Markus 3

3
Yesus pomambuh dulun nyan ondo Sabat
3:1-6
(Mat. 12:9-14; Luk. 6:6-11)
1Yesus hopuli kole hia lopo ika sombayang. Nyan intin oko ico beti dulun co siluieh matoi silaieh. 2Kawan dulun Parisi hosoroli Yesus, nyau noto amun Are pomambuh dulun cioh. Monurut iroh, iyoh tomasuk alogawi co aroko boraoi tonguan nyan ondo Sabat. Jadi, daai iroh boraoi nondah Are.
3Yesus mantun ma dulun cioh co siluieh matoi silai, “Haas, tonjok nyan intoi tohun kawan dulun tatuh!” 4Paluh, Yesus mantun ma kawan dulun Parisi, “Ome co boraoi to umpi nyan ondo Sabat, umpi aang co pio atawa umpi kojahat; nyolamat dulun atawa ngompatoieh?” Tapi iroh tonih leh.
5Yesus jorung tului atoi doh makeng. Ma angit, Are nolangon koliling hia kawan dulun nyan intin. Paluh, hie-Eh ma dulun cioh co siluieh matoi silai, “Nyoro silum!” Kotika dulun cioh nyoro siluieh, are pio. 6Maka kawan dulun Parisi naat lopo ika sombayang cioh, holuh nyua borunding ma pira-pira dulun pondukung Herodes, ika ngompatoi Yesus.
Orong dulun ingkan kawan ika co ocu dombut hia Yesus
3:7-12
7Yesus hintang kawan murid-Eh naat ika cioh hintang tulak mahah danau Galilea. Orong dulun ingkan propinsi Galilea ngumba iroh. Oko ka dulun ingkan propinsi Yudea, 8ingkan kota Yerusalem, ingkan derah Idumea, ingkan hila tosok ondo sungoi Yordan, ingkan derah sokitar kota Tirus hintang Sidon. Uras doh dombut hia Yesus awi iroh ngoneh tintun kokon co ocop tongompiai. 9Are nyuhu kawan murid-Eh nyodia jukung indai-Eh ina Are aroko hotorenye pian dulun orong yoh. 10Tului, Are ocop pomambuh sanioh kuhat dulun, dapot uras dulun co hotoro hotorenye bousaha ngoroni Are ina ngoncamak Are. 11Hiah kawan roh jahat taiyoh kito Yesus, iroh lansung potonturok nyan tohimo-Eh. Kawan roh jahat noriak, “Ikoboh Anak Mohotara!” 12Tapi ma kotegas Yesus morentah iroh ina aroh mara dulun bahawa Are Anak Mohotara.
Yesus mili duo balas rasul-Eh
3:13-19
(Mat. 10:1-4; Luk. 6:12-16)
13Yesus nukat hia tungkui lungkuh paluh naah kawan dulun co nyau tomili-Eh. Jadi, iroh dombut hia-Eh. 14Are mili duo balas dulun ika horoholuh ngumba Are. Duo balas dulun tatuh tonisi-Eh ‘rasul’. Are nyoruhan iroh ika momborita Tarung Pio 15hintang mihi kuasa indan doh ika musir kawan roh jahat. 16Duo balas dulun co tomili-Eh iyohco: Simon (co pian Yesus araieh Petrus), 17Yokobus (anak Sebedeus) hintang konduang eh Yohanes. (Doruo hokonduang tuh tongompian Yesus aran Boanerges, artieh kawan anak duhung.) 18Solanjut eh oko Andreas, Pilipus, Bartolomeus, Matius, Tomas, Yokobus (anak Alpeus), Tadeus, Simon (dulun Selot), 19hintang Yudas Iskariot (co opaiyoh nyarah Yesus ma kawan dulun co naleh-Eh).
Yesus tonondah hapo kuasan Lacan Setan
3:20-30
(Mat. 12:22-32; Luk. 11:14-23,12:10)
20Yesus muntam ico lopo. Tapi orong dulun dombut kole bokumpur nyan intin. Jadi, Yesus hintang kawan murid-Eh aroko kojuan kuman. 21Kawan dulun mantun, “Are ocop bobujon!” Kotika koluarga-Eh ngoneh iyoh, iroh tulak ika monu Are.
22Kawan guru agama Yahudi co dombut ingkan Yerusalem mantun, “Are tonguasa pian Lacan Setan! Lacan Setan yoh co mihi kuasa indai-Eh ika musir kawan roh jahat.”
23Tapi Yesus naah iroh, paluh mantun ma iroh hapo tindung. Hie-Eh, “Aroko bodai roh jahat musir roh jahat co bokon! 24Amun ico korojaan topacah ponah kawan golongan co hobomusuh, mositi korojaan cioh angar lumat. 25Amun anggota koluarga hobomusuh, mositi koluarga cioh angar hancur. 26Sanioh ka nyan ponah korojaan Setan. Amun nyan ponah korojaan Lacan Setan tobagi-bagi hintang hobomusuh, korojaan cioh aroko lian botahan hintang mositi angar lanyap. 27Amun oko dulun nyau muntam lopo dulun co kuat ina morampas harta bandaeh, mositi are sobulih mowot dulun co kuat cioh houn. Hanyar are lian morampuk lopo cioh.#3:27 Yesus bomaksut Are samah isan dulun co mowot dulun co kuat yoh. Are ngolawan Lacan Setan ina dulun lian jarin anggota koluarga Korojaan Mohotara hangki Korojaan Setan.
28Ngoneh ehyoh! Sika dulun co bodosa atawa mohina, dulun cioh boraoi tomampun. 29Tapi dulun co mohina Roh Mohotara, dulun cioh aroko piji angar tomampun. Dosa cioh umpi dulun sala sokotahi-tahieh.” 30Yesus mantun isanioh awi iroh mohina Are ma antun bahawa Are tonguasa roh jahat.
Koluarga Yesus co kotuueh
3:31-35
(Mat. 12:46-50; Luk. 18:19-21)
31Opah iyoh tinai hintang kawan konduang Yesus dombut. Iroh nundui nyan luar hintang nyuhu dulun naah Yesus. 32Hiah waktu cioh, oko orong dulun tuot toliut-Eh. Iroh mantun ma-Eh, “Pa, tinam-Mu hintang kawan konduang-Mu oko nyan luar, nyau nyopopak Iko.”
33Tapi Yesus mantun, “Omeboh tinang-Kuh? Omeboh kawan konduang-Kuh?” 34Yesus nolangon kawan dulun co tuot toliut-Eh. Hie-Eh, “Kawan dulun tatuhboh iyohco tinang-Kuh hintang kawan konduang-Kuh! 35Kokon dulun co nguan ome co tongojere Mohotara. Iroh iyohco konduang-Kuh co bakah, konduang-Kuh co bawe hintang tinang-Kuh.”

موجودہ انتخاب:

Markus 3: TBSS

سرخی

شئیر

کاپی

None

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in