Juan 8
8
1Koka apmeiakho lhta Jesús metaimong akhaiam akvesai'a Olivos. 2Lhema aknem alhta ntak akiekai'a m'a, atsak'o lhtoka mokhom akmopeiam konne', apvaktamo mokhom Jesús Eniapom Neten apnemakha. Apkelteteskaktamo lhta nhan enenlhet apentalhnema apnakha m'a, ka apno lhta Jesús ma'a, apketlhekmoso nhan. 3Moklhem'a lhta nhan escribas kakpota nhan moklhem'a Fariseos apkeliantemakmo lhta lhema ngkelvana apnakha Jesús ma'a, akvetammalhka aktevaskama aliemhapma. Ka apkelankeskaktamo lhta apieseksek enenlhet'avok ma'a, lhta aptangkok apkellano Jesús:
4—Hengetlhekmoskama, ngvetalhkek nak lhek aktevaskama aliemhapma ngkelvana nak hengke'e. 5Ley Moises aklheianma angaqhek ngkelvana kto nak hengke'e, angeliaqnak na metaimong, ¿ko la aptakha nhan lheiap ma'a, he? —lhta aptangkok ma'a.
6Koka m'a aptangkolha lhta apkellanei'o apkenmahai'a eliepkonek Jesús kakpota elpeskakhak meieplavkeskama henganemakha Moises ma'a. Ma lhtoka eniatemmoma Jesús ma'a, ka aphalhantamo lhta, apkelkaso lhta apophek lhepop. 7Koka apkelelmalhnakhave lhta mokhom ma'a, apkenmakho lhta nhan neten Jesús ma'a, lhta aptak apkellano:
—Metka nkek la apkellanai'a ngkollatsekama apieseksek anak ketlhengkap ham, eienhe ta apmanie metaimong ngkelvana nak —lhta aptak Jesús.
8Aphalhakhe lhta mokhom Jesús ma'a, apkelkaso mokhom lhepop. 9Moklhem'a apanke lhta apkenmakpok apkelenteiapma m'a, apmaniaie lhta apkelvaneiam, netamen aplhamakho m'a. Ka apnakho lhta aplhepkennenga Jesús ma'a kakpota nhan ngkelvana. 10Apkenmakhe lhta neten mokhom Jesús, lhta aptak apkano ngkelvana:
—¡Mamma apketlheianma lhkek alanai'a ngkollatsekama lheia' hengke'e, apkeltaqhakhe ie! —lhta aptak.
11Ka atemmongka lhta nhan ngkelvana, lhta ntak:
—Ka m'a, have niapak Apveske, mang koka hetselhnanak ma'a —lhta ntak.
Lhta aptak apkano Jesús:
—Ko'o nhan moltankok akselhnanemmalhka lheia, kotaqhek hata, molanekhankek mokhom ngkollatsekama —lhta aptak Jesús.
Aplhenammakpo panke Jesús apto apommatema
12Lhta aptak mokhom Jesús apkellano enenlhet:
—Ko'o asto malha apommatema apieseksek enenlhet'avok apkellokha la'a, apkellelto la helieplekama nkolhnangkok hata apommatema hengaikamok akiennaktema enneniek, melloka ta ienaqtesakha lhma —lhta aptak.
13Koka lhta aptangkok fariseos apkellano:
—Mangkolhek aktemeskaso iokhalhmek aplhenakpo la pankek lheiap —lhta aptangkok.
14Ka apkatemmongka lhta Jesús, lhta aptak:
—Hai', iokhalhmek alhenalhko nak ehenke ngkanek asiavek ko'o askempai'akha', asiavek na asmeiakhelha ta, meliehek koka ketlhengkap. 15Ketlhengkap apketlhenkek po'ok aptemakha ngkolatsekama nlho ka la aktaqmanma aniem'o atlhenaikamok apvalho'ok apanko'ok apankavek, ko'o koka molhenak ma'a. 16Koka asmak'o la atnek ma'a, atnek akietemo nkek alheianma aktemakha apkelanai'a ngkolatsekama nlho ka la aktaqmanma ngkanek heiaikamok asmopvana aliekpelkok ma'a Eniapom apto lhta heiapaskama. 17Ka ntak ley apanko'ok anak ketlhengkap, nkaimelhkek elhek apqanet aknemo mo'ok apketlheianma kakpota ngkotnek iokhalhmek ma'a. 18Alhenalhkek ehenkek astaqmanma ko'o, helheianmek na Eniapom apto lhta heiapaskama, enqanet nentakha —lhta aptak Jesús apkellano m'a.
19Netamen alhta aptangkok apkelelmalhnengka m'a:
—¿Ko la apnakha Apiapom lheiap ma'a, he?
Ka apkatemmongka lhta Jesús ma'a, lhta aptak:
—Mangheliekpelkak ketlhengkap ko'o, man na eliekpelkak ko'o Tata, koka heliekpelko la'a, apkeliekpelkek na ko'o Tata —lhta aptak Jesús.
20Neksa apkeltennaikama lhta Jesús ma'a, apne lhta Eniapom Neten apnemakha, akieto iamet aiseksek alhankok patakkom nema akmeskama qaselha, koka ma lhta emammakpok ma'a, ma lhta nhan nkovaiakmok aknem apankok.
Aplheianma Jesús mankonmopvanka'a elvomok hata apmeiekhelha
21Lhta aptak mokhom Jesús apkellano apkelemhama apmaniaie judios:
—Alhong hata ko'o, helketmok hata ketlhengkap koka eletsepo ta aniem'o ngkollatsekama apkellanekamok. Mankollapvankek hata nhan elvomok asmak'akha ta amhangkok —lhta aptak Jesús.
22Ka apkelpaqmetkesakpo lhta mok apankave apkelemhama apmaniaie judios ma'a, lhta aptangkok:
—¿Selha ntak aplheno nak mangenmopvanka'a angelvomok apmeiakhelha ta ha'e, he? Nlhenkek kelha apvalhok eniaqhakpo panke' —lhta aptangkok ma'a.
23Koka lhta aptak Jesús:
—Ko takhalhet lhepop ketlhengkap, ko'o koka askeniem'o neten. Apkellomakha pankek ketlhengkap hengke'e, ko'o koka have askeniem'o hengke'e nalhepop anak. 24Askeleltennaskek lhe niekhe ketlhengkap eletsepok hata aniem'o ngkollatsekama apkellanekamok apkeliaskakmo la'a asto ko'o —lhta aptak Jesús.
25Ka apkelelmalhnengka lhta mokhom apkelemhama apmaniaie judios, lhta aptangkok:
—¿Se lha enenlhet lheiap ke, he?
Ka apkatemmongka lhta Jesús ma'a, lhta aptak:
—Askeleltennaskangke mota ketlhengkap. 26Mantek askeltemo niekhe aleltennaksek aktemakha aptaiangkolha ngkollatsekama ketlhengkap, mang koka nkomahai'ak aleltennaksek. Koka lhamakho aktemakha askeleltennaskama nak aniem'o aslengai'a heltennaskama apto lhta heiapaskama, apto have niapak aplheianma m'a —lhta aptak Jesús.
27Koka ma lhta eliohok enenlhet'avok aplheianma Jesús Eniapom. 28Lhta aptak mokhom Jesús:
—Hato ka akno ta aklheno neten Enenlhet Apketka nak, eliangvakhok hata ketlhengkap asto ko'o, have askelanai'a ehenkok ehenke', vanlha askelanai'a apkeltemo alana Eniapom. 29Vanlha ko mota alhelhma Eniapom apto lhta heiapaskama ngkanek askelan'ak ko qaselha akleklemelha la apvalhok ma'a —lhta aptak Jesús ma'a.
30Ma lhta ntek enenlhet meliaskeiam aplheianma Jesús ma'a.
Apmopvana Jesús elpaqnengkasekha enenlhet anmaikama meliamolhma
31Lhta aptak Jesús apkellano judios apkellelto lhta meliaskeiam ma'a:
—Apkelleliahakhavek hata nke ketlhengkap aktakha nak asketlhekmoskama, hata etnangkok askeltamesaikamok aptaikamok have niapak ankek ma'a. 32Apkeliekpelkavek hata nkek na akto have niapak anke nak, nkolpaqnengkasekhak hata m'a anmaikamok maniamolhma —lhta aptak.
33Ka apkellatemmongka lhta enenlhet'avok ma'a, lhta aptangkok:
—Have ennengko'o nema allasennaikama nema apkelianmoma, Abraham annenga aptavana'ak neptamen ennengko'o. ¿Se lha akto aplheno nak lheiap nema hengellasennaikama nema apkelianmoma ennengko'o ie, he? —lhta aptangkok ma'a.
34Ka apkellatemmongka lhta Jesús ma'a, lhta aptak:
—Have niapak ankek aplhamakho apkellelto la apkellanekamok qaselha ngkolatsekama, malha akto nak ma'a asennaikama anmaikama akiennaktema nkek ngkollatsekama nak. 35Lhema nema asennaikama la nema apianmoma, mankapvankek elhe mota akvangkakho akhangkolha la apkennemolhema apveske apankok. Koka apketka apankek la'a apvankek elhe mota akvangkakho nkek m'a. 36Vanlha apvanka'ak na etnangkok enenlhet'avok metka anmaikama maniamolhma aniem'o apkelpasmoma Apketka nak. 37Asiavek ko'o Abraham aptavana'ak neptamen ketlhengkap, koka apkeleltavek hellaqhek, menmak takha asketlhekmoskama nak. 38Alhenkek ko'o vanlha mota aktemakha helhekmoskama Apiapom, koka ketlhengkap apketlhengke mota vanlha aktemakha lhta apketlhekmosekamok apiapma'ak apankave —lhta aptak Jesús.
39Koka lhta aptangkok enenlhet'avok ma'a:
—¡Eniapom ennengko'o Abraham! —lhta aptangkok.
Koka lhta aptak mokhom Jesús apkellano m'a:
—Have, melieplomak amai Abraham ketlhengkap, 40mok aktema aptaiangkok ketlhengkap. Apkenmak'ak na hellaqhek ngkanek askeleltennaskek akto have niapak ankek aslengai'a aniem'o Eniapom Neten. ¡Ma lhta etnemak Abraham annenga aptaiangkelha nak! 41Koka ketlhengkap apkelieplavkek amai apankok apkeliapom —lhta aptak.
Ka apkellatemmongka lhta m'a, lhta aptangkok:
—Have ennengko'o nempalleiam neksa anmensangveiam alhma engkana'ak, vanlha lhema aphapak Eniapom ennengko'o, Eniapom Neten ma'a —lhta aptangkok.
42Ka apkatemmongka lhta Jesús, lhta aptak:
—Have apiapma'ak ketlhengkap Eniapom Neten ngkanek heltaknevakke mota, Eniapom Neten apto heiapaskama, have asvai'a ehenko ie'. 43Meliehek ketlhengkap aktakha nak alheianma ngkanek mankollekok apvalho'ok aktakha askeltennaikama. 44¡Aveske keliaqhameio' atkak ketlhengkap! Vanlha mota apkelleliehekho m'a, nentekioma niapom ma'a tep nak nanek ampai'osekha lhmankek ham, kakpota nhan akmovana ania'a anko ie, ngken na nenmopvana ania'a nak. 45Ko'o koka alheianma akto have niapak ankek, heliaskakmek koka ketlhengkap. 46¿Selha enenlhet apieseksek anak ketlhengkap apvetai'o la askelanei'o ngkollatsekama hengkaie, he? Ka alheno la ko'o akto have niapak ankek qaselha, ¿se lha aktemo heliaskeiakmo na mota ie, he? 47Eniapom Neten apketkak la'a apkeltakmelkasavek mota apkellailhemo aktakha aplheianma Apiapom, koka mellailhemok ketlhengkap, ngkanek have Eniapom Neten apketkak —lhta aptak Jesús.
Jesús apnengkek nak nanek metiaianlha Abraham
48Koka lhta aptangkok enenlhet'avok ma'a:
—Have niapak netlheno nak, Samaritano kasekapok av'alhok akmaikama lheiap —lhta aptangkok.
49Ka apkatemmongka lhta Jesús:
—Mamma nkek ko'o kasekapok av'alhok hemaikamaha, askai'o ko'o mota Tata, koka ketlhengkap manghellak'o mota. 50Moteniak ko'o asiaspommalhko ehenkek la'a, koka apnek ma'a apto heiaspekama mota, apto nhan apkeliekpelkemo lhamakho qaselha m'a. 51Enenlhet apkellelto la apkelleliehekho aspaioma nak, melletsepek hata, have niapak ankek astakha nak —lhta aptak.
52-53Lhta aptangkok mokhom enenlhet'avok ma'a:
—¿Se lha ntak aplheno nak melletsepek hata apkellasekhai'o la lheiap? Neten apankek apmahai'a etnama lheiap, apkeletsepmek nak nanek ma'a nelieihengka Abraham kakpota nhan apkeleltennasemmap ania'a annenga, lheiap koka apmahai'a etnama neten apankek, neliavek kolhvave nak kasekapok av'alhok akmaikama lheiap —lhta aptangkok enenlhet.
54Ka apkellatemmongka lhta Jesús, lhta aptak:
—Aqhemo alhenalhko la ehenke' ko'o nema heiaspekamaha, Tata koka heiangkok asiaspommalhka. Ko'o Tata aptaiangko na mota ketlhengkap Eniapom Neten apanko'ok, 55koka meliohok mokhom ketlhengkap ma'a, ko'o koka asiavoie', askeliehekho nhan ma'a. Alheno la moiekpelkemo Tata, atnek hata asmopvana ania'a ehenke, ka apkellelto nak ketlhengkap. 56Abraham apkelieihengka lhta ketlhengkap apmahai'ave lhta etak aknem ehenkok, apvetai'a lhtoka m'a, mpaihakhe lhta nhan apvalhok ma'a —lhta aptak.
57Ka apkellatemmongka lhta enenlhet'avok ma'a, lhta aptangkok:
—Mankovakmok 50 iantelhkapa apankok lheiap, ¿se lha ntak aplheno nak apvetai'a Abraham annenga? —lhta aptangkok.
58Ka apkellatemmongka lhta Jesús ma'a, lhta aptak:
—Have niapak ankek ma'a, aslomaka lhta tep nak nanek ko'o amanie apmahai'a etiemok Abraham —lhta aptak Jesús.
59Kolhvavek anke lhta apkenmangkok metaimong aliaqiema kakpota ennapok Jesús ma'a, koka aplhenengkasekpe lhta apankek apieseksek enenlhet'avok ma'a, aptepo nhan Eniapom Neten apnemakha.
موجودہ انتخاب:
Juan 8: TMF
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©2023 LETRA Paraguay
