SAN MATEO 1
1
Ke tcyman Jesucristo ootxa
(Lc. 3:23-38)
1Ejeeꞌ tzunj lu tzꞌiꞌben cybi tiyꞌjil Jesucristo. Ja Jesucristo t-xeꞌchel David, bix jatzen David t-xeꞌchel Abraham.
2Yaltzen te Abraham, tman Isaac. Jatzen te Isaac, tman Jacob. Bixsen te Jacob, cyman Judá cyuyax ke ttzicy bix ke titzꞌen. 3Bixsen te Judá, cyman Fares tuyax Zara, tal Tamar kej lu. Bix te Fares, tman Esrom. Bix te Esrom, tman Aram. 4Bix te Aram, tman Aminadab. Bix te Aminidab, tman Naasón. Bix te Naasón, tman Salmón. 5Bix te Salmón, tman Booz, tal Rahab. Bix te Booz, tman Obed, tal Rut. Bix te Obed, tman Isaí. 6Bix te Isaí, tman jrey David. Bix te David, tman Salomón, tal jxuj xuuj t-xuꞌl jxin Urías.
7Yaltzen te Salomón, tman Roboam. Bix te Roboam, tman Abías. Bix te Abías, tman Asa. 8Bix te Asa, tman Josafat. Bix te Josafat, tman Joram. Bix te Joram, tman Uzías. 9Bix te Uzías, tman Jotam. Bix te Jotam, tman Acaz. Bix te Acaz, tman Ezequías. 10Bix te Ezequías, tman Manasés. Bix te Manasés, tman Amón. Bix te Amón, tman Josías. 11Bix te Josías, tman Jeconías cyuyax ke ttzicy bix ke titzꞌen. Eteꞌ ke Jeconías tej cyxiꞌ kꞌiꞌn xjal aj Israel tuj Babilonia.
12Yaltzen te Jeconías, tman Salatiel. Otk chi pon kꞌiꞌn aj Israel tuj Babilonia tej titzꞌj Salatiel. Bix te Salatiel, tman Zorobabel. 13Bix te Zorobabel, tman Abiud. Bix te Abiud, tman Eliaquim. Bix te Eliaquim, tman Azor. 14Bix te Azor, tman Zadoc. Bix te Zadoc, tman Aquim. Bix te Aquim, tman Eliud. 15Bix te Eliud, tman Eleazar. Bix te Eleazar, tman Matán. Bix te Matán, tman Jacob. 16Bix te Jacob, tman José, tchmil María. Bix ja te María, ttxu Jesús, jaj Cristo tbi, jaj xjal scyꞌoꞌn tuꞌn Dios te cawel tibaj cykilca.
17Juꞌ tzunj, at cyajlaaj cloj cyiyꞌjil xjal e tzaj xeꞌt tiꞌj Abraham ul tiꞌj David. Bix at cyajlaaj cloj cyiyꞌjil xjal e tzaj xeꞌt tiꞌj David ul tej kꞌij tej cyxiꞌ kꞌiꞌn aj Israel tuj Babilonia. Bix at cyajlaaj cloj cyiyꞌjil xjal e tzaj xeꞌt tej kꞌij tej cytzyet cyuꞌn aj Babilonia ul baj tej titzꞌj Cristo. Juꞌtzen tten oc Jesucristo t-xeꞌchel jrey David.
Tej tul itzꞌj Jesucristo
(Lc. 2:1-7)
18Bix ja te Jesucristo, Tcwal Dios. Tej tul itzꞌj, juꞌ e baj cyjulu. Ttxu Jesús, jaj txin María, otk yolen tuyaj xin José tuꞌn tmajetxin tuyaxin. Pero te mitknaꞌx majetxin tuyaxin, bix te mitknaꞌx toc ipan José tiꞌjtxin, ya atl taltxin tuj tcꞌuꞌjtxin. Preñadatltxin tuꞌn Espíritu Santo. 19Yaltzen te José, jxin xjal tuꞌn tmaje tuya María, jun xjal e tnima tley Dios. Juꞌ tzunj, tej tel tniyꞌxin tiꞌj otk tzꞌoc María preñada, e tajbexin tuꞌn tcyaj ttzokpiꞌnxin María, pero yaaꞌn cywitz nejenel tuj tja Dios, cuma tcyꞌixin tuꞌn tcub tchꞌixew María. 20Tajxin tuꞌn el tpaaꞌn tiibxin tiꞌjtxin, pero ul jlet jun tsanjel Dios tuj cyaꞌj tuj twitziyꞌxin, bix e tkba texin:
—José, tiyꞌjil David, miꞌn tzaj ttz̈i tiꞌja tuꞌn tmajey tuya María, cuma tuꞌn tipemal Espíritu Santo ma tzꞌoc jlet taltxin. 21Bix qꞌuitzꞌjel jun taltxin, bix cꞌoquel tkꞌoꞌna tbi te Jesús, jatzen japeninaj “Clol xjal.” Jatzen tbi cꞌoquel tkꞌoꞌna, cuma chi cletel xjal tuꞌn tuj cyil―tz̈i ángel te José.
22Cykilcatzen jlu e baj tuꞌntzen tjapan baj tyol Dios e cyaj tkbaꞌn cye xjal tuꞌn jun tyolel. E tkba tyolel Dios cyjulu:
23—Cycyeꞌyenc, cꞌoquel preñada jun txin mitknaꞌx toc ipan jun xinak tiꞌj, bix qꞌuitzꞌjel jun taltxin, bix cꞌoquel kꞌoꞌn tbi te Emanuel, jatzen japeninaj “At Dios kuya”―tz̈i Dios te jun tyolel.
24Bix el twatl José. Bix e tcuya tuyaj yol e tkba tsanjel Dios texin tuj twitziyꞌxin, bix e majexin tuya María. 25Pero min oc ipanxin tiꞌjtxin tejxe tul itzꞌj taltxin. Bix oc tkꞌoꞌnxin tbikꞌa te Jesús.
موجودہ انتخاب:
SAN MATEO 1: mamTS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2000, Wycliffe Bible Translators, Inc. All rights reserved.
