Pinongoorapan 28
28
Si Paulus so puru Malta
1Nokotindal kai yo po, noilaan mai nai' nu puru oono ingoranan Malta. 2Lobuw so puru oono sobana ko otoua so kai. Owarong nosiro so kai, om pinurokitan kai nu apui, so' minuran om osogit. 3Minokikayu sono si Paulus om laid niyo momurakit-i, lumobuso yo sono su topirik noomutan om tinduko yo longon ni Paulus. 4Nosiou-o po nu ongo lobuw-i nu miis-giis topirik-i so longon ni Paulus, mutotongaro yo nosiro nu, “Moomatoi gaam lobuw iitu su pudi pona nokolaiw-o iyo kiat so kosonsora'an so raat, nga dai ya iyo pinosimaidan miau nu pinokokinoringan Moonunsuli',” koo. 5Nga puoso yo ni Paulus topirik iiri posubo so apui-i, om insan sabat ado oirosaan niyo nu opodos. 6Ponokodan nosiro nu maa' sono longon ni Paulus om lumuluk-a matoi, nga pagka olaid-o nosiro momurimon, om ado ya onu-onu oirosaan ni Paulus, mininda yo sono pomikiran nosiro om minutangar nu, iyo yo su pinokokinoringan.
7Dai orawu' kiat dii, kuwai tana' songapan ni Publius, gobonor so puru oono. Sobana ko owarong iyo so kai om minogol kai sono dii so iyo kotoluan laid. 8Iya oono, tumogom om tumai nu raa' amo ni Publius. Kokapo yo sono iyo ni Paulus, om minogdu'a maid nu nopotopop nu kiduo palad niyo so koyuwan nu amo ni Publius, om nopoli'an-o sono. 9Pagka soko iri, lumogaa yo sono kiawi' lobuw sumakit so puru ri dii si Paulus, om nopoli'an-a nosiro. 10Osuang sono nitungkap nosiro so kai, om uyud mai mungkayas-i nga osuang-a nitaak nosiro nu kosukupan mai so poponowan.
Kiat so Malta mian so Ruum
11Nokotalib tolu nowulan laid mai dii, lumombuso kai yo lumayag maid nu kapal kiat so Aliksandria, nu mudul-dudul dii mongindad nu muas. Kapal iiri ingoranan nu “Pinokokinoringan Minuapid”.#28:11: Ngaran nu pinokokinoringan oono si Kastur om si Puluk. 12Nokologa' kai yo sono so bandar Sirakusa om mombayo kai yo dii kotoluan laid. 13Kiat dii linumayag kai yo om nokologa' so bandar Rigium. Susuab-i, tumimpuun-o sono muos kiat so solatan. Koduaan om nokologa' kai so bandar Putiuli. 14Dii yo kinosombatan mai nu lobuw poimaid so si Yisus. Mindomoo yo sono nosiro nu poogolon kai dii koturuan. Nopupus iri, lumombuso kai yo so Ruum. 15Norongou-o po nu kosusulodan poimaid so si Yisus so Ruum nu lumoga' kai, miano yo nosiro so Pasar Apius om Tolu Oombayan monamung so kai. Nosambat-o po ni Paulus nosiro, noinsosomodan sono iyo om mongunsopoto yo so Kinoringan.
Dii so Ruum
16Nokologa' kai so Ruum, linila'an-a si Paulus sumondiang nu polakan maid nu soujar moongipat so iyo ri.
17Nokotalib kotoluan, impugo yo ni Paulus wowaidon nu lobuw Yaudi so tontong iiri. Noimpug-o po nosiro, mutongaro yo iyo nu, “Oo su kosusulodan, d'ado ya onu-onu sala' ku so bansa toko, intawa nokopongolampos nu adat nopusaka toko kiat so odu aki toko ri. Soko ono pona, inakom aku ya so Yirusalim, om nikomouli' so lobuw Ruum. 18Nobisara' aku yo po, pinokilolobusan aku yo nosiro, so' otolang nu d'ado ya nowaal ku nu kosola'an mutoop pongukuman so aku nu potoyon. 19Nga pagka lumawan ongo lobuw Yaudi ri so aku, sinumosog aku sono mokibisara' so Raja Maayo Ruum. Pudi pona soko ono, okon-a ko mokimudaawa aku nu bansa ku kondiri.#P'rapan 25:11 20Ono yo ko' mokimusambat aku om mokimutangar-tangar so kou pokoilo nu kinogosan aku nu rantai iitu so' poimaid aku so Iyo, iri orap-orapon toko lobuw Israil,” koo si Paulus.
21Mutongaro yo sono nosiro so si Paulus nu, “Dai kai ya insan ologa'an nu surat kiat so Yudia suat so ikau, om ado ido koyuwan linumoga' kiat dii paabar nu oraai suat so ikau. 22Nga oingin kai ya mongorongou suat nu koimaidan mu, so' nokorongou kai yo nu monginsala' lobuw siombo-ombo ya nu pontudukan winaid mu no,” koo.
23Indadi minonantu yo sono nosiro om si Paulus nu runat pusombatan koimbagu, om iya oono osuang lobuw linumoga' so inogolan ni Paulus, om noowianan iyo montuduk om potuturan nu gama' nu Kinoringan mogkuasa nu Iyo yo Raja. Minomakai si Paulus nu Ukum ni Musa om nisurat nu poo'abar nu Kinoringan silaid-i, tayon ong poimaid nosiro so si Yisus. 24Kuwai ya poimaid, nga kuwai ya dai poimaid nu tinangar niyo ri. 25Musosagka' sono om mokilolaiw nosiro nu notangar ni Paulus so nosiro nu, “Osuat sobana onu yo po tinangar nu Atod nu Kinoringan nilombus ni Yisaya so odu aki muyu ri nu,
26‘Panou-o
om tuturani so bansa iitu nu
mongorongou kou dadan,
nga dai kou koorati.
Monsiou kou dadan,
nga dai muyu oilaan
ong onu ourug.
27Ono yo ko' soko ono,
so' okosog inawo nu bansa oono.
Nobongol nosiro om nobolou.
Bang okon ko soko ono nosiro,
kosiou om koorati ya nosiro s'Aku.
Om bang mululi' nosiro tuui so Aku,
sopulan Ku nosiro
kiat so koraayan nosiro,’
koo ri,” koo si Paulus.#Yis 6:9-10
28Mutongaro po si Paulus nu, “Ono yo ko', moingin aku ong oilaan muyu nu, gama' nu Kinoringan monapul nu lobuw, nokotuturan-o nu ono sono tu so bansa okon ko Yaudi, om poimaid-a nosiro!” koo. [ 29Notangar-o po iri ni Paulus, mulaiwo yo lobuw Yaudi ri maid nu musosagka'-sagka'.]
30Duo notoun laid ni Paulus molak-polak so Ruum so waloi siniwaan niyo ri. Osanang sobana iyo pologa' nu kiawi' lobuw mongondaa so iyo ri. 31Sobana ko kooku' iyo paabar nu gama' nu Kinoringan mogkuasa nu Iyo yo Raja, om montuduk so nosiro suat so si Tuhan Yisus Kristus, om d'ado ya muad momogos so iyo.
موجودہ انتخاب:
Pinongoorapan 28: TomPWPgLgPn
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023 (Active), Wycliffe Bible Translators, Inc. All rights reserved.