Lukas 18
18
Eeli lyomuhepe nomukoyi onkembi
1Iya Jesus wa heela ovalongwa ve eeli okutya ngava kumbe apehe, háva poyola. 2We ve heela ha tyaa: “Mondolopa imo mwa li omukoyi wodhondaka nguha tila Kalunga, ye nguha tumbaleke ovantu. 3Mondolopa moka mwa li wo omuhepe, we ya kuye, he mu heele ha tyaa: ‘Mpopila ndje, u nkoyele omukondjethi wandje.’ 4Pa pita otembu onde omukoyi ahama hala, iya kon̯ima we lipopila momutima we ha tyaa: ‘Nandaku tiwa hí tila Kalunga, ame hí tumbaleke ovantu, 5me hala okukoyela omuhepe hengu, mena lyokutya wa ndjetela oudheu, opo há ndweyeke.’ ”
6 Muhona we ve heela ha tyaa: “Teelelen̯i omukoyi hengu onkembi, hima hee. 7Iya Kalunga mpaeli kaa koyele mouvyuuki ovaholowolwa ve mbave mu ithana omutenya nout̯iku? Kalunga ma t̯i outheno oku ve popila ngaile? 8Me mu heele okutya Kalunga me ve ningile tjo dhiva. Iya Omuna wOmuntu hime ya, ma vadha ko tuu eitavelo kombanda yohi?”
Omufarisai nomuthendelethi
9Iya eeli hendi Jesus we li hipululila wo ovantu vamo mbava tomba ovakwawo, wo mbave liun̯ika ovene okutya ovavyuuki. 10“Ovalumentu vavali va ya motempeli oku ka kumba, umo Omufarisai nomukwawo omuthendelethi.
11“Iya Omufarisai wa kulama ontali, he lipelele, wa kumba ha tyaa: ‘Kalunga, me ku pandula, mena lyokutya ame hí ngala ovantu vamo mbava nyeka, mbava punda, mbave hole ovihulo ne ngomuthendelethi hengu. 12Ame ndji litjaela ovikulya tuvali motjivike, ndji yandja ovityamulongo movipuka avihe mbindji mona.’
13“Iya omuthendelethi wa kulama kokule, ye kaa li ama hala okuyela omeho keulu. We likambula pomutima ha tyaa: ‘Kalunga, nt̯ila ndje onkenda, ame ndjimulundhi.’ 14Me mu heele okutya hengu wa tjuna koyawo, ae na ouvyuuki mbwaa pon̯a owOmufarisai. Iya auhe ngoka ngume linenepeke, ma nunupikwa, nangoka ngume linunupike, ma nenepekwa.”#Mat. 23:12; Luk. 14:11
Jesus ma pa oulele elao
(Mat. 19:13-15; Mark. 10:13-16)
15Iya ovantu va eta oupepe kuJesus e u t̯in̯e, atjaa ovalongwa hive tji mono, va tjaela mboka mbava li amava eta oupepe. 16Iya Jesus wa ithana oulele, u ye kuye, ha tyaa: “Yethen̯i oulele, u ye kwaame, hámu u tjaele, mena lyokutya otjilongo tjaKalunga otjovantu mbava ngala oulele hembu. 17Ame me mu heele otjatjili okutya nguhama tambula otjilongo tjaKalunga ngokalele, kaa i mo.”
Omulumentu omuhona
(Mat. 19:16-30; Mark. 10:17-31)
18Omunene umo wOvajuda wa pula Jesus ha tyaa: “Mulongethi omuwa, mba thele okuninga tji, ndji mone omwenyo waapehe?”
19Jesus we mu yaka ha tyaa: “Omena lyatji mo ntya ndjimuwa? Kaku na tja uke omuntu omuwa, Kalunga oye e li vala aika omuwa. 20Ovitumino u vi i: ‘Hó yono olukupo, hó dhipaa, hó vaka, hó kuminine, tumbaleka iho nanyoko.’ ”#Eks. 20:12-16; Deut. 5:16-20
21Omulumentu we mu yaka ha tyaa: “Ovipuka avihe hembi mbe vi takametha okudha koudhantu wandje.”
22Jesus hiee tji tee, we mu heela ha tyaa: “Wa kambetha po otjipuka tjimo. Enda, u ka landethe po ovipuka vyoye avihe mbyuu na vyo, ove u vi yandje kovathona. Iya ove u kale nemona meulu, tjau ove u ye, u ndandule.” 23Hiaa tee odhondaka ndhoka, wa li ae etetha onkenda, mena lyokutya wa li omuhona unene.
24Jesus hiaa mono okutya omuhona u yuvite oudheu, we mu heela ha tyaa: “Oudheu vi kumbave na ouhona okuya motjilongo tjaKalunga! 25Ongamelu okupitila meyulu lyonguya otjipu okupon̯a omuhona okuya motjilongo tjaKalunga.”
26Ovalongwa hiva tee odhondaka ndhoka hava tyaa: “Iya nan̯i nguma ulu okuhupithwa aan̯i?”
27Jesus we ve yaka ha tyaa: “Ovipuka mbii anyena ovantu, kaavi anyene Kalunga.”
28Petrus we mu heela ha tyaa: “Taa tuutuu, nt̯e twa thiaa po ovipuka vyetu, hatu ku landula.”
29Jesus we ve heela ha tyaa: “Ame me mu heele otjatjili okutya kape na tja ngwaa thiaa po onganda ne omukadhintu ne ovanitje novakulwe ovadhantu ne odhompandje ne ovanene ve ne ovana mena lyotjilongo tjaKalunga, 30ye a kale ngaile ahama pewa ovipuka ovingi mouye hembu, nomwenyo waapehe mouye mbumau ya.”
Jesus ma popi et̯o lye otjikando otjityatatu
(Mat. 20:17-19; Mark. 10:32-34)
31 Jesus wa itha po ovalongwa ve omulongo navavali, he ve heele ha tyaa: “Taa tuutuu, matu i kombanda koJerusalem, ovipuka avihe mbyaa sonekwa kovaprofeti ouhunga nOmuna wOmuntu, mavi ka hwithilwa po. 32Iya ye ma ka yandjwa kovapaani, mave ke mu penya, mave ke mu tatetha, mave ke mu tjakela omate, 33mave ke mu tona nodhosokoti, mave ke mu dhipaa, netango etyatatu ma ka imunwa kout̯e.”
34Ovipuka hembi ovalongwa va li ahave vi yuvite nokanunu, odhondaka ndhoka ve dhi holekwa, wo kava teele ovipuka mbyoka mbyaa li amavi popiwa.
Jesus ma velula omupot̯i popedhi naJeriko
(Mat. 20:29-34; Mark. 10:46-52)
35Etango limo Jesus hiaa li popedhi naJeriko, pa li omupot̯i ngwaa li aa kala pohi pontyo yondjila, ama kopo. 36Hiaa tee owingi wovantu mbumau ende po, wa pula ha tyaa: “Otjitji soka?”
37Wo ve mu heela hava tyaa: “OJesus Omunasareta ma ende po.”
38Wa wololoka ha tyaa: “Jesus, MunwaDavid, nt̯ila ndje onkenda!”
39Owolutenga ve mu anda a nyime, iya ngunya ha wololoka uke unene ha tyaa: “MunwaDavid, nt̯ila ndje onkenda!”
40Iya Jesus wa kulama, he ve heele, ve mu ete kuye. Hiee ya popedhi, Jesus we mu pula ha tyaa: 41“Mo hala ndji ku ningile tji?”
Omupot̯i we mu heela ha tyaa: “Muhona, me hala ndji twikuluke.”
42Jesus we mu heela ha tyaa: “Twikuluka, eitavelo lyoye lye ku velula.”
43Wa twikuluka vala powola yatjo ndjoka, he mu landula, ye ha tumbaleke Kalunga. Iya ovantu avehe mbave tji mona, va tumbaleka Kalunga.
موجودہ انتخاب:
Lukas 18: DBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Dhimba New Testament © Bible Society in Namibia, 2010.
