Ruum Pokoilaan
Pokoilaan
Itu yo po Surat ni Paulus so Puimpugan so Ruum iitu, pokoilo nu mokipopongondaa iyo so nosiro. Kipadu-padu iyo nu mugogoma'on sontagal so ongo lobuw poimaid so Ruum om opupus ono, mokitabang iyo so nosiro lumombus so Sopanyul. So surat ni Paulus iitu no, potarang iyo suat nu ugama Kristian, om gogoma'on otoop nu lobuw poimaid so si Kristus.
Noopod ponimpuunan ni Paulus so surat iitu, nopotarang sono iyo nu impuunon nu pontudukan so surat niyo tu, nu Abar Owarong oono yo su pinakai nu Kinoringan pointolang so toko ong onu koo gama' toko kopuwarong so Iyo, ono yo subai poimaid toko nu Kinoringan, ungkiat nu timpuun sampai so pongoowi'an. (1:17).
Noopod ono, nopotarang si Paulus nu onsi nu pontudukan oono, ono yo: Kiawi' lobuw, kiat-o so lobuw Yaudi kumoo yo so okon ko Yaudi, subai kopuwarong koimbagu so Kinoringan, so' kiawi' nga kakal po nokuasa nu koraayan. Bang poimaid lobuw so si Yisus Kristus, kopuwarong sono koimbagu iyo om Kinoringan. Nopokoilo si Paulus nu bang poimaid lobuw so si Kristus, kikowiawan wagu sono lobuw oono, om nopotarang iyo nu kowiawan wagu oono oirosaan so' kopuido so si Kristus. Bang poimaid lobuw so si Yisus, kopusulut sono lobuw oono om Kinoringan, om nilabus nu Atod nu Kinoringan kiat so pogkuosaan nu koraayan om kopotoyan.
So pasal 5-8, nopotarang si Paulus nu tomod nu Ukum nu Kinoringan, om kuasa nu Atod nu Kinoringan so kowiawan nu lobuw poimaid. Nopotarang-a si Paulus nu, lobuw Yaudi om okon ko Yaudi, nokoompit-a nu padu-padu nu Kinoringan so kiawi' lobuw. Inompusan-a ni Paulus nu, iri yo po pinomotoyan so si Yisus nu lobuw Yaudi ri, nokaasuw-a so padu-padu nu Kinoringan, monabang nu lobuw maid nu koworongan Niyo niintolang ni Yisus Kristus. Kuwai ya so pomikiran ni Paulus nu, okon-a ko musingkolaid monulak lobuw Yaudi so si Yisus.
Pongoopodan, minonurat si Paulus suat so gogoma'on otoop nu lobuw poimaid, labi po monamod om mokimuwarong so lobuw wokon. Kuwai ya tinu-tinu wokon sinurat ni Paulus, ono yo monoroido mugogoma'on suat so Kinoringan, otoop goma'on nu lobuw poimaid suat so wonuo om so lobuw inong poimaid, om osuang po suat so pomikiran nu inawo. Inopod ni Paulus surat iitu nu ongo kodau kiat so ido soido nu lobuw om royou-royowan so Kinoringan.
So surat ni Paulus iitu, orunsum sobana pontudukan niyo suat so Abar Owarong, kaalib po ko' kiawi' surat intawa buuk wokon so Buuk nu Kinoringan. Kiawi' oogot so kowiawan nu lobuw niasuw so pontudukan so surat iitu, ono yo koraayan nu lobuw, tomod nu ukum, pongukuman nu Kinoringan so lobuw, koompusan nu lobuw, koimaidan, gogoma'on nu lobuw, koworongan nu Kinoringan, kopusulutan nu lobuw om Kinoringan, rumuang koworongan nu Kinoringan so kowiawan nu lobuw, pinili' nu Kinoringan lobuw tu, padu-padu nu Kinoringan monapul nu lobuw, gogoma'on ni Kristus om Atod nu Kinoringan, pongoorapan nu lobuw poimaid so si Kristus, om wokon po pontudukan. Oogot sobana so kiawi' lobuw poimaid so si Kristus nu mongudio nu pontudukan so surat iitu su' koorati sobana nu pontudukan nu Kinoringan orunsum oono om miau sono mongowaid nu koinginan Niyo.
Asuw nu Surat
0. Ponimpuunan (1:1-15)
1. Abar Owarong kuasa nu Kinoringan koponapul nu lobuw (1:16-17)
2. Kiawi' lobuw kikoraayan om orawu' kiat so Kinoringan (1:18-3:20)
3. Gama' nu Kinoringan monapul nu lobuw (3:21-5:21)
4. Koworongan nu Kinoringan so lobuw maid nu kobonaan Niyo (6:1-8:39)
5. Kobonaan nu Kinoringan so lobuw Yaudi om okon ko Yaudi (9:1-11:36)
6. Kogoyaan nu lobuw poimaid, pointolang nu kobonaan nu Kinoringan (12:1-15:13)
7. Padu-padu ni Paulus, pongoompusan nu surat, om kodau (15:14-16:27)
موجودہ انتخاب:
Ruum Pokoilaan: TomPWPgLgPn
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023 (Active), Wycliffe Bible Translators, Inc. All rights reserved.