Rut 2
2
Koi Rut e ago tana nina uta ia Boas
1Toha me chikai na kamana na tauna koi Naomi tana lilivuna ia Elimelek, na asana ia Boas. Ia na tinoni tatamani ma na tinoni boroha.
2Chikai na dani, me tu koi Rut me kori vahai vania koi Naomi de, “Tina vahai ko tala hoe, ba ku dia nau tatana ke chikai na uta, mu ku chiro bali tara basiaa ira na tinoni ago tara kuri bali. Nau ba ku chaulia ke chikai na tinoni te ke tala ku ago bubukea ia.” Me kori vahai koi Naomi de, “Dia hoe, vungogu.”
3Me tu koi Rut me dia tatana chikai na uta me bubukera na tinoni ago nira, me chirora na vungu ni bali tara basiaa ira. Ma na uta te dia koi Rut lalona, na nina uta ia Boas, na kamana ia Elimelek.
4Teha oka bukena, me chau mai ia Boas te vota i Betlehem, me valagu mamahela vanira nina tinoni ago nira. Me kori vahai ia Boas de, “!Ia Yawe ke toha kolulohamu!”
Mara tuhu visua loera mara kori vahai de, “!Ia Yawe ke sangaho hoe!” 5Me tu ia Boas me gesua vahania na tinoni te morosi tutuhura na tinoni ago nira de, “?Isei nina daki chikai nia?”
6Me tuhu visua na tinoni me kori vahai de, “Ia na daki ni Moab te mai kolua koi Naomi. 7Ma ia e nongiu nau ku talasangaa ia me ke bukera na tinoni ago nira, me ke ni chiro sasaira na bali nira. Me ago tuturiha noha ngeni tana mohomoho me vasangi ni mango me toha raviravi ia.”
8Me dia ia Boas me kori vania koi Rut de, “Nigu daki, ko valingea hoe nigu paratanga nau. Ko mui hoe chichiro laka lalona siki uta tovosi, mi tana uta bamu de. Ko ago bubukera hoe nigu daki ago nira nau de, 9mo ko morosia vei tara chichiro ira, mo ko bukera. Inau u sau paratanga vani nohara nigu tinoni ago nira, kara mui agosiana siki omea te ke seko vaniho hoe. Tana tahu vahai ko ngalo inu hoe, mo ko dia inu tana lasa tara tore nohaa ira me toha inge.”
10Me sivo tuturu koi Rut, me chuporu sivo i pari, me gesu vahai ia de, “?Vahai vei o vu boe sahata hoe tana rongogu nau? ?Me vahai vei o vu talana vaniu nau hoe, na daki ni vera tovosi?”
11Me kori vahai ia Boas de, “Inau u valinge kodea visa na omea to agosia vania hoe na vungomu, tuturiha tahuna te mate na taumu hoe. Inau u valinge nohaa to basiaa hoe na tohamu ma na tinamu kolu na veramu, mo mai mo toha kolura na tinoni to teha hoe na hanara i sau. 12Tihilana ia Yawe ke voli visua visa na omea to agosia hoe. !Tihilana ko tamania hoe na vovolina tatana Yawe God ni Israel, ia to mai hoe mo toha vatarahi tatana!”
13Koi Rut e kori vahai vania de, “Ihoe o talana solehana vaniu nau. Hoe o vahaniu nau mu manava tana nimu valagu talana vaniu nau, na sekomalana, seisuge nau teha na aja kolua ke chikai na nimu daki ago nira hoe.”
14Tana tahu ni hahani, me tu ia Boas me kori dia vania koi Rut de, “Mai mo ko tahaa ke chikai na busu ni bereti de, mo ko lupia tana vuaeni me ke ni hani odo.”
Ba, me tohotuu koi Rut kolura na tinoni ago nira. Me tu ia Boas me sau vania na daki nia kesana na piu ni bali tara rangira ira. Me hahani ia me masu, me basia vata busuna na hahani nira.
15-16Bukena tahuna te dia laka koi Rut na chiro bali, me tu ia Boas me kori vanira nina tinoni ago nira, “Kamu livua ia ke chichiro, seisuge ke chichiro lilihina na voho tara sori nohaa. Ma kamu mui hamu na koriana ma na tongo vaniana ia siki omea. Kamu raga chonia hamu kesana na vungu tana voho nira, ma kamu livu vania ia ke chichiro.”
17Ma koi Rut e chiro kokolura na bali nira diadia me au. Mi tahuna te poha rarasara na bali nira me toha tovosi dangana na piuna, me liungia e sangavulu na kilo na mamavana. 18Me taha visua na piu ni bali nira i vera, me tihisi vania na vungona na dangana vahai te chiroa ia. Me sau vani lakamua ia na busuna na hahani te chara ngeni. 19Ma koi Naomi e gesuaa koi Rut, “?Ivei to chichiro hoe de? ?Isei nina uta to ago hoe tatana? !Ia God ke sangaa na tinoni te sangaho hoe!”
Ma koi Rut e kori vania koi Naomi, ia e ago tana nina uta chikai na tinoni asana ia Boas.
20Ma koi Naomi e valagu leho me kori vahai de, “Ia Yawe ke sangaa ia Boas matengana ia te talana vanikohita kohita ta ko mamauri, matengana tana nina sasahavi ia vaniloera, ia Elimelek ma na dalena mane koera tara mate noha.” Me kori vahai laka de, “Ma ia nimu na kamana nigu toha kolu nau, me tihilana nimu ia ke morosi tutuhukohita kohita.”
21Me kori vahai koi Rut de, “Me kori vani lakamuu nau ku chirora na bali nira kolura nina tinoni ago nira diadia me ke chau tahuna vahai ta kara kode ira na kukuri.”
22Ma koi Naomi e kori vahai vania koi Rut de, “E talana, vungogu. Ba ke talana solehana vaniho hoe to ko ago kolura na daki nira tara ago tana nina uta ia Boas. Tina vahai ko dia hoe tana uta ke chikai tinoni tovosi, ba kara sekoliho kanau ira.” 23Ma koi Rut e ago kolura nina daki ni ago ia Boas na chichiro diadia me kode na tahu ni kuri bali ma na wit. Me toha kolu ia na vungona.
موجودہ انتخاب:
Rut 2: mln
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2024 (active), Wycliffe Bible Translators, Inc. All rights reserved