Matius 7
7
Aroh mohakimi dongam
7:1-5
(Luk. 6:37-38,41-42)
1“Aroh mohakimi dongam. Amun ikan mohakimi dongam, maka Mohotara angar mohakimi ikan. 2Awi maindeon ikan mohakimi dongam, sanioh ka Mohotara angar mohakimi ikan. Hintang ukuran co hapam me indan dongam, angar tohapan pian Mohotara indan ikan ka. 3Ikan ibarat eh dulun co kito ico juwuk kaju ponah matan dongam, tapi aroh monau baluk ponah mataieh tarop. 4Paluh are mantun, ‘Haas, Konduang, olu akuh dohop pokusit juwuk kaju conon ingkan matammu.’ Tapi baluk ponah matan tioh leh, aroh are momporhati. 5Ooi.., dulun co herak pura-pura pokusit boh soun baluk ingkan matammu, hanyar boraoi tonta lau ika boraoi pokusit juwuk kaju ingkan matan dongam.”
Ajaran Yesus sobulih tomohormati
7:6
6“Aroh mihi indan kawan asu barang banda co husus indan Mohotara. Amun ikan umpi iyoh, kawan asu taiyoh angar nokulang paluh nasukap ikan. Aroh mihi mutiara hia kawan bulo. Amun ikan umpi iyoh, kawan bulo taiyoh baya angar hoticak-ticak mutiara cioh.”
Tunuh ponah doa
7:7-11
(Luk. 11:9-13)
7“Nyawotleh hia Mohotara, maka ikan angar tomihi. Nganyapleh, maka ikan angar haba. Ngatukleh, maka antop angar tomukap indamme.#7:7 Antun ‘nyawot, nganyap, hintang ngatuk’ boraoi borati socara ‘hopompahui’. Maksud ingkan ayat cotuh, ito sobulih nyawot asi hia Mohotara. Sika dulun co porocaya ma Yesus, Are bojanji angar mongabul ome bewe co tomondoa sosuai ma kojere Mohotara. Noto Yohanes 14:12-14; 15:14,16; 16:23-24; 1 Yohanes 5:14-15. 8Awi sika dulun co nyawot angar tomihi; sika dulun co nganyap angar haba; hintang antop angar tomukap indan sika dulun co ngatuk.
9Misal eh oko ico bakah nyan halo ikan co anak eh nyawot rute. Mositi ikan aroh mihi batu indaieh. 10Amun anak me nyawot ocin ika konah. Mositi ikan aroh mihi nyipo co boracun indaieh! 11Oluco ikan iyohco dulun co bodosa, ikan ocop monau mihi co pio indan anak me. Nohani Mohotara Tama nyan sorga! Are angar mihi co pio indan dulun co nyawot hia-Eh.”
Cara bolum co buah
7:12-14
(Luk. 6:31,13:24)
12“Umpi kopio indan dongan, samah isan ikan nyau dongan nguan eh indan ikan. Cononboh sangan ingkan kokon porentah hintang poraturan Mohotara co tonulih ponah Hukum Agama Yahudi hintang buku kawan nabi.”
13-14Tungkang noraka bolambah. Calan co nuntu hia idi mahi bolambah. Orong dulun nintai calan cioh. Tapi tungkang korojaan sorga kolik. Calan co nuntu hia idi mahi sikong. Baya isut dulun co popak eh. Poko tului iyoh, ikan sobulih muntam buah tungkang co sikong!
Botawat tohimo kawan nabi palsu
7:15-23
(Luk. 6:43-44,13:25-27)
15Botawat tohimo kawan nabi palsu. Iroh samah isan srigala co dangas co dombut monyamar isan domba. 16Tapi ikan angar monau ome sobujur eh iroh yoh ingkan cara pomolum doh samah isan sika batang imbun tonyono ingkan buaeh. Humput duhi aroh bodai mohasir bua angur. Jakah duhi aroh bodai mohasir bua ara. 17Isan iyohboh, sika batang imbun co bolunyah mohasir bua co pio. Tapi sika batang imbun co tongket mohasir bua co ceet. 18Aroh bodai batang imbun co bolunyah mohasir bua co ceet. Aroh bodai ka batang imbun co tongket mohasir bua co pio. 19Sika batang imbun co aroh mohasir bua co pio, mositi tonowong paluh tomende hia ponah apui. 20Jadi, ikan angar monau amun kawan nabi cioh pio atawa jahat ma kito cara kobolum doh.
21Aroh kokon dulun co naah Akuh, ‘Tuhan, Tuhan,’ angar muntam ponah Korojaan sorga. Tapi kawan dulun co nguan kojere Tamang-Kuh nyan sorga co angar muntam ponah Korojaan Sorga. 22Nyan ondo Mohotara momutus kokon dulun co bujur atawa co sala, orong dulun angar mantun muhat hia Akuh, ‘Tuhan, Tuhan, kaih ocop porapot tungon Mohotara. Kaih ocop ngomuho kawan roh jahat. Kaih ocop umpi orong aang co mosotahir. Kaih umpi kokoieh yoh ponah aram-Mu ka.’ 23Nyan waktu iyohboh Akuh angar mantun sakrak ma iroh, ‘Sobujur eh kokon ikan dulun jahat. Akuh aroh piji nyono ikan. Buhobat ingkan Akuh!’ ”
Kawan dulun sobulih monggawi ajaran Yesus aroh baya ngoneh eh
7:24-27
(Luk. 6:47-49)
24“Jadi, oko dulun co angar ngoneh antun-Kuh paluh monggawieh ka. Are samah isan dulun co borakar pikir co mangun lopoeh ma koborohon nyan tungkui batu. 25Hiah waktu ondo ucan, oko sompurak hintang bahi muhat co nampuh lopo cioh. Tapi lopo cioh aroh borohop awi tomangun nyan tungkui batu. 26Sika dulun co ngoneh antun-Kuh tuh tapi aroh monggawieh ka. Are samah isan dulun co uong co manggun lopoeh nyan tungkui barah. 27Hiah waktu ondo ucan, oko sompurak hintang bahi muhat co nampuh lopo cioh. Borohop lopo cioh. Hancur bujur.”
Ingkan ajaran Yesus, dulun monau bahawa Yesus bokuasa
7:28-29
28Opah Yesus umbot majar kokon aang taiyoh, dulun orong co ngoneh antun-Eh nongkomo kagum. 29Awi Are majar ma deon tosa isan pomimpin co tohormat, aroh isan kawan guru agama Yahudi.
موجودہ انتخاب:
Matius 7: TBSS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
