प्रेरितां चे काम 12
12
हेरोदेस ने कलीसिया उपर अत्याचार करला
1ओ समय उपर हेरोदेस राजे, ने कलीसिया चे कोच्छ लौका नु ङोख ङेणे वास्ते वानु कैदखाने मां नाखले। 2ओणे यूहन्ना चे भावां याकूब नु तलवारी लारे मरवाती नाखले। 3जिसे बेले ओणे ङेखले, कि यहूदी लौक ये बाते कनु खौश हुवे, तां ओणे पतरस नु वी पकड़ती गेले। वे ङिहें अखमीरी रोटी चे तेंहवारा ची हुती। 4ते ओणे ओनु पकड़ती कर कैदखाने मां नाखले, ते रखवाली वास्ते, चार-चार सिपाहीया चे चार पाहरे मां राखले, ये मनसा लारे कि फसह तेंहवार चे बाद ओनु लौका सामणे आणो। 5कैदखाने मां पतरस ची रखवाली हुवे पलते, पर कलीसिया ओचे वास्ते हेक मन लाती कर नरीकारा कनु प्राथना करे पलती।
पतरस चे कैदखाने कनु छुटणे
6ते जिसे बेले हेरोदेस ओनु वांचे सामणे आणने आला हुता, तां वे ही राती पतरस ङुंहु संगला लारे ब़झला आला हुता, ङुंहु सिपाहीया चे बिचु नूहला पलता, ते पाहरेदार दरवाजे उपर कैदखाने ची रखवाली करी पलते। 7बल्ति प्रभु चा हेक स्वर्ग़दूत आती खड़ा हुला ते कोठड़ी मां सोज़ले चमकले, ते ओणे पतरस चे पासे उपर हाथ मारती कर ओनु सुज़ाक करले, ते केहले, “ऊठ, जल्दी कर।” ते ओचे हाथा महु संगल खुलती कर ढेती पले।
8बल्ति स्वर्ग़दूता ने ओनु केहले, “कमर कस, ते आपणी जुत्ती घालती गे।” ओणे यूंही करले, बल्ति ओणे ओनु केहले, “आपणे ओढ़णी घालती माये भांसु टुरती पड़।”
9पतरस निकलती कर ओचे भांसु हुती पला, पर ईं जाणता कि जको कोच्छ स्वर्ग़दूत किहे पला, ऊं सच्च छै, बल्कि ईं समझले कि, “मैं खाब ङेखे पला।” 10बल्ति वे पेहले ते ङुजे पाहरेदारा कनु निकलती कर वे लोहे ची फाटकी उपर पुज़ले, जको शहरा सनु छै वा वांचे वास्ते आपणे आप खुलती गेली, ते वे निकलती कर हेक ही गली हुती कर गेले, इतने मां स्वर्ग़दूत ओनु छोड़ती कर चाह्ला गेला।
11बल्ति पतरस ने सचेत हुती कर केहले, “मैं हमा सच्चमां जाणती गेले कि प्रभु ने आपणे स्वर्ग़दूत नु भेज़ती कर मनु हेरोदेस चे हाथु छुड़ाती गेले, ते यहूदिया ची सारी आस तरोड़ती ङिली।”
12ते ईं जाणती कर, ओ वे यूहन्ना ची आई मरियम चे घरे आला, यूहन्ना जको मरकुस किहवावे। ओठे ब़ोहत लौक भेले हुती कर प्राथना करी पलते। 13जिसे बेले पतरस ने फाटकी ची खिड़की खड़काली तां रूदे नांवा ची हेक दासी सुणु आली। 14ते पतरस ची अवाज पिछाणती कर, विणे खुशी ची मारली ने फाटक नी खोड़ले, पर द्रोड़ती कर भीतर गेली, “ते बावड़ले कि पतरस दरवाजे उपर भिला ला।”
15वाणे विनु केहले, “तु पाग़ल छी।” पर वा आपणी बाते उपर अटल रेहली तां वाणे केहले, “ओचा स्वर्ग़दूत हुवी।”
16पर पतरस खड़काता ही रेहला तां वाणे खिड़की खोड़ली, ते ओनु ङेखती कर चकराती गेले। 17बल्ति ओणे वानु हाथा लारे इशारा करला कि चोप रिहा, ते वानु बावड़ले कि, “प्रभु केस रीति लारे मनु कैदखाने महु काढ़ती आणले।” बल्ति केहले, “याकूब ते भावां नु हा बात केहती ङिजा।” बल्ति निकलती कर ङुजी जग़हा चाह्ला गेला।
18पुरा फुटले सिपाहीया मां बङी हलचल हुं लाग़ली कि पतरस किठे गेला। 19जिसे बेले हेरोदेस ने पतरस ची खोज करली ते ओ कोनी मिड़ला, हेरोदेस ने पाहरेदारा ची जांच-पड़ताल करती कर आज्ञा ङिली कि पाहरेदारा नु मारती नाखले जाओ, ते हेरोदेस यहूदिया प्रदेस नु छोड़ती कर कैसरिया प्रदेस मां जती कर रिहुं लाग़ला।
हेरोदेस राजे ची मौत
20हेरोदेस सूर ते सैदा चे लौका कनु घणा ही नराज हुता। बल्ति उठले लौक हेक मन हुती कर ओचे गोढु आले ते बलास्तुस नु जको राजे चा हेक कर्मचारी हुता, मनाती कर मेल-मिलाप करना चाहवी ले, कांकि राजे चे देशा कनु वांचे देशा चा पालन-पोषण हुता।
21ठहराले आले ङिओ हेरोदेस राजपोशाक घालती कर सिंहासना उपर ब़ेहला, ते वानु भाषण ङिऊं लाग़ला। 22ते लौक ऊंची अवाजी मां किहुं लाग़ले, “हा तां इन्सान ची कोनी ईश्वर ची अवाज छै।” 23ओही बेले प्रभु चे हेक स्वर्ग़दूता ने तुरन्त ओचे उपर वार करला, कांकि ओणे नरीकारा ची महिमा कोनी करली हुती ओचे शरीरा मां कीड़े पड़ती गेले ते ओ मरती गेला।
24पर नरीकारा चा वचन फैलता ते बधता गेला।
25जिसे बेले बरनबास ते शाऊल आपणी सेवा पुरी करती चुकले तां यूहन्ना नु जानु मरकुस किही, लारे गेहती यरुशलेम कनु पुठे आले।
موجودہ انتخاب:
प्रेरितां चे काम 12: ODR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
CC BY-NC-ND 4.0