प्रेरितां चे काम 15
15
यरुशलेम ची सभा
1बल्ति कई लौक यहूदिया प्रदेस कनु अन्ताकिया शहर मां आती कर भावां नु हा सिखाऊं लाग़ले, “मूसा ची रीति चे अनुसार अगर तम्चा खतना कोनी हुला तां तम्चा उद्धार ना हो सग़ी।” 2जिसे बेले पौलुस ते बरनबास चा वांचे लारे घणा झग़ड़ा ते बहस-बाजी हुली, ते ईं ठहराले गेले कि पौलुस ते बरनबास नु कोच्छ नेरा चैला चे लारे ये बाते चे बारे मां सोच-विचार चे मकसद लारे प्रेरितां ते कलीसिया चे अग़ुवा चे गोढु यरुशलेम सनु भेज़ती ङिले जाओ।
3ऐवास्ते अन्ताकिया ची कलीसिया ने वानु थोड़ी दूर तक पुचाले, ते वे फीनीके ते सामरिया प्रदेसा महु हुते हुले, नेरीया जातिया नु मन फिरावणे चा सुसमाचार सुणाते गेले। ते ऐ समाचार लारे सारे भऊ घणे खौश हुले। 4जिसे बेले वे यरुशलेम पुज़ले, ते विश्वासी ते प्रेरित ते कलीसिया चे अग़ुवे वानु बङी खुशी लारे मिड़ले, ते वाणे बावड़ले कि नरीकारा ने वांचे लारे हुती कर किसड़ी बङी-बङी कामे करली।
यरुशलेम शहर मां बहस-बाजी
5ये बाते उपर फरीसिया चे दल महु कोच्छ विश्वासी लौक खड़े हुले ते केहले कि, “नेरीया जातिया नु खतना कराणे ची ते मूसा ची व्यवस्था उपर टुरणे ची आज्ञा ङेणी चाही छै।”
6तब प्रेरित ते अग़ुवे ये बाते चे बारे मां सोच-विचार करने चे मकसद लारे भेले हुले। 7#प्रेरि 10:1–43बल्ति पतरस ने सोच-विचार करने चे बाद खड़े हुती कर केहले कि, “हे माये भऊ, तम्ही जाणा कि घणी ङिहें हुली, नरीकारा ने तम्चे महु मनु चुणती गेले, कि माये मुँहा कनु नेरीया जातिया सुसमाचार चा वचन सुणती कर विश्वास करो। 8#प्रेरि 10:44; 2:4ते मना नु परखणे आले नरीकारा ने वानु वी अम्चे आलीकर पवित्र आत्मा ङिती कर ऐची ग़वाही ङिली। 9ते नरीकारा ने वांचे विश्वास चे जरिये वांचे मन शोद्ध करती कर अम्चे मां ते वांचे मां कुई भेद-भाव कोनी राखला। 10ऐवास्ते हमा तम्ही कां नरीकारा नु परखा पले कि नेरीया जातिया ची गिच्ची उपर इसड़ा जूले मेहला पले, जानु ना तां अम्ही ते ना अम्चे पुरखे चा सग़ले? 11पर अम्चा विश्वास तां हा छै कि प्रभु मसीह ईशु चे अनुग्रह लारे अम्चा उद्धार ठीक यूंही हुला जिंवे वांचा हुला।”
12तब सारी सभा चोप-चाप हुती कर बरनबास ते पौलुस ची सुणु लाग़ली, कि नरीकारा ने वांचे जरिये नेरीया जातिया मां किसड़े-किसड़े बङे चैन्ह, ते अचम्भे ची कामे ङिखाणली।
याकूब चा भाषण
13जिसे बेले वे चोप हुती गेले तां याकूब किहुं लाग़ला कि, “हे भऊ, माई सुणा। 14शमौन ने बावड़ले कि शुरुआत कनु ही नरीकारा ने किसे तरीके लारे नेरीया जातिया महु आपणे नांवा वास्ते हेक प्रजा चुणने ची कृपा करली। 15ते ऐचे लारे भविष्यवक्ता चीया बाता वी मिली, जिंवे लिखले पले,
16“ ‘ऐचे बाद मैं बल्ति आती कर,
दाऊद चे ढेले आले डेरे नु खड़े करी।
ते ओचे खण्डरा नु बल्ति कनु बणावी,
ते ओनु खड़े करी।
17ऐवास्ते कि बाकि इन्साने,
यानिकि सब नेरीया जातिया
जको माये नांवा चा किहवावी,
प्रभु नु सोधो।
18हा ओही प्रभु किहे जको जग़त ची शुरुआत कनु यां बाता चा समाचार ङिता आला।’
19“ऐवास्ते माई सोच हा छै कि, नेरीया जातिया महु जको लौक नरीकारा ची तरफ फिरी, अम्ही वानु ङोख ना ङिऊं। 20पर वानु लिखती भेज़ा कि,
मूर्तिया उपर चढ़ले आले खाणे तम्हानु नी खाणे चाही छै।
ते आपणे आप नु व्यभिचार कनु बचाली राखा।
गिच्ची घुटले आली मवेशी चा मांस खाणे कनु दूर रिहो ते वांचे लुहीं ना पीयो।
21पुराणे समय कनु ही शहर-शहर मां मूसा ची व्यवस्था चा प्रचार करने आले पले। ते वे हर सब्त चे ङिओ मूसा ची व्यवस्था नु प्राथनाघरा मां पढ़लीया जई।”
नेरीया जातिया विश्वासीया चे नांवे चिठ्ठी
22ऐवास्ते सारी कलीसिया समेत प्रेरितां नु ते अग़ुवा नु ईं ठीक लाग़ले कि आपणे ही महु कोच्छ बन्दा नु चुणती कर पौलुस ते बरनबास चे लारे अन्ताकिया शहर भेज़ती ङिले जाओ, वाणे ऐचे वास्ते यहूदा जानु बरसब्बा चे नांवा लारे वी जाणते ते सीलास नु चुणती गेले ये विश्वासी भावां मां प्रधान हुते। 23वाणे वांचे हाथु हा चिठ्ठी लिखती भेज़ती ङिली कि,
“अन्ताकिया ते सीरिया ते किलिकिया चे रेहणे आले भावां नु जको नेरीया जातिया महु छी, प्रेरित ते अग़ुवा भावां चा नमस्कार। 24अम्ही ईं सुणले कि, अम्चे महु कई जणा ने ओठे जती कर, तम्हानु आपणीया बाता लारे घब़राती नाखले, ते तम्चे मन बैचेन करती नाखले पर अम्ही वानु हा आज्ञा कोनी ङिली हुती। 25ऐवास्ते अम्ही हेक मन हुती कर हा फैंसला करला कि, चुणले आले बन्दा नु आपणे प्यारे बरनबास ते पौलुस चे लारे तम्चे गोढु भेज़ु। 26ये तां इसड़ी इन्साने छी जेह्णे अम्चे प्रभु ईशु मसीह चे नांवा वास्ते आपणी जान ची बाजी लाती ङिली हुती। 27ते अम्ही यहूदा ते सीलास नु भेज़ु पले, जको आपणे मुँहा लारे वी ये बाता केहती ङिये। 28कांकि पवित्र आत्मा नु, ते अम्हानु ईं सही लाग़ले कि यां जरुरी बाता चे अलावा तम्चे उपर नेरा कुई बोझ ना नाखला जाओ। 29मूर्तिया उपर चढ़ले आले खाणे तम्हानु नी खाणे चाही छै। ते आपणे आप नु व्यभिचार कनु बचाली राखा। गिच्ची घुटले आली मवेशी चा मांस खाणे कनु दूर रिहो ते वांचे लुहीं ना पीयो। यां बाता कनु दूर रिहा तां तम्चे भले हुवी। नरीकार तम्चे भले करो।”
30बल्ति वे विदा हुती कर अन्ताकिया शहरा मां पुज़ले, ते वाणे कलीसिया नु भेले करती कर वा चिठ्ठी वानु सोंपती ङिली। 31वे चिठ्ठी मां जको ओ सनेसा लिखला पलता ओनु पढ़ती कर वे बङे खौश हुले। 32यहूदा ते सीलास जको खौद्द वे आप ही भविष्यवक्ता हुते, घणीया बाता लारे भावां नु उपदेश सुणाती ते हिम्मत ब़न्धवाली। 33वे कोच्छ ङिहें ओठे रेहणे चे बाद भावां कनु शान्ति चे लारे विदा हुले कि आपणे भेज़णे आला कनु वापिस जाओ। 34पर सीलास नु ओठे रुकले रेहणे आच्छे लाग़ले। 35ते पौलुस ते बरनबास अन्ताकिया शहरा मां रेहती गेले, ते नेरे घणा लौका लारे प्रभु चे वचन चा उपदेश करते ते सुसमाचार सुणाते रेहले।
पौलुस ते बरनबास चे अलग़ हुवणे
36कोच्छ ङिहां चे बाद पौलुस ने बरनबास नु केहले कि, “जिसे-जिसे शहरा मां अम्ही प्रभु चे वचन नु सुणाले हुते, आ, बल्ति ओठे आपु चालती कर आपणे विश्वासी भावां ची आत्मिक जीवन ङेखती आऊं किवें छी।”
37बल्ति बरनबास ने यूहन्ना नु जको मरकुस किहवाता, लारे गेहली जाणे चा विचार करला। 38#प्रेरि 13:13पर पौलुस ने बरनबास नु केहले कि “आपु ओनु आपणे लारे ना गेहली चालु कांकि ओणे पंफूलिया मां आपणा साथ छोड़ती ते प्रभु चे कामा नु अधूरे छोड़ती ङिलते।” 39वां ङुंहु चा इसड़ा विवाद हुला वे हेके ङुजे कनु अलग़ हुती गेले। बरनबास, मरकुस नु आपणे लारे गेहती कर जहाजा मां ब़ेसती ते साइप्रस शहरा सनु चाह्ला गेला।
पौलुस ची सीलास लारे ङुजी प्रचार-यात्रा
40पर पौलुस ने सीलास नु चुणती कर, ते विश्वासी भावां ने नरीकारा चे अनुग्रह मां ओनु सोंपती ङिले ते पौलुस ने सीलास नु लारे गेहती यात्रा शुरु करली। 41वे सीरिया ते किलिकिया प्रदेसा कनु हुते हुले कलीसिया नु मजबूत करते हुले उग़ते बधते गेले।
موجودہ انتخاب:
प्रेरितां चे काम 15: ODR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
CC BY-NC-ND 4.0