मति 8
8
बडकि दुःखवा लागल मन्से
(मरकुस १:४०-४५; लुका ५:१२-१६)
1जब येसुजि सिछा देके पहडावासे तर नभलसि, मन्सेक जबड भिड हुनेक पाछा लगलइ। 2तखनहिँ एक जन बडकि दुःखवा लागल मन्से येसुजि लघिना याके हुनेक पाउ परते यसके कहलिय, “हे प्रभुजि, यपनहुँ चाहबहुँ जउँ मोरके डउल बनावे सकबहुँ।” 3येसुजि यापन हथवा पसोरलसि हसे वकरेके छुके कहलसि, “मुइ चाहबहिँ, तुइ डउल हख” हसे वइघरहिँ वकर बडकि दु:खवा डउल भेलइ। 4तब येसुजि वकरेके कहलसि, “हेरहि, इअ बतवा ककरहुँके फेनि झिन कहसि, बाकि पुजेरियानिक लघिना जाके तुइ यपनहिँके देखोसि हसे मोसाक आग्या करलि नहिँया भोग चढाके डउल भेलिक परमान मन्सावानिके देसि।”#लेवि १४:१-३२
रोमि कप्तनवाक बहरियावा डउल भेल
(लुका ७:१-१०)
5जब येसुजि कफरनहुम गउँवामा पेसलसि, तब एक जन रोमि कप्तान हुनेक लघिना याके यसके कहके बिन्ति करलिय, 6“हे प्रभुजि, मोर बहरियावा धार-हइने चल्ना रोगसे थाला परके गहनि दुःखमा बडिय।” 7तब येसुजि वकरेके कहलसि, “मुइ जाके वकरेके डउल बनोबहिँ।” 8बाकि कप्तनवा कहलिय, “हे प्रभुजि, यपनहुँके मोर घरवा भितरा लिगाएके मुइ लाइक हइने बडहिँ। यपनहुँ आग्या मतरे देहुँ हसे मोर बहरियावा डउल हखबेकरबिय। 9केहकेकि मुइ फेनि बडके हाकिमक अदलमा बडहिँ हसे मोर अदलमा फेनि सिपाहिसभ बडइ। मुइ एक जनके ‘जाहि’ कहसहि, उअ जइबे करसिय हसे दोसरि जनके ‘यवहि’ कहसहि, उअ यइबे करसिय। मुइ यापन बहरियावाके ‘इअ करहि’ कहसहि, तब उअ वसने करसिय।”
10येसुजि वकर बतवा सुनके छक परलसि हसे हुनेक पाछा लगलहरानिके कहलसि, “मुइ तोहराके सदियो कहबहिँ, यतुरा जबड विस्वास भेल मन्से त मुइ इस्राएलक मन्सावानिमा फेनि हइने पउले बडहिँ। 11मुइ तोहराके कहबहिँ, पुरवे हसे पछिय देसवासे बहुत जन यतइ तके स्वरगक राजमा हुनुका अब्राहम, इसहाक हसे याकुबसाङे भोजमा बेठतइ।#लुका १३:२९ 12बहुत इस्राएलक मन्सेसभ, जाकर तहिँया परमेस्वरक राज तयार भेल बडइ, हुनुका बाहरा यन्हारिमा फकेतइ, जहवाँ मन्सावाह कनते हसे दतवा किटकिटोते रहतइ।”#मति २२:१३; २५:३०; लुका १३:२८
13वकरपाछा येसुजि कप्तनवाके कहलसि, “याबे जाहि, तोर विस्वास करलि नहिँया हखइ।” तखनहिँ वकर बहरियावा डउल भेलिय।
येसुजि बहुत मन्सेके डउल बनोलसि
(मरकुस १:२९-३४; लुका ४:३८-४१)
14वकरपाछा येसुजि पतरुसक घरवामा पेसलसि। वहवाँ हुने पतरुसक ससुइयाक जर लागके सुतल देखलसि। 15तब येसुजि वकर हथवा छुलसि हसे जरवा छडबे करलिय। तखनहिँ उअ उठलिय हसे हुनेक सेवा करे लगलिय।
16जब साँझ भेलइ मन्सावाह भुत लागल मन्सेसभके येसुजि लघिना यनलइ। हुने यापन फदकवासे दुस्ट-आत्मासभके निकडोलसि हसे जम्मे मनियइलि मन्सावानिके फेनि डउल बनोलसि। 17इअ यसइया अगमवक्तावासे फदकलि बतवा पुरा हखेके तहिँया भेल बडइ:
“हुने हमार कमजोरिसभ लेलसि
हसे हमार रोगसभ बोकलसि।”#यसइया ५३:४
चेलाक गुड
(लुका ९:५७-६२)
18जब येसुजि यापन चारिवरि मन्सेक भिड देखलसि, हुने यापन चेलवानिके तलवाक वाहिकरवा जायके आग्या देलसि। 19तखनहिँ एक जन व्यवस्थाक-गुरु याके हुनेके कहलिय, “गुरुजि, यपनहुँ जहवाँ जेबहुँ, मुइ यपनहुँक पाछा लगबहिँ।” 20तब येसुजि वकरेके कहलसि, “हेरहि, गिदरानिक रहेके सोन्हर बडइ हसे यकसवाक चेरइयानिक कोथासभ बडइ, बाकि मुइ मन्सेक पुतरक मुडवा राखेके ठउरि फेनि हइने बडइ।”
21तब हुनेक चेलवानिमधे दोसरि एक जन कहलिय, “प्रभुजि, मोरके पहिला जाके मोर बाबाके गाडे देहुँ।” 22बाकि येसुजि वकरेके कहलसि, “तुइ मोर पाछा लगहि हसे मुरदावानिके हुनुकर मुरदासभके गाडे देहि।”
येसुजि धुधुइयाके रोकलसि
(मरकुस ४:३५-४१; लुका ८:२२-२५)
23वकरपाछा जब येसुजि डोङवामा चढलसि, तब हुनेक चेलवाह फेनि हुनेक पाछा लगलइ। 24तखनहिँ तलवामा यरमरका जबड धुधुइ-बयार यलइ हसे पनियाक मचाल उठके डोङवा डुबे लगलइ। बाकि येसुजि सुतल रहलसि। 25तब येसुजिक चेलवाह हुनेक लघिना याके यसके कहते उठावे लगलइ, “गुरुजि, हमराके बचोहुँ, हमरा त मरहिँ लगलहुँ!” 26तखनहिँ येसुजि हुनुकाके कहलसि, “तोहरा केहके डेराइ बडह, तोहार विस्वास कहवाँ गेलइ?” वकरपाछा येसुजि उठके धुधुइ-बयार हसे मचलवाके डटलसि तके तखनहिँ वहवाँ जम्मे सुनसान भेलइ। 27इअ देखके हुनुका जम्मे जन छक परते यसके कहलइ, “इअ कुन मन्से हखिय त? धुधुइ-बयार हसे मचलवा फेनि यकर आग्या मनसइ!”
येसुजि दु जन भुत लागल मन्सेके डउल बनोलसि
(मरकुस ५:१-२०; लुका ८:२६-३९)
28जब येसुजि तलवाक वाहिकरवा गदरिनि छेतरमा यापुगलसि, तखनहिँ भुत लागल दु जन मन्से चिन्डियासे हुनेके भेटे यलइ। हुनुका यसनुक डेरटावनेक रहलइ कि, उअ पइडावा माहे कुनहुँ फेनि हइने बुलइ। 29येसुजिके देखके हुनुका यसके कहते चिलेलइ, “हे परमेस्वरक पुतर, यपनहुँ हमार लघिना कथि करे यवइ बडहुँ? कथि यपनहुँ हमार जुनवा पुगलिसे यगाहे हमराके दुःख देवे याइल बडहुँ?”
30तखनहिँ हुनुकरसे इचिका वताहुँ एक बगाल सुवर चरहइ रहलइ। 31उहेसे उअ भुतवाह हुनेके यसके कहके बिन्ति करलइ, “यगर यपनहुँ हमराके निकडोबहुँ जउँ, इअ सुवरवानिक भितरा पेसे देहुँ।” 32तब येसुजि हुनुकाके कहलसि, “जाह!” तब भुतवाह निकडके सुवरवानिक भितरा पेसलइ हसे सुवरवानिक बगलवा तलवाक तरियासे खसके पनियामा डुबके नास भेलइ।
33इअ देखके सुवरवा चरोलहरा भागके सहरवावरि गेलइ हसे उअ जम्मे घटनवाक बारेमा तके कस्के भुतवा लगलि मन्सावाह डउल भेलइ उअ बतवा फेनि सुनादेलइ। 34तब जम्मे सहरवाक मन्सावाह उझिटके येसुजिके भेटे यलइ। जब हुनुका येसुजिके देखलइ, हुनुका यापन छेतरसे जाहुँ कहके हुनेके बिन्ति करलइ।
موجودہ انتخاب:
मति 8: CTHR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023, Wycliffe Bible Translators, Inc. and Nepal Bible Society
