Matayo 8

Yesu álamya emubenzi-benzi

(Mar 1:40-45; Luk 5:12-16)

1Era nyuma se'bi, Yesu era kwândaala kwe'i ndulungu. Ábere era ândaala'ko, bandu banene busese bera kumukulikira.

2Mwo'lu, mubenzi-benzi muuma era kumuikira. Oyu mubenzi-benzi, era kukoma emafi era muhondo sa Yesu. Era kumubura mbu: «Enawetu! Akaba uhónjire, ùnganyilamya.» 3Yesu era kunanula ekuboko na ámuuma'ko. Era kumubura mbu: «Nechi! Náhonda uláme!» Unao-unao, ola mubenzi-benzi kuna kulama. 4Chasinda, Yesu era kumuchichika mbu: «Uményaa! Ùtaereresaa wábura mundu asibya kwe'i myasi! Si uyáa kuchilosa era mwa kuhanyi, wánâna ne'mitulo* kwa kulosa kwa walámire mira, kukulikana no'kwa Mwaso wa Musa atúla àtechire.»#8:4 Akaba emundu alámisibwe ebibenzi, oyu mundu éndee áya kulosa ebakuhanyi kwa alámire mira. Éndee áira bacha, chasiya bàmwêmerere ahúbe kuba ala'uma ne'banji bandu. Somaa Balawi 13:45-46; 14:1-32.

Ebwemeresi bwe'mukulu-kulu we'basula be'Baroma

(Luk 7:1-10)

5Mango Yesu ábaa era êngirira mwa musi we'Kaperinaumu, kwera kuulukira mukulu-kulu muuma we'basula be'Baroma. Oyu mukulu-kulu, era kuika kwéma Yesu mbu àmuasaa. Era kumubura mbu: 6«Enawetu! Emukosi wanyi àremere, na mwe'chine chihangi, kuonjira ku anáonjire mwa nyumba, bushi álibuka busese.» 7Yesu era kumwǎkula mbu: «Nyingáika kumulamya.» 8Si oyu mukulu-kulu nai mbu: «Nânga Enawetu! Ndéte kwa nyìri kwa kùngatuma wêngirira mwa mwanyi. Rero Waliya, woyo unátetaa chinwa chiuma oshâo, ne'mukosi wanyi angálama. 9Bushi nanyi, nyìri era bufuli sa banji bakulu-kulu. Nyéte na basula ba batúla era bufuli sanyi. Nénde nánabura muuma mbu: ‹Éndaa!› Nai, unao-unao ánaenda. Nánabura ne'unji mbu: ‹Bàhaa!› Nai, unao-unao ánabaha. Ne'mukosi wanyi nai, kwa nanámubwirire ku énde ánaira.»

10Yesu ômvire bacha, era kusanwa busese. Era kwire ábura ebandu ba bábaa bamúkulikire mbu: «Kubinali! Nábabura kwa mwa Baisiraeli boshi, ndàfuraa kulola chiro ne'uma kwo'la wète bwemeresi bungana nge'bono Muroma! 11Ndababisha, bandu banene bakátengera mwa bisiki byoshi, kwa kwîngirira mwa Bwami bo'kwa nguba. Abu bandu, bakálya ala'uma na Aburahamu, na Isaka, na Yakobo. 12Si ba bachírembaa mbu bu bakába besha obu Bwami, bakáumwa era butala mwa musimya munene. Na mwo'yu musimya, bakálira na kulola kwa kasibu.»

13Chasinda, Yesu era kubura oyu mukulu-kulu mbu: «Endaa! Kwa bwemeresi bwao bùli, ku bingánaba.» Mwechi chihangi chine'chi, ola mukosi wai, kuna kulama.

Yesu álamya balwala banene

(Mar 1:29-34; Luk 4:38-41)

14Era nyuma se'bi, Yesu era kwêngirira mwa mwa Petero. Era kubuana nasala wa Petero àchilámbikire kwa njingo bushi ábaa asímbirwe ne'hushira. 15Yesu era kumuuma kwa mino, unao-unao era hushira kuna kulama. Oyu mukasi era kubatuka na áya kumutekera ebiryo.

16Ábere lwera luolo-olo, bera kuretera Yesu bandu banene. Abu bandu, bábaa basímbirwange na bihwasi. Ebi bihwasi, Yesu era kunde âmbula'bi mwa kunateta oshâo. Ne'balwala boshi nabo, era kunde ánabalamya.

17Byábaa bacha, chasiya cha chinwa chibérere, cha murebi* Isaya átetaa mbu: «Êkaa emalibuko metu moshi, era kwêka ne'malwala metu.»#8:17 Somaa Isaya 53:4.

Yesu âna eano kwa'ba báhonda kumukulikira

(Luk 9:57-62)

18Mango Yesu álolaa bandu banene bamúsungwire, era kubura ebanafunzi* bai mbu bahábukiraa kwa unji mushirirya we'nyanja.

19Mwo'lu, mukangirisi muuma we'Mwaso era kuchifunda ofu nai. Era kumubura mbu: «Mukangirisi! Chira era ungénde wánaya, nanyi nyingénde nákukulikira.» 20Yesu era kumwǎkula mbu: «Emitereri itúsa nyikunda, ne'milonge itúsa matu. Si nyi Mwana we'Mundu nyeke, ndatúsa chiro na chisiki cha kuonjira'mo!»

21Chasinda, unji mwanafunzi* muuma wa Yesu nai era kumubura mbu: «Enawetu! Ùnyirekaa tanga nyíye kutaba tata.» 22Yesu era kumwǎkula mbu: «Rékaa ebafu bénde bátaba bafu balikabo. Si woyo, unyíkulikiraa!»

Yesu ákaliira emulaba

(Mar 4:35-41; Luk 8:22-25)

23Era nyuma se'bi, Yesu era kwérukira mwa bwato, ebanafunzi* bai bera kuenda nai.

24Ábere baíka kwa nyanja, kwera kuulukira mulaba munene. Bushi no'ku, emeshi mera kutangirisa máchiumanga mwo'bu bwato. Si mwe'chi chihangi, Yesu yeke ábaa àonjire.

25Abu banafunzi* bai, bera kwire báya kumususa. Bera kumubura mbu: «Enawetu! Twásika, ùtulamyaa!» 26Nai mbu: «Era! Chi chátuma mwôbaa? Kubinali, ebwemeresi bwenyu bùkeire!» Era kwire êmanga, na ákaliira oyu mulaba ne'meshi. Era nyanja, kuna kuorera.

27Abu bandu, bera kusanwa busese. Bera kutangirisa báteta mbu: «Ewashe! Mundu muchiye ono? Ola mulaba ne'nyanja nabi byámutunda!»

Yesu álamya bandu babiri ba bábaa basímbirwe ne'bihwasi

(Mar 5:1-20; Luk 8:26-39)

28Mango Yesu ábaa era àhabukaa enyanja, era kuika mwa chio che'Baketari. Era kubuana bandu babiri ba bábaa bátengera kwa shinda. Abu bandu, bábaa basímbirwe na bihwasi. Ebi bihwasi, byera kubaíra bákali busese. Bushi no'ku, kwábaa kutachiri mundu asibya ola wéndee wáereresa árenga ofu nabo. 29Abu bandu bera kutangirisa báchilakangira mbu: «Eu Mwenyi Ongo! Chi wátuhonda'ko? Túburaa, waíkire kutulibusa era muhondo se'suku se'buchinjibusi?»

30Ofu ne'chi chisiki, ábaa ákerera buso bunene bwa ngulube. 31Ebi bihwasi, byera kwire byéma Yesu mbu: «Akaba wátwambula, utútumaa mwo'bu buso bwe'ngulube.» 32Nai mbu: «Muyáa'mo!» Ebi bihwasi kuna kubatenga'ko na byáchiuma mwe'sa ngulube. Bwa buso boshi, unao-unao kuna kwândaalira mwa nyanja, na sásikira'mo.

33Ebangere be'si ngulube bálolire bacha, bera kuhaira kwa musi. Bera kubalira ebandu kwa myasi yoshi era Yesu àkorere ba bandu babiri bábaa basímbirwe ne'bihwasi.

34Chasinjire, besha mwa musi boshi, bera kulibichira era Yesu ábaa àli. Bámulolire'ko, bera kumwěma busese mbu aténgaa mwa chio chabo.

موجودہ انتخاب:

Matayo 8: tbt

سرخی

شئیر

کاپی