Lukas 13
13
Dulun angar matoi lumat amun aroko naat dosa hintang aroko ngonyorih songan Mohotara
13:1-9
1Nyan waktu iyoh, Yesus tomara pira-pira beti dulun co dombut hia-Are. Hien doh, “Oko kawan dulun ingkan derah Galilea co tulak hia kota Yerusalem ika momporsembah kurban nyan Lopo Mohotara. Kotika iroh mihi porsembahan eh, Pilatus, gubernur pomorintah Romawi yoh, nyuhu ina dulun taiyoh tongompatoi.”
2Ngoneh tarung cioh, Yesus mantun ma iroh, “Aroh bopikir kawan dulun Galilea yoh tongompatoi ma kopurun isan iyoh tului iroh meleh bodosa hangki kokon dulun bokon nyan Galilea. 3Pikiran me korinah kosalaeh. Porhatieh bat amun ikan aroko naat dosa hintang aroko ngonyorih songan Mohotara, ikan mahi angar matoi isan iroh ka. 4Sanioh ka tarung tintun jalu balas beti dulun co matoi hiah monara Siloam nyan Yerusalem kolungkang ngohop iroh. Aroh bopikir iyoh tojadi ma iroh tului iroh meleh bodosa hangki kawan dulun bokon nyan kota Yerusalem. 5Pikiran me yoh korinah kosalaeh. Porhatieh bat amun ikan aroko naat dosa hintang aroko ngonyorih songan Mohotara, ikan mahi angar matoi isan iroh ka.”
6Paluh Yesus majar iroh ma kesah cotuh, “Oko dulun co tempun kabun angur. Are mimbun kaju ara nyan intin ka. Derek are nyalan noto, pai imbun kaju ara cioh ocop mua. Tapi sika are nyari imbun kaju ara cioh hopompaluh arelu oko buaeh.
7Maka are mantun ma tukang kabun eh, ‘Ocop tolu toun kotahieh akuh nganto puun ara cotuh mua. Tapi cara nyaloi. Nowong eh leh! Keleh nowong eh leh puun ara conon ina tanaeh aroko mohampa.’
8Tapi hien tukang kabun, ‘Pa, olueleh puun ara cotuh tenden bolum ico toun oni. Akuh angar moncangkur tana toliut eh holuh umpi pupuk eh. 9Ma cara conon akuh boharap puun ara conon angar mua toun muka. Tapi amun aroh, olu leh tonowong.’ ”#13:9 Ponah tindung cotuh batang ara cioh mahi molambang sika dulun, buaeh molambang bukti bahawa kawan dulun naat dosa hintang bolum ngonjorih songan Mohotara (Yohanes 15:8; Galatia 5:22-23; Epesus 5:8-9), hintang tempun kabun angur molambang Mohotara, co angar mohukum kokon co kuloi ika naat dosa hintang porocaya ma-Eh. Tukang kabun molambang Yesus hintang kawan coruhan Mohotara co nyawot ma Mohotara ika sabar hintang pomasi ika kawan dulun incah tomihi kosempatan ika naat dosa hintang tonyolamat.
Yesus pomambuh ico beti bawe nyan ondo Sabat
13:10-17
10Nyan ico ondo Sabat, Yesus majar nyan ico lopo ika sombayang. 11Nyan intin oko ico beti bawe co ocop jalu balas toun hotoro. Oko roh jahat nyan ponah arop eh co umpi are hotoro dapot jarin bojungkung. Are samah sindo aroko lian tonjok sokoting.
12Kotika Yesus noto bawe cioh, Yesus naah are hia muka. Paluh Yesus mantun, “Nah, makitu iko topomambuh ingkan toromu.” 13Opah Yesus mandak silui-Eh, bawe cioh holuh tonjok sokoting paluh nara Mohotara.
14Tapi kopala nyan lopo ika sombayang cioh jarin sangit, awi are bopikir gawin Yesus yoh gawi co aroko hini tongompian nyan ondo Sabat awi ondo Sabat husus ika nondoolai. Maka kopala nyan lopo ika sombayang mantun ma kumpulan dulun taiyoh, “Monurut Hukum agama to, oko onom ondo ika bogawi. Jadi, amun jere tongomambuh, dombut hia intoi nyan kawan ondo taiyoh. Aroh nyan ondo Sabat!”
15Paluh Tuhan Yesus mantun maeh hintang ma dulun co bopikir samah ma are, “Ikan kawan dulun co pura-pura pio! Sika ondo, tomasuk ondo Sabat, ikan miwuh sapi atawa koledai ingkan kandang eh, mehen eh pusit ika boraoi ngorih. Onon mahi gawi ka. 16Tapi bawe cotuh iyohonon ico beti ingkan tonga umat Mohotara, koturunan Abraham. Roh jahat lacan setan ocop umpi are soranta jalu balas toun kotahieh. Pantas leh are topomambuh ingkan kosoranta toroeh, oluco otuh ondo Sabat.”
17Kotika Yesus mantun sanioh, kokon dulun co monentang-Eh nongkomo mohaan, tapi co bokon eh jorih jerah tului kokon aang co mosotahir co tongompian Yesus.
Korojaan Mohotara somporengu luang sosawi hintang bopongaruh isan dagi
13:18-21
(Mat. 13:31-33; Mrk. 4:30-32)
18Paluh Yesus mantun ma kumpulan dulun taiyoh, “Akuh angar mongumpama Korojaan Mohotara. 19Korojaan Mohotara yoh somporengu jangoi sosawi co tomorawuh nyan kabun. Jangoi cioh nyuluh paluh hobatang hintang kawan beleu nyalah nyan kawan daaieh.”
20-21“Korojaan Mohotara mahi sompama dagi nyan ponah kucok tepung. Ico bawe ngolutoeh ponah tolun pulu kilo tepung. Kojekaieh, dagi cioh nompi kokon tepung co tongalut yoh nyiwuh.”#13:20-21 Luang jangoi iyohonon aang co pokokolik tapi amun during paluh dapot bahai. Nyan jaman Yesus baya isut dulun co paham ma kojere Mohotara. Tapi dapot jaman cotuh sasar orang dulun porocaya ma Yesus. Nohani, nyan ahir jaman, kokon dulun angar tunduk ma-Are. Noto nyan Yes. 45:23 hintang Roma 14:11. Dagi ika gamaran aang co isanioh, tapi gamaran pongaruh eh ka. Anggota koluarga Korojaan Mohotara, dulun co porocaya ma Yesus bopongaruh co pio nyan dunia tuh.
Oko dulun co bopikir iroh angar lian muntam sorga, tapi tonyata aroh
13:22-30
22Incah ponah solanan nuntuh kota Yerusalem, Yesus buah kawan kota hintang kawan lowu samir majar tintun Korojaan Mohotara. 23Paluh oko dulun co ngisok ma Are, “Pa, main boh baya isut leh pai dulun co angar tonyolamat?”
24“Paluh Yesus museh, Korojaan Mohotara samah isan ico lopo co tungkangeh sikong. Bojuang bat ika muntam buah tungkang co sikong yoh, awi orong dulun co suwah muntam, tapi baya isut co hegah.
25Daai tempun lopo angar mantop antop eh. Oko nyan halo ikan co angar nyan luar, ngatuk samir mantun, ‘Tuan, mukap antop indan kaih!’ Tuan cioh angar museh, ‘Aroh! Akuh aroko nyono ikan.’ 26Paluh ikan angar nyawot asi, ‘Tantu Iko nyono kaih! Kaih ocop derek kuman ngorih homboh Iko. Iko mahi derek majar nyan kawan calan nyan kota kaih.’ 27Tapi tuan cioh angar mantun kole ma ikan, ‘Akuh aroko nyono ikan. Buho bat ingkan Akuh! Kokom me dulun jahat’. 28Hiah iyoh, ikan angar noto tatu hiang me Abraham, Ishak hintang Yakup kawun kawan nabi nyan ponah Korojaan Mohotara nyan sorga, tapi ikan angar tonapuk hia noraka. Nyan intin ikan angar nangih tului korinah kohujok hintang angar ngoritet kosing me awi aroko kuhan muntam sorga.
29Orong dulun angar dombut ingkan ngolauh dunia. Iroh angar tonorima. Iroh angar tuot kuman nyan ponah Korojaan Mohotara nyan sorga. 30Porhatieh bat: Oko dulun co tomangap aroko penting makitu, tapi daai Mohotara angar umpi iroh penting. Oko ka dulun co tomangap penting makitu, tapi daai Mohotara angar nompi iroh aroko penting.”
Yesus mantun Are angar matoi nyan kota Yerusalem
13:31-35
(Mat. 23:37-39)
31Nyan waktu cioh ka, oko pira-pira beti dulun Parisi dombut hia Yesus. Iroh mantun, “Aroh nukui nyan intoi awi Herodes jere ngompatoi Iko! Keleh tulak hia ika co bokon.”
32Tapi Yesus mantun ma iroh, “Mantun eh ma srigala cioh, ‘Ngondaii cotuh hintang nyuap, Akuh angar tenden musir kawan roh jahat hintang pomambuh kawan dulun. Holuh nyan ondo co kotolu, Akuh angar ngumbot kawan gawing-Kuh.’ 33Oluco sanioh, Akuh sobulih ngoholuh solanang-Kuh hia kota Yerusalem ngondaii tuh, nyuap hintang opah nyuap awi Akuh angar tongompatoi nyan intin. Arelu oko ika bokon ika ico beti nabi Mohotara tongompatoi kocuali nyan Yerusalem.#13:33 Yesus hapo antun co tantokulang artieh. ‘Yerusalem’ boarti ‘kota damai’. Lopo Mohotara oko nyan intin. Kota utama indan dulun Israel, umat co tomili Mohotara. Jadi, karas kosalai amun dulun ngompatoi kawan nabi Mohotara nyan intin.
34Paluh Yesus nohuang Yerusalem, Akui ikan boh, kawan dulun Yerusalem. Mohotara nyoruhan kawan nabi indam me, tapi tomedak me seen iroh ma batu dapot matoi. Akuh jere pompaluh nyolindung ikan, samah ma ongkan pohok nyolindung kawan anak eh nyan pinda ilat eh. Tapi ikan kuloi. 35Tului iyoh, daai Mohotara angar moholu ikan tarop. Aroh tonyolindung-Eh kole Lopo Mohotara hintang ngolauh kota Yerusalem. Ikan aroko angar noto Akuh bat dapot ikan mantun tintun Akuh, ‘Are tuh dombut ponah aran Mohotara. Haas ito nara Are!’ ”#13:35 Ingkan Masmur 118:26.
موجودہ انتخاب:
Lukas 13: TBSS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
