Mark 4

Ɓi ngi mbur mizliɗa hilfa gwat ar guva

(Yo pura Mat 13.1-9; Luk 8.4-8)

1Yesu ara dubuna gwat da mizli a mi yam madiɗa tuwa ma ni. Zigiduw haɗi a kus ng'avaŋ. Taŋ haɗi, hã a ci palalam misi angi yama, a cifi anga. Mizli kwana, taŋ hirkim a ˀaydidike, hiri pulaˀ pulaˀ nga mi yama. 2Joˀ a dubuna taŋ gwatay haɗi, a wa taŋ di weˀ ti wi. Yo naŋ madubuna taŋ gwat na, a ɓa taŋ: 3«Cinam! Mbur a bi nga zliɗa hilfa gwata. 4Ti naŋ mazliɗa hilfa gwat ar guva tuwa na, mengeleleŋ mekelemey a ndilam a jiviɗi. Ɗiyuwoy a soko, a ndaka taŋ gar. 5Mekelemeye, a ndilam ar li ɗugur, hirwuy anta haɗi anga ta. A pusam kutum si, asi hirwuy anta jileŋ ta tuwa. 6Ti pas mijiɗo na, a wura taŋ, a muˀulom, asi a lumam li dira virzi ta. 7Mekelemeye, a ndilam a wuzla hadaw. Hadawa gil, a suro taŋ, mbak ko a gam ta. 8Amma mengeleŋ mekelemeye, a ndilam ar li mezle. A gilam mosloˀ mosloˀ, a gam, mekelemeye, purla gar na, a gi mengeleŋ ava kukur makir, mekeleme kukur merkeɗ, mekeleme skata.» 9Joˀ Yesu a ɓi: «Mbur misi ti slimiɗ macin na, anja a cin!»

Yesu a wa ɓi weˀ ti wi vur mike?

(Yo pura Mat 13.10-17; Luk 8.9-10)

10Ti Yesu mubuˀ baˀ pal naŋ na, mizli mugun hirnga naŋ ati mizli mukuruˀnga cuw ngi seˀeheye, a zlaka a cufuɗakaŋ ar ɓi naŋ mawa taŋ di ti wi na. 11Joˀ Yesu a ɓa taŋ: «Kumo, ɓi ngir Zumabuy ngi Buymisemuŋ, a bugukum di le. Amma avu mizli mekelemeye, sey a waka taŋ di weˀ ti wi. 12Vur ɓa, ko da ara puram hiri kwana, anta puram gisiŋ ta,

ko da ara cinam kwana, anta slaka wala ngi ɓi ta.

Vur taŋ masa mbiɗaka mevele,

ɓa Buymisemuŋ a puya mungra taŋ avra!›»

Mbiɗeˀvra ngi ɓi ngi mbur mizliɗa hilfa gwat ar guva

(Yo pura Mat 13.18-23; Luk 8.11-15)

13Dar Yesu a ɓa taŋ: «Dambalaka, kum anta cinam ɓi ya muwukum di weˀ ti wi hana ta. Na, ɓi ya masa ɓu kum taŋ weˀ ti wi vur Zumabuy ngi muŋ gar na, kisa cinaka mbri mbrike? 14Mizliɗa hilfa gwat na, a zliɗ di i Ɓi ngi Buymisemuŋ. 15Ciki jiviɗ i mizli misi Ɓi ngi Buymisemuŋ midiɗ anga. Taŋ micinaka ɓi le na, Satan a so kutum, a muɗa ɓi midiɗ a mevel taŋ tuwa. 16Naŋ kanah ma, mengeleleŋ mekelemey mindilam ar ɗugur na, i mizli micinaka Ɓi ngi Buymisemuŋ le, a tiɓaka kutum ti mumul. 17Amma dimbasl anta avu taŋ ta, taŋ i mizli mazikam ti zik si. Yo da bonoy a so le, malla da ara sipaka taŋ nder nder asi Ɓi ngi Buymisemuŋ na, a pulaka kutum si. 18Mengeleleŋ mekelemey mindilam ar hadaw na, taŋ i mizli micinam Ɓi ngi Buymisemuŋ le, 19amma wuluk ngi duniya, tikin ngi luuma zlili ati may gwat mekelemeye, a ci a hur taŋ, dar a vuso Ɓi ngi Buymisemuŋ, mbak a sik mata. 20Yo mekelemey mindilam ar li mezle tuwa, taŋ i mizli micinaka Ɓi ngi Buymisemuŋ le, a tiɓakaŋ, a gi haɗa. Mengeleleŋ avu purla gar na, kukur makir, numuŋ, kukur merkeɗ, mekeleme skata.»

Ɓi ngi Lampe

(Yo pura Luk 8.16-18)

21Dar Yesu a ɓa taŋ: «Mbur ada so ti lampe, ɓa a ca asi kisa malla asi arngawo kwa? A ɗuva taˀ ar li ɗuv naŋ takwa? 22Asi gwat miyaŋŋa masa bo bidas ta na, anta. Ko gwat muɗumo zleˀe masa bugo vu ar li babara ta na, anta. 23Da mbur ada ti slimiɗ macin na, anja a cin!» 24Joˀ Yesu a ɓa taŋ ma: «Jam lesl avu ɓi kum macinakaŋ! Daram kum mawam di gwat na, a sa wu kum gwata ti nah ya, hã a sa vulukum a meˀe ma. 25Asi mburo, da naŋ da ti gwat na, a sa vulakaŋ, amma mbur manja gwat na, a sa tiɓaka nga naŋ mineˀ vuna ma.»

Ɓi ngi hilfa gwat magil pal naŋ

26Yesu a ɓi ma: «Zumabuy ngi muŋ, naŋ ka mbur mizliga hilfa gwat le ar guva naŋ. 27Ko da naŋ ar li hinje, ko naŋ titiri, ko ti papas, ko ti duvuɗ gar na, hilfa gwat tuwa ra pus, ara gil, anta si na a gi kahana kahana ta. 28I hirwuy pal naŋ maga gwata. A puso di dumbuŋ, i kalaf ɗagay, dar a bo ti hirnga, a dirba nah, i daw ti zinga ava likwicik. 29Yo da dawa nih le muduba so na, a ngumaka ti slagway, asi i hin ngi sifi muduba.»

Ɓi ngi zinga ngi lar mekelem ada

(Yo pura Mat 13.31-32,34; Luk 13.18-19)

30Yesu a ɓi ma: «Zumabuy ngi muŋ, i sa waka ti mike? Malla i sa bigaka, ti ɓi wanaka? 31Naŋ kaɓa zinga ngi lar#4.31 Lar nah na, a zilaka ti mi frasẽ mutarde, zinga naŋ a luguɗom di lar. mekelem ada. Da taŋ mira dikaka na, i hilfa gwat meciɗek muwãˀ ngi wuzla hilfa gwat ngir duniya gar. 32Amma da a dikaka le na, a gil hã a funa lar mekelemey gar. A ki haŋ cay cay, hã ɗiyuw ngi ɓuhoy a soko, a ɗiyam hayay a susuɗuk naŋ.» 33Yesu a tila taŋ mi ti Ɓi ngi Buymisemuŋ, ti wa taŋ sukwi ngi ɓihey haɗi weˀ ti wi kahana, weˀe avu gidaŋ taŋ, taŋ macinaka gu. 34A ɓa taŋ manja a wa taŋ di weˀ ti wi na, anta. Amma baˀ pal taŋ ati mizli ngi seˀehey na, a biga taŋ wala ngi ɓi nah gar.

Yesu ɓi micica burkataŋ

(Yo pura Mat 8.23-27; Luk 8.22-25)

35Kalla, ngi pastaˀ naŋ na, Yesu a ɓa taŋ: «Tuwuɗukum nga dubazaw vay diga.» 36A pulaka zigiduwo, a ram ti Yesu ti palalam naŋ misi anga tuwa. Palalam melekemey ada ava akẽh. 37Birkataŋ madiɗa a ndilawa, yam a ngi diɓel, a pi nga hur palalama, hã a wuɗ a naha. 38Yesu naŋ tup ti dirba, hirnga ɓaˀ ar gwat ngi taha hirnga, ara hinje zleˀe. Dar mizli ngi seˀehey a puɗkakaŋ, a ɓakaŋ: «Kumani, ndra mazizam na, a cuw ka ta wãˀ kwa?» 39Yesu mupuɗuk na, a buca himiɗe, a ɓa yama: «Ki wus ta! Cifi teˀ teˀe!» Burkataŋ a kiɗ mi le, li a cici kiŋ. 40Dar Yesu a ɓa mizli ngi seˀeheye: «Ki zluwunam mi kine ka? Ki tiɓam t'aruŋ kwa?» 41Amma zluwun a ga taŋ le haɗi teˀe, a ɓam ar wala taŋ: «I wa hana vuna ska? Ɓa hã burkataŋ ati mubuliy a cinakaŋ mi na ka!»

موجودہ انتخاب:

Mark 4: BEGDC

سرخی

شئیر

کاپی