Matsiyù 5

Jèèn tsɛ waajibia

(Marikì 3.13; Lukì 6.12-16; 6.20-26)

1Àyìwà, Yesù jàmaà jàu, è tèyn, è tsuù jèn sɔn tsɛ. Tɔ̀un, à re kàràndzin neè yè e kpɛrɛ̀ à ra. 2Àwà, è maa è kàr'na. À ci:

Xɛɛrɛ dziitsyɛunmaà

(Lukì 6.20-23)

3«Nìì reè y'à jàa ye gbaɔ̀ Ŋaablà kajaa tsɛ, twɛy raa wùbeu, kàtsu Ŋaablà re Màsàbee twɛy rìì laa.

4Nìì reè vunuun kɔɔ̀n, twɛy raa wùbeu, kàtsu Ŋaablà nà è vunun cin.#Ekk 61.2.

5Nìì reè vunun ma dzi, twɛy raa wùbeu, kàtsu, è nà dzɔ̀nxɔɔ̀ tàrà shɛn.#Zab 37.11.

6Terenbee dzuà ko à mìnoò ni nìì reè rà, twɛy raa wùbeu, kàtsu è nà cɛn.#Ekk 55.1-2.

7Nìì reè màtsur'la, twɛy raa wùbeu, kàtsu, Ŋaablà sa nà màtsuru è ra.

8Nìì reè duùn fyɛɔ, twɛy raa wùbeu, kàtsu, è nà Ŋaablà ja.#Zab 24.3-4.

9Nìì reè y'à gaa jaancin yè bà ni, twɛy raa wùbeu, kàtsu, è nà kiri Ŋaablà dzin ì.

10Nìì reè xɔn bìiŋnà terenbee yè bà saabu, twɛy raa wùbeu, kàtsu, Ŋaablà re Màsàbee twɛy rìì laa.#Piy1 3.14.

11Mòdzian ye ba ye ɲɛ̀ɛn, yè ye byɛn, yè ɲanbee kaatsià sapɛ doò wɔ ye ra mun kamà, ye raa wùbeu.#Piy1 4.14.

12Ye e taama dzibe, taamadzibe brìsi ka, kàtsu, ye nà bàràji bla tarà Ŋaablà re. Kɛɛra niì reè dɔ̀n bou ye jɔun, è twɛy sa byɛun tɔ̀ rii tsuru.#Mbk2 36.16; Kɛf 7.52.

Yesù ci wò re kàràndzin neè rìì dziɲaan kòo, ko à vyevyeè

(Marikì 9.50; 4.21; Lukì 14.34-35)

13 # Mar 9.50; Luk 14.34,35. Ye rìì dziɲaan kòo. Kòo to ye maà, fee soo dzia à sèè dzibe kɔn ? Àwà, à na gèsɔn wùbee tɔ̀un dɛ, fɔ è maa da rɔn mòdzian y'à tɔ̀rɔ̀ e san dzuun. 14#Yux 8.12; 9.5.Ye rìì dziɲaan vyevyeè. Wɔ̀ rìi tsùuŋnà jèn tsɛ, tɔ̀ na dzia mɛnɛn waa. 15#Mar 4.21; Luk 8.16; 11.33.Mòò to na fìtsina dzu wɔɔ̀, è gè kuu à kùùn waa. À y'à tsùɔ fìtsìnà tsuuma nɔ̀n nì, à vyeè yè bo gbàdòùndzin neè sapɛ re. 16#Piy1 2.12.Tɔ̀ soo tsuru, ye sa raa vyevyeè yè bo mòdzian rè, yè bà ni ye faadzii wuu reè jà, yè tsoo dzi ɲɛn ye Fàà tsɛ, tɔ̀ riì ni jìrànxɔ rɔ̀n.»

Yesù ci wo naɔ̀ Ŋaablà re shi kpadèuma rèè dzii tsyɛn

17Àyìwà Yesù ye dzin kɔn ci: «E maà à siin ci mun naɔ̀ sàrìyaa gooma reè, tàmafa Kɛɛra reè rè gooma reè mɛɛy rìì dɛ ! Mun na naɔ̀ è mɛɛy waa, mun naɔ̀ è bo e shi tsɛ rìì. 18#Luk 16.17.Sààben na, mun nì ci e ra, fɔ ŋaablaxɔɔ̀ ko dzɔ̀nxɔɔ̀ sa yeè bè dò, arì Ŋaablà re sàrìyaa goomadziniin, tàmafa à sɛbɛndziniin, tɔ̀ pɛn fa dò waa, fɔ goo rèè sapɛ yeè bè fa do. 19Tà doùn, mòò o moò ye to Ŋaablà dzugooma xɔù rèè soo latsùù bɛy, arì è ɲan kiɲaaniàn, è mòdzian kàràn ci è sa y'a fa tà tsuru, tà tsìfa sa nà kiri Jìrànxɔɔ̀ Màsàbee doùn mòdzin kiɲaaniàn. Mòò o moò to nà è shi jiì, à yè è kàràn dzyee rèè sa ra, tɔ nà kiri Jìrànxɔɔ̀ Màsàbee doùn mòdzin blaa. 20Àwà, mun nì ci e ra, ye raa terenbee ma geren Sàrìryà Kaamoo reè ko Faridziɲɛn rèè raà tsɛ fyeu, dɔ̀n goòmà na ni ye mà Jìrànxɔɔ̀ Màsà ganee doùn waa.

Yesù ci min goo nìì reè shi jiì

(Marikì 11.25; Lukì 12.57-59)

21 # Jdk 20.13; Sdk 5.17. Àwà, ye y'à myɛ̀un, ci à dèu fàbɔɔ rèè rà ci:

"Maà mòò vu waa. Ci mòò riì ye mòò vu, tɔ̀ tsìfa wù kitsia ka."

22Ŋà, mun nì ci e ra, mòò o moò nà e vunun ta e modzìnsia ka, tɔ wù è kitsi. Mòò riì nà e modzìnsia ɲɛ̀n ci à manan, à wù tɔ̀ yeè kitsi kitsi kunun kur'là mòdzin neè rè. Mòò riì to nà e modzìnsia ɲɛ̀n ci à fàkɔɔn, tɔ wù jààndamaan sàà ka. 23Tɔ̀ kamà, a re saaka boràmaà Ŋaablà re, e ba nà à bo saakabomaà tsɛ, a taa ye to ci moo tsyèè tàraɔ̀ a ma, 24saakaà tsùù to mɔn saakabomaà tɛyn, e bè, ye bè byɛ̀n à mà ŋe. Tà shɔ̀ùn, e kòmànà bè a re saakaà bo.

25È ba a ci goo dɔ̀un a ko mòò fi, ye bà nà bè à kitsi kunùn, à yè e to shia tsɛ, a maxɔbe ye byɛ̀n à mà tabe. Tà boshɔ̀ùn wo kitsifasià ye be wo wɔ kitsikununbaà suun, tɔ nà wo wɔ kàsògbaà kplatsuubaà suun, yè wo ji kàsoò doùn. 26Sààben na, mun nì ci a ra, ɲɛyn niì sapɛ jiɔ̀ wo jɔun, wo ma tɔ̀ sàrà do fyeu, wo na boò mɔn byɛ.

27 # Jdk 20.14; Sdk 5.18. Ye y'à myɛ̀un, ci à dèu ci:

"Maà ɲànmɔ̀ɔ̀be fa waa."

28Ŋà, mun nì ci e ra, mòò o moò taàn siɛ̀n à jaàn yè bo à re, tɔ ɲànmɔ̀ɔ̀be fau à ka e duùn nòn. 29#Mat 18.9; Mar 9.47.Àwà, sani a sirama sia rè jaadzian yè bà saabu e gooɲaantsii tarà, à kwey bo, a maa jeenà. E fɔn a gɔɔ̀n gàne soo ɲan, tɔ fyan a ko e kur'la yè bè jààndaman. 30#Mat 18.8; Mar 9.43.Sani a sirama sia to yè bà ni ba saabu e gooɲaantsii tarà, à kùnùn bo, a maa jeenà. E fɔn a gɔɔ̀n gàne soo ɲan, tɔ fyan a ko e kur'la yè bè jààndaman. 31#Sdk 24.1-4; Mat 19.7; Mar 10.4.À deò ci:

"Mòò riì ye ba e re tààn bàjia, è furu san sɛbɛ̀n sìn à ra."

32 # Mat 19.9; Mar 10.11,12; Luk 16.18; Kor1 7.10,11. Ŋà, mun nì ci e ra, mòò o moò yè re tààn bàjia, à mà bà kɛ̀kɛ̀ɛ̀ybe kamà fyeu, tɔ̀ ye e re tààn jaa kaà ɲànmɔ̀ɔ̀be rii là. Mòò riì to tàan bàjiumaà seen, à sa ɲànmɔ̀ɔ̀be rii.»

33 # Sak 19.12; Dɛk 30.3; Sdk 23.22. Yesù yè geren goomaa rè ci: «Y'a myɛun sa, ci à dèu fàbɔɔ rèè rà ci:

"A y'a kɛɛ̀y nìi ra, tɔ̀ bo e shi tsɛ. A y'a kɛɛ̀y goo o goo ra Tsìfa Ŋaablà kajaa tsɛ, tɔ̀ bo e shi tsɛ."

34 # Yak 5.12; Ekk 66.1; Mat 23.22. Ŋà, mun nì ci e ra, e maà e kɛɛ̀y tsu rii waa. E maà e kɛɛ̀y ŋaablaxɔɔ̀ rà, kàtsu tɔ Ŋaablà re màsà gbaaniɛn nì. 35#Ekk 66.1; Zab 48.3.E maà e kɛɛ̀y dzɔ̀nxɔɔ̀ rà, kàtsu, tɔ Ŋaablà santsuumaà nì. E maà e kɛɛ̀y Yerusalɛmùn wɔ̀ɔ̀ rà, kàtsu tɔ màsa blaa rè wɔ̀ɔ̀ rìì. 36Maà a kɛɛ̀y a yɛrɛ̀ kungɔɔ tsu ra waa, kàtsu wo fa dzi a kungwɛ̀ɛn soo ba fyɛu, tàmafa wo y'à bà tsìù waa. 37E re ɔ̀ɔn ye bà ɔ̀ɔn, ɔ̀ɔɔn ye bà ɔ̀ɔɔn, dzyee gè o ge bàa tɔ̀ tɛ̀y, tɔ̀ sapɛ boò Sùtana ɲan.

38 # Jdk 21.24; Sak 24.20; Sdk 19.21. Àwà, y'a myɛun, ci à dèu ci:

"E mòò jaa ci, a sa raà yè ci. E mòò ɲin kɛɛy, a sa raà yè kɛɛy."

39Ŋà mun nì ci e ra, mòò riì y'à gaa wò yeè ɲaan fa a ra, maà a gɔn à ra waa. Mòò ye sitaa zhɛ a sirama sia tààkuàn ɲàn, soo sa tsuù à re. 40Mòò to ye ba ni à re è b'à ka kitsima, à re mɛ̀yɛɛ tsi a ra, a re mɛ̀yɛ blaa sa to à re. 41Fààntsià sɔn ye seyn tsuù a kuùn, ci a ka gànè xɛkɛɛ̀ sɔn jiì, à ka à tsuru fii jìì. 42Mòò y'a fyɛn gè rà, à kɔ̀ ! Mòò to ye gè dandan a re, maà a nɔn waa.

43Àwà, y'a myɛ̀un, ci à dèu ci:

"A naà a wuɔ kɛ̀n, a ɲaàn goo xɔbe a ma."

44Ŋà, mun nì ci e ra, ye ɲan rèè kɛ̀n. Nìì reè yè e kuun'n kuru ɲaan faa, ye Ŋaablà mafyɛ̀n twɛy rè. 45Ye tɔ̀ fa, sànko ye bà ni ba e Fa Ŋaablà dzin ì, tɔ̀ riì ni jìrànxɔ rɔ̀n, è bà e re bwèè boò mòdzìn ɲan reè ko mòdzin wuu reè sa re, è ŋaà nàa mòdzin tereunma rèè, ko terenbɛy reè sa re. 46Ye ye e kɛnbaa rèè bàsɔùn goo dzibe e ra ɔ, ye ni bàràji kɛn ni tàrà tɔ̀ ɲan ? Xɔnsɔɔn tsi reè sa na tɔ̀ soo rìì fara ɔ ? 47Ye to ye ba e neemasi reè bàsɔùn nì tswàa, tɔ goo blà rii fakɔɔn ye re o ? Ŋaabla tɔ bɛy reè sa na tɔ̀ soo rìì faa gbɛ ? 48#Sak 19.2; Sdk 18.13.Àwà, ye bà mòdzin dziitsyɛunma ì, a ci ye Fà rìi ni jìrànxɔ rɔ̀n, tɔ̀ dzii tsyɛɔ̀n nìi tsuru.»

موجودہ انتخاب:

Matsiyù 5: BDZU

سرخی

شئیر

کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

Bible Dzùùngoo Unicode کے بارے میں مزید معلومات حاصل کریں

Matsiyù 5
سے مشہور بائبلی آیات

Videos for Matsiyù 5

20-1:5 متی

Lumo Project

48-21:5 متی

Lumo Project

Matsiyù 5

Matsiyù 5
سے مشہور بائبلی آیات

Videos for Matsiyù 5

20-1:5 متی

48-21:5 متی

بائبل:

Dzùùngoo

ترجمہ: Bible Dzùùngoo Unicode - BDZU

Matsiyù 5

Matsiyù 5

Matsiyù 5 سے مشہور بائبلی آیات

Videos for Matsiyù 5

20-1:5 متی

48-21:5 متی

بائبل:

Dzùùngoo

ترجمہ: Bible Dzùùngoo Unicode - BDZU

Matsiyù 5

Matsiyù 5
سے مشہور بائبلی آیات