प्रेरितां चे काम 17
17
पौलुस ते सीलास थिस्सलुनिके शहरा मां
1बल्ति वे अम्फिपुलिस ते अपुल्लोनिया शहरा कनु हुते हुले थिस्सलुनिके शहरा मां पुज़ले, जिठे यहूदिया चे हेक प्राथनाघर हुते। 2ते पौलुस आपणी रीति चे अनुसार वांचे गोढु गेला, ते तीन सब्त चे ङिहां मां, पवित्रशास्त्र चे मुताबिक वांचे लारे बहस-बाजी करता रेहला। 3ते वा बाता चा खोलती-खोलती कर मतलब समझाता कि मसीह चे ङोख चवणे, ते मरला आला महु जीते हुवणे, जरुरी हुते, ते “हाओ ईशु जाया मैं तम्हानु प्रचार बावड़े, मसीह छै।” 4वांचे महु कईयां ने, ते नरीकारा कनु ङरणे अणगिणत यूनानी बन्दी, ते ऊंचे कोल्ल चा असतरीया ने वी मनती गेले, पौलुस ते सीलास लारे मिलती गेले।
5पर कोच्छ यहूदी गुस्से लारे भरीती गेले, ते बजारा महु कोच्छ बदमाश लौका नु भेले करती कर आपणे लारे मिलाती गेले ते भीड़ लाती कर शहर चे चौका मां हुल्लड़ करु लाग़ले। वाणे यासोन चे घरा मां धावा ब़ोलती ङिला, ते हा कोशिस करु लाग़ले कि कुई तरीके लारे पौलुस ते सीलास नु लौका चे सामणे आणो। 6वानु ओठे ना मिलणे चे वजह वे यासोन ते कोच्छ विश्वासी भावां नु शहर चे हाकिमा चे सामणे छिकती आले ते जोरा रीत रौल मचाती ते किहुं लाग़ले, “यां लौका ने पुरे संसारा मां अफरा-तफरी फैलाती नाखली, ते हमा इठे वी आती पुज़ले। 7ते यासोन ने आपणे घरा मां वानु शरण ङिली, ते ये सारे चे सारे हा किही कि ईशु राजा छै, ते कैसर राजे ची आज्ञा चे विरोध छी।”
8जिसे बेले भीड़ ने ते शहर चे हाकिमा ने ईं सुणले तां वे भड़कती गेले। 9ते वाणे यासोन ते बाकि बन्दा नु जमानती उपर हरजाना भरवाती कर छोड़ती ङिले।
बिरीया शहर मां पौलुस ते सीलास
10विश्वासी भावां ने तुरन्त रातो-रात पौलुस ते सीलास नु बिरीया शहरा मां भेज़ती ङिले, ते वे ओठे पुज़ती कर यहूदिया चे प्राथनाघरा मां गेले। 11बिरीया शहरा चे लौक थिस्सलुनिके चे यहूदी लौका कनु घणे भले हुते, ते वाणे बङी लालसा लारे वचना नु ग्रहण करले, जको पौलुस वानु सिखाता वां बाता ची सच्चाई चे बारे मां हर ङिओ पवित्रशास्त्र नु बङी गहराई लारे पढ़ते रेहले। 12ऐवास्ते वांचे महु घणीया ऊंचे कोल्ल चीया यूनानिया असतरीया ते मर्दा ने विश्वास करला।
13पर जिसे बेले थिस्सलुनिके शहरा चे यहूदिया नु पता लाग़ला कि पौलुस बिरीया मां वी नरीकारा चे वचना चा प्रचार करे पला, ते ओठे वी जती कर लौका नु भड़काऊ ते हलचल मचाऊं लाग़ले। 14तब तुरन्त ही विश्वासी भावां ने पौलुस नु विदा करती ते समुन्दर चे किनारे सनु भेज़ती ङिले, पर सीलास ते तीमुथियुस उठी रेहती गेले। 15पौलुस नु पुचाणे आले ओनु एथेंस शहरा तक पुचाले, ते सीलास ते तीमुथियुस चे वास्ते हा सनेसा आणला कि वे उठु जल्दी टुरती पड़ो।
एथेंस शहरा मां पौलुस
16जिसे बेले पौलुस एथेंस शहरा मां सीलास ते तीमुथियुस चा इन्तजार करे पलता ला, ओ ईं ङेखती कर कि सारा शहर मूर्तिया लारे भरीला पला, आत्मा मां घणा ङुखी हुला। 17ऐवास्ते ओ यहूदी प्राथनाघरा मां यहूदिया ते यूनानी भग़ता लारे ते शहर चे चौका मां जको लौक मिलते, वांचे लारे ओ हर ङिओ बहस-बाजी करता रेहता। 18बल्ति कोच्छ इपिकूरी ते स्तोईकी दार्शनकारीया महु कोच्छ ओचे लारे तर्क करु लाग़ले,
ते आपस मां किहुं लाग़ले कि, “हा बकवादी का केहणे चाहवे?”
पर ङुजा ने केहले कि, “हा कुई नेरे देवता चा प्रचारक छै।” कांकि पौलुस तां प्रभु ईशु मसीह चा ते पुनरुत्थान चा सुसमाचार सुणाता।
19ऐवास्ते वे पौलुस नु अरियुपगुस पंचेत घरा मां गेहती गेले ते ओकनु पूछु लाग़ले, “का अम्ही जाण सग़ु, दुधे जरिये ङिली गेली हा नवीं शिक्षा का छै? का तु अम्हानु समझावे? 20कांकि दुधे जरिये बावड़लीया गेलीया बाता अम्चे वास्ते अनोखीया छी, अम्ही जाणने चाहु कि यांचा मतलब का छै?” 21तब ओनु केहले कांकि एथेंस शहरा चे निवासी ते प्रदेसी जको ओठे रेहते, वानु नेरे कुई काम कोनी हुते सेर्फ नवींया-नवींया बाता सुणनीया ते कहाणीया मां ही आपणा समय गुजारते।
अरियुपगुस पचेंत घरा मां पौलुस चा भाषण
22बल्ति पौलुस अरियुपगुस शहर चे बीच मां भिले रेहती कर केहले कि, “हे एथेंस शहरा चे लौक, मैं ङेखे पला कि तम्ही हर बाते मां देवता नु बङे मनणे आले छिवा। 23कांकि मैं घूमते-फिरते हुले तम्चीया पूजा करने आलीया चीजा नु ङेखले, ते मैं हेक इसड़ी वेदी ङेखली, जाये उपर ईं लिखले पलते ले, ‘अणजाणे ईश्वर चे वास्ते।’ ऐवास्ते जिसे नु तम्ही बिना जाणले पूजा, मैं तम्हानु ओचा समाचार सुणावे पला।
24 #
प्रेरि 7:48
“जिसे नरीकारा ने धरती उपर सारीया चीजा नु बणाले, ओ स्वर्ग़ ते धरती चा मालिक हुती कर हाथा चे बणाले आले मन्दरा मां ना रिही। 25ते ओनु ना ही कुई जरुरत छै बन्दे ची सेवा ची, ते ना ही ओ काये उपर निर्भर छै। कांकि ओ तां आप ही सब नु जीवन ङिये ते सांस ते सब कोच्छ ङिहें। 26ओणे तां हेक मूल लारे बन्दा चा सारीया जातिया धरती उपर रेहणे चे वास्ते बणालीया, ते ओणे ही बन्दा चा समय, ते रेहणे ची जग़हा, ते हद्द वी ब़ांथी ङिली। 27इसड़े ऐवास्ते हुले कि वे नरीकारा नु सोधो, ताकि वे ओचे गोढु पोज़ सग़ो, ते वास्तव मां, ओ अम्चे महु काये कनु वी दूर कोनी। 28कांकि अम्ही ओचे मां जीते रिहुं, ते अम्चे टुरने-फिरने, ते टिकले रिहुं। जिसड़े कि तम्चे कई कविया ने वी केहले, ‘अम्ही तां ओचे ही वंशज वी छिऊं।’
29“कांकि अम्ही नरीकारा ची ऊलाद्ध छिऊं, ऐवास्ते अम्हानु ईं कङी वी नी सोचणे चाही छै कि, परमात्मा सोने, जा चान्दी, जा पत्थर चे समान छै, जको बन्दे ची कारीगरी ते ओची सोच लारे बणाले गेले हो। 30हमा तक तां नरीकारा ने अज्ञानता चे समय उपर ध्यान कोनी ङिला। पर हमा तां हर जग़हा सारा बन्दा नु मन फिरावणे ची आज्ञा ङिये पला। 31कांकि नरीकारा ने हेक ङिओ ठहराला, जाये कनु ओ शक्स चे जरिये धार्मिकता लारे संसारा चा न्यां करी, जानु ओणे ठहराले ते मरला आला महु जीते करले, हा बात सारा बन्दा उपर साबित करली।”
32मरला आला महु जीते हुवणे ची बात सुणती कर कोच्छ लौक तां ओचे उपर मजाक करु लाग़ती गेले, पर नेरे कईयां ने केहले कि, “यां बाता चे बारे मां अम्ही बल्ति कङी दुधे कनु होर ज्यादा सुणु।” 33ओही बेले पौलुस वांचे महु चाह्ला गेला।
34कोच्छ बन्दी पौलुस लारे मिलती गेली, ते प्रभु उपर विश्वास करला, जाये मां अरियुपगुस पंचेती चा सदस्य दियुनुसियुस, ते दमरिस नांवा ची हेक असतरी, ते वांचे लारे नेरी वी कोच्छ बन्दी हुती।
موجودہ انتخاب:
प्रेरितां चे काम 17: ODR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
CC BY-NC-ND 4.0