Markus 1
1
Polayanan Yohanes Pombaptis
1:1-8
(Mat. 3:1-12; Luk. 3:1-18; Yoh. 1:19-28)
1Tuhboh Tarung Pio tintun Yesus Kristus, Anak Mohotara. 2Tarung Pio cioh sosuai ma co tonulih pian nabi Yesaya yoh. Tuhboh antun-Eh:
“Ngoneh ehyoh! Akuh angar nyuhu coruhan-Kuh nosoun Iko.
Coruhan-Kuh yoh angar momposiap calan indan korombut-Mu.#1:2 Ingkan buku nabi Maleakhi 3:1
3Oko dulun co mantun muhat nyan padang gurun,
‘Nyodiaehbat calan indan Tuhan.
Nongkorong ehbat calan indai-Eh.’ ”#1:3 Ingkan buku Yesaya 40:3.
4 Dulun co tonyoruhan Mohotara yoh iyohco Yohanes Pombaptis. Are dombut nyan padang gurun hintang momborita tintun baptisan kawun dulun sobulih naat dosa ina lian tomampun. 5Orong dulun ingkan kota Yerusalem hintang ingkan ngolauh propinsi Yudea yoh dombut hiaeh. Iroh mongaku dosan doh paluh are mombaptis iroh nyan sungai Yordan.
6Yohanes hapo jubah co tonguan ingkan bulun unta. Owot kahang eh tonguan ingkan upak ocin. Are kuman kalap hintang oleng. 7Are porapot tarung cotuh: “Oko dulun co angar dombut opah akuh. Are meleh bokuasa hangki akuh. Malah nukup ika mukoi talin sopatu-Eh aku mahi aroko pantas. 8Akuh baya mombaptis ikan ma danum. Tapi Are angar mombaptis ikan ma Roh Mohotara.”
Yesus tomombaptis
1:9-11
(Mat. 3:13-17; Luk. 3:21-22; Yoh. 1:32-34)
9Nyan waktu iyoh Yesus dombut, Are ingkan lowu Nasaret nyan propinsi Galilea. Yohanes mombaptis Are nyan sungai Yordan. 10Opah tomombaptis, Yesus jion pusit ingkan danum. Hiah waktu iyoh ka, Yesus kito langit boporoak kawun Roh Mohotara toka hia tungkui-Eh isan beleu merpati. 11Paluh tokoneh suara Mohotara ingkan sorga mantun, “Ikoboh Anak-Kuh co tongasih-Kuh. Iko ngonjorih atoi-Kuh.”
Lacan Setan ningkoh ina Yesus bodosa
1:12-13
(Mat. 4:1-11; Luk. 4:1-13)
12Jion opah iyoh Roh Mohotara momimpin Are hia padang gurun. 13Nyan idi, Lacan Setan ningkoh Are kotahin opat pulu ondo. Halo Are nyan intin oko kawan ocin louk co oko nyan intin hintang kawan molekat molayan Are.
Yesus molai polayanan-Eh nyan propinsi Galilea
1:14-15
(Mat. 4:12-17; Luk. 4:14-15)
14Bopira waktu opah iyoh, opah Yohanes ocop tonawan hintang tomokuntam ponah seper,#1:14 Kesah Yohanes tonawan hintang tongompatoi oko nyan Mat. 14:1-12. Mrk. 6:14-29 hintang Luk. 9:7-9. Yesus tulak hia propinsi Galilea, porapot Tarung Pio ingkan Mohotara. 15Hie-Eh, “Waktu co tonantu Mohotara ocop dapot. Korojaan Mohotara ocop dokin.#1:15 Maksut eh, Yesus ocop dombut hia dunia tuh, maka dulun boraoi porocaya Are iyohco Laca Co Tomonjanji Mohotara. Amun porocaya iyoh, naat dosa, paluh monuruti Yesus, dulun boraoi jarin anggota koluarga Korojaan Mohotara. Jadi, naat ehbat kawan dosam me hintang porocayabat Tarung Pio cotuh!”
Yesus naah opat nolayan jarin kawan murid-Eh co portama
1:16-20
(Mat. 4:18-22; Luk. 5:1-11)
16Kotika Yesus rahat nyalan nyan saran danau Galilea, Are kito duo beti nolayan, iyohonon Simon doruo konduang eh, Andreas. Iroh rahat monyala ocin nyan danau. 17Hien Yesus ma iroh, “Haas umba boh Akuh. Hintang ikan angar piangkuh ika monyala kolunon.”#1:17 Kiasan ‘monyala kolunon’ boarti iroh nganyap kolunon ika jarin murid Yesus. 18Nyan kotika cioh ka, Simon hintang Andreas langsung naat jala doh paluh umba Yesus.
19Yesus nyalan tarus, aroko tahi opahiyoh Are kito duo beti hokonduang co bokon, iyohonon Yokobus doruo Yohanes, kawan anak Sebedeus. Iroh oko nyan ponah jukung, rahat ngombuah jala doh. 20Yesus naah iroh ruo. Hiah waktu iyoh ka, iroh lansung naat taman doh nyan ponah jukung hintang kawan dulun co tonombah eh. Paluh, iroh ngonulu Yesus.
Yesus musir roh jahat
1:21-28
(Luk. 4:31-37)
21Yesus hintang kawan murid-Eh dapot nyan kota Kapernaum. Nyan ondo Sabat, Yesus muntam hia ponah lopo ika sombayang paluh majar kawan dulun nyan intin. 22Iroh kagum ngoneh Are majar. Tului, Are majar ma kuasa ingkan Mohotara, aroko isan kawan guru agama Yahudi. 23Nyan waktu cioh ico dulun co tonyarung roh jahat muntam hia ponah ika sombayang, hintang noriak. 24“Aah! Yesus, dulun ingkan lowu Nasaret, aroh Iko umba campur urusan kaih! Tomonau kuh Iko Co Suci ingkan Mohotara! Mainboh Iko dombut ika ngolumat kaih?”
25Yesus ngorangat roh jahat cioh, “Tonih! Pusitbat ingkan dulun cotuh!” 26Maka, roh jahat cioh pokunyot-kunyot dulun cioh muhat-muhat, paluh pusit ingkan dulun cioh samir ngorisi ma suara muhat.
27Kokon dulun kagum, jadi mantun ico ma co bokon, “Harat lau ajaran baa cotuh co tomajar-Eh ma kuasa. Are mihi porentah ma kawan roh jahat, paluh iroh nuhit Are!” 28Maka borita tintun Yesus tosebar jion lau hia kokon propinsi Galilea.
Yesus pomambuh umpu Simon Petrus co bawe hintang kawan dulun bokon
1:29-34
(Mat. 8:14-17; Luk. 4:38-41)
29Opah pusit ingkan lopo ika sombayang, Yesus, Yokobus, hintang Yohanes tulak hia lopo Simon doruo Andreas. 30Umpu Simon co bawe palek-palek nyan ika pongaling eh awi are noro pondam. Jadi, iroh lansung mara Yesus tintun iyoh. 31Yesus ngoroni umpu Simon yoh, ngoncamak siluieh, paluh dohop are kokat. Lansung hanyih iyoh, umpu Simon yoh jarin solop, paluh are molai molayani iroh.
32Nyan cohit ondoeh, opah matanondo picop, orong dulun hotoro tomehen hia Yesus, tomasuk co tonguasa pian kawan roh jahat. 33Jonyo kokon ponduduk kota cioh bokumpur nyan muka lopo cioh. 34Yesus pomambuh orong dulun co noro kokon macam toro. Are mahi musir orong roh jahat. Yesus ngosiit kawan roh jahat taiyoh hopander awi iroh monau ome Are.
Yesus majar nyan kawan kota nyan propinsi Galilea
1:35-39
(Luk. 4:42-44)
35Ngonyua-nyua lau, waktu ondo incah pindong, Yesus monyun paluh tulak hia derah co ngolohiui hintang bodoa nyan intin. 36Tapi Simon hintang kawan tongkanyoh eh tulak nganyap Are. 37Kojekaieh, iroh sopopak Are. Hien doh, “Kokon dulun rahat nganyap Iko.”
38Tapi Yesus museh, “Haas ito tulak hia kawan lowu sokitar intoi ina Akuh lian porapot Tarung Pio nyan idi ka. Iyohboh alasan Akuh dombut hia dunia tuh.” 39Jadi, Are tulak hia kokon ika nyan ngolauh propinsi Galilea. Yesus porapot Tarung Pio nyan kawan lopo ika sombayang doh hintang musir kawan roh jahat.
Yesus pomambuh dulun co buah boro co ngeri
1:40-45
(Mat. 8:1-4; Luk. 5:12-16)
40Oko dulun co buah boro co ngeri dombut hia Yesus. Are nukup bolutut nyan tohimo Yesus paluh nyawot asi. Hieeh, “Dohop pomambuh akuh. Amun Iko kolu, Iko boraoi pomambuh akuh.”
41Yesus nongkomo masi maeh. Are nyoro silui-Eh, ngoncamak dulun cioh, paluh mantun, “Akuh kolu. Pioboh!” 42Lansung are jarin mambuh ingkan toro boro cioh. 43Paluh Yesus nyuhu are tulak ma poringatan cotuh, 44Hie-Eh, “Aroh ngesah aang cotuh hia ome bewe. Tapi, tulak leh hia imam houn. Nyawot are momastieh iko ocop pio. Opah iyoh, mihibat porsembahan sosuai ma porentah Musa ika jarin bukti indan dulun bokon, iko bujur-bujur ocop pio.”#1:44 Noto buku Imamat 14:1-2.
45Tapi, dulun cioh tulak horoholuh momborita kojadian cioh nyan omoh-omoh. Tului iyoh, Yesus aroko boraoi muntam hia ponah kota bat socara tarang-tarangan. Are sobulih nukui nyan luar nyan ika co ngolohiui. Tapi, dulun horoholuh leh dombut hia-Eh ingkan omoh-omoh.
موجودہ انتخاب:
Markus 1: TBSS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
