မးသဲ 12
12
တဲၤဒဲအဘဲာ်ကၠးမူၤနံၤဆီးဒဲ
(မၢ် ၂:၂၃-၂၈, လူၤ ၆:၁-၅)
1လှ့နဳၤယ့ၣ်ရှူးလ့ၤနံၢ်ကိာ်ကဲၤဟူၣ်ကျဲ တလှ့းအပူၤဘ့မူၤနံၤ ဆီးဒဲနဳၤ. စအပျဲၢ်အဘီၣ်တစီာ် သးဝံာ်ကဲၤဒဳၣ်, စဒ့းအၣ်ဘူၣ်ဇလဲၢ်ကၱာ် စအၣ် ကဲၤ. 2ဖၤရံၤၡဲဖဳးတစီာ်စာ်ထၱးဒဳၣ်, စဒီၣ် ကဲၤယ့ၣ်ရှူး, “စာ်ပီၢ်, နအပျဲၢ်အဘီၣ်တစီာ်မဲၤကဲၤ တဲၤထဲၢ်အထာ်ဒ့ဒီၣ်တဲၤမှဲးလၤဒၱာ် ဒါမူၤနံၤဆီးဒဲ အနံၤနဳၤ.”
3မၱာ်စဒီၣ်ကဲၤလၢ်ဝၤတစီာ်, “ဘ့စီၤဒၤဝံး ကၱာ်အအီၣ်ကိာ်စကါတစီာ်သးဝံာ်ဒဳၣ်စမဲၤကဲၤ တၤနဲၢ်နဳၤသံတဖးဘဲာ်ကဲၤနီးဧါ. 4စလ့ၤနံၢ် ကဘၱာ်စဲာ် အၡံၣ်ကၱာ် အၣ်ကဲၤတဲၤလှူၣ်အတကဳာ်, ထဲၢ်စဲာ်မၱာ် ဝၱၤ, ပၠၤအအီၣ်ကိာ်စကါတစီာ် မၱာ်ဝၱၤ, တဘဲာ်အၣ်နီး. အအၣ်ဘဲာ်မၱာ် ပၠၤ လှူၣ် ဘၱာ်စဲာ်တစီာ်လီၤနဳၤနီးဧါ. 5မၱတမၱာ်နီး ပၠၤလှူၣ်တဲၤ အဓဳၤ တစီာ် ခဲဘးမူၤနံၤဆီးဒဲ အတဲၤမှဲးလၤဒဳတဲၤလှူၣ်ၡံၣ်အပူၤ, ပရၤဆါ စတဲၤကမဲာ်တအီၣ်နီးနဳၤ, သံတဖးဘဲာ်ကဲၤဒဳ စီၤမိၤၡ့အတဲၤမှဲးလၤအပူၤ နီးဧါ. 6မၱာ် ယဒီဆးသံ, ဘၱာ်စဲာ်လံ တဲၤလှူၣ်ၡံၣ်အီၣ် ဘ့ယဳၤ. 7ကၱာ်ဒီ သံကသၱာ်ဟဲမၤ တဲၤယၱၢ်ဘဲာ်အယဳၤ, ထဲၢ်, ‘ယသးနံၤ တဲၤ ခီၣ်ဝဲၤမှီးဘဲာ်, တဘဲာ်တဲၤလှူၣ်ထာ်အံာ်နီး,’ အထာ်ပဳၤထာ်ဘါဒဳၣ်, တဘဲာ်သံကစံးရး ပၠၤအအီၣ်လှိအီၣ်လၤတဲၤကမဲာ်တစီာ်နီး. 8မၤ နဲၢ်ကဒီၣ်ဓဳၤဒဳၣ်, ပၠၤအဖဳးမၱာ်မူၤနံၤဆီးဒဲ အဘၱာ်စဲာ်စဲာ်.”
ပၠၤအစူးသံဝံၤတခီတပွဲၤ
(မၢ် ၃:၁-၆, လူၤ ၆:၆-၁၁)
9ကၱာ်ဒီ, စာ်ပီၢ်, စဟဲးတလိးဝှါဘ့နဳၤဒဳၣ်, စလ့ၤနံၢ်ကဲၤလၢ် ဝၤအဘူၣ်ဘျီၣ်အပူၤ. 10ဒဳနဳၤပၠၤအစူးသံဝံၤတခီအီၣ်ကဲၤတပွဲၤ. ပၠၤတစီာ် ဒဲကဲၤယ့ၣ်ရှူး, စဒီၣ်, “မူၤနံၤဆီးဒဲနဳၤ, ကပြး လှဲမဲၢ်ဇၤတပွဲးတဲၤဆဲဧါ.” အယဳၤမၱာ်စာ်ဘိ ထဲၢ်စကဝၢ်လှဲးကဲာ်ထာ်ပီၢ်လၢ်ဝၤအတဲၤ ကမဲးနဳၤ.
11ပရၤဆါ စဒဲက့ၤကဲၤလၢ်ဝၤတစီာ်, “ဒဳသံကျဲအသဳအီၣ်တဒဳကၱာ်အကလၤတ့ၢ်နံၢ် မၤပီၤပူၤဘ့မူၤနံၤဆီးဒဲဒဳၣ်, အကတစွံးထာ်က့ၤ နီးအီၣ်ပီၢ်တပွဲၤပွဲၤဧါ. 12ပၠၤနဳၤ စလံၢ်ဓဳၤပွၱၤသဲဒဳၣ်လံပီၢ်ဒီသဳ အဇၱၢ်အဇိၢ်. မဲၤကနဳၤဒဳၣ်, ဘ့မူၤနံၤဆီးဒဲနဳၤ နမဲၤဇၤတပွဲး တဲၤဖၱးတဲၤမဲၤအဝၱၤအအဲး.” 13မဲၤဝှါ, စဒီၣ်ကဲၤပၠၤအနဳၤတပွဲၤ, “ယ့ၤထာ်ပီၢ်နစူး ခီး.”
စယ့ၤထာ်စစူးခီးဒဳၣ် အအဲး က့ၤကဲၤအစာ်ဘိ အလဝ့ၤတခီနဳၤ. 14ဘ့နဳၤ ဖၤရံၤၡဲဖဳး တစီာ် ဟဲးထာ်ကဲၤအချဳ ကၱာ်စဒီဆးလှဲး လၢ် ဝၤ အကမဲၤကဲမဲၤလှဲမဲၢ်ယ့ၣ်ရှူးစာ်တဲၢ်နဳၤ.
ယ့ၣ်ရှူးအတဲၤခီဝဲၤမှီးဘဲာ်
15မၱာ်ယ့ၣ်ရှူးသၱာ်ဟဲအယဳၤဒဳၣ်, စဟဲးတပီၤကဲၤဒဳနဳၤ, ကၱာ်ဒီ ပၠၤအီၣ် အဲးအီးအီး လ့ၤကိာ်စလ့ၤကၱာ်စမဲၤမှးက့ၤကဲၤလၢ်ဝၤလဳစါ စဲး. 16ပရၤဆါစမှဲးလၤလၢ်ဝၤတစီာ် စာ် ဘိထဲၢ် စကတဒီဆးပီၢ် ပၠၤ အလဝ့ၤတစီာ်နီးနဳၤ. 17စမဲၤကဲၤကနဳၤစာ်ဘိထဲၢ်ဝံယၡါယၤအတဲၤဒီၣ်တီၤလီၤကပ့ထာ်ပီၢ်အနံၤခံနဳၤ. 18စဒီၣ်,
“စာ်ပီၢ်, ယဇိၤဖဳးထဲၢ်ယရိၤကဲၤ,
ယဘဲာ်လီၢ်ထဲၢ်အဘဲာ်သဳးဘဲာ်သးကဓူၤယဲၤ တပွဲၤနဳၤ.
ယကနှးလၤကီယသးစါထံစခဳး,
ကၱာ်စကဒီၣ်အူဒီဆးကီယတဲၤစံးရး အဝၱၤအကဲဒဳပၠၤခွံဖဳးတစီာ်အအီၣ်နဳၤ.
19စကတတရၤကီပၠၤနီး, တကဲာ်ဧဳၤထဳဖူးကီတဲၤနီး.
ပၠၤကတသၱာ်ဟဲကီစလ့ၢ်ဒဳကျဲးတစီာ် အပူၤတဗွဲနီး.
20ကပီၤအပြၱးနဳၤ စကတမဲၤ ထဲဓူၢ်ကီနီး,
ကၱာ်ဒီမှၱးဆဲးအခူးဝ့ၤနဳၤ, စကတမဲၤလၤပၱၢ်ကီနီး.
စကမဲၤကီထိကၱာ်တဲၤတၱၢ်တဲၤမှးနဳၤပဲၤတဲၤနဳၤ.
21ကၱာ်ဒီပၠၤခွံဖဳးတစီာ် ကဆးၡံအံာ်ကီစဲာ်.”
ယ့ၣ်ရှူးကၱာ်ဘၤဧၤလစဘူာ်
(မၢ် ၃:၂၀-၃၀, လူၤ ၁၁:၁၄-၂၃)
22ဘ့နဳၤ, ပၠၤလ့ၤအံာ်အနှဲးအီၣ်, အတခံး မ့ၢ်ကၱာ်အတမူၢ် တအးတပွဲၤဒဳစအီၣ်, ကၱာ်စမဲၤ မှးက့ၤလၢ်ဝၤဒဳၣ်, စယၱၢ်ဘဲာ်က့ၤ ကၱာ်စစာ်ထၱး က့ၤဇၤတပွဲးကဲၤ 23ကၱာ်ဒီပၠၤအပဳၤအဟီး လဳစါစဲးထဲးတမိၢ်တမှါကဲၤ, ကၱာ်စဒီၣ်, “အယဳၤတပွဲၤမၱာ်သရီကဲၤစီၤဒၤဝံးအဖဳးဧါ.”
24ပရၤဆါဖၤရံၤၡဲဖဳးတစီာ် သၱာ်ဟဲဘဲာ် အယဳၤဒဳၣ်စဒီၣ်, “ပၠၤအယဳၤတပွဲၤ နှးဟဲးထာ် တဲၤၡံးတဲၤနှဲးနဳၤမၱာ်တဲၤၡံးတဲၤနှဲးအဆးဖြး ဘၤဧၤလစဘူာ်အစိသလဲအပူၤလီၤ.”
25ယ့ၣ်ရှူးသၱာ်ဟဲ စဲာ်တစီာ်အတဲၤကမဳၤဒဳၣ်, စဒီၣ်လၢ်ဝၤ, “ထံက့ၤကိအက့ၤထဲၢ်အပ့ၢ်ဖးအန့ၤနဳၤ, ကလၤမူၤလၤဖးကီ, ကၱာ်ဒီအူး, မၱတမၱာ်နီးၡံၣ်ကိ အဝၤ, ထဲၢ်အပ့ၢ်ဖးက့ၤအန့ၤနဳၤ, ကတဆီထဳးအီၣ် မှ့း ကီနီး. 26ကၱာ်ဒီမဳၤဒဲးလၱး ကနှးဟဲးထာ် မဳၤဒဲးလၱးဒဳၣ်, စပ့ၢ်ဖးကဲၤ စန့ၤ. မဲၤကနဳၤ စထံစက့ၤကဆီထဳးအီၣ်မှ့းပီၢ်စာ်တဲၢ်. 27ကၱာ်ဒီ ယနှးဟဲးထာ်တဲၤနှဲးတစီာ် ဘၤဧၤလစဘူာ်အစိသလဲ အပူၤဒဳၣ်, သံဖဳးတစီာ်နှးဟဲးထာ်ဒီစဲာ် ပီၢ်ပွဲၤအစိသလဲ အပူၤပွဲၤ. မဲၤကနဳၤစကမၱာ်ကီ အစံး ရးသံတစီာ်. 28ပရၤဆါ, အကမၱာ်မၤယနှးဟဲးထာ် တဲၤနှဲးတစီာ် ကၱာ်ကဘၱာ်စဲာ်အသးအစိသလဲဒဳၣ်, အကမၱာ်တပွဲးကဘၱာ်စဲာ် အထံအက့ၤဓဳၤထၱးထဳသံ.
29“မၱတမၱာ်နီးပၠၤကတစဳကျဳၤအူဆူးပၠၤအခဳး ဘါအါဓဳၤတပွဲၤ နီးဒဳၣ်, ပၠၤကလ့ၤနံၢ်စရှံၣ်ပူၤကၱာ် စကဖၱးအါဝူၢ်ဇၤလၢ်ဝၤအတဲၤထီ တဲၤ လၤစာ်တဲၢ်. ကၱာ်ဒီ, ဘ့နဳၤပၠၤကစဳကျဳၤဝှါစဲာ်ခၣ်လဲာ် စကအါဝူၢ်ကီ စရှံၣ်စဖါ.
30“ပၠၤထဲၢ်အတအီၣ်ကိာ်ယကါနီးတပွဲၤ, ထာ်ခဳးကါယဲၤ, ကၱာ်ဒီထဲၢ်အတထူၣ်က့ၤကိာ်ယကါ နီးတပွဲၤပၢ်ဖြူးပၢ်ဖြၱလီၤ. 31မဲၤကနဳၤဒဳၣ်, ယဒီၣ်သံ, တဲၤကဘါပျဲးကီပၠၤ စတဲၤခီၣ်ဝဲၤကၱာ် တဲၤဒီၣ်ကဲ ဒီၣ်အိးကိအမဳၤ, ပရၤဆါတဲၤဒဳအထာ်ဒ့ဒီၣ် သးစါထံအတဲၤခီၣ်ဝဲၤနဳၤ, တဲၤကတဘါပျဲးကီနီး. 32ကၱာ်ဒီပၠၤအရါအဒီၣ်ကဲဒီၣ်အိးပၠၤ အဖဳး တပွဲၤနဳၤ, တဲၤကဘါပျဲးကီစဲာ်. ပရၤဆါ, ပၠၤထဲၢ်အကဒီၣ်ကဲ ဒီၣ်အိး သး စါထံတပွဲၤနဳၤ, တဲၤကတဘါပျဲးကီစဲာ် ဒဳခဳနူၤယဳၤနီးကၱာ်ဒဳအလ့ၤကါနီးနီး.
သဳာ်ကၱာ်အသဲာ်
(လူၤ ၆:၄၃-၄၅)
33“မၱာ်ပီၢ်သဳာ်အဝၱၤကၱာ်အသဲာ်ကဝၱၤကီ, မၱမၱာ်သဳာ်အတဝၱၤ နီးနဳၤ, အသဲာ်ကအိကီ, ပၠၤသၱာ် ဟဲသဳာ်သဲာ်မူၤကၱာ်အသဲာ်လီၤ. 34အဳကလၤ ပူးမဳၤအခွံတစီာ်, သံကၱကဲာ်ဒဳၣ် သံတဲၤယၱၢ်ဘဲာ်ကဝၱၤ ဇၤဒီစာ် တဲၢ်. မၤနဲၢ်ကဒီၣ်ဓဳၤဒဳၣ်, တဲၤအီၣ်ပ့ထာ်ကသး ပူၤအဓ့ကလီၤမီၤ ဒီၣ်ထာ် ကိာ်. 35ပၠၤအဝၱၤတပွဲၤ ဖၱးထာ်တဲၤအဝၱၤတစီာ်ဒဳစတဲၤဇွၱၢ် တဲၤအဲး အကလီၤပူၤ နဳၤ, ကၱာ်ဒီပၠၤအတဝၱၤနီးတပွဲၤဖၱးထာ်တဲၤအတဝၱၤနီးဒဳ စတဲၤကၱကဲာ်မဲၤလှီအကလီၤပူၤနဳၤ.
36“ကၱာ်ယဒီဆးသံ, တဲၤယၱၢ်ဘဲာ်အနှးနှါထဲၢ် ပၠၤဒီၣ်ထာ်ဝှါ နဳၤ, ကိအမှိအနံၤခံ, ပၠၤကဘဲာ်ဒဲကီဘ့ တဲၤစံးရးအမူၤနံၤနဳၤ. 37မၤနဲၢ်ကဒီၣ်ဓဳၤဒဳၣ်, နကဘဲာ်တဲၤလဲၢ်တၱၢ်လဲၢ်မှးအံာ်နဲၤကၱာ်နတဲၤယၱၢ်ဘဲာ်, ကၱာ်နကဘဲာ်တဲၤစံးရးအံာ်နဲၤကၱာ်နတဲၤယၱၢ်ဘဲာ်လီၢ်.”
စီၤယိၤနါအဟိအကလဲၤ
(မၢ် ၈:၁၁-၁၂, လူၤ ၁၁:၂၉-၃၂)
38ဘ့နဳၤ ပၠၤသၱာ်အတဲၤသိၣ်တဲၤသီကၱာ် ဖၤရံၤၡဲဖဳးတစီာ်စီာ် ဒီၣ်က့ၤကဲၤစဲာ်အလံၢ်ကယဳၤ, “ဆရၣ်, ဝၤသးအဲးစာ်ထၱးနမဲၤတဲၤပီၤတဲၤ ပၤတဓဲ.”
39စဒီၣ်က့ၤလၢ်ဝၤတစီာ်, “ပၠၤအကၱကဲာ်ကၱာ် အဘၱာ်စဲာ်ကျဲး ထီးတအီၣ်နီးတစိၤ တၤတဲၤပီၤတဲၤပၤ တဓဲ, မၱာ်စီၤယိၤနါအတဲၤပီၤတဲၤ ပၤကဝှါ တဲၤကတဒဲ လၱၢ်ကီစဲာ်တဲၤပီၤတဲၤပၤတမံနီး. 40မၤနဲၢ် ကဒီၣ် ဓဳၤဒဳၣ်, အစာ်ဘိစီၤယိၤနါအီၣ်ကဲၤဓၢ်ဓဳၤအဖူပူၤ သဳနံၤကၱာ် သဳနဲၤ နူၤ, ပၠၤအဖဳးကအီၣ်ကီဟးလဲၢ်သဳနံၤ ကၱာ်သဳနဲၤအပူၤပူၤ. 41ဘ့ တဲၤစံးရးအမူၤနံၤနဳၤ, နံၤနဝ့ဖဳးတစီာ်ကဝဲၢ်ထဳးစံးရးကီပၠၤအယဳၤတစိၤ, မၤနဲၢ်ကဒီၣ်ဓဳၤဒဳၣ်, စဲာ်တစီာ် သၱာ်ဟဲဘဲာ်စီၤယိၤနါ အတဲၤဒီထိးအစဲ, စဲာ် တစီာ်ပၤယၤလၤက့ၤအန့ၤ. ကၱာ်ဒီ, စာ်ပီၢ်, အဓဳၤလံစီၤယိၤနါတပွဲၤ အီၣ် ကဲၤဘ့ ယဳၤ. 42ဘ့တဲၤစံးရးအမူၤနံၤနဳၤ, ရှဘၤ အဆးဖြးမဳၤကဝဲၢ်ထဳးစံးရးကီပၠၤအယဳၤတစိၤ. မၤနဲၢ်ကဒီၣ်ဓဳၤဒဳၣ်, စအီၣ်ဒဳလၢ်ခဳးအကူ ဓူၤနဳၤ, စလ့ၤဆီးခ့န့းကဲၤစီၤၡလိၤမိၤအတဲၤသၱာ်ဟဲ. ကၱာ်ဒီ, စာ်ပီၢ်, အဓဳၤ လံစီၤၡလိၤမိၤတပွဲၤအီၣ်ကဲၤဘ့ယဳၤ.
သးအစၱးပိးအတဲၤက့ၤဘးအလ့ၤကါ
(လူၤ ၁၁:၂၄-၂၆)
43“ဘ့သးအစၱးပိးတဒဳ ဟဲးထာ်ဝှါပၠၤတပွဲၤ အဟၱးကျဲနဳၤ, အဟဲးတဝၱၢ်တဝ့ၤဒဳတဲၤဝှ့ တဲၤကြး အလ့ၤနဳၤ, အဝၢ်လှဲးအတဲၤဆီဓူၢ် ဆီးဒဲအလ့ၤအကျဲး, မၱာ်အတကဲာ်ထၱးကဲၤတလါနီး. 44အနဳၤတပျာ် အဒီၣ်လၤက့ၤအန့ၤ, ‘ယကက့ၤဘးယလ့ၤကါ ဒဳယရှံၣ်နဳၤ’ ကၱာ် က့ၤကဲၤကၱာ် အစာ်ထၱးတဲၤအလ့ၤ အီၣ်လှိးသိ, အအီၣ်ဝှံးဘါဝၢ်ဘါအဲး ဇဲၤနဲၤကဲၤ. 45မဲၤဝှါဒဳၣ်, အလ့ၤယဳၤကဲၤသးအစၱးပိးဒဳၣ်လံစဲာ် သါ သိး တဒဳကၱာ်အီၣ်ကဲၤဘ့နဳၤလီၤ. ပၠၤအနဳၤတပွဲၤဇၱၢ်ဓဳၤလံ ကၱာ်အအူဆူး နဳၤ. ကနဳၤအခီဖးတဲၤကဖၱထာ်နံၤကီပၠၤ အယဳၤတစိၤနဳၤ.”
ယ့ၣ်ရှူးအမဳၤကၱာ်စသဲပူၤဝ့ၤတစီာ်
(မၢ် ၃:၃၁-၃၅, လူၤ ၈:၁၉-၂၁)
46ဘ့ယ့ၣ်ရှူး ယၱၢ်ဘဲာ်ထၱးဖါသးပၠၤအပဳၤအဟီး နဳၤ, စာ်ပီၢ်, စမဳၤကၱာ်စသဲပူၤဝ့ၤတစီာ် ဆီထဳးအီၣ်အချဳ, စသးအဲးယၱၢ်ဘဲာ်ထၱး လၢ် ဝၤ. 47ကၱာ်ဒီပၠၤတပွဲၤဒီၣ်စဲာ်, “စာ်ပီၢ်, နမဳၤကၱာ်နသဲပူၤဝ့ၤတစီာ် ဆီထဳး အီၣ်အချဳ, စသးအဲးစာ်ထၱးနဲၤ.”
48မၱာ်စဒီၣ်က့ၤအဒီဆးစဲာ်တပွဲၤကယဳၤ, “ပီၢ်ပွဲၤ မၱာ်ယမဳၤ, ပီၢ်ပွဲၤတစီာ်မၱာ် ယသဲပူၤဝ့ၤပွဲၤ.” 49ကၱာ်ဒီ စယိၢ်ဝဲၢ်စစူးခီး စပျဲၢ် စဘီၣ်အီၣ်ကၱာ် စဒီၣ်, “စာ်ပီၢ်, ယမဳၤကၱာ်ယသဲပူၤဝ့ၤတစီာ်ယဳၤ. 50မၤနဲၢ်ကဒီၣ်ဓဳၤဒဳၣ်, ကယါပၠၤအမဲၤ, ယပာ်အအီၣ် မီၢ်ခဳးတပွဲၤအတဲၤသး အဲၤနံၤတစီာ်နဳၤ, စမၱာ်လဳ ယပူၤယစဲာ်ကၱာ်ယမဳၤလီၤ” စဒီၣ်ကဲၤဒဳၣ်.
موجودہ انتخاب:
မးသဲ 12: GBA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Geba Roman New Testament © Bible Society of Myanmar, 2021.
