प्रेरितां चे काम 9

9
शाऊल चे मन बदड़ले
(प्रेरितां चे काम 22:6–16; 26:12–18)
1शाऊल जको हमा तक प्रभु चे चैला नु धमकावणे ते मारती नाखणे ची धुन्‍नी मां हुता, ओ महायाजक चे गोढु गेला। 2ते ओणे दमिश्क चे प्राथनाघरा चे नांवा उपर ऐ अधिकारा चीया चिठ्ठीया मांगलीया कि का मर्द, का असतरी, जानु ओ ऐ पंथ उपर ङेखो वानु ब़ांथी कर यरुशलेम मां गेहती आवे।
3पर जिसे बेले ओ चलते-चलते दमिश्क चे गोढु पुज़ला, तां हेकदम आसमाना कनु ओचे चारो-तरफ सोज़ले चमकले, 4ते ओ भोंये उपर ढेती पला, ते हा अवाज सुणली, “हे शाऊल, हे शाऊल, तु मनु कां सतावी पला?”
5शाऊल ने पूछले, “हे प्रभु, तु कूण छी?”
ओणे केहले, “मैं ईशु छै, जानु तु सतावी। 6पर हमा ऊठती कर शहरा मां जा, ते जको तनु करने छै, ऊं तनु केहले जई।”
7जको इन्साने ओचे लारे हुती, वे चोप-चाप हुले रेहले, कांकि ओची अवाज तां सुणी पलते, पर कानु ङेखी कोनी पलते। 8तब शाऊल भोंये उपरु ऊठला, पर जिसे बेले आँख खोड़लीया तां ओनु कहीं कोनी ङिसले ते वे ओचा हाथ पकड़ती कर दमिश्क मां गेहती गेले। 9ओ तीन ङिहां तक ना ङेख सग़ला, ते ना खाले ते ना पिले।
10दमिश्क मां हनन्याह नांवा चा हेक चैला हुता, ओनु प्रभु ने दर्शन मां केहले, “हे हनन्याह!”
ओणे केहले, “हां प्रभु।”
11तब प्रभु ने ओनु केहले, “ऊठती कर वे गली मां जा जको ‘सिधी’ किहवावे, ते यहूदा चे घरे शाऊल नांवा चे हेक तरसुस बसन्दे नु पूछ, कांकि ङेख, ओ प्राथना करे पला, 12ते ओणे हनन्याह नांवा चे हेक मर्दा नु भीतर आते ङेखले ते ओणे ओचे उपर आपणा हाथ मेहलती कर केहले, कि बल्ति कनु ङेखु लाग़।”
13पर हनन्याह ने उत्तर ङिला, “हे प्रभु, मैं ऐ इन्साना चे बारे मां घणा कनु सुणले कि ऐणे यरुशलेम मां दुधे पवित्र लौका लारे बङीया-बङीया बुराईया करलीया, 14ते इठे तक वी ऐनू प्रधान याजका चे तरफु अधिकार मिड़ला आला छै, कि जको लौक दुधे नां गिही, वां सारा नु ब़ांथी गेहती जाओ।”
15पर प्रभु ने ओनु केहले, “तु चाह्‍ला जा, कांकि हा तां नेरीया जातिया ते वांचे राजे ते इस्राएलीया चे सामणे माये नां उजागर करने वास्ते माये चुणले आले जन छै। 16ते मैं ओनु बावड़ी, कि माये नांवा वास्ते ओनु किसड़े-किसड़े ङोख चवणे पड़े।”
17तब हनन्याह ऊठती कर ओ घरा मां गेला, ते ओचे उपर आपणा हाथ मेहलती कर केहले, “हे भऊ शाऊल, प्रभु, यानिकि ईशु, जको ओ मार्ग़ा मां, जिसे मां तु आला, तनु ङिसला हुता, ओणे ही मनु भेज़ले, कि तु बल्ति कनु ङेखु लाग़ ते पवित्र आत्मा लारे भरीती जाये।” 18ते तुरन्त ओचीया आँखीया कनु छिलके जिसड़े ढेले, ते ओ ङेखु लाग़ती गेला, ते ऊठती कर बपतिस्मा गेहला। 19बल्ति खाणे खाती कर हिम्मत गेहली।
ओ कोच्छ ङिहां तक वां चैला लारे रेहला जको दमिश्क मां हुते।
शाऊल चे जरिये ईशु मसीह चा प्रचार
20ते ओ तुरन्त यहूदी प्राथनाघरा मां ईशु चा प्रचार करु लाग़ला कि, “ईशु मसीह नरीकारा चा पूत छै।”
21ते सारे सुणने आले हैरान हुती कर किहुं लाग़ले, “का हा ओही शक्स कोनी जको यरुशलेम मां वानु जको ईं नां गेहते नाश करता, ते इठे वी ऐवास्ते आला हुता, कि वानु ब़ांहती कर प्रधान याजका गोढु गेहती जाओ?”
22पर शाऊल होर वी ताकतवार हुता गेला, ते ये बाते सबूत ङिती-ङिती कर कि ईशु ही मसीह छै, दमिश्क चे रेहणे आले यहूदिया चे मुँह बन्द करता रेहला।
शाऊल चे यहूदिया कनु बचती निकलणे
23 # 2 कुरि 11:32,33 जिसे बेले घणी ङिहें गुजरती गेली, तां यहूदिया ने मिलती कर ओची मारती नाखणे ची जुग़त काढ़ली। 24पर वांची जुग़त शाऊल नु पता लाग़ती गेला। वे तां ओनु मारती नाखणे वास्ते रात-ङिओ फाटका उपर घात मां लाग़ले रेहते। 25पर राती नु ओचे चैला ने ओनु टोकरे मां ब़िसाणले, ते शहरपनाह चे उपर कनु लटकाती कर उतारती ङिले।
यरुशलेम मां शाऊल चे पुज़णे
26यरुशलेम मां पुज़ती कर ओणे चैला लारे मिलणे चा उपा करला, पर सारे ओकनु ङरते, कांकि वानु विश्‍वास ना हुता, कि ओ वी चैला छै। 27पर बरनबास ने ओनु आपणे लारे प्रेरितां चे गोढु गेहती गेला वानु केहले, कि ऐणे केस रीति लारे मार्ग़ा मां प्रभु नु ङेखले, ते ओणे ऐचे लारे बाता करलीया बल्ति दमिश्क मां ऐणे किवें हिम्मती लारे ईशु चे नांवा चा प्रचार करला।
28शाऊल वांचे लारे यरुशलेम मां आता जता रेहला, ते बेधड़क हुती कर प्रभु ईशु चे नांवा लारे प्रचार करता। 29ते यूनानी ब़ोली ब़ोलणे आले यहूदिया लारे बातचीत ते वाद-विवाद करता रेहता पर वे ओनु मारती नाखणे चा जत्तन करु लाग़ले। 30ईं जाणती कर भावां ने ओनु कैसरिया मां गेहती आले ते तरसुस नु भेज़ती ङिले।
31यूं करती सारे यहूदिया, ते गलील, ते सामरिया, मां कलीसिया नु चैन मिड़ला, ते वांची बढ़ोतरी हुती गेली, ते वे प्रभु चे भय ते पवित्र आत्मा ची शान्ति मां टुरते ते बधते गेले।
लुद्दा ते याफा मां पतरस
32बल्ति यूं हुले कि पतरस हर जग़हा फिरता हुला, प्रभु चे वां पवित्र लौका चे गोढु वी पुज़ला, जको लुद्दा मां रेहते। 33ओठे ओनु ऐनियास नांवा चा हेक लकवे चा मारला हुला हेक शक्स मिड़ला, जको आठ साला कनु खाटे उपर पलता।
34पतरस ने ओनु केहले, “हे ऐनियास, ईशु मसीह तनु ठीक करे पला। ऊठ, आपणा बिस्तरा चा।” ते बल्ति ओ तुरन्त ऊठती खड़ा हुला। 35ते लुद्दा ते शारोन चे सब रेहणे आले ओनु ङेखती कर प्रभु ची तरफ फिरले।
36याफा मां तबीता नांवा ची हेक विश्‍वासनी रेहती, जानु यूनानी भाषा मां दोरकास किही जाया मतलब हरणी हुवे। वा ब़ोहत सारे भले-भले काम ते दान करती रेहती। 37वां ङिहां मां वा बिमार हुती कर मरती गेली ते वाणे विनु झूलातीकर चौब़ारे उपर मेहलती ङिले। 38ते ऐवास्ते कि लुद्दा याफा चे गोढु हुता, चैला ने ईं सुणती कर कि पतरस ओठे छै ङोन जणे भेज़ती कर ओकनु बिनती करली कि, “अम्चे गोढु आणे मां देर ना कर।”
39बल्ति पतरस ऊठती कर वांचे लारे हुती पला, ते जिसे बेले पुज़ती गेला, तां वे ओनु चौब़ारे उपर गेहती गेले। ते सारीया बांढीया रोतीया हुलीया ओचे लारे आती भिलीया रेहलीया ते जको चोले ते ओढ़णी दोरकास ने वांचे लारे रेहते हुले बणाले हुते, ङिखाणु लाग़लीया।
40बल्ति पतरस ने सारा नु ब़ाहर काढ़ती ङिले, ते गोङे टेकती कर प्राथना करली ते मय्यत नु ङेखती कर केहले, “हे तबीता, ऊठ।” बल्ति विणे आपणीया आँख खोलती ङिलीया ते पतरस नु ङेखती कर ऊठती ब़ेहली। 41ओणे हाथ ङिती कर विनु उठाणले ते प्रभु चे लौका नु ते बांढीया नु हकारती कर विनु जीती जाग़ती ङिखाणती ङिले।
42हा बात सारे याफा मां फैलती गेली, ते घणा ने प्रभु उपर विश्‍वास करला। 43ते पतरस याफा मां शमौन नांवा चा कुई चमड़े चा धन्धा करने आले चे इठे घणा ङिहां तक रेहला।

سرخی

شئیر

کاپی

None

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in