Mark 7

Sirik Yudehey mulumoko di avu dideˀ taŋhay

(Yo pura Mat 15.1-9)

1Farisahay ati mekelemey a wuzla buy ngi ɓimuwahay musoko ti Zerusaleme, a kusom aciki Yesu. 2A puraka na, mekelemey a wuzla mizli ngisi Yesuhoyo, a zumam ɗaf ti haŋ misi dili, mbiɗeˀvra: manja buna haŋ ceɗceɗ le. 3Asi mike na, Farisahay ati Yudehey gar na, anta zumam ɗaf manja buna haŋ ceɗ ceɗ le ta, a gam di i sirik ngi dideˀ taŋhay. 4Taŋ mumoko le tir luuma na, a zumam gwat t'aruŋ, sey da a bunam le ɗagay. Mezegwel mekelemey ada haɗi taŋ magaka taŋ, kaɓa buna sikiɗey, kisahay, misirgaɗay. 5Vurˀe, Farisahay ati buy ngi ɓimujuwahay, a cufuɗaka Yesu: «Mizli ngisi kahay anta sipaka sirik ngi dideˀ ndraˀahaya kasl kasl ta, a zumaka gwata ti haŋ misi dili vur mike?» 6Yesu a ɓa taŋ:

«Ezayi a njika ɓi ngi Buymisemuŋ le kaslsla wãˀ a hirnga kumo, kum miɓi mi cuw cuwoy, asi a ɓi na:

‹Mizli tayna, a ɗuvikiy hirnga ti mi tewle,

amma mevel taŋ naŋ kileŋ avu ya.

7Taŋ madilkam a mbuŋ ɗu na, i ngatara lambaˀ,

yo gwat taŋ madubunaka da mizli na, i ɓi ngi mizli muɗuvaka si.› 8Ki pulaka ɓi muɗuva ngi Buymisemuŋ baˀ murciki, joˀ ki sipam sirik ngi mizli.»

9A ɓa taŋ: «Muɗuva, Ɓi ngi Buymisemuŋ ki baˀaka baˀ kuy kuy wãˀ, joˀ ki gam sirik ngi dideˀ kumoy. 10Asi Moyis a ɓi na: ‹Ɗuva hirnga da bunuk ati munuk,› yo ma na: ‹Mbur maza cine ati mumuŋ naŋ na, sey a kiɗaka vagay.› 11Amma kumo, ki ɓam: ‹Da mbur a ɓa cine malla mumuŋ naŋ le: Gwat ya masa junuw ti naŋ zleˀe na, i Kurbaŋ, mbiɗeˀvra: sedege mihĩˀĩ da Buymisemuŋ na, 12ki pulakaŋ di i jiviɗ ɓa a jina cine malla mumuŋ mata. 13Naŋ kanah, ki hiryam di i Ɓi ngi Buymisemuŋ ti sirik kum madubunaka da mizli na, yo ki gam gwatay haɗi mubam vu ati tayna.»

Gwat maci ti mbur ar dili

(Yo pura Mat 15.10-20)

14Dar Yesu a zila zigiduw a muŋ ma, a ɓa taŋ: «Kum gar, cinaka mingiɓi ɗu ani, ɓa ki slaka wala naŋ: 15Gwat ngi vra gar, maci nga hur mbur na, a ci ti mbur ar dili gu ta. Amma maci ti mbur ar dili, i gwat mabo ti hur mevele.» 16Da kum ada ti slimiɗ macin na, cinam kuy kuy.

17Ti Yesu mici ngi hay, naŋ mikilǝŋ vu zigiduwo na, mizli ngi seˀehey a cufuɗaka mbiɗeˀvra ngi ɓi naŋ miwa taŋ di ti wi nah vuna. 18Yesu a ɓa taŋ: «Kumo kwana, kum manja lesley ya kwa? Gwat ngi vra maci nga hur mburo, a caŋ ar dili gu ta na, ki sinaka ta kwa? 19Asi mike na, naŋ anta ci ng'ar mevele ta, amma a ci nga kwacay naŋ, a dirba nah, a sa bawa avra.» Yesu miɓi kahana, mbiɗeˀvra: gwat ngi zum gar na, a zumaka zuy.

20A ɓi ma: «Maca mbur ar dili i gwat mabo ti hur naŋ. 21Asi mike na, wuluk malambaˀa, a bo zle a hur mbur, zle a mevele, a hizigiɗaŋ ɓa a gi biyãˀbiyãˀ, a hul, a kiɗ hirnga, 22a gi madama, a gi may gwat, a gi moˀore, a gi gilaw da mbur, a gi sulome, suloŋ, zi vu, a gi zlokoko, a tiri gilaw. 23Gwat malambaˀ tayna gar, a boko baɗ a hur mbur. Maci ti mbur ar dili i nah.»

Ngwas mulak mitiɓa Yesu

(Yo pura Mat 15.21-28)

24Yo Yesu mucuh ti kẽh na, aru nga hirwuy Tir. A ci ngi hay mbur, a wuɗ ɓa mizli a sinakaŋ ta. Amma a ɗum gu ta. 25Neˀ si na, ngwas ada, zuŋ naŋ, setene a hirnga, a cin maɓaka ɓi ngi Yesu na le. Joˀ a sawa, a diɗ a mbuŋ naŋ. 26Ngwas nah i zuŋ Yude ta, cak naŋ i ngwas Finiki, hirwuy Siri. A tumbulo Yesu ɓa a ɓula setene ngi hirnga zuŋ tuwa. 27Amma Yesu a ɓaŋ na: «Pula ziri a mbam ɗagay, asi a zlir ngi zuɓa ɗaf ngi ziri, ɓa ngi hiziga da ziri kiriheye ta.» 28Ngwasa mbiɗaŋ di: «Kanah ɓula Buy, amma zir kirihey vuna, a zumam di i misi mi ngi ziri madiɗo nga ruwuy takwa?» 29Yesu a ɓaŋ na: «Asi mingiɓi ɗik hana na, mi ngi hay. Setene a bi le tivu zuŋ ɗike.» 30Ngwas a mi ngi hay, ara luuma zuŋ, a hin le tup ar arngawo naŋ. Setene a bi le ti vaŋ.

Yesu miɗiya mbur midigizla, yo maɓi ɓi gu ta

31Yo Yesu a pula hirwuy Tire, a cuh bal ti Sidoŋ, a mi nga mi yam madiɗa ngi Galile, a ngira hirwuy Dekapol kããk. 32A sakaŋ ti mbur midigizla, yo a ɓi tuwaˀ tuwaˀa ma, a tumbulokoŋ ɓa a buca haŋ ava. 33Yesu a bi di kileŋ a wuzla zigiduwo, baˀ pal naŋ, a caŋ muzuŋ haŋhay nga slimiɗe, a tuf tazlay, a wusaŋ ˀirne. 34Dar a zuɓa hiri nga muŋ, a niˀic, a ɓa mbur tuwa: «Effata!» mbiɗeˀvra: «Wun!» 35Ar nah si na, slimiɗey a wunam, ˀirne a pusuk, a ɓi calala. 36Yesu a kuta taŋ, ɓa a ɓaka ɓi nah da mbur ta. Amma ko naŋ makuta taŋ kuteˀkuteˀ le na kwana, taŋ ra tilam di mi ti gidaŋ jaka. 37Ɓi nah a zuma hirnga le haɗa da mizli, a ɓam: «Gwat naŋ maga gar na naŋ kuy! A ga, ɓa midigizlahay a cinam, yo ɓa mizli maɓam gu tahay, a ɓam!»

موجودہ انتخاب:

Mark 7: BEGDC

سرخی

شئیر

کاپی