San Marcos 13

Cataj Jesús se vaa cane̱e̱ nu̱ꞌ nuvií noco̱o ya̱nj chumanꞌ Jerusalén a

1Ga̱a ne̱ curiha̱nj Jesús rej ya̱nj nuvií noco̱o, ga̱a ne̱ ꞌo̱ nij síí tucuꞌyón snana̱ soꞌ cataj rihaan soꞌ a:

―Ni̱ꞌyaj so̱ꞌ, maestro. Sa̱ꞌ ina̱nj vaa yuvej, ne̱ veꞌé ndoꞌo vaa nij veꞌ asânj ―taj ꞌo̱ nij síí tucuꞌyón snana̱ Jesús a.

2Ga̱a ne̱ cataj Jesús rihaan soꞌ a:

―Neꞌén so̱ꞌ nu̱ꞌ nij veꞌ noco̱o ma̱n rej ya̱nj nuvií nihánj naꞌ. Vaa güii, ne̱ cane̱e̱ nu̱ꞌ nihánj, ne̱ a̱ ꞌó yuvej se̱ quitáá xráá tuviꞌ yuvej nihánj a̱ maꞌ ―taj Jesús a.

Nataꞌ Jesús cheꞌé sayuun gu̱un rihaan chumii̱ nihánj vaa güii a

3Dan me se caꞌanj ca̱yáán Jesús raa̱ tacaan cuꞌna̱j Tacaan ma̱n Chruun Olivó, rej ruviꞌ sa̱ꞌ nuvií noco̱o, ne̱ ma̱an Pedró do̱ꞌ, Jacobo do̱ꞌ, Juan do̱ꞌ, Andrés do̱ꞌ, cuchiꞌ rihaan soꞌ, ne̱ xnáꞌanj nij soꞌ man soꞌ a:

4―Maestro, aman cane̱e̱ nu̱ꞌ yoꞌ ga̱. Ne̱ a̱ me rasu̱u̱n caꞌna̱ꞌ qui̱ꞌyáá so̱ꞌ asa̱ꞌ quisíj caꞌna̱ꞌ nu̱ꞌ nij sayuun nda̱a vaa cataj xnaꞌanj so̱ꞌ rihaan núj ga̱ ―taj caꞌa̱nj nij soꞌ a.

5Ga̱a ne̱ guun cheꞌe̱ Jesús cataj xnaꞌanj soꞌ rihaan nij soꞌ a:

―Tu̱mé ndoꞌo soj man soj se̱ gaa na̱nj tiha̱ꞌ yuꞌunj yuvii̱ man soj á. 6ꞌO̱ se caꞌna̱ꞌ uxrá yuvii̱ cata̱j se vaa ꞌu̱nj caꞌnéé man nij soꞌ ne̱ cata̱j nij soꞌ a: “ꞌU̱nj me síí naꞌvi̱j soj, Síí Ti̱nanii man Yuvii̱ rihaan Sayuun á”, cata̱j nij soꞌ, ne̱ dan me se tiha̱ꞌ yuꞌunj uxrá nij soꞌ man tuviꞌ nij soꞌ na̱nj ado̱nj.

7’Dan me se asa̱ꞌ queneꞌen soj se vaa unuꞌ uxrá chumanꞌ ga̱ tuviꞌ chumanꞌ, ne̱ asa̱ꞌ cuno uxrá soj nana̱ se vaa unuꞌ chumanꞌ ma̱n ga̱nꞌ ga̱ tuviꞌ chumanꞌ yoꞌ, ne̱ tu̱mé soj man soj se̱ cuchuꞌviꞌ nimán soj maꞌ. Ma̱an se vaa cheꞌé gu̱un sayuun yoꞌ rihaan chumii̱ nihánj ado̱nj. Tza̱j ne̱ asa̱ꞌ quisíj guun da̱nj, ga̱a ne̱ se̱ caꞌanj niꞌya̱ chumii̱ nihánj nu̱ꞌ orá dan maꞌ. 8Dan me se cunu̱ꞌ uxrá ꞌo̱ chumanꞌ noco̱o ga̱ ꞌó chumanꞌ noco̱o, ne̱ cunu̱ꞌ ꞌo̱ gobiernó ga̱ ꞌó gobiernó a. Ne̱ cache̱n yuún noco̱o queꞌe̱e̱ chumanꞌ, ne̱ cache̱n ndoꞌo xꞌnaa uún a. Nu̱ꞌ sayuun nihánj roꞌ, ase vaa guun cheꞌe̱ ꞌo̱ chana̱ veꞌee̱ rque noꞌ cuchru̱j noꞌ neꞌej roꞌ, da̱nj ga̱a̱ nu̱ꞌ sayuun nihánj na̱nj ado̱nj.

9’Ne̱ ta̱dó soj cheꞌé sayuun quira̱nꞌ maꞌa̱n soj na̱nj á. ꞌO̱ se ta̱cuachén nii man soj rihaan nij xꞌneꞌ nij síí ata̱ suun rihaan níꞌ si̱j israelitá, ne̱ ta̱cuachén nii man soj rihaan nij síí ma̱n rá veꞌ tucuꞌyón níꞌ stucua̱nj Moisés, ne̱ ma̱an yoꞌ go̱ꞌ nii cuartá xráá soj a. Ne̱ ta̱cuachén nii man soj canicu̱nꞌ soj rihaan síí nica̱j suun noco̱o do̱ꞌ, rihaan síí nica̱j suun rey do̱ꞌ, cheꞌé se me soj síí noco̱ꞌ manj a. Ne̱ cata̱j xnaꞌanj soj rihaan nij síí nica̱j suun cheꞌej a. 10Ne̱ asino caꞌmi̱i̱ natáj soj snana̱j nana̱ sa̱ꞌ rihaan cunuda̱nj nij xꞌneꞌ yuvii̱ ino̱ vaa stucua̱nj, ga̱a ne̱ caꞌve̱e navi̱j chumii̱ nihánj ado̱nj.

11’Dan me se asa̱ꞌ caꞌa̱nj ni̱caj nii man soj rihaan nij síí nica̱j suun, ne̱ se̱ nanó rá soj da̱j caꞌmi̱i̱ soj rihaan nij soꞌ maꞌ. Ma̱an Nimán Yaꞌanj rque̱ nu̱ꞌ nana̱ caꞌmi̱i̱ soj man orá yoꞌ na̱nj ado̱nj. ꞌO̱ se né maꞌa̱n soj me nij síí caꞌmi̱i̱ rihaan nij soꞌ maꞌ. ꞌO̱ se Nimán Yaꞌanj me síí caꞌmi̱i̱ rihaan nij soꞌ na̱nj ado̱nj. 12Dan me se caꞌa̱nj ni̱caj snóꞌo man tinúú snóꞌo rihaan nij síí nica̱j suun, ne̱ ticavi̱ꞌ nii man tinúú snóꞌo yoꞌ, quiꞌya̱j maꞌa̱n soꞌ na̱nj ado̱nj. Ne̱ caꞌa̱nj ni̱caj snóꞌo man taꞌníí snóꞌo rihaan nij síí nica̱j suun, ne̱ ticavi̱ꞌ nii man taꞌníí snóꞌo yoꞌ, quiꞌya̱j soꞌ ado̱nj. Ne̱ cunu̱ꞌ xnii ga̱ rej xnii, ne̱ caꞌa̱nj ni̱caj xnii man rej xnii rihaan nij síí nica̱j suun, ne̱ ticavi̱ꞌ nii man rej xnii yoꞌ, quiꞌya̱j soꞌ na̱nj á. 13Ne̱ nachri̱ꞌ cunuda̱nj nij yuvii̱ ni̱ꞌyaj nij soꞌ man soj, cheꞌé se me soj síí noco̱ꞌ manj ado̱nj. Tza̱j ne̱ síí noco̱ꞌ xraan manj nda̱a se cavi̱ꞌ soꞌ roꞌ, soꞌ me síí nani̱i̱ rihaan sayuun nu̱ꞌ cavii nu̱ꞌ caꞌanj ado̱nj ―taj Jesús rihaan caꞌa̱nj nij síí tucuꞌyón snana̱ soꞌ a.

14Ne̱ soj si̱j nayaa nana̱ nihánj roꞌ, xca̱j uxrá soj cuentá me se me raj cata̱a nana̱ nihánj nana̱ caꞌmii Jesús cheꞌé se chiꞌi̱i̱ á.

Dan me se cataj uún Jesús a:

―A̱j neꞌen soj se vaa vaa ꞌo̱ se chiꞌi̱i̱ quiꞌya̱j ndoꞌo sayuun man yuvii̱, nda̱a vaa cataj Daniel síí nataꞌ snana̱ Yaꞌanj ga̱a naá, ne̱ dan me se güii queneꞌe̱n soj man se chiꞌi̱i̱ yoꞌ rej ne nó xcúún yoꞌ canicu̱nꞌ yoꞌ, ne̱ ꞌo̱ cuna̱nj nij síí ma̱n estadó Judea caꞌa̱nj nij soꞌ raa̱ quij á. 15Ne̱ síí ta̱j xráá veꞌ tucuá roꞌ, se̱ catúj soꞌ rá veꞌ tucuá soꞌ quiri̱i̱ soꞌ siꞌyaj soꞌ maꞌ. 16Ne̱ síí ꞌyaj suun tacaan roꞌ, se̱ canica̱j soꞌ ta̱ꞌaa soꞌ saga̱nꞌ soꞌ maꞌ. 17Nique̱ nij chana̱ nu̱u̱ rque do̱ꞌ, chana̱ vaa taꞌníí neꞌej utzii do̱ꞌ, güii caꞌna̱ꞌ sayuun yoꞌ a. ꞌO̱ se sayu̱u̱n vaa cuna̱nj nij chana̱ yoꞌ a. 18Cachi̱nj niꞌya̱j soj rihaan Yaꞌanj se vaa se̱ caꞌnaꞌ sayuun yoꞌ tiempó acoj ndoꞌo maꞌ.

19’ꞌO̱ se güii yoꞌ me se caꞌna̱ꞌ uxrá sayuun, ne̱ qui̱j doj ga̱a̱ sayuun yoꞌ rihaan nu̱ꞌ nij sayuun quiranꞌ yuvii̱ asi̱j quiꞌyaj Yaꞌanj chumii̱, ne̱ daj chiha̱a̱ míj se̱ quiranꞌ uún yuvii̱ sayuun vaa da̱nj a̱ maꞌ. 20Sese queꞌe̱e̱ uxrá güii gu̱un sayuun, ne̱ a̱ ꞌó yuvii̱ se̱ nanii rihaan sayuun yoꞌ maꞌ. Tza̱j ne̱ vaa güii quisi̱j sayuun, quiꞌya̱j Yaꞌanj Si̱j ꞌNi̱j Raꞌa man níꞌ, cheꞌé rej nani̱i̱ nij síí narii soꞌ canoco̱ꞌ man soꞌ ado̱nj.

21’Ne̱ güii yoꞌ me se sese cata̱j ꞌo̱ yuvii̱, “Ni̱ꞌyaj soj; nihánj nicunꞌ Síí Caꞌnéé Yaꞌanj Ti̱nanii man Yuvii̱ rihaan Sayuun á”, ase cata̱j ꞌó yuvii̱, “Ni̱ꞌyaj soj; yoꞌ nicunꞌ soꞌ á”, ne̱ se̱ cuchumán rá soj maꞌ. 22ꞌO̱ se caꞌna̱ꞌ uxrá síí aꞌmii ne̱ cata̱j se vaa Síí Caꞌnéé Yaꞌanj Ti̱nanii man Yuvii̱ rihaan Sayuun me nij soꞌ, ne̱ caꞌna̱ꞌ uxrá síí aꞌmii ne̱ cata̱j se vaa nataꞌ nij soꞌ snana̱ Yaꞌanj a. Ne̱ quiꞌya̱j nij soꞌ da̱j a̱ nij suun noco̱o ga̱ suun quiꞌya̱j caꞌa̱nj rá nij yuvii̱, cheꞌé rej tiha̱ꞌ yuꞌunj nij soꞌ man cunuda̱nj nij yuvii̱ na̱nj ado̱nj. Ne̱ nda̱a gu̱un rá nij soꞌ tiha̱ꞌ yuꞌunj nij soꞌ man nij síí narii Yaꞌanj, tza̱j ne̱ se̱ caꞌve̱e quiꞌya̱j nij soꞌ da̱nj maꞌ. 23Ta̱dó uxrá soj á. Nihánj me se a̱j cataj xnaꞌanj ꞌu̱nj rihaan soj da̱j gu̱un rihaan chumii̱ nihánj vaa güii na̱nj á.

24’Tza̱j ne̱ güii yoꞌ me se asa̱ꞌ navij quisíj sayuun yoꞌ, ga̱a ne̱ gu̱un rmi̱ꞌ güii gu̱un rmi̱ꞌ yavii gu̱un rmi̱ꞌ, 25ne̱ cayu̱u nij yatiꞌ xta̱ꞌ, ne̱ quina̱a̱n ta̱ranꞌ nij rasu̱u̱n nucua̱j ma̱n rej xta̱ꞌ a. 26Ga̱a ne̱ queneꞌe̱n nii mán ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ á. Dan me se rque ngaa caꞌna̱ꞌ ꞌu̱nj, ne̱ gu̱un nucua̱j ndoꞌoj quiri̱i̱ taꞌngaj, ne̱ niꞌndaj ya̱ sa̱ꞌ veꞌé curuvi̱ꞌ ꞌu̱nj caꞌna̱j a. 27Ga̱a ne̱ caꞌne̱j ꞌu̱nj man nij se‑mo̱zó ꞌu̱nj cuchi̱ꞌ nij soꞌ rihaan nu̱ꞌ chumii̱ nihánj, ne̱ dan me se naquiꞌya̱j chre̱ꞌ ꞌu̱nj man nij síí narii Yaꞌanj man canoco̱ꞌ manj a. Dan me se caꞌa̱nj nij se‑mo̱zó ꞌu̱nj rihaan nu̱ꞌ cachra̱ꞌ chumii̱ nihánj, nano̱ꞌ nij soꞌ ta̱ranꞌ nij síí cunu̱u chre̱ꞌ ga̱ ꞌu̱nj na̱nj ado̱nj.

Cataj Jesús da̱j queneꞌe̱n níꞌ se vaa nichrunꞌ caꞌna̱ꞌ uún soꞌ a

28’Tu̱cuꞌyón soj nana̱ nihánj nana̱ cheꞌé chruun higó á. Ga̱a quisíj nahuun yaꞌni̱j tahúj chruun, ne̱ naca coj yaꞌni̱j raꞌa chruun, ne̱ neꞌen soj se vaa nichrunꞌ ꞌnaꞌ tiempó maan a. 29Dan me se xca̱j uún soj cuentá se vaa asa̱ꞌ queneꞌen soj nu̱ꞌ se vaa cataj xnaꞌanj ꞌu̱nj rihaan soj cuano̱, ne̱ nichrunꞌ caꞌna̱ꞌ uún ꞌu̱nj na̱nj ado̱nj. Dan me se ase vaa síí nicu̱nꞌ taꞌyaa roꞌ, ga̱a̱ ꞌu̱nj ado̱nj. 30Ya̱ ya̱ cata̱j xnaꞌanj ꞌu̱nj rihaan soj cuano̱ se vaa queneꞌe̱n taꞌa̱j soj si̱j vaa iꞌna̱ꞌ rihaan chumii̱ nihánj cuano̱ se vaa quisi̱j ya̱ nu̱ꞌ rasu̱u̱n nihánj nu̱ꞌ se vaa cataj xnaꞌanj ꞌu̱nj rihaan soj cuano̱ na̱nj á. 31Vaa güii caꞌa̱nj niꞌya̱ chumii̱ ga̱ xta̱ꞌ, tza̱j ne̱ snana̱j me se daj chiha̱a̱ míj se̱ caꞌanj niꞌya̱ yoꞌ maꞌ.

Ne neꞌen níꞌ me güii caꞌna̱ꞌ uún Jesús maꞌ

32’Nihánj me cata̱j xnaꞌanj ꞌu̱nj rihaan soj se vaa a̱ ꞌó síí ne neꞌen me güii ne̱ me orá caꞌna̱ꞌ uún ꞌu̱nj rihaan chumii̱ nihánj maꞌ. Caꞌve̱e se nda̱a se‑mo̱zó Yaꞌanj ma̱n rej xta̱ꞌ, caꞌve̱e se nda̱a ma̱ꞌanj Taꞌni̱j Yaꞌanj, tza̱j ne̱ ne neꞌen núj me güii me yoꞌ maꞌ. O̱rúnꞌ Réj me síí neꞌen na̱nj ado̱nj. 33ꞌO̱ ni̱ꞌyaj soj, ne̱ se̱ guun coto̱j soj maꞌ. ꞌO̱ se ne neꞌen uxrá soj me güii me caꞌna̱j maꞌ. 34Dan me se ase vaa síí caꞌa̱nj ꞌó chumanꞌ na̱j ga̱nꞌ vaa tiempó nuvíꞌ ꞌu̱nj ca̱yáán a. A̱j tanáj soꞌ veꞌ tucuá soꞌ, ne̱ caꞌneꞌ soꞌ suun rihaan ꞌo̱ ꞌo̱ nij mozó nu̱u̱ rihaan soꞌ se vaa veꞌé tu̱mé nij soꞌ nu̱ꞌ siꞌyaj soꞌ, ne̱ cataj soꞌ rihaan síí tumé taꞌyaa se vaa ni̱ꞌyaj soꞌ a. 35Cheꞌé dan tu̱mé uxrá soj man soj, ne̱ ni̱ꞌyaj soj á. ꞌO̱ se ne neꞌen soj aman caꞌna̱ꞌ ꞌu̱nj si̱j tucua̱ veꞌ maꞌ. Caꞌve̱e caꞌna̱j rej tiꞌnuu, caꞌve̱e rej ya̱nꞌ, caꞌve̱e orá aguáj taꞌloo caꞌve̱e rej naꞌya̱a̱n caꞌve̱e, 36ne̱ ta̱dó soj se̱ gaa na̱nj ta̱j niꞌyo̱n caꞌna̱j ne̱ nari̱ꞌ ꞌu̱nj man soj ne̱ xca̱j ꞌu̱nj cuentá se vaa otoj rmaꞌa̱n soj na̱nj á. 37Ne̱ nana̱ nihánj nana̱ taj xnaꞌanj ꞌu̱nj rihaan nij soj roꞌ, veé nana̱ nihánj taj xnaꞌanj ꞌu̱nj rihaan cunuda̱nj nij yuvii̱, se vaa tu̱mé soj man soj se̱ gaa na̱nj coto̱j rmaꞌa̱n soj á ―taj Jesús rihaan caꞌa̱nj nij síí tucuꞌyón snana̱ soꞌ a.

موجودہ انتخاب:

San Marcos 13: trc

سرخی

شئیر

کاپی