Hechos 11
11
Pedro apsekha ania'a napaqtavek iglesia akieto Jerusalen
1Apkellengai'ak nak ania'a nema allapaskamo kakpota nhan apkelialheng'a apkakhaiangko m'a Judea, apkenmaikamok nhan takha Eniapom Neten apaivoma metnangko nak judios. 2Neksa apvekha lhnak Pedro m'a akieto Jerusalen, apkellatemommakpo lhnak apkellelto nak apkelieplavkeskama aktemakha nema aliaqtemenkeskama apkellammelhakha nehatko'o ma'a, 3lhnak aptaiangkok:
—Mankoietok etalhnengvomok lheiap apkakhaiangkolha metnangko nak nema aliaqtemenkeskama nekhatkok apkellammelhakha, aptaveikokhek na lhta nhan lhemek lheiap ma'a —lhna aptaiangkok ma'a.
4Koka Pedro apkeleltennaseiangka lhnak ampakhasekha nkek aktemakha apvetai'a, aptaqmelkeskamo akvakmo aktakha nnelha apkeleltennasekama m'a, lhnak aptemak:
5—Asne lhta ko'o akieto m'a natemma Jope askenmalhno Eniapom Neten ma'a, ngvet'a lhta ehaqtek malha nengaqlammalhka apiavai'a apkeniem'o neten, apvaivantamo koneng akieto asnakha ko'o, 4 lhta apnaktetemmap nepva'ak ma'a. 6Askeltamesave panke lhta, asvet'o konne' lhamakho aktemakha kaselha nevhak, nennaqtoskama, kaselha aknema alloma, ka nhan alpelhievaikama nalhepop, ka nhan anata. 7Asleng'o lhta nhan nema aliatekama, lhta ntak heiano:
"Pedro, eniaqha ta, etav hata m'a", lhta ntak ania'a.
8Ka askatemmongka lhta, lhta stak askano: "Have Apveske', motomak ko mantomakha la alpaiseiam nentoma".
9Koka lhta ntak mokhom nema aliatekama aniem'o neten heiano:
"Apkenmopesakhek Eniapom Neten ma'a, melhen anke alpaiseiam lheiap", lhta ntak nema aliatekama.
103 aktaiekho lhta ntak ma'a altakhengvekha neten, ka netamen aptaqho mokhom neten nengaqlammalhka. 11Ka apkelvakho lhta asnakha m'a 3 enenlhet apkelleniem'o Cesarea, nema allapaskama helketansema ko'o. 12Espíritu alhta hepaqmetkasak apkeltemo atnek asketlhelhma'ak enenlhet alhta m'a, lhta nhan asketlhelhma'ak hengke'e 6 anak elialheng'a. Nelvakhe lhta nhan m'a akieto apnemakha lhema enenlhet, nelentalhno lhta nhan konne. 13Hengelleltennasema lhta ania'a apvetai'a lhema ángel ma'a, lhna lhta aptemak apkanemo m'a:
"Ellapes hata enenlhet natemma akieto Jope kakpota eliantementak Simon mo'ok nema altema Pedro, 14hata etlhekmoksek ma'a aktemakha apvongkasemmap tep lheiap kakpota nhan apkennemolhema apketkak", lhna lhta aptemak apkanemo ángel.
15Askelte lhta asketlhelhma'ak ma'a, ka askeleltennaso lhta ania'a aktaqmanma m'a. Apvaivantamo lhta nhan takhaplhet'ok Espíritu Santo m'a, ka aktemakha lhta nhan ennengko lha' sekhe lhta m'a. 16Nlheianvakhave lhta ko'o evalhok aptemo nak hengellanemo Apveske m'a, lhta aptak:
"Have niapak apkellavkesaiangko konne iemmen Juan ma'a, koka ngkolhek hata akto malha nema allavkesaikamok la akieplomo Espíritu Santo ketlhengkap ma'a", lhta aptak ma'a.
17Asvet'a lhta ko'o apkellangko Eniapom Neten enenlhet metnangko nak judios lhema qaselha metka akianmoma, nnavek na ennengko'o sekhe lhta aniem'o mongeliaskeiam Apveske Jesucristo. Ka ngkanek mongvapvankek ko'o angvammelhek apmak'akha la etnek elanak Eniapom Neten —lhna aptemak Pedro m'a.
18Neksa apkellengai'a lhnak ma'a akmaskemo nhan apkeliamenammap Pedro m'a, apkeliavenkaskesaiangka lhnak apvesai'a Eniapom Neten ma'a, lhna aptaiangkok:
—Neliavek kolhva ennengko'o apkenmamo takha Eniapom Neten enenlhet metnangko nak judios, apkeltavek na eliaqmongkasekhak mo'ok apvalho'ok ma'a kakpota ngkoitek aliennaktema apnenio'ok mankotnengvaianlha nnelha —lhnak aptaiangkok ma'a.
Iglesia akieto Antioquia
19Netamen apmatnama lhnak Esteban ma'a, ampai'akha lhnak aknema akmenlhenaikama apkellelto meliaskeiam. Moklhem'a lhnak apkenmaiangkok apkeniaikamok akieto Fenicia, Chipre, kakpota nhan Antioquia, ka apkeleltennaskeiakmo lhnak Eniapom Neten apaivoma m'a apkelvaianlha la'a. Vanlha lhnoka apkellelto judios ma'a, man noka eleltennaskamak metnangko nak judios. 20Koka apkelvai'ak nak na moklhem'a enenlhet'avok apkelleniem'o Chipre kakpota nhan Cirene, apkeleltennaseiangka lhnak na ania'a aktaqmanma aplhenammap Apveske Jesús enenlhet griegos ma'a akieto Antioquia. 21Nnaiangkek nak apkenmopvanka'a m'a aniem'o Apveske, apkellelto apkellailhemo apkeleltennaikama apkelpengkaiakmo lhnak apvalho'ok akieto m'a apnakha Apveske, meliaskeiakmo nhan ma'a.
22Apkellengai'ak nak ania'a apkellelto iglesia akieto Jerusalen, ka apkellapaskamo lhnak Bernabe m'a Antioquia. 23-24Bernabe lhnoka apto enenlhet apiamolhma', aklanei'o lhnak na apvalhok Espíritu Santo m'a kakpota nhan mei'askeiam ma'a. Apvekhek nak Bernabe m'a akieto Antioquia, apvetangvekho lhnak Eniapom Neten apkeltakmelkeskama enenlhet'avok ma'a, avanhek ankek nak na akpaihekha apvalhok ma'a. Ka apkeliatekho lhnak ma'a enenlhet'avok kakpota melvatesankek apkelleliehekho Apveske. Aplhaniek nak enenlhet apkellailhemo Bernabe, ka aptaiangko nhan meliaskeiam Apveske m'a.
25Netamen nak ma'a apmeiekho lhnak Bernabe akieto iokhalhma Tarso kakpota eliangvakhak Saulo m'a, apvetangvekho lhnak ma'a apiantementamo nhan Antioquia m'a. 26Lhema iantelhkapa lhnak apkakhaiangkok ma'a, apkankesekho lhnak ma'a, apketlhekmoseiangko lhnak na apkellelto iglesia m'a. Koka m'a akieto nak ma'a nema altamesaikamok anak ampai'akhasekha nkek nak apkeltemeskasekha apkelvesai'a Meliaskeiam Cristo.
27Ka apkelvaiakmo lhnak na m'a moklhem'a apkeleltennasemmap ania'a apkelleniem'o Jerusalen. 28Agabo lhnak apvesai'a lhema, apmaikama Espíritu kakpota elhenek lhema ania'a nkovak hata aknem aktema metka aptekamok lhmankek ham. Hai', ngvai'a lhta have niapak ma'a aptemo lhta apiav'akha apveske Roma apvesai'a Claudio. 29Netamen nema altamesaikamok akieto Antioquia atlheianvekho lhnak apvalho'ok moklhem'a apkelleltakha la elpasmok kakpota ellapaskesek alpasmoma apkelialheng'a ko Judea. 30Ka apkellangkongvekho lhnak patakkom Bernabe kakpota nhan Saulo kakpota elletsakhak ellangkongvakhak metno apketko'ok akieto Judea kakpota ennaskangkok apankavek ma'a.
موجودہ انتخاب:
Hechos 11: TMF
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©2023 LETRA Paraguay