Phŭn Blŭng 10
10
Nă čo Nô-ê
(1R̂oi 1:5-23)
1Ne yơh klơi a čih čr̂oh ƀŏ nă čo Sĕm, Hăm, dăp Yaphet, nă Nô-ê. Dơdơi mơ̆ng ia lip, gơñu klâo r̂ăng hmâo nă čo hla ne:
2Nă đahkơi Yaphet: Hmâo Kômơ, Makô̆k, Mađai, Yawan, Tuƀal, Mêsêt, dăp Tirah. 3Nă đahkơi Kômơ: Hmâo Akênah, Riphat, dăp Tôkama. 4Nă đahkơi Yawan: Hmâo Êlisa, Tasih, Kitim, dăp Đôđanim.#10:4 Kitim dăp Đôđanim Hêbrơ laĭ «Môt Kitim dăp môt Đôđanim.» Đôđanim hla hr̂ă phŭn blŭng mơ̆ng đim pơanah a čih laĭ «R̂ôđanim.» An 1R̂oi 1:7. 5Nă čo môt gơñu nŭn yơh, pơklah yô dŏ r̂ok hang ia sĭ,#10:5 Hang ia sĭ lơ «Kuăl.» gơñu hmâo lŏn-ia gơñu pô, tui tam klơi pơhiăp gơñu pô, tui tam phung wang gơñu pô, dăp tui tam sô̆n-sat gơñu pô.
6Nă đahkơi Hăm: Hmâo Kuh, Êjĭp,#10:6 Jơ̆ hiăp tui tam Krĭk, ƀŏ ñu djơ̆ Êjĭp, jơ̆ hiăp tui tam Hêbrơ, ƀŏ ñu djơ̆ «Mihr̂em.» Dua nŭn ha tô̆ nŭn yơh. Put, dăp Kanan. 7Nă đahkơi Kuh: Hmâo Saƀa, Hawila, Săpta, Rama, dăp Săp-tĕka. Nă đahkơi Rama dŏng: Hmâo Sêƀa, dăp Đêđăn. 8Kuh ma Nimrôt, Nimrôt ñu mơnuih kơtang bơblah blŭng hlâo tăm lŏn kơnah. 9Ñu mơnuih bơgap kơtang, ti năp Yêhôwa, yua nĭng nŭn yơh, r̂ăng mơ̆ng laĭ: «Hla ti Nimrôt, mơnuih bơgap kơtang, ti năp Yêhôwa.» 10Mơ̆ng blŭng, ñu ngă khua mơ̆ng plơi Ƀaƀĕl, plơi Êrêk, plơi Akat, dăp plơi Kalnê, mơ̆ng čal Sinơ. 11Ñu biă mơ̆ng ƀon nŭn nao pơ čal Asơ dŏng, jr̂ŏng nŭn ngă plơi Niniwê, plơi Rêhôƀôt, plơi Kalah, 12dăp plơi Rêsen (plơi Rêsen nŭn dŏ plah-wah plơi Niniwê mơ̆ng plơi Kalah, plơi pr̂ŏng). 13Nă čo Êjĭp dŏng: Hmâo môt Luđim, môt Anamim, môt Lêhaƀim, môt Nap-thuhim, 14môt Patrusim, môt Kahluhim, dăp môt Kap-thôrim. (Plai môt Philistin dŏng biă r̂ai mơ̆ng môt Kahluhim).
15Kanan ma Siđôn, Siđôn nă phŭn Kanan. Jr̂ŏng nŭn Kanan hmâo nă dŏng a iâo ƀŏ ñu Hêt, 16wŏt Kanan hmâo nă čo pơkŏn dŏng, nă čo ñu môt Yêƀuh, môt Amôri, môt Kơkasi, 17môt Hêwi, môt Ơki, môt Sini, 18môt Ơwađit, môt Sêmarit, dăp môt Hamathit. Dơdơi mơ̆ng anŭn, phung wang nă čo Kanan pơklah gŏp gơñu. 19Lŏn-ia môt Kanan hmâo goi hla ne: Tô̆ mơ̆ng plơi Siđôn, tơl nao hlom plơi Kasa, jĕ plơi Kêra. Tô̆ mơ̆ng plơi Kasa dŏng, tơl nao hlom plơi Lasa, jĕ plơi Sôđô̆m, plơi Kômôra, plơi Ătơma, dăp plơi Sêƀôm. 20Ne yơh nă čo Hăm, tui tam phung wang gơñu pô, tui tam klơi pơhiăp gơñu pô, tăm lŏn-ia gơñu pô, dăp tui tam sô̆n-sat gơñu pô.
21Gah Sĕm dŏng, ñu yŏng Yaphet, ñu hmâo nă mơ̆n. Sĕm yơh ơi môt nă čo Hêƀơ. 22Nă Sĕm: Hmâo Êlăm, Asơ, Ơpasat, Lut, dăp Ơram. 23Nă Ơram: Hmâo Uh, Hŭl, Kêthơ, dăp Mah. 24Ơpasat ma Sêla, plai Sêla dŏng ma Hêƀơ. 25Hêƀơ, ñu hmâo nă đahkơi dua r̂ăng: Ti sa a iâo ƀŏ ñu Phalêk,#10:25 Ƀŏ Phalêk tui tam Hêbrơ čiăng laĭ pơklah čah-čap. yua pah nôk ñu, mơnuih dŏ mơ̆ng lŏn kơnah pơklah čah-čap. Adơi Phalêk a iâo ƀŏ ñu Yô̆kthan. 26Yô̆kthan ma Ăl-môđat, Sêlep, Hasa-mawet, Yêra, 27Hađôram, Ôsal, Đikla, 28Ôƀal, Êƀimel, Sêƀa, 29Ôphie, Hawila, dăp Yôƀap. Bih gơñu nă Yô̆kthan soh-sel. 30Lŏn-ia gơñu dŏ, tô̆ mơ̆ng plơi Mêsa tr̂uh pơ plơi Sêpha, dŏ ping gah ngŏ, ƀon plơi Sêpha nŭn hmâo kŏ čĭ lô. 31Ne yơh nă čo Sĕm, tui tam phung wang gơñu pô, tui tam klơi pơhiăp gơñu pô, tăm lŏn-ia gơñu pô, dăp tui tam sô̆n-sat gơñu pô.
32Nĭng nŭn yơh, phung wang nă čo Nô-ê, tui tam klơi a čih čr̂oh ƀŏ gơñu, tui tam sô̆n-sat gơñu. Môt nă čo Nô-ê nŭn yơh, pơklah yô phar̂a sô̆n-sat mơ̆ng lŏn kơnah, dơdơi mơ̆ng ia lip.
موجودہ انتخاب:
Phŭn Blŭng 10: JKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2024, Wycliffe Bible Translators, Inc.