Juan 5
5
Jesús aptaqmelkaskeiam metka aptapno'ok akieto Betesda
1Netamen alhta m'a apmeiakho lhta Jesús akieto natemma Jerusalen kakpota epasengvomok aktaqmelaikama lhma judios apanko'ok ma'a. 2Nengaqte lhta atong nentalhnemakha Jerusalen akvesai'a nepkesek, nietnengke lhta lhema pa'at metaimong alanemmalhka akhalhtemommalhka nekhav'ak, 5 lhta nhan atno'ok ma'a. Pangkalhva koka alanemmalhka metaimong konne m'a akvesai'a Betesda, hebreo apaivoma. 3-4Apnaiangke lhta lhamakho aktemakha anmaska apiempeiok ma'a, metka apaqto'ok, apkeliakteikama, metka aptapno'ok. 5Apietnengke lhta nhan lhema enenlhet ma'a, 38 iantelhkapa lhta ngvaiakmok aplengaiangko akmaska apiempek. 6Ka apvetangvakmo lhta Jesús ma'a, aplengai'o nhan ania'a aplhenammap akmaska apiempek alhta ma'a, lhta aptak apkano:
—¿Apkeltave nlho etaqmelekha lheiap, he? —lhta aptak.
7Ka apkatemmongka lhta enenlhet:
—Apveske, mongvapvanak aklhek emanie iemmen neksa nema akhaposkekta la iemmen#5:7 Aniem'o lhnak ma'a lhema enenlhet neten aphaposkekta iemmen, kakpota etaqmelekhak akmaska apiempek apmanie la aptalhnema iemmen ma'a., nne mota hepoktengkaso ko'o, mamma ko enenlhet hepasmok kakpota aklhek iemmen emanie —lhta aptak enenlhet.
8Koka lhta aptak apkano Jesús:
—Etnemekha neten, ema nema aktangkeskama nak, elheng ma'a —lhta aptak Jesús apkano.
9Kolhvavek ankek alhta apkenmakhak neten, aplhengo nhan, apmo lhta nhan nema aktankeskama m'a. Koka nietavek anke lhta aktakha aknem nennekhelha' sabado m'a, 10lhna lhta nkeniemai'ak na apkelemhama apmaniaie' judios aptaiangkok apkellanemo aptaqmalveiam enenlhet ma'a, lhna lhta aptaiangkok:
—Sabado aknem anak nennekhelha, mankoltemak ley ampatmok nema hentangkeskama la'a —lhna lhta aptaiangkok ma'a.
11Koka lhna lhta aptemak enenlhet:
—Apto lhkek hetaqmelkasekha apkeltemo apatmok nema hethangkeskama nak hengke'e kakpota nhan alhong —lhna lhta aptemak ma'a.
12Apkelelmalhnekhavek na lhta mokhom apkelemhama apmaniaie' judios, lhna lhta aptaiangkok:
—¿Se lhkek enenlhet apkeltemo lhnak lhek epatmok aptanema ntanema nak kakpota nhan elhong, he? —lhna lhta aptaiangkok ma'a.
13Mang noka eihamok enenlhet apto aptaqmelkasekha m'a ngkanek mannak etekhok mokhom Jesús, aplhaniek na lhta enenlhet ma'a. 14Netamen alhta m'a apvetakho lhta mokhom Jesús enenlhet konne Eniapom Neten apnemakha, lhta aptak Jesús apkano:
—Aptaqmelakhave i'e lheiap, melanekha nkek mokhom ngkolatsekama, ngkotnekhak kelha mokhom akiavai'a akmaska apiempek —lhta aptak apkano.
15Netamen apmeiakho lhta mokhom akieto neptamen enenlhet, apkakhangkolha apkelemhama apmaniaie' judios, lhna lhta aptemak apkellanemo m'a:
—Kolhva asiavek apto lhkek hetaqmelkaseha', Jesús lha iek —lhna lhta aptemak ma'a.
16Apkelempai'avek na lhta apkelemhama apmaniaie judios apkenmahai'a emenlhenama Jesús ma'a, lhta songke apmakmeiangka aptaqmelkeskaiakmo akmaska apiempek aknem sabado nennekhelha. 17Koka lhta aptak Jesús apkellano m'a:
—Ko'o Tata apmakmema lhamakho aknem, ko'o nhan asmakmema —lhta aptak Jesús.
18Apkellavke lhta apkelemhama apmaniaie judios ma'a, apkenmak'ave lhta ennapok Jesús ngkanek apmakmeiangka aknem sabado nennekhelha, aplhenakpe lhta nha apankek apto Eniapom Neten apketka, apnemo nhan Eniapom Neten.
Eniapom Neten Apketka akietnema apientalhnemo
19Koka lhta aptak Jesús apkellano m'a apkelemhama apmaniaie judios:
—Have niapak anke, apto Apketka mankapvankek elana apmak'akha la elana. Vanlha elanak apvet'o la apkelan'o qaselha Eniapom, lhamakho qaselha apkelanai'a Eniapom, kakpota nhan elanak ma'a Apketka. 20Eniapom apkamelaiam Apketka, apvetaskaskek aptakha la apkelanai'a. Netamen eteskesek hata mokhom qaselha mongvetai'o nkek ma'a, nkolpelapkesek hata apvalho'ok ketlhengkap apkelvet'o ta m'a. 21Eniapom anak apnaklhatekhaskakmek apkenmaskengvaiakmo nak, Apketka nhan ma'a apkellangkek aliennaktema apnenio'ok apkenmak'akha la ellangkok enenlhet. 22Eniapom anak meliekpelkak aptaiangkolha enenlhet aktaqmanma nlho ka la ngkolatsekama, apkankek Apketka akiavai'a apmopvana kakpota elanak ma'a. 23Kakpota ellahok aplhamakho enenlhet Apketka, nnavek na ellahok Eniapom. Mang hata nkek ellahok na Apketka nak, mang na ellak'ok Eniapom apto lhta apkapaskama Apketka.
24Apto la enenlhet aptaqmelkeskamo apkailhemo astakha alheianma, mei'askakmo la nhan apto heiapaskama, have niapak ankek enenlhet anak ngkoitek hata akiennaktema apneniek nkotnengvaianlha nnelha, meselhnanakpe hata nhan. Malha apketsepma lhta aptemak, kolhva koka aptakhak aphalhnankok. 25Have niapak ankek astakha nak, ngva'ak aknem kolhvave nak apkellelto nak apkeletsepma elleng'ak hata apaivoma Eniapom Neten Apketka, ngkoitek hata nhan aptaikamok aphalhnanko'ok. 26Eniapom anak nietnek apmopvana kakpota ellangkok aliennaktema apnenio'ok enenlhet'avok, apkanke lhta nhan Apketka apmopvana kakpota ellangkok hata aliennaktema apnenio'ok enenlhet. 27Apkankek na Apketka apientalhnemo kakpota eliekpelkok apkellanekamok ngkollatsekama, nlho ka la aktaqmanma enenlhet'avok lhmankek ham ngkanek Apketka nak apto Enenlhet Apketka. 28Molpelapkesangkek apkellengai'a astakha nak alheianma, nkovak hata aknem apkellenganveiam apaivoma Eniapom Neten Apketka apkellelto apnangkongvaiam ma'a nemakha aknengkanveianlha enghapak, 29enaklhatekhangvomok hata nhan ma'a. Koka apkellelto lhta apkellanekamok qaselha altaqmelo neksa aptaikamo lhta aphalhnanko'ok, etlhevangkok hata aliennaktema apnenio'ok ma'a. Koka apkellelto lhta apkellanekamok ngkolatsekama, ngkolhek hata akiaqmongkasakho apkeltemakha m'a.
Jesús apkelvetaskeskama apientalhnemo
30Mongvapvankek alanak asmak'akha la alana ehenkok ehenke', Eniapom anak ma'a helhekmoskek atnek askeliekpelkemo aktemakha apkellanekamok enenlhet. Ka ngkanek atnek aktaqmelo askeliekpelkemo motaha aniem'o askeliehekho Eniapom anak ma'a, apto nhan heiapaskama. 31Aqhemo ta ngkotnek alhenammalhko ehenkek ko'o asiamolhma, hetlhenek hata ketlhengkap asmopvana ania'a. 32Apnek koka po'ok enenlhet apto have niapak ankek helheianma, asiave ko'o aplheianma mota apto have niapak anke'. 33Apkellapaske lhta ketlhengkap apkelennengkasekama m'a apnakha Juan kakpota helpeivesekhok ko'o, helhenke lhta ko'o Juan akto have niapak anke. 34Ko'o koka melaimekpok enenlhet hetlheianma la asvesai'a, asiamolhma napaqtavek alhenkek mota qaselha nak kakpota elvongkasakpok tep ketlhengkap.
35Juan alhtoka malha talha alhankok alaivoma atsaskama lhma, nkelpaiesakhe lhta apvalho'ok ketlhengkap atsaskama lhma lhta m'a, iakvatakho nke lhtoka.
36Helhenke lhta ko'o Juan napaqtavek ketlhengkap astemakha, kotlheianvom koka apvalho'ok apkelvet'ak lhamakho aktemakha aspeneskama lhta aniem'o apkeltemo Eniapom alanak, kakpota eliangvomhok asto heiapaskama Eniapom anak. 37Eniapom na helheianma ko'o astema asiamolhma, ketlhengkap koka mamma nkek apkellengai'a aptakha apaivoma m'a, melvetai'ak na napa'at ma'a. 38Mang na eleliehekhok apaivoma m'a ngkanek apkeliaskeiakmek ma'a apto apkapaskama. 39Apkeltakmelkasavek niekhe apkelietsatekamok Vakkahak Eniapom Neten Apaivoma ketlhengkap, ngketlheianmek apvalho'ok elvetangvomok hata m'a aliennaktema apnenio'ok mankotnengveianlha nnelha, koka helheianme' ko'o vakkahak anak aktalhesammalhka. 40Man koka helketamak ketlhengkap kakpota allangkok aliennaktema apnenio'ok. 41Moteniak ko'o apkeltemeskeskama la akiavai'a asvesai'a enenlhet'avok. 42Askeliavek ko aptaiangkolha ketlhengkap, asiavek na mankolhnaiangkok nengasekhai'o nak aniem'o Eniapom Neten. 43Ko'o Tata apto lhta heiapaskama, koka manghenmak takha ketlhengkap. Koka apvo'o la po'ok enenlhet apvesai'a apanke', enmankok kelha takha m'a. 44Mankollapvankek nkolhnangkok meliaskeiam ketlhengkap ngkanek vanlha mota apteniaikamok eleltangko mota enenlhet apkeliamolhma ketlhengkap. Meteniaiangkok na apketlheianma la Eniapom Neten apto apveske vanlha lhema aphapak apanke etlhenek apkeliamolhma ketlhengkap ma'a. 45-47Apketlhengke mota meliaskeiam ley Moises ketlhengkap, have koka iokhalhme' ngkanek Moises helheianmek ko'o aptalheskama. Ka apkeliaskakmo la ketlhengkap Moises, heliaskakmek na ko lha'. Mankaimelhkak ko'o atlheianvakhak apkelvesai'a meliamolhma ketlhengkap napaqtek Eniapom ma'a, Moises hato ka etlheiangvakhak apkelvesai'a ketlhengkap ma'a —lhta aptak Jesús apkellano apkelemhama apmaniaie judios ma'a.
موجودہ انتخاب:
Juan 5: TMF
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©2023 LETRA Paraguay
