Lukas 21
21
Porsembahan ico beti balu co mala
21:1-4
(Mrk. 12:41-44)
1Kotika Yesus incah nyan Lopo Mohotara, kitai-Eh kawan dulun tatou co miing porsembahan hia ponah kotak porsembahan. 2Kitai-Eh ka ico beti balu co mala pokuntam duo kodilat duit logam co pokongolik nilaieh. 3Paluh, Yesus mantun ma kawan murid-Eh, “Ngoneh eh bat! Sobujur eh balu co mala conon mihi labih hangki sika dulun co bokon eh, 4awi iroh baya mihi isut leh ingkan duit tiroh co orong yoh. Tapi balu co mala cotuh, tikas duit co oko nyan are ika ungkus eh mahi kokoi ihieh.”
Lopo Mohotara angar tonohop
21:5-6
(Mat. 24:1-2; Mrk. 13:1-2)
5Kotika cioh oko pira-pira dulun co mantun tintun kobungah Lopo Mohotara. Iroh nisi bangunan cioh pio lau awi tomangun ma batu alam co mias kopioi, hintang tomohias ma kawan banda co hinut co tomporsembah hia Mohotara. Tapi ngoneh aang cioh Yesus mantun, 6“Nyan ico kotika daai, kokon aang co kitam me tuh angar tongohancur. Arelu oko ico mahi batu co tosusun co aroko angar tonusut.”
Kawan murid Yesus angar tonyoranta pian dulun
21:7-19
(Mat. 24:3-14; Mrk. 13:3-13)
7Iroh ngisok Yesus, “Pak Guru, nganto omoh aang conon angar tojadi? Sorinai iyoh ome kawan cirieh co oko?”
8Hien Yesus, “Borondong-rondongleh! Aroh dapot ikan buah tipu tintun kotika-Kuh hopuli. Orong dulun angar dombut mongaku soolah-olah are yoh Akuh. Iroh angar mantun, ‘Akuh tuh Laca Co Tomonjanji Mohotara! Makitu ocop ondo kiamat!’ Aroh dapot ikan porocaya paluh umba iroh. 9Amun ikan ngoneh tintun kohokohojat hintang pomboruntak, aroh takut awi uras eh yoh sobulih tojadi sorinai dunia angar boahir. Tapi cioh aroko borati dunia angar nyua kiamat.
10Daai bangsa angar hokohojat ngolawan bangsa co bokon. Nogara ngolawan nogara co bokon. 11Nyan omoh-omoh angar oko gempa bumi hokonyangit, douonuh co luar biasa, wabah toro co hokonyangit. Isanioh ka angar oko aang co konyilu-nyilu nyaman to notoeh. Kawan dulun angar dalo akut doh noto kawan ciri nyan langit co ika potinjun dunia tuh angar kiamat.
12Tapi, sorinai kokoi yoh tojadi, ikan angar tonawan paluh tonyiksa tului ikan iyoh murid-Kuh. Ikan angar tomongadili nyan kawan lopo ika sombayang paluh tomokuntam nyan ponah seper. Ikan angar tomehen hia kawan laca hintang kawan ponguasa ika tomongadili ka. 13Tapi, non leh waktueh ika ikan bosaksi tintun Akuh. 14Jadi, sorinaieh natap ponah songa ika aroh kuatir tintun luang antun co angar ikan pokusit eh ika ngilang arop me. 15Awi Akuh leh angar mihi indanme komampuan ika nisi kawan luang antun co tangar, sohinga kawan musuh me aroko angar lian monantang atawa naleh ikan. 16-17Tului ikan iyohco murid-Kuh, kokon dulun angar dolee ma ikan. Malah ikan angar tomohianat kawan dulun ongko, kawan konduang kuhung, kawan sotatum, kawan jolaham. Oko ka pira-pira dulun nyan halo ikan co angar tongompatoi. 18-19Tapi amun ikan tenden botahan, dapot soropai, kawan jiwa me angar landah. Ikan angar bolum sokotahi-tahieh nyan sorga.”
Hien Yesus Kota Yerusalem angar tomohancur
21:20-24
(Mat. 24:15-21; Mrk. 13:14-19)
20“Waktu ikan noto tontara musuh ngapung kota Yerusalem, ikan angar monau aroko tahi oni kota cioh angar tomohancur. 21Maka nyan waktu iyoh, kawan dulun co oko nyan kota sobulih eh buho nyuhuk arop doh hia ika co aman. Kawan dulun co ocop nyan luar kota, sobulih eh aroh muntam hia ponah kota. Kawan dulun nyan ngolauh Yudea sobulih eh ngomuho arop eh hia kawan puruk. 22Awi onon boh waktueh Mohotara angar mohukum. Kokon co tonulih pian kawan nabi tintun aang tatuh angar jarin konyataan. 23Sasi lau kawan bawe co dahat eh botohi atawa co dahat doh pokosu anak doh kotika cioh. Kawan dulun nyan tana Israel tuh angar karas soranta tului Mohotara angar mohukum iroh. 24Oko co angar tongompatoi ma padang. Oko ka co tonawan paluh ehen hia kawan nogara bokon, jarin towanan nyan intin. Kawan bangsa co bokon ma Yahudi angar monguasa tana kota Yerusalem dapot waktu co ocop tonantu pian Mohotara.”
Kawan ciri co ika potinjun Yesus angar hopuli hia dunia tuh
21:25-33
(Mat. 24:29-35; Mrk. 13:24-31)
25“Daai angar oko kawan ciri nyan matanondo, bulan, kawan potondu nyan langit co ika potinjun dunia tuh angar boahir. Nyan bumi kawan kolunon jarin karas takut, putus asa tului otuh laut hintang golumbang eh co karas kahai. 26Kawan ponguasa nyan langit#21:26 Kawan ponguasa nyan langit boraoi maksut eh matanondo, bulan, potondu, planet (Yesaya 34:4; Ibrani 12:26-27; Wahyu 6:12-13). Tapi boraoi ka maksut eh kawan roh jahat nyan langit co ngolawan Yesus hintang kawan dulun co porocaya ma-Eh (Epesus 2:2,6:12; Roma 8:38; 1 Korintus 15:24-26; 1 Petrus 3:22). angar hoguncang, nompi dulun pisan tului takut lau noto kawan boncana monimpa dunia cotuh. 27Nyan waktu iyoh, dulun angar noto Anak Kolunon dombut hopuli hia dunia tuh, toka ingkan sorga nyan tungkui hawun. Are angar molet pandau. Are angar korinah bokuasa.#21:27 Daniel 7:13-14. Yesus angar hopuli ma kuasai ika ngalah Lacan Setan hintang kokon kawan roh jahat, ika mohukum kawan dulun co aroko porocaya ma-Eh. 28Waktu ikan noto kokoi yoh molai tojadi, jadi yakin hintang porocaya boh! Tenang leh, awi aroko tahi oni ikan angar tonyolamat.”#21:28 Nyan waktu cioh, dulun porocaya ma Yesus angar ‘tonyolamat’ ingkan kosoranta hintang tingkoh nyan dunia tuh awi kuasa jahat aroko boraoi nyarang ito bat.
29Paluh, Yesus monjelas eh hapo cuntu cotuh, “Porhati puun ara atawa puun ome bewe. 30Amun ikan noto kawan kaju ocop ngonolak, ikan angar monau aroko tahi oni kaju cioh angar mua. 31Isanioh ka, amun ikan noto kokon kawan ciri nyan langit hintang nyan bumi, ikan angar monau aroko tahi oni Korojaan Mohotara ocop jonyo.
32Ngoneh eh bat! Sobujur eh aroko kokon dulun ingkan jaman cotuh angar matoi sorinai kokon aang tatuh molai tojadi. 33Langit hintang bumi angar boahir, tapi antun-Kuh tenden sokotahi-tahieh.”
Sobulih hopompaluh siap indan korombut Yesus
21:34-38
34-35“Jaga leh arop me. Aroh dapot oko kawan hal nyan dunia tuh co ngoneroh pikiran me, misal eh buso, gawi jahat co tongompian amun ocop buso, kawan mosalah kobolum tuh. Amun pikiran me isanioh, daai ikan aroko siap kotika ondo cioh dombut. Awi ondo cioh angar dombut indan kokon dulun, aroko tosangka-sangka, somperengu jeret dikah buah ocin. 36Jadi, bojaga-jaga boh. Bodoa boh ina kotika aang cioh tojadi ikan tenden porocaya ma Mohotara. Paluh ikan angar landah waktu Anak Kolunon hopuli hia dunia tuh, mongadili kokon dulun.”
37Sika ondo Yesus majar nyan polontaran Lopo Mohotara. Sika momi, Are tirui nyan Lungkuh Jaitun nyan luar Kota Yerusalem. 38Ngonyua-nyua, kokon dulun orong dombut mahah Lopo Mohotara, nyau ngoneh ajaran-Eh.
موجودہ انتخاب:
Lukas 21: TBSS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
