Lukas 14
14
Jesus ma velula omulumentu ngwaa li nothulo
1Iya Esabati limo Jesus hiaa i monganda yomunene umo owOvafarisai okulya, va li amave mu talele nawa. 2Iya pompuka mpoka Jesus mpaa li, pa li omulumentu ngwaa vela othulo. 3Jesus wa uta okupopya, ha pula ovalongiveta nOvafarisai ha tyaa: “Tja itavelwa tuu okuvelula omuntu metango lyEsabati ne katji itavelelwe?”
4Iya wo va nyima vala thiluu. Jesus wa itha po omulumentu ngoka, he mu velula, tjau ha tya, nga ende. 5We ve heela ha tyaa: “Aan̯i mun̯e nguu na omuna ne ongombe, hai wile mondjombo, kee i nana mo dhivadhiva nandaku tiwa ometango lyEsabati?”#Mat. 12:11
6Wo kava ulile oku mu yaka motjipuka hehi.
Jesus ma longo omukongi novakongwa
7 Jesus hiaa mono ovayenda hive liholowolele ovipundi vyokomeho, we ve heela eeli ha tyaa: 8“Andaa ku na ngwee ku kongo kotjipito tjolukupo, hó kala pohi kotjipundi tjokomeho, pamo pe na omuyenda umo ngoka ngwee ku pon̯a,#Omae. 25:6-7 9omwene wotjipito hime ya, mpe ma tyaa: ‘Yandja otjipundi tjoye kuhengu.’ Iya mo dhi po nolukundo, ho ka kala pohi kotjipundi tjokon̯ima. 10Iya andaa wa kongwa ko, kala pohi kotjipundi tjokon̯ima, opo omwene wotjipito hime ya, ae ku mono, a tyee: ‘Epanga lyandje, hweena komeho.’ Iya mo tumbalekwa movipathi vyovantu avehe mbave li pamo naove pokulya. 11Iya auhe ngoka ngume linenepeke, ma nunupikwa, nangume linunupike, ma nenepekwa.”#Mat. 23:12; Luk. 18:14
12Iya Jesus wa heela wo ngoka ngwee mu konga ha tyaa: “Andaa mo hala okukonga ovantu komalyaalyo, hó kongo omapanga oye ne ovakuloye ne ovanitjoye ne oven̯i ne ovalaanganda woye ovahona, opo háve ku kongo wo, wo ve ku thute nyahoka. 13Iya andaa u na otjipito tjomalyaalyo, konga ovathona novilema novapot̯i. 14Iya mo ningi omunalao, mena lyokutya mboka kave na himave ku thutu. Mo ka thutwa kuKalunga meimuko lyovavyuuki.”
Eeli lyotjipito otjinene
(Mat. 22:1-10)
15Iya umo owomovayenda mbava li amava li pamo naJesus hiaa tee ovipuka mbyoka mbyaa popiwa kuJesus, we mu heela ha tyaa: “Omunalao oye ngoka nguma ka lya omungome motjilongo tjaKalunga.”
16Iya Jesus we mu heela ha tyaa: “Omulumentu umo wa teleka omalyaalyo otjipito otjinene, ha kongo ovantu ovengi. 17Iya powola yotjipito wa tuma omupika we, a ka heele ovakongwa a tyee: ‘Indjen̯i, mena lyokutya ovipuka avihe vya longekedhwa, vya pu.’ 18Wo avehe naa vala va uta okwaanya. Owolutenga we mu heela ha tyaa: ‘Ame mba landa otjana, me hala oku ke tji tala, alikana hí po.’ 19Omukwawo we mu heela ha tyaa: ‘Ame mba landa odhonani dhodhokanga ntano, me hala oku ke dhi lola, alikana hí po.’ 20Nomukwawo uke we mu heela ha tyaa: ‘Ame opo mba kupu, híme ulu okuya.’
21“Omupika wa tjuna, ha ka hipululila omuhona we ovipuka hembi avihe. Iya omwene wonganda wa yumana, ha heele omupika we ha tyaa: ‘Kanyauka, enda komivanda nokodhondjila dhomondolopa, ka ete ovathona novilema novapot̯i novingolomena.’ 22Omupika we mu yaka ha tyaa: ‘Muhona, mba ningi ngahi wa ntjeele, iya atjaa nanapano pe na oluvedhe.’ 23Omuhona wa heela omupika we ha tyaa: ‘Enda kodhondjila nokomivanda, u ve tumin̯in̯e ve ye, onganda yandje opo i yule. 24Me mu heele okutya kaku na tja omuntu noumo movalumentu hembenya mbava ithanenwe, nguma ka makela omalyaalyo motjipito tjandje.’ ”
Matji ku pula tji okukala omulongwa waJesus
(Mat. 10:37-38)
25Iya owingi wovantu wa enda pamo naJesus. Ye wa pilulukila kuwo ha tyaa: 26“Andaa pe na omuntu ngume ya kwaame, ye ahama kala ae yele ina naihe#14:26 ae yele ina naihe: Matji tya omuntu nga kale ae hole Jesus unene okupon̯a ovanene ve. nomukadhintu we novana novakulwe novanitje ovadhantu novakadhona naye omwene wo, kaa ulu okwiila omulongwa wandje.#Mat. 10:37 27Iya nguhama tjindi omutjaakano we, ye ahama ndandula, kaa ulu okukala omulongwa wandje.#Mat. 10:38; 16:24; Mark. 8:34; Luk. 9:23
28“Andaa umo owomun̯e ma hala okutunga ondjuwo ndjaa ya pokatangaulu, olutenga kaa kala pohi, ha hava okutya mai pula hitji lithike pi, ye a tale andaa u na odhombongo ndhaa hulu oku i tunga katee mai pu? 29Mena lyokutya nda tungu ekulameno, ye ha anyenwa oku i mana, avehe mbave mu mona, mava utu oku mu yola 30hava tyaa: ‘Omuntu hengu wa uta okutunga, iya wa anyenwa oku i mana.’
31“Ne andaa ku na ohamba ndjimai i kovita okulwitha ohamba imo, olutenga kaa kala pohi okusokolola, andaa ma ulu nomayovi e omulongo umo oku ka lwa nahengunya nguu na omayovi omilongo vivali? 32Andaa kee tji ulu, ma tumu ko odhontumwa oku mu kumba ouwa, tainkolo ae li kokule. 33Iya auhe owomun̯e nguhama yetha ovipuka vye avihe mbyee na vyo, kaa ulu okukala omulongwa wandje.
Omungwa mbuhau na otjilinga
(Mat. 5:13; Mark. 9:50)
34“Omungwa otjipuka otjiwa, iya andaa wa hahuka, mau tovalethwa natji? 35Kaau thevelwa motjana ne mombumbi, mau yekelwahi vala kotjila. Ngoka nguu na omatwi okutyaa, nga tyee.”
موجودہ انتخاب:
Lukas 14: DBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Dhimba New Testament © Bible Society in Namibia, 2010.
