a.

30Ne̱ cataj Jesús a:

―Ya̱ ya̱ cata̱j xnaꞌanj ꞌu̱nj rihaan so̱ꞌ cuano̱ se vaa a̱j neꞌén ꞌu̱nj se vaa nii̱ cuanꞌ ga̱a ataa quisi̱j vi̱j aguáj taꞌloo, ne̱ vaꞌnu̱j ya̱ cata̱j so̱ꞌ rihaan yuvii̱ se vaa né si̱j noco̱ꞌ manj mé so̱ꞌ a ―taj Jesús rihaan Pedró a.

31Ga̱a ne̱ nucua̱j uxrá cataj Pedró rihaan Jesús a:

―Taj maꞌ. Caꞌve̱e se ticavi̱ꞌ yuvii̱ man níꞌ, tza̱j ne̱ daj chiha̱a̱ míj se̱ cataj ꞌu̱nj se vaa né si̱j noco̱ꞌ mán so̱ꞌ mej maꞌ ―taj Pedró a.

Ne̱ veé da̱nj cataj ta̱ranꞌ nij síí tucuꞌyón snana̱ Jesús uún a.

Caꞌanj Jesús rej Getsemaní ne̱ cachíín niꞌya̱j soꞌ rihaan Yaꞌanj a

32Ga̱a ne̱ caꞌanj Jesús ga̱ nij síí tucuꞌyón snana̱ soꞌ nda̱a ꞌó rej cuꞌna̱j Getsemaní, ne̱ cataj xnaꞌanj Jesús rihaan nij soꞌ a:

―Ca̱yáán soj nihánj, na̱ꞌvi̱j soj mán ꞌu̱nj, ne̱ caꞌa̱nj ꞌu̱nj, cachi̱nj ni̱ꞌyáj rihaan Réj a ―taj Jesús a.

33Ne̱ nica̱j Jesús man Pedró do̱ꞌ, Jacobo do̱ꞌ, Juan do̱ꞌ, caꞌanj soꞌ, ne̱ guun cheꞌe̱ soꞌ caꞌnaꞌ ndoꞌo xruꞌ nimán soꞌ ne̱ quinanó ndoꞌo rá soꞌ a. 34Ga̱a ne̱ cataj soꞌ rihaan nij soꞌ a:

―Nanó uxrá rá nimanj ado̱nj. Ma̱an cheꞌé rej nanó ndoꞌo rá nimanj, quiꞌya̱j cavi̱ꞌ ꞌu̱nj, raj a. Quina̱j soj nihánj, ne̱ se̱ cotoj soj maꞌ ―taj Jesús a.

35Ga̱a ne̱ cavii soꞌ yaníj do̱j tzínꞌ, ne̱ caꞌanj ca̱yáán ru̱j soꞌ nda̱a canó rihaan soꞌ rihaan yoꞌóó, ne̱ cachíín niꞌya̱j soꞌ rihaan Yaꞌanj se vaa sese caꞌve̱e, ne̱ ca̱ráán raꞌa Yaꞌanj xráá soꞌ, se̱ gaa na̱nj quira̱nꞌ soꞌ sayuun a. 36Dan me se cataj soꞌ a:

―Caꞌve̱e qui̱ꞌyáá so̱ꞌ cunuda̱nj, Ata̱j. Ca̱ráán raꞌá so̱ꞌ xráj, se̱ gaa na̱nj quira̱nꞌ uxrá ꞌu̱nj sayuun, tza̱j ne̱ sese ma̱ꞌán so̱ꞌ me rá qui̱ránꞌ ꞌu̱nj sayuun, ne̱ qui̱ꞌyáá so̱ꞌ nda̱a vaa me rá ma̱ꞌán so̱ꞌ, ne̱ se̱ quiꞌyáá so̱ꞌ nda̱a vaa me rá ma̱ꞌanj maꞌ ―taj Jesús, cachíín niꞌya̱j soꞌ rihaan Yaꞌanj a.

37Ga̱a ne̱ canica̱j uún soꞌ caꞌnaꞌ soꞌ rihaan vaꞌnu̱j nij síí tucuꞌyón snana̱ soꞌ, ne̱ queneꞌen soꞌ se vaa cotoj nij soꞌ a. Ga̱a ne̱ cataj soꞌ rihaan Pedró a:

―Otoj so̱ꞌ, na̱nj Pedro. A̱ ꞌó ya̱ orá ne gu̱un nu̱cuáá so̱ꞌ ni̱ꞌyaj so̱ꞌ a̱ maꞌ. 38Ma̱an se ni̱ꞌyaj soj, ne̱ cachi̱nj niꞌya̱j soj rihaan Yaꞌanj se vaa ca̱ráán Yaꞌanj rihaan Síí Chre̱e se̱ caxríj Síí Chre̱e chrej chiꞌi̱i̱ rque soj á. ꞌO̱ se me rá nimán soj quiꞌya̱j soj se sa̱ꞌ, tza̱j ne̱ ne uun nucua̱j soj maꞌ ―taj Jesús a.

39Ga̱a ne̱ cavii uún Jesús, caꞌanj soꞌ, ne̱ cachíín niꞌya̱j soꞌ rihaan Yaꞌanj, ne̱ cuya̱a̱n vaa nana̱ caꞌmii soꞌ cachíín niꞌya̱j uún soꞌ a. 40Ga̱a ne̱ canica̱j uún soꞌ caꞌnaꞌ soꞌ, ne̱ queneꞌen soꞌ se vaa cotoj uún vaꞌnu̱j nij síí tucuꞌyón snana̱ soꞌ a. ꞌO̱ se caꞌnaꞌ ndoꞌo nej rihaan nij soꞌ a. Ne̱ ne nari̱ꞌ nij soꞌ nana̱ cata̱j nij soꞌ rihaan soꞌ a̱ maꞌ.

41Ga̱a ne̱ síj vaꞌnu̱j caꞌnaꞌ uún soꞌ rej ma̱n vaꞌnu̱j nij síí tucuꞌyón snana̱ soꞌ, ne̱ cataj soꞌ a:

―Caꞌve̱e coto̱j soj caꞌve̱e nara̱a̱n rá soj caꞌve̱e sese vaa yaꞌnúj rihaan soj á. Ni̱ꞌyaj soj á. Quisíj orá ta̱cuachén ꞌo̱ soꞌ manj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan síí tumé ndoꞌo cacunꞌ ado̱nj. 42Na̱xagaa soj, caꞌa̱nj níꞌ na̱nj á. Ni̱ꞌyaj soj á. ꞌNaꞌ síí ta̱cuachén manj rihaan síí ta̱j riꞌyunj manj na̱nj chugua̱nj ―taj Jesús a.

Taꞌaa nii man Jesús a

43Dan me se nicu̱nꞌ Jesús caꞌmii soꞌ, ne̱ nu̱ꞌ caꞌnaꞌ Judas ꞌo̱ nij chuvi̱j nij síí tucuꞌyón snana̱ Jesús, ne̱ caꞌnaꞌ uxrá yuvii̱ ga̱ soꞌ, ne̱ nica̱j nij yuvii̱ neê espadá do̱ꞌ, chruun do̱ꞌ a. Dan me se yuvii̱ caꞌnéé nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, nij síí uun chij rihaan nij yuvii̱ israelitá do̱ꞌ, me nij soꞌ a. 44Ne̱ Judas roꞌ, cataj xnaꞌanj rihaan nij yuvii̱ da̱j quiꞌya̱j soꞌ ga̱ Jesús, ga̱a ne̱ cunu̱u ya̱a̱n nij yuvii̱ man Jesús, ne̱ cataj soꞌ a:

―Síí ru̱tuꞌvaj roꞌ, soꞌ me síí ta̱ꞌaa soj cuaj á. Raan cano̱ soj man soꞌ, caꞌa̱nj soj á ―taj Judas a.

45Ga̱a ne̱ nu̱ꞌ cuchiꞌ soꞌ cuaj rihaan Jesús, ne̱ cataj soꞌ a:

―Maestro ―taj soꞌ a.

Ne̱ nu̱ꞌ cachrón tuꞌva̱ soꞌ xruu̱ Jesús a. 46Ga̱a ne̱ cuchiꞌ nij yuvii̱ rihaan Jesús, ne̱ taꞌaa nij yuvii̱ man soꞌ a.

47Ne̱ ꞌo̱ síí nicu̱nꞌ ga̱ Jesús me se quirii soꞌ taneê soꞌ neê espadá, ne̱ goꞌ soꞌ neê espadá yoꞌ raa̱ ꞌo̱ se‑mo̱zó xrej ata̱ suun noco̱o doj, ne̱ veé dan güéj nu̱ꞌ nuj xréé mozó yoꞌ, quiꞌyaj soꞌ a. 48Ga̱a ne̱ cataj Jesús rihaan nij yuvii̱ a:

―Me cheꞌé nica̱j soj neê espadá nica̱j soj chruun nica̱j soj, caꞌnaꞌ soj ga̱. Síí itu̱u̱ mé ꞌu̱nj, rá soj naꞌ. 49ꞌO̱ se guun queꞌe̱e̱ güii cayáán ꞌu̱nj rihaan rej ya̱nj nuvií noco̱o, tucuꞌyón ꞌu̱nj snana̱j rihaan soj, tza̱j ne̱ ne ta̱ꞌaa soj manj maꞌ. Tza̱j ne̱ nihánj me se qui̱ránꞌ ꞌu̱nj nu̱ꞌ se vaa taj nana̱ no̱ rihaan Danj Yaꞌanj a ―taj Jesús a.

50Ga̱a ne̱ tanáj cunuda̱nj nij síí tucuꞌyón snana̱ Jesús man soꞌ, ne̱ cunánj nij soꞌ, caꞌanj nij soꞌ a. 51Ne̱ vaa ꞌo̱ síí tachru̱u̱ noco̱ꞌ xcó Jesús, ne̱ o̱rúnꞌ yatzéj mantá nique̱e̱ soꞌ, ne̱ taꞌaa nij yuvii̱ man soꞌ, 52ga̱a ne̱ tanáj soꞌ yatzéj mantá raꞌa nij yuvii̱, cunánj soꞌ, ne̱ cánj u̱u̱n vaa soꞌ, cunánj soꞌ a.

Cutaꞌ nii cacunꞌ xráá Jesús a

53Dan me se nij síí taꞌaa man Jesús me se nica̱j nij soꞌ man Jesús caꞌanj nij soꞌ rihaan síí ya̱nj xrej ata̱ suun noco̱o doj, ga̱a ne̱ cunuu chre̱ꞌ ꞌó nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, nij síí uun chij do̱ꞌ, rej ma̱n nij soꞌ a. 54Ne̱ ga̱nꞌ ga̱nꞌ canocoꞌ Pedró xcó Jesús, ne̱ cuchiꞌ soꞌ catúj soꞌ rihaan veꞌ ya̱nj xrej ata̱ suun noco̱o doj yoꞌ, ne̱ cayáán soꞌ ga̱ nij se‑mo̱zó xrej ma̱n rá veꞌ, nuguu̱n soꞌ rihaan yaꞌan a.

55Dan me se nanoꞌ nij xrej ata̱ suun noco̱o do̱ꞌ, nu̱ꞌ Xꞌneꞌ Nij Síí Ata̱ Suun Noco̱o Doj rihaan nij yuvii̱ israelitá do̱ꞌ, man yuvii̱ cata̱j xnaꞌanj cheꞌé cacunꞌ tumé Jesús a. Me rá nij soꞌ nari̱ꞌ nij soꞌ cacunꞌ cuta̱ꞌ nij soꞌ xráá Jesús, ne̱ cavi̱ꞌ Jesús, rá nij soꞌ a. Tza̱j ne̱ nuviꞌ cacunꞌ tumé Jesús nariꞌ nij soꞌ maꞌ. 56ꞌO̱ se cuchiꞌ uxrá síí ne̱ rihaan nij síí ata̱ suun caꞌmii ne̱ nij soꞌ, tza̱j ne̱ ino̱ vaa nana̱ caꞌmii ꞌo̱ ꞌo̱ nij soꞌ a. 57Ga̱a ne̱ canicunꞌ ꞌó do̱j síí ne̱ uún, ne̱ cutaꞌ nij soꞌ cacunꞌ xráá Jesús, cataj nij soꞌ a:

58―Cuno núj se vaa cataj Jesús a: “ꞌU̱nj me síí ta̱cuanee nuvií noco̱o nihánj nuvií cuneꞌ yuvii̱, ne̱ rque vaꞌnu̱j güii cune̱ꞌ ꞌu̱nj ꞌó nuvií uún, tza̱j ne̱ né nu̱vií cune̱ꞌ maꞌa̱n yuvii̱ me nuvií cune̱ꞌ ꞌu̱nj a̱ maan ado̱nj”, taj Jesús cuno núj na̱nj á ―taj síí ne̱ niꞌya̱j nij soꞌ man Jesús a.

59Tza̱j ne̱ nda̱a snana̱ nij soꞌ roꞌ, ino̱ do̱j vaa nana̱ caꞌmii ꞌo̱ ꞌo̱ nij soꞌ a.

60Ga̱a ne̱ canicunꞌ xrej ata̱ suun noco̱o doj tanu̱u̱ ꞌó nij síí ma̱n rá veꞌ yoꞌ, ne̱ xnáꞌanj soꞌ man Jesús a:

―Me cheꞌé ne aꞌmii so̱ꞌ ga̱. Da̱j vaa nana̱ nihánj nana̱ aꞌmii nij síí nihánj cheꞌé so̱ꞌ ga̱ ―taj soꞌ a.

61Tza̱j ne̱ dínj vaa tuꞌva Jesús, ne̱ ne caꞌmi̱i̱ soꞌ a̱ doj nana̱ a̱ maꞌ. Ga̱a ne̱ xnáꞌanj uún xrej ata̱ suun noco̱o doj man Jesús a:

―So̱ꞌ me Síí Caꞌnéé Yaꞌanj Ti̱nanii man Yuvii̱ rihaan Sayuun, ne̱ Taꞌníí Yaꞌanj síí aráj cochro̱j cunuda̱nj yuvii̱ rihaan mé so̱ꞌ naꞌ ―taj soꞌ a.

62Ga̱a ne̱ cataj Jesús rihaan soꞌ a:

―Veé da̱nj vaa ya̱ na̱nj ado̱nj. Ne̱ queneꞌe̱n soj se vaa quita̱j ꞌu̱nj rej nuva̱ꞌ Yaꞌanj ne̱ ni̱caj ꞌu̱nj se‑nucua̱j soꞌ gu̱un chij ꞌu̱nj á. Ne̱ queneꞌe̱n uún soj se vaa caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj, ne̱ quita̱j ꞌu̱nj xráá ngaa xta̱ꞌ caꞌna̱j ado̱nj ―taj Jesús a.

63Ga̱a ne̱ caꞌmaan rá xrej yoꞌ, ne̱ cutzinꞌ xrej yoꞌ saga̱nꞌ maꞌa̱n xrej, ne̱ cataj xrej rihaan tuviꞌ xrej a:

―Se̱ cachiin a̱ doj síí caꞌna̱ꞌ cata̱j xnaꞌanj rihaan níꞌ cheꞌé cacunꞌ tumé síí nihánj a̱ maꞌ. 64Ne̱ cuno soj nana̱ qui̱j caꞌmii soꞌ se vaa quita̱j maꞌa̱n soꞌ rej xꞌnu̱j Yaꞌanj naꞌ. A̱j cuno soj chugua̱nj. Ne̱ da̱j quiꞌya̱j níꞌ man soꞌ, rá soj ga̱ ―taj xrej a.

Ga̱a ne̱ cataj cunuda̱nj nij soꞌ se vaa ya̱ tumé Jesús cacunꞌ, ne̱ no̱ xcúún soꞌ cavi̱ꞌ soꞌ a.

65Ga̱a ne̱ guun cheꞌe̱ taꞌa̱j nij soꞌ quirii talúj nij soꞌ man Jesús, ne̱ caráán nij soꞌ yatzéj rihaan Jesús, ne̱ goꞌ nij soꞌ man Jesús, ne̱ cataj nij soꞌ a:

―Sese ya̱ síí nataꞌ snana̱ Yaꞌanj mé so̱ꞌ, ne̱ cata̱j xnaꞌanj so̱ꞌ rihaan núj me síí goꞌ mán so̱ꞌ vi̱j ―taj nij soꞌ, tihaꞌ yuꞌunj nij soꞌ man Jesús a.

Ne̱ nica̱j nij tanuu man soꞌ, ne̱ goꞌ nij tanuu man soꞌ a.

Cataj Pedró se vaa né si̱j noco̱ꞌ man Jesús me soꞌ a

66Veé dan, ne̱ ya̱nj Jesús ga̱ ꞌó nij soꞌ rá veꞌ, ne̱ ya̱nj Pedró rej rque̱ doj rej rihaan veꞌ yoꞌ a. Ga̱a ne̱ caꞌnaꞌ ꞌo̱ mozó cha̱na̱ nu̱u̱ rihaan xrej ata̱ suun noco̱o doj, 67ne̱ queneꞌen noꞌ man Pedró ga̱a nuguu̱n soꞌ rihaan yaꞌan a. Ga̱a ne̱ niꞌya̱j uxrá mozó cha̱na̱ yoꞌ man Pedró, ga̱a ne̱ cataj noꞌ a:

―Ne̱ ma̱ꞌán so̱ꞌ me ꞌo̱ síí cachéé ga̱ Jesús síí cavii chumanꞌ Nazaret ado̱nj ―taj noꞌ a.

68Ga̱a ne̱ cataj Pedró a:

―Ne neꞌén ꞌu̱nj man soꞌ, ne̱ ne neꞌén ꞌu̱nj me taj so̱ꞌ maꞌ ―taj Pedró rihaan mozó cha̱na̱ yoꞌ a.

Ga̱a ne̱ curiha̱nj soꞌ, ne̱ canicunꞌ soꞌ rihaan chingá a. Ne̱ caguáj taꞌloo a. 69Ga̱a ne̱ queneꞌen mozó cha̱na̱ se vaa nicu̱nꞌ Pedró rihaan chingá, ne̱ guun cheꞌe̱ noꞌ caꞌmii noꞌ rihaan nij yuvii̱ nicu̱nꞌ rihaan chingá ga̱ Pedró, cataj noꞌ a:

―Síí nihánj me ꞌo̱ nij síí cachéé ga̱ Jesús asânj ―taj noꞌ a.

70Ga̱a ne̱ cataj uún Pedró se vaa ne neꞌen soꞌ man Jesús a.

Dan me se corá nii doj me se cataj nij síí nicu̱nꞌ ga̱ Pedró rihaan Pedró a:

―Ya̱ ya̱ ꞌo̱ síí cachéé ga̱ Jesús mé so̱ꞌ ado̱nj. ꞌO̱ se si̱j cavii estadó Galilea mé so̱ꞌ chugua̱nj ―taj nij soꞌ rihaan Pedró a.

71Ga̱a ne̱ guun cheꞌe̱ Pedró nucua̱j doj caꞌmii Pedró, cataj Pedró se vaa caꞌve̱e quiꞌya̱j Yaꞌanj sayuun man soꞌ sese né na̱na̱ ya̱ me nana̱ aꞌmii soꞌ, ne̱ cataj soꞌ a:

―Ne neꞌenj man snóꞌo nihánj síí aꞌmii soj cheꞌé a̱ maꞌ ―taj uún Pedró a.

72Ga̱a ne̱ nu̱ꞌ quisíj vi̱j caguáj taꞌloo a. Ga̱a ne̱ nanuj rá Pedró nda̱a vaa a̱j cataj Jesús rihaan soꞌ quii se vaa ga̱a ataa quisi̱j vi̱j caguáj taꞌloo, ne̱ vaꞌnu̱j cata̱j Pedró se vaa né si̱j noco̱ꞌ man Jesús me maꞌa̱n Pedró a. Ga̱a ne̱ guun cheꞌe̱ Pedró taꞌvee ndoꞌo soꞌ a.

موجودہ انتخاب:

San Marcos 14: trc

سرخی

شئیر

کاپی