Mal 1
1
Li Qaawa' naxraheb' laj Israel
1A'an a'in li aatin kixye li Qaawa' reheb' laj Israel chi xtz'uumal re laj Malakías.
2“Laa'in jwal nekexinra”, chan li Qaawa'. Ab'an laa'ex nekeye: “K'aru nak'utunk wi' naq nokoohaara?”, chankex. Ut li Qaawa' naxye: “Ma ink'a' tab'i' riitz'in laj Esaú laj Jakob? Laa'in jwal kinra laj Jakob 3ut xik' kiwil laj Esaú.#1,2-3 Gn 25,23-26; Ro 9,13. Ut li xch'och'el laj Esaú, li tzuul ru naq kiwank, kinkanab' chi junesal na'ajej, ut li xna'ajeb' li xxe'toonil yuwa' kinsutq'isi cho'q chaqich'och'”.
4Wi ta eb' laj Esaú#1,2-5 Is 34,5-17; 63,1-6; Jr 49,7-22; Ez 25,12-14; 35,1-15; Am 1,11-12; Abd 1-14. te'xye: “Yaal naq xoosache'k, ab'an tqawaklesi wi' chik li qatenamit”, cha'qeb', li Qaawa', li Nimajwal Yos, tixye: “Wi eb' a'an te'xwaklesi wi' chik li xtenamiteb', laa'in tinjuk'uq wi' chik re. Ut li na'ajej a'an tixk'ab'a'in: «Xtenamitul li maa'usilal», ut «Tenamit b'arwi' junelik wanq li xjosq'il li Qaawa'»”. 5Laa'ex teeril rik'in leeru ut teeye: “Nim xwankil li Qaawa' toj junpak'al xteepal Israel!”, cha'qex.
Li xq'usb'aleb' laj tij
6Li Qaawa', li Nimajwal Yos, kixye reheb' laj tij:
“Li alalb'ej naroxloq'i li xyuwa' ut laj k'anjel naxk'e xloq'al laj eechal re. Wi laa'in leeyuwa', k'a'ut naq ink'a' nikineeroxloq'i? Wi aj eechalin eere, k'a'ut naq ink'a' nekek'e inloq'al? Laa'ex nikineetz'eqtaana ut nekeye: «K'aru xatqatz'eqtaana wi'?», chankex. 7Laa'ex nekemayeja sa' lin'artal li tzekemq muxb'il ru, ut nekepatz': «K'aru xqamux wi' aaloq'al?», chankex. Laa'ex nikineetz'eqtaana naq nekek'oxla naq naru xtz'eqtaanankil lin'artal 8ut maak'a' eemaak xb'aan xmayejankil li mutz'eb' aj xul, yeq ra'eb' malaj yajeb'.#1,8 Lv 22,18-25; Dt 15,21. Ayuqex ut sihomaq chaq a'an re lee'awab'ej! Ma taawulaq tab'i' chiru? Ma tixk'ul tab'i' xch'ool leemaatan? -chan li Nimajwal Yos-.
9“Anaqwan tz'aamahomaq rusilal li Yos sa' qab'een re naq taaruxtaana qu. Ab'anan chanru naq taaril xtoq'ob'aal eeru naq yookex chi xyeechi'inkil a'an? -chan li Nimajwal Yos-. 10Us rajan naq jun taxaq sa' eeyanq tixtz'ap li rokeb'aal li wochoch re naq ink'a' texk'atoq mayej sa' lin'artal chi maak'a' rajb'al! Xb'aan naq moko sa ta linch'ool cherix chi moko tink'ul chik leemayej.#1,10 Is 1,13; Am 5,21-24.
11“Sa' chixjunileb' li tenamit chalen sa' releb'l saq'e toj sa' rokeb'l jwal nim link'ab'a' ut yalaq b'ar nayeechi'imank k'ajpom ut mayej li ink'a' muxb'il ru, sa' ink'ab'a'. Xb'aan naq eb' li jalan tenamit neke'xk'e inloq'al -chan li Nimajwal Yos-.
12“A'ut laa'ex aj tij nekesach inloq'al naq nekeye: «Li xmeex li Qaawa' naru xmuxb'al xloq'al, ut li tzekemq wank aran naru xtz'eqtaanankil». 13Laa'ex nekeye: «Tawajenaqo chi xb'aanunkil a'in!». Ut nikineetz'eqtaana. Ut toj nekek'oxla naq nasaho'k linch'ool rik'in leek'ulunik chi xmayejankil li elq'anb'il xul, malaj li wakax yeq roq malaj ut yaj. 14Tz'eqtaananb'ilaq taxaq li nab'alaq'ik, a' li wank jun xchaab'il xul ut naxye naq tixq'axtesi we, ab'anan chirix chik a'an tixmayeja re li Qaawa' li yaj aj xul! Laa'in li Nimajwal Awab'ej, ut nak'eemank inloq'al sa' xyanqeb' li tenamit!”, chan li Qaawa', li Nimajwal Yos.
موجودہ انتخاب:
Mal 1: QQC
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Q'eqchi DC Bible © Bible Society in Guatemala, 2005.