Matius 14
14
Yohanes to Pediu laipatehi
(Mrk. 6:14-29; Luk. 9:7-9)
1Tempo ee mai naratami kareba nangkambelai Yesus hi Herodes, magau to noparenta i Galilea. 2Lauparia Herodes nangulikara to pobagona, “Yesus to laiulira ee rau, kakonona Yohanes to Pediu to laipakatuwu nculi lako kamateana. Etu pade nabaraka-'I nobabei to nepakahera.” 3Pade ewa ee iuli Herodes, apa hia moto wengi to nantudu tauna nampahoko Yohanes to Pediu pade nampahilu'i bo nopahua'i i rara tarungku. Herodes nobabei lauria habana hia nangala Herodias, bangkele Filipus ompina moto, laipobangkelena. 4Apa nadea ngkani'i Yohanes nangulika Herodes iwei, “Momako mamala mampobangkele Herodias.” 5Mingki'i Herodes mampatehi Yohanes, naupawee naeka'i hi todea. Apa laiparahayara mpuu todea ee, ane Yohanes ee mai hadua nabi.
6Hangkani tempo Herodes nobabei huha nampalinga eo pangoteana. Tempo ee mai noencemi ana Herodias toronaa i tingoo Herodes hante to ratana. Nasana mpuu rara Herodes nampahilo poence toronaa ee mai, 7hampena notipa'i hante nosumpa hi toronaa ee mai, nau napa to naperapi toronaa ee mai, kana nawai'i. 8Nangepe lauria, Herodias nampaukei anana bona naperapi woo Yohanes to Pediu. Etu pade toronaa ee mai nangulika Herodes, “Waika'a welau ei woo Yohanes to Pediu, raboli i lolo baki.” 9Pangepena Herodes lauria, laihohona rarana. Naupawee, apa bela nosumpami i tingoora to ratana, laipetuduinami bona napa to laiperapi toronaa ee mai, raturuhi.
10Lauparia Herodes nantudu tantarana rau mohamale Yohanes to Pediu i rara tarungku. 11Napu ee, woo Yohanes laiboli i lolo baki pade laikeni hi toronaa ee, pade toronaa ee nampopewai hi tinana. 12Pangepera ana guru Yohanes to nadupa lauria, narataramo nangala wataloka Yohanes, pade laitanara. Napu ee rauramo nangkewo hi Yesus napa to nadupa hi Yohanes.
Yesus nopakoni nelabi alima ncobu dua tauna
(Mrk. 6:30-44; Luk. 9:10-17; Yoh. 6:1-13)
13Pangepe-Na Yesus ane namatemi Yohanes, neongko-'Imi hante ana-ana guru-Na lako hee nencawi duanga rau mengkalino i kalinoana. Naupawee pangepera todea peongko-Na, palahirami ngatara pade rauramo nantuku-'I nantara dala i lorena. 14Pehompo Yesus lako duanga, laihilo-Naramo todea ee mai. Nehuwu ahi rara-Na nampahilora. Lauparia, laipakauri-Nara to nohaki. 15Lau maholopi eo, narataramo ana guru-Na hi Hia pade nangulika-'I, “Para malimaumi lauria, pade i kalinoanata ei. Tuduramo todea ee rau i ngata bona raolira pangkoni.”
16Naupawee Yesus nangulika ana-ana guru-Na, “Momaramo rau. Komi to kana mopakonira.”
17Nehonora ana guru-Na, “To naria hi kami ei, alima ongu roti pade romaa bau aga.”
18Yesus nangulikara, “Kenimi etu tumai.”
19Napu ee Yesus nantudura todea ee moncuna i lolo kawoko. Laiala-Nami alima ongu roti bo romaa bau ee, laitingara-Na langi, pade nohambaya-'I nosukuru hi Alatala. Napu ee roti bo bau ee laitubi-tubi-Na pade laiwaika-Na hi ana-ana guru-Na bona ratirakara hi todea ee mai. 20Humawee tauna nangkoni duura nabohu. Napu ee, ana-ana guru Yesus nopalimpuru roti pade bau to nelabi. Naponu hampulu ropangkoloapi kadea labina. 21Maria alima ncobu dua balailo to nangkoni, poma laireke bangkele pade ngana.
Yesus nomako i lolo ue
(Mrk. 6:45-52; Yoh. 6:16-21)
22Napu ee, tudu-Naramo Yesus ana guru-Na mencawi i rara duanga bona moilodoramo rau i dipo rano, pade todea ee laitudu-Na manculi rau i ngatara. 23Napupi Yesus nantudura todea ee manculi, nanake-'Imi i bulu, nohambaya hadudua-Na. Lau mangkawengiami, hadua-Na moto i hee. 24Tempo ee, duanga to laihawira ana guru-Na na'awami lako lorena. Duanga ee rau tumaidimi lairumpa balumba apa nabohe ngolu nampotomura.
25Ba maria tinti tolu parabaa, naratami Yesus hi ana-ana guru-Na nomako i lolo ue. 26Pangkahilora Yesus nomako i lolo ue, nakonce mpuura ana guru-Na, pade nongare, “Etu heta!” Pade ngare-ngarenaramo keni ekara.
27Naupawee, dungku iulika-Naramo Yesus, “Pakarodo rarami! Nemo maeka, Aku ei.”
28Napu ee Petrus nangulika Yesus, “Pue, ane Iko mpuu etu, tudu'a tulau hi Iko momako i lolo ue.”
29Iuli-Na Yesus, “Maimoko.”
Nehompo mpuumi Petrus lako duanga pade nomako i lolo ue rau hi Yesus. 30Naupawee, hangka lairasaina Petrus narimboho ngolu nantawiri, naeka'imi pade nopamulami nalimpa. Lauparia, nongare'i, “Pue, tulungi'akuwo!”
31Dungku laiulu-Nami Yesus pale-Na nampahoko pale Petrus pade iuli-Na, “Nakura gagakona peparahayamu. Napa pade nokararako?”
32Napu ee nengkaheramo i lolo duanga pade naorami ngolu. 33Ana-ana guru-Na to i rara duanga nampasombaa Yesus, iulira, “Mpuu-mpuu Iko ei Ana Alatala.”
Yesus nampakauri tau-tauna to nohaki i ngata Genesaret
(Mrk. 6:53-56)
34Karatara i dipo rano, nehomporamo i ngata Genesaret. 35Hangka tau-tauna i ngata ee nangincani ane to narata ee Yesus, rauramo nangkewo lauria nahobo i ngata-ngata to notongki hante ngatara. Alaana humawee tauna to nohaki laikenira hi Yesus. 36Laiperapira hi Yesus bona Napaliurahawo mantui nau wuntu waru pokarolapii-Na aga. Humawee tauna to nantui waru-Na, nauri lako hakira.
موجودہ انتخاب:
Matius 14: MYL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
