Lukas 19
19
Opah sopopak Yesus, cara kobolum Sakeus borubah
19:1-10
1Opah iyoh Yesus hintang kawan dulun co umba Are muntam kota Yeriko hintang holuh nyalan nyihin kota cioh. 2Oko ico beti kopala takih pajak co nukui nyan intin araieh Sakeus. Are korinah koponatoueh. 3Kotika Yesus nyalan buah kota cioh, Sakeus bousaha ika lian noto Yesus. Tapi aroko boraoi tului dalo kuhat dulun mahi kole are dulun eh redek-redek. 4Jadi, are tongkoru nosoun dulun orong yoh, holuh nukat batang ara, ika boraoi noto Yesus co sonyulu oni angar nyihin intin.
5Kotika Yesus dapot dokin batang ara cioh, Are nongkara hia hunyung. Hie-Eh, “Sakeus, dere ngeleh ingkan intin! Awi Akuh sobulih hiloi nyan lopo mu momi tuh.” 6Hanyih iyoh ka, Sakeus toka holuh norima Yesus nyan lopoeh ma kojorih jerah.
7Tapi kawan dulun co noto Yesus tulak hia lopo Sakeus ngolomumut. Hien doh, “Huh! Are nganda lopo dulun co bodosa.”
8Opahiyoh nyan lopoeh, Sakeus tonjok holuh mantun ma Yesus, “Tuhan, akuh bojanji mihi sotengah ingkan harta banda kuh indan kawan dulun mala. Sika dulun co piji tonipu kuh, akuh bojanji nahur hopuli opat kali lipet!”
9Paluh Yesus mantun, “Ngondai tuh iko hintang kokon koluarga mu tonyolamat, awi iko mahi koturunan Abraham.” 10Anak kolunon dombut ika nganyap paluh nyolamat dulun co bodosa.
Kesah tintun kawan polayan co pio hintang co jahat
19:11-27
(Mat. 25:14-30)
11Pondehan Yesus mantun ma Sakeus, kawan dulun incah ngoneh Yesus. Awi Are ocop doni ma kota Yerusalem, maka kawan dulun nyompan bahawa Korajaan Mohotara angar lansung oko nyan dunia tuh, iyohonon iroh nyompan hintang bopikir bahawa Mohotara angar lansung momorintah sobagai Laca nyan dunia. Jadi, Yesus majar iroh ma kesah cotuh. 12Hie-Eh, “Oko ico beti utuh kawan laca. Are sobulih tulak hia negri co ocu ika haba tomangkat jarin laca. Opah iyoh are angar hopuli paluh momorintah nyan derah eh bat. 13Tapi sorinai tulak, are naah sopuluh polayan paluh mihi orong duit indan doh, hopomasing ico kodilat mina. Hie-Eh, ‘Hapoeh leh pio-pio duit cotuh ika modal mu bodagang indangkuh dapot akuh buli.’
14Opah utuh laca cioh tulak, kawan dulun co sobangsa ma are co dolee maeh, nyuhu kawan coruhan doh nosoun are ina porapot tungon doh ma ponguasa co bokuasa mangkat eh jarin laca cioh nyan uwoidi. Hien doh, ‘Kaih aroko kolu ma dulun cotuh jarin laca kaih.’ 15Tapi utuh laca cioh niin tenden tomangkat jarin laca nyan derah cioh.
Hayak buli, are nyuhu ina kawan polayan co ocop tomihi duit yoh dombut hia are, ika monau pira kobohujung co kohaba doh hopomasing indaieh.
16Polayan co portama dombut, paluh molapor, ‘Tuan, ico kodilat mina co ihim mu ma akuh yoh, ocop hapangkuh hintang hasir eh sopuluh kali lipet.’ 17Maka, tuan cioh mantun, ‘Pio lau! Iko polayan co pio. Awi iko lian tomorocaya ma urusan co kolik, akuh mangkat iko jarin ponguasa nyan sopuluh kota.’
18Polayan co koduo dombut, paluh molapor, ‘Tuan, ico kodilat mina co ihimmu ma akuh yoh, ocop hapangkuh hintang mohasir limo kali lipet.’ 19Maka, tuan cioh mantun, ‘Akuh mangkat iko jarin ponguasa nyan limo kota.’
20Polayan co kotolueh dombut, paluh molapor, ‘Tuan, tuh iyoh ico kodilat mina co ihim ma akuh yoh. Tomika kuh ponah saput tangan 21awi akuh takut ma iko. Iko dulun co purun. Iko monu aang co sobujur eh aroko tiko. Iko haba kobohujung ingkan gawin dulun bokon samah ma dulun co monu hasir umo co aroko are mimbun eh.’ 22Maka, tuan cioh mantun, ‘Iko polayan co jahat! Akuh angar mohukum iko sosuai ma antun mu non. Iko nisi akuh purun. Akuh monu ome aang co sobujur eh aroko takuh. Akuh haba kobohujung ingkan gawin dulun bokon samah ma dulun co monu hasir umo ingkan umo co aroko are mimbun eh. 23Amun iko bopikir isanioh, jakaieh iko pokongaroh mika duit cioh ika pokanak eh ma dulun co potindah duit, ika kotika akuh buli, akuh norima duit kuh yoh kawun anak eh ka.’
24Opah iyoh are mantun ma kawan dulun co tonjok nyan intin, ‘Monu duit conon ingkaieh. Paluh mihieh indan polayan co tempun sopuluh kodilat mina yoh.’
25Tapi iroh mantun, ‘Tuan are ocop tempun sopuluh kodilat mina.’
26Tuan cioh museh, ‘Ngoneh eh bat! Dulun co ocop haba, angar ihin meleh orong kole; tapi dulun co aroko tempun ome-ome, ome co oko nyan are mahi angar tomonu ingkaieh. 27Nah, makitu tintun kawan musuh kuh non co aroko kolu akuh jarin laca doh. Mehen eh bat hantoi. Ika ngompatoi kokon doh nyan tohimo kuh!’ ”#19:11-27 Ponah kesah cotuh, koturunan laca potinjun tintun Yesus, kawan polayan potinjun tintun kawan murid-Eh, hintang musuh eh, gamaran kawan pomimpin Yahudi co aroko porocaya ma Yesus iyohonon Laca Co Tomonjanji Mohotara. Waktu Yesus hopuli hia dunia indan co koduo kalieh, dulun co sotia nompi kojere-Eh angar ihin aang co pio hinut, tapi kawan-musuh-Eh angar tomohukum.
Komok dulun nohambang korombut Yesus nyan kota Yerusalem
19:28-40
(Mat. 21:1-9; Mrk. 11:1-10; Yoh. 12:12-15)
28Opah-Eh umbot bokesah nain iyoh, Yesus ngompaluh solanai-Eh hia kota Yerusalem. Are nyalan soun hintang co bokon yoh ngonulu nyan uwoi likut-Eh. 29Kotika iroh jonyo dapot desa Betpage hintang desa Betania nyan bengke Lungkuh Saitun, Yesus nyuhu duo murid-Eh soun hia desa cioh. 30Hie-Eh, “Tulak leh soun hia desa co tonyuru to tuh. Hayak dapot, ikan duo angar noto ico koledai co incah anak eh co botangkin nyan tihang kaju nyan idi dai. Koledai cioh arinai piji tongoncakat dulun. Mukoi talin koledai cioh paluh mehen eh hantoi. 31Amun oko co ngisok, ‘Kura ikan mukoi talin koledai conon?’ Maraeh ‘Tuhan porulu maeh.’ ”
32Duo murid yoh tulak. Kokon aang co tojadi pas isan co tomantun Yesus ma doruo. 33Pondehan iroh mukoi talin anak koledai cioh, dulun co tempui mantun, “Noh, kura ikan mukoi talin koledai conon?”
34Doruo museh, “Tuhan co porulu maeh.” 35Paluh, doruo mehen anak koledai cioh hia Yesus. Tomihat doh jubah doh nyan tungkui likut anak koledai cioh paluh dohop Yesus cakat hia tungkuieh. 36Waktu Yesus nunggang anak koledai cioh nyuru kota Yerusalem, kawan dulun mihat jubah doh nyan calan co tonyihin Yesus ika mohormat Are.
37Kotika Yesus ocop jonyo dapot Yerusalem nyan tosuloh Lungkuh Saitun, kawan murid-Eh co orong yoh noriak jorih, nara Mohotara tului kokon aang co mosotahir co ocop kitan doh yoh. 38Hien doh,
“Ihin aang co pio hinut bat Laca co dombut ponah aran Tuhan, Mohotara!#19:38 Masmur 118:26.
Makitu indan to oko kongolandah kongolami nyan sorga,
hintang tara hormat indai-Eh nyan ika co poko hunyung!”
39Tapi pira-pira pomimpin agama ingkan kolompok Parisi nyan halo dulun orong yoh mantun ma Yesus, “Bapa Guru, nyuhu kawan murid-Mu non umbot mantun nain onon.”
40Yesus museh iroh yoh, “Porocayaleh! Amun kawan murid-Kuh tonih, kawan batu tatuh angar noriak nara Mohotara!”
Yesus nohuang Yerusalem
19:41-44
41Yesus sasar dokin ma kota Yerusalem. Kotika Are noto kota cioh, Are nangih nohuang kawan dulun nyan intin. 42Hie-Eh, “Sasi lau! Akuh karas boharap ikan monau cara co angar nompi ikan ngolandah ngolami. Tapi makitu ikan aroko boraoi monau cara cioh. 43-44Ikan aroko monau kotika Mohotara dombut ika nyolamat ikan. Maka, angar oko kotikaeh nyan omoh musuh me angar ngapung kota me, nompi aang co ngantong ikan. Iroh angar hopompaluh nyarang ikan ingkan kokon ponjuru. Iroh angar ngolumat kota me, kawan batu kuta, kawan batu bangunan angar tonusut. Kokon ponduduk angar tongompatoi.”#19:43-44 Opat pulu toun opah iyoh nyata bat aang co tomara Yesus. Kotika tontara Romawi mohancur kota Yerusalem nyan toun pitun pulu.
Yesus musir kawan podagang ingkan polontaran Lopo Mohotara paluh majar nyan intin
19:45-48
(Mat. 21:12-13; Mrk. 11:15-18; Yoh. 2:13-16)
45Opah Yesus dombut nyan Yerusalem, Are muntam hia polontaran Lopo Mohotara paluh musir kawan podagang nyan intin. 46Hie-Eh, “Ikan nompi Lopo Mohotara ika guha porampuk!#19:46 Noto Yeremia 7:11. Tapi oko tonulih nyan Surat Borasih bahawa Lopo Mohotara iyohonon lopo ika bodoa.”#19:46 Noto Yesaya 56:7.
47Opah iyoh, Yesus majar nyan polontaran Lopo Mohotara sika ondo. Pondehan iyoh, kawan imam kopala, kawan guru agama Yahudi, hintang kawan pomimpin dulun Yahudi nganyap cara ika ngompatoi Are. 48Tapi iroh aroko boraoi awi hopompaluh orong dulun nyan toliut-Eh, herak ngoneh ajaran-Eh.
موجودہ انتخاب:
Lukas 19: TBSS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
