မးသဲ 10
10
ယ့ၣ်ရှူးရိၤထာ်အပျဲၢ်အဘီၣ်ရှံးကၠံၢ်ပွဲၤ
(မၢ် ၃:၁၃-၁၉, လူၤ ၆:၁၂-၁၆)
1ယ့ၣ်ရှူးယဳၤပျဳာ်ဝှါစပွဲၤအပျဲၢ်အဘီၣ်ၡံးကၠံၢ် ပွဲၤကၱာ် စအံာ် လၢ်ဝၤတဲၤဖျူတဲၤသရ့ာ် စာ်ဘိ ထဲၢ် အကနှးဟးထာ်ကဲ တဲၤရှံးတဲၤနှဲး တစီာ် ကၱာ်ဒီ, စာ်ဘိထဲၢ် စကမဲၤလှဲမဲၢ်တဲၤရွှံးတဲၤဆဲ ကၱာ် မဲၤမှးက့ၤပီၢ် ပၠၤအတမိၢ်တမှးနီၤတစီာ်နဳၤ. 2အပျဲၢ်အဘီၣ်ၡံးကၠံၢ်ပွဲၤ အမံၤမၱာ် အယဳၤ, အအူဆူးတပွဲၤမၱာ်စီၤၡံမိၣ်, ထဲၢ်ပၠၤယဳၤ စီၤပ့းတရူးနဳၤ ကၱာ်စမဲၢ် စီၤအၣ်ဒရ့း, စီၤယၤကိာ်ထဲၢ် စီၤစ့းဘ့းဒဲအဖဳး ကၱာ်စပၱးကီစီၤယိၤဟၣ်, 3စီၤဖံလံးပူးကၱာ် စီၤဘၢ်သလီးမဲ, စီၤသိမါကၱာ် အတၤတဲၤမှူစီၤ မးသဲ, စီၤယၤကိာ်ထဲၢ်စီၤအၤလဖဲအဖဳး, ကၱာ် စီၤသးဒဲ, 4စီၤၡံ မိၣ်ထဲၢ်ကနၤဧၣ်ဖဳး, ကၱာ် စီၤယူဒၤအံၣ်စကၤရံၤအိာ်, ထဲၢ် အဟိလါယ့ၣ် ရှူး တပွဲၤနဳၤ.
ယ့ၣ်ရှူးသဲလ့ၤအပျဲၢ်အဘီၣ်ရှံးကၠံၢ်ပွဲၤ
(မၢ် ၆:၇-၁၃, လူၤ ၉:၁-၆)
5ယ့ၣ်ရှူးနှးဟဲးကဲၤအယဳၤၡံးကၠံၢ်ပွဲၤ, စထူးလၤမှဲးလၤလၢ်ဝၤ ကၱာ် စဒီၣ်, “လ့ၤနံၢ်မဲး ပွဲၤသူကူာ်ဖဳးတစီာ်အကျဲးပူၤမဲး, ကၱာ်ဒီ လ့ၤနံၢ်မဲး ပၠၤၡၤမရံဖဳးအအူးတစီာ်အပူၤမဲး. 6မၱာ်လ့ၤ ထၱးပီၢ်သဳအလှဲမဲၢ်, ထဲၢ်အမၱာ် အံၣ်စရ့လး အရှံၣ်အဖါတစီာ်နဳၤတခီ. 7ကၱာ်ဒီ ဟဲး ကၱာ်ဒီထိးပီၢ်တဲၤ, ‘မီၢ်ခဳးအထံအက့ၤဘိးထၱးထဳ’ ဒီၣ်ပီၢ်ဒဳၣ်. 8မဲၤ မှးက့ၤပီၢ်အရွှံးအဆဲတစီာ်, မဲၤထာ်ပဳၤက့ၤပီၢ်အသံတစီာ်, မဲၤစါက့ၤပီၢ် အကလးကၠံးတစီာ်, နှးဟဲးထာ်ကဲပီၢ်တဲၤနှဲး တစီာ်. သံနံၤဘဲာ်နှးနှါကဲၤ ဒဳၣ်, အံာ်နှးနှါပီၢ်. 9အီၣ်အံာ်မဲး ထဲမၱာ်ဝၱၤ, ဝှိမၱာ်ဝၱၤ, ပံဒဳပံဆး မၱာ် ဝၱၤဒဳသံလှူသကံအပူၤနဳၤမဲး. 10ဟဲးအံာ်မဲး တဲၤပိးလိးဒဳကျဲးလီၤ အနံၤခံ မၱာ်ဝၱၤ, ၡံာ်ဒဳကၠံၢ်ဘဲာ်မၱာ်ဝၱၤ, ခၣ်တကီးမၱာ်ဝၱၤ, နှဲးထီး မၱာ်ဝၱၤမဲးမဲး. မၤနဲၢ်ကဒီၣ်ဓဳၤဒဳၣ်, အမဲၤတဲၤတပွဲၤ မီၤနံၤဘဲာ်စတဲၤအၣ်.
11“ကၱာ်ဒီဘ့သံလ့ၤနံၢ်အူးပူၤမၱာ်ဝၱၤ, ဒဳဖါပူၤမၱာ်ဝၱၤနဳၤ, ဒဲစာ် ပီၢ်ပၠၤအအီၣ်ဒဳနဳၤ, ထဲၢ်အတးနံၤသံအီၣ်ကိာ် အကါမှၱာ်ပီၢ်ပွဲၤနဳၤ, ကၱာ် အီၣ်ပီၢ်ဒဳနဳၤထိသံကဟဲးထာ်နဳၤ. 12ကၱာ်ဒီဘ့သံလ့ၤနံၢ်ရှံၣ်ပူၤနဳၤ, ဆဳဝၱၤပီၢ်စဲာ် ကၱာ်ဒီၣ်ပီၢ်စဲာ်, ‘တဲၤစဳးတဲၤမီၤကလၤဘဲာ်ဒီဧဲၤရှံၣ်အယဳၤ တဝၤယဳၤ.’ 13ကၱာ်ဒီရှံၣ်အနဳၤတဝၤ ကတးနံၤဒဳၣ်, သံတဲၤသး တဲၤယၤကလၤဘဲာ်ကီ အခဳး. ပရၤဆါ အကတတးနံၤနီးဒဳၣ်, သံတဲၤ သးတဲၤယၤကက့ၤထၱးကီသံ. 14ကၱာ်ဒီ ပၠၤတပွဲၤပွဲၤအရါ ကတအံာ်က့ၤစာ်က့ၤသံနီး, ကၱာ် ကတဆီးခ့န့းသံတဲၤယၱၢ်ဘဲာ်နီးဒဳၣ်, ဟဲး ထာ် ကဲပီၢ်ရှံၣ်အနဳၤတဝၤ, မၱတမၱာ်နီးအူးအနဳၤ တအူးအပူၤ, ကၱာ်ပျၤဘါကဲ ပီၢ်ဟးဖၱမူးဒဳ သံခၣ်ခီးအလီၤနဳၤ. 15ယဒီၣ်သံအတၱၢ်အမှး, ဘ့ တဲၤစံးရးအမူၤနံၤနဳၤ, စဒိၣ်ကၱာ်ဂမိရၤ အလၢ်ခဳးကတခးဘဲာ်ကီပွ့အူးအနဳၤတအူးနီး.
တဲၤဒီဆးတီၤလီၤတဲၤထာ်ခဳးကါယ့ၣ်ရှူး
(မၢ် ၁၃:၉-၁၃, လူၤ ၂၁:၁၂-၁၇)
16“စာ်ပီၢ်, ယသဓဳသံအစာ်ဘိ သဳဒဳ ကယၤဘိာ်အကျဲနဳၤ. မဲၤကနဳၤပျၤပီၢ်အစာ်ဘိဝူၤ တစီာ်နဳၤ, ဘၱာ်ယူၢ်ပီၢ်အစာ်ဘိ သကဳတြူၤ တစီာ်နဳၤ. 17ပရၤဆါဆီးအံာ်ပီၢ်သံန့ၤ. မၤနဲၢ်ကဒီၣ်ဓဳၤဒဳၣ်, စကအံာ်လၤဖျီးမံကီသံဒဳ အစံးရးတဲၤတစီာ်အစူးခီးပူၤကၱာ် စကလှၱးကပျဲသံ ဒဳ စဘူၣ်ဘျီၣ်တစီာ်အပူၤနဳၤ. 18ကၱာ်ဒီယခဳးယစဲ သံကဘဲာ်စွံး လ့ၤကီ အူးအစဳးမၢ်တစီာ်ကၱာ်ဆးဖြးတစီာ်အလှီမီၢ်, စာ်ဘိထဲၢ်သံကခး သဲသၱးစလှီမီၢ်ကၱာ် ပွဲၤသူကူာ် ဖဳးတစီာ်အလှီမီၢ်နဳၤ. 19ပရၤဆါဘ့ ပၠၤ ကအံာ်လၤဖျီးမံသံနဳၤ, ကမဳၤမဲး သံကယၱၢ်ဘဲာ် စာ်တဲၢ်, မၱတမၱာ်နီး တၤနဲၢ်နဳၤမဲး. မၤနဲၢ်ကဒီၣ်ဓဳၤဒဳၣ် ဒဳၣ်, ဘ့နဳၤအခၠၱးသံကဒီၣ်ဘဲာ် တၤနဲၢ် တၤနဲၢ်နဳၤ တဲၤကအံာ်လၤကီသံ. 20မၤနဲၢ်ကဒီၣ်ဓဳၤဒဳၣ်ဒဳၣ်, အယၱၢ်ဘဲာ်တမၱာ်သံနီး. မၱာ်သံပာ် အသးစါထံ, ထဲၢ်အယၱၢ်ဘဲာ်သံဟၱးကျဲတပွဲၤ နဳၤ.
21“သဲပူၤဝ့ၤကအံာ်လၤဖျီမံကီ အသဲပူၤဝ့ၤတဲၤသံကျဲ, ကၱာ် တဲၤပာ်ကအံာ်လၤဖျီမံကီအဖဳး, ကၱာ်ဒီအဖဳး အလံၤကဝဲၢ်ထဳးထာ်ဒ့ဒီၣ် ကီ အမဳၤအပာ်, ကၱာ်ကမဲၤနံၤကီလၢ်ဝၤတဲၤသံ. 22ကၱာ်ဒီယမံၤ အခဳး အစဲ ပၠၤလဳ စါစဲးကတဝဲၢ် ကီသံနီး. ပရၤဆါပၠၤထဲၢ် အခီးသးဒီထိကဓူၤလါ တပွဲၤကလှိထာ်ကီ. 23ဘ့ပၠၤကလိၤမဲၤ ဆဲးညဲသံအူးတအူးအပူၤနဳၤ, ဆဲးဖျီးမံပီၢ်ဒဳ အလဝ့ၤတအူး. ယဒီဆးသံအတၱၢ်အမှး, ထိ ဓဳၤပၠၤအဖဳးကလၤနဳၤ, သံကတဟဲးခွဲးနံၤ လဳကီ အံၣ်စရ့လးအူးတစီာ်နဳၤ နီး.
24“ခီပံၤစဖဳးတဓဳၤချဳလံ အဆရၣ်နီး, ဇိၤဖဳးတဓဳၤချဳလံအဘၱာ်စဲာ်နီးနီး. 25အခီ ပံၤစဖဳးကမၱာ်စာ်ဘိစဆရၣ်နဳၤ, ကၱာ်ဒီဇိၤဖဳး ကမၱာ်မၤစာ်ဘိအဘၱာ်စဲာ်နဳၤဒဳၣ်, အဘဲာ်နံၤထဳ တပွဲး. ပၠၤယဳၤကဲၤရှံၣ်အဘၱာ်စဲာ် ဘဧၤလစဘူာ် ဒဳၣ်, စယဳၤဒဳၣ်ချဳကီအရှံၣ်ဖဳးဖါဖဳးတစီာ်နဳၤ.
ပၠၤအမီၤရှံးဆါ
(လူၤ ၁၂:၂-၇)
26“မဲၤကနဳၤၡံးဆါနံၤမဲးစဲာ်တစီာ်အလ့ၤ မဲး. မၤနဲၢ်ကဒီၣ်ဓဳၤ ဒဳၣ်, တဲၤအအီၣ်ဘံာ်နဳၤ ကလှၱထၣ်ကီ, ကၱာ်တဲၤအဟူၣ်အဇီၤနဳၤ ပၠၤကသၱာ်ဟဲကီ. 27တဲၤထဲၢ် ယဒီဆးသံ တဲၤခံးကျဲနဳၤ, ဒီဆးပီၢ်တဲၤ လှၱအကျဲ, ကၱာ်ဒီ တဲၤထဲၢ်သံသၱာ်ဟဲဘဲာ်ကၱာ်သံနံၤကူၤနဳၤ, ဒီထိး ပီၢ်ဒဳသံ ရှံၣ်ခဳးတစီအခဳးနဳၤ. 28ၡံးဆါ နံၤပီၢ်မဲးပၠၤအမဲၤသံကန့ၤဘၱစဲာ်, မၱာ်အတမဲၤ သံကဲာ်ထာ်သဳးသးနီးတစီာ်အလ့ၤမဲး. ပရၤဆါ ၡံးဆါနံၤပီၢ် ပၠၤအမဲၤကဲကဲာ်ထာ်သဳးသး ကၱာ် ကန့ၤဘၱစဲာ်ဒဳလရာ်ပူၤ တပွဲၤအလ့ၤ တခီ. 29ပၠၤတဆဲထဳၣ်ဖဳးမဳၤကၠံၢ်ဘဲာ်ကၱာ် ကြ့းလၱၤတဘ့ာ် နီးဧါ. မၱာ်သံပာ်အတဲၤသးအဲးနံၤကတအီၣ်မၤ နီး ဒဳၣ်, အကတလၤတ့ၢ်ကီ လၢ်ခဳးတဘဲနီး. 30ခူၣ်လူအအီၣ်သံကဳာ်လီၤတစီာ်နှီနဳၤ, အဘဲာ်ဒိး စာ်ကိအဘီလီၤ. 31မဲၤကနဳၤ, ၡံးဆါပီၢ်မဲး. သံချဳလံပီၢ်ဒီထဳၣ်ဖဳး မဳၤအဘဲာ် ပွ့တမံၤ.
တဲၤဒီၣ်ဖျီထာ်ကၱာ်တဲၤယၤဘံာ်
(လူၤ ၁၂:၈-၉)
32“မဲၤကနဳၤဒဳၣ်, ကယါပၠၤအဒီၣ်ဖျီထာ် ယဲၤ ပၠၤအလှီမီၢ်တပွဲၤနဳၤ, ယကဒီၣ်ဖျီထာ်လဳစဲာ် ဒဳအပာ်အအီၣ်ဒဳမီၢ်ခဳးတပွဲၤအလှီမီၢ်နဳၤနဳၤ. 33ပရၤဆါ ပၠၤအယၤဘံာ်ယဲၤပၠၤအလှီမီၢ် တပွဲၤနဳၤ, ယကယၤ ဘံာ်ကီစဲာ်ဒဳအပာ်အအီၣ် ဒဳမီၢ်ခဳးနဳၤတပွဲၤအလှီမီၢ်မီၢ်.
မၱာ်ဒာ်ဆ့, တဘဲာ်တဲၤစဳးတဲၤချံးနီး
(လူၤ ၁၂:၅၁-၅၃, ၁၄:၂၆-၂၇)
34“ကမဳၤမဲး ယလၤဘဲလါ တဲၤစဳးတဲၤချံး လၢ်ခဳးအခဳးမဲး. ယတလၤဘဲလါတဲၤစဳးတဲၤချံး နီး. မၱာ်ဒာ်ဆ့တခီ. 35မၤနဲၢ်ကဒီၣ် ဓဳၤဒဳၣ်, ယလၤဘဲပၢ်ဖဳးခဳကၱာ်ပာ်, ဖဳးမူးကၱာ်မဳၤ, ဒဲးကၱာ်မူၤပွ့ၢ်. 36ကၱာ်ဒီပၠၤအဒ့ဒီၣ်ရီၢ်ခဲး ကမၱာ်ကီခွံခီအအီၣ်ပျဳာ်စဲာ်ရှံၣ်ပူၤတစီာ်နဳၤ.
37“ပၠၤထဲၢ်အဘဲာ်လီၢ်အပာ်မၱာ်ဝၱၤ, အမဳၤ မၱာ်ဝၱၤ, ဒဳၣ်လံယဲၤ တပွဲၤနဳၤ, တတးနံၤကၱာ်ယဲၤ နီး. ကၱာ်ဒီပၠၤအဘဲာ်လီၢ်အဖဳးခဳမၱာ်ဝၱၤ, အဖဳး မူၤမၱာ်ဝၱၤဒဳၣ်လံကၱာ်ယဲၤတပွဲၤနဳၤ, တတးနံၤကၱာ်ယဲၤ နီး. 38ပၠၤ ထဲၢ်အတယးထာ်အသဳာ်ပျီၤထူၣ်စူညါကၱာ် တလ့ၤကိာ်ယလ့ၤနီးနဳၤ, တတးနံၤကၱာ် ယဲၤနီး. 39ပၠၤထဲၢ်အနံၤဘဲာ်အသးသမိတပွဲၤ, ကဆူး ဘဲာ်ကီအအဲ, ကၱာ်ဒီပၠၤအဆူးဘဲာ် အသးသမိ ယနံၤခံတပွဲၤ, ကနံၤဘဲာ်ကီအအဲ.
တဲၤဆိးတဲၤလှဲ
(မၢ် ၉:၄၁)
40“ပၠၤအအဳလါသံတပွဲၤ, အဳလါယဲၤ, ကၱာ်ဒီပၠၤအအဳလါယဲၤ တပွဲၤ, အဳလါအသဓဳယဲၤ တပွဲၤနဳၤ. 41ပၠၤထဲၢ်အအဳလါဝံ အစာ် ဘိ ဝံနဳၤတပွဲၤ, ကနံၤဘဲာ်ကီ ဝံအဆိးအလှဲ. ကၱာ်ဒီ ပၠၤအအဳလါပၠၤအတၱၢ်အမှးအစာ်ဘိ ပၠၤအတၱၢ် အမှးနဳၤတပွဲၤ, ကနံၤဘဲာ်ကီပၠၤအတၱၢ်အမှး အဆိးအလှဲ. 42ကၱာ်ဒီကယါပၠၤအအံာ်အီ အယဳၤတစီာ်အကျဲ အၡံးဖဳး ကဓူတပွဲၤ ထံစဳး တမှါလီၤနှီနူၤ, ဒဳစမၱာ် ယပျဲၢ်ယဘီၣ် အစဲလီၤ နဳၤ ဒဳၣ်, ယဒီၣ်သံအတၱၢ်အမှး, စကတဆူးဘဲာ် ကီစဆိးစလှဲနီး.”
موجودہ انتخاب:
မးသဲ 10: GBA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Geba Roman New Testament © Bible Society of Myanmar, 2021.
