Mt 6

Li lemoox sa' muqmu

1“Chereek'ahaq eerib', meeb'aanu li us chiruheb' li tenamit yal re naq tex'ile'q xb'aaneb'; wi jo'kan teeb'aanu, maak'a'aq leeq'ajkamunkil rik'in leechoxahil Yuwa'.

2“Jo'kan utan, naq taatenq'a junaq li wank sa' aajel ru, maayaab'asi tronpeet chawu jo' neke'xb'aanu eb' laj ka'pak'al u sa'eb' li ch'utleb'aal kab'l ut sa' b'e re naq te'oxloq'iiq xb'aaneb' li tenamit. Relik chi yaal ninye eere naq ak xe'xk'ul li xq'ajkamunkileb'. 3A'ut laa'at, naq taatenq'a li wank sa' aajel ru, mixnaw laatz'e uq' li k'aru naxb'aanu laanim, 4re naq li k'aru xasi wanq sa' muqmu; ut laaYuwa' li naril li wank sa' muqmu, tatxq'ajkamu.

Li tz'aqal tijok

(Lk 11,2-4)

5“Ut naq textijoq, moko jo'kaqex ta eb' laj ka'pak'al u: nawulak chiruheb' li tijok chi xaqxo sa'eb' li ch'utleb'aal kab'l ut sa'atqeb' li xxuk li k'ayiil re xk'utb'aleb' rib' chiruheb' li tenamit. Relik chi yaal ninye eere naq ak xe'xk'ul li xq'ajkamunkileb'. 6A'ut laa'at, naq tattijoq, okan sa' laawochoch, tz'ap li okeb'aal ut tijon chiru laaYuwa' li wank sa' muqmu; ut laaYuwa' li naril li k'aru wank sa' muqmu, tatxq'ajkamu.

7“Ut naq textijoq, meeye k'iila aatin jo' neke'xb'aanu eb' li maak'a'eb' xpaab'aal: neke'xk'oxla naq rik'in li k'iila aatin te'ab'iiq. 8Meejuntaq'eeta b'i' eerib' rik'ineb' a'an, xb'aan naq leeYuwa' ak naxnaw li k'aru nekeraj ru chi toj maji' neketz'aama chiru. 9Jo'ka'in naq textijoq laa'ex:

«At qaYuwa' li wankat sa' choxa,

santob'resinb'il taxaq laak'ab'a',

10chichalq ta laanimajwal awab'ejihom,

chi'uxq ta laawajom

arin sa' ruuchich'och' jo' sa' choxa.

11Chak'e ta qe hoon li qawa re rajlal kutan,

12ut chakuy chasach ta li qamaak

jo' laa'o xqakuyeb' xmaak li xe'maakob'k chiqu.

13Ut moohaakanab' chi t'ane'k sa' li aaleek,

choohaakol b'an chiru li maa'us».

14“Wi laa'ex nekekuyeb' xmaak leeras eeriitz'in, leechoxahil Yuwa' tixkuy tixsach ajwi' eemaak. 15Wi ut ink'a' nekekuyeb' xmaak leeras eeriitz'in, chi moko leeYuwa' tixkuy tixsach eemaak.

Li ayuun sa' muqmu

16“Naq tex'ayuuniq, moko jo'kaqex ta eb' laj ka'pak'al u li neke'xpak' xrahilaleb' xch'ool: neke'xpo' li rilob'aaleb' yal re naq taak'utunq chiruheb' li tenamit naq yookeb' chi ayuunik. Relik chi yaal ninye eere naq ak xe'xk'ul li xq'ajkamunkileb'. 17A'ut laa'at, naq tat-ayuuniq, chayul laajolom sa' sununkil b'an ut chach'aj laawu, 18re naq moko chiruheb' ta li tenamit taak'utunq naq yookat chi ayuunik, chiru b'an laaYuwa' li wank sa' muqmu; ut laaYuwa' li naril li k'aru wank sa' muqmu, tatxq'ajkamu.

Li tz'aqal b'ihomal

(Lk 12,33-34)

19“Meetamresi eeb'ihomal arin sa' ruuchich'och' b'arwi' li xmaxel ut li xq'olel neke'sachok re, jo'wi' eb' laj elq' neke'xte rokeb'aaleb' ut neke'elq'ak. 20Chetamresi b'an eeb'ihomal sa' choxa b'arwi' li xmaxel ut li xq'olel ink'a' neke'sachok, ut eb' laj elq' ink'a' neke'xte rokeb'aaleb' chi moko neke'elq'ak. 21Xb'aan naq b'ar wanq laab'ihomal, aran ajwi' taawanq laach'ool.

Li xsaqenk li tz'ejwalej

(Lk 11,34-36)

22“Li xsaqenk li tz'ejwalej a'an li xsa' laawu. Jo'kan utan, wi saqenk ru xsa' laawu, chixjunil laajunxaqalil saqenaq ajwi' ru; 23ab'an wi ink'a' chaab'il xsa' laawu, chixjunil laajunxaqalil taawanq sa' aak'ab'. Ut wi li saqenk li wank aawik'in a'an q'oqyink ru, k'ajo' xnimal li aak'ab'!

Li Qaawa' ut li tumin

(Lk 16,13)

24“Maa'ani naruhank chi k'anjelak chiru wiib'aq aj eechal re, xb'aan naq xik' taaril junaq ut tixra li jun chik, malaj tixk'e xch'ool rik'in junaq ut tixtz'eqtaana li jun chik. Ink'a' naru texk'anjelaq chiru li Yos ut chiru li Tumin.

Li xk'oxlankil rix li qayu'am

(Lk 12,22-31)

25“Jo'kan naq ninye eere: Mixik eech'ool chi k'oxlak chirix leeyu'am k'aru teetzeka, chi moko chirix leetz'ejwal k'aru teetiqib' wi' eerib'. Ma ink'a' tab'i' jwal loq' li qayu'am chiru li qatzekemq, ut li tz'ejwalej chiru li aq'ej? 26Ilomaqeb' li xik'anel xul li neke'rupupik chiru choxa: ink'a' neke'awk, chi moko neke'q'olok, chi moko neke'tamok sa'eb' li xk'uuleb'aaleb'; ut leechoxahil Yuwa' nach'oolanink reheb'. Ma ink'a' tab'i' q'axal loq'ex laa'ex chiruheb' a'an? 27Ani eere laa'ex taaruhanq chi xtiqb'al wiib'aq k'utub' li xteram, us ta naxik xch'ool chi xk'oxlankil?

28“Ut k'a'ut naq naxik eech'ool chi k'oxlak chirix leeraq'? Chek'e reetal eb' li uutz'u'uj sa' pim, chanru neke'k'iik: ink'a' neke'xtawasi rib' chi moko neke'q'inok. 29A'ut laa'in ninye eere naq chi moko laj Salomón sa' chixjunil li xnimal xloq'al kixtiqib' rib' kama' junaq reheb' a'an. 30Wi li Yos jo'ka'in naq naxtiqib' li pim li wank anaqwan chiru tzuultaq'a ut wulaj taakutmanq sa' xam, ma ink'a' tab'i' q'axal numtajenaq chik tixb'aanu eere laa'ex li kach'in ajwi' leepaab'aal? 31Jo'kan utan, mixik eech'ool chi k'oxlak chi moko teeye: «K'aru taaqatzeka? K'aru taaquk'? K'aru taaqatiqib' wi' qib'?». 32Chixjunil a'in neke'xk'oxla li maak'a'eb' xpaab'aal. Ab'an ak naxnaw leechoxahil Yuwa' naq nekeraj ru chixjunil a'in. 33Sik'omaq xb'enwa li xnimajwal awab'ejihom li Yos ut li tiikilal li nachalk rik'in, ut chixjunil li nekeraj taak'eemanq chaq eere cho'q xtz'aqob'. 34Mixik b'i' eech'ool chi k'oxlak chirix li kutan wulaj, xb'aan naq li kutan wulaj taawanq ajwi' xk'oxlankil rix. Tz'aqalaq li ch'a'ajkilal re li junjunq chi kutan.

موجودہ انتخاب:

Mt 6: QQC

سرخی

شئیر

کاپی