Pinongoorapan 25
25
Mokibisara' si Paulus so Raja Maayo
nu Ruum
1Kotoluan kinologa'an ni Gobonor Pistus so wonuo nu Yudia, lumombuso yo sono iyo kiat so Kaisaria mian so Yirusalim. 2Nai yo nopointolang wowaidon nu imam om wowaidon nu lobuw Yaudi nu ponopudan nosiro so si Paulus. Otigi' sobana nosiro mindamo so si Pistus, 3tayon ong mimaid so nosiro, om monuu' sono nu lobuw popongowit so si Paulus mian so Yirusalim, so' minuupakat-o nosiro nu potoyon si Paulus so lolanon. 4Nga sumombuto yo si Pistus nu, “Ipat-ipatan-o si Paulus so Kaisaria, om dai yo su olaid mululi' dii. 5Adi, owarong maid so aku kouna'an muyu kipangkat-o mian so Kaisaria om monapud so iyo dii, ong bana nu kikosola'an iyo,” koo.
6Kiro-kiro kowoluan intawa kopuluan po minogol si Pistus so Yirusalim, om mulio yo iyo so Kaisaria. Susuab-i miano yo iyo so poomubisora'an om monuuo yo nu pologa'on si Paulus dii so iyo. 7Nokologa' yo po si Paulus, mundiio yo sono so pililiwut niyo ri lobuw nu Yaudi kiat so Yirusalim, om tumimpuuno yo monapud so iyo. Nga dai ya kointolang nosiro nu bana ya ka ponopudan nosiro ri ko' dai. 8Nga musintopano yo si Paulus nu, “D'ado ya nowaal ku nu kosola'an suat so Ukum ni Musa, Waloi Maayo nu Kinoringan, intawa Raja Maayo nu Ruum,” koo.
9Nga pagka mokimuwarong-warong si Pistus nu lobuw Yaudi ri, duato yo sono niyo si Paulus nu, “Kotaayun ko ka ong owiton ku ikau so Yirusalim mongobisara' suat so topudan iitu no?” koo.
10Sumombuto yo si Paulus nu, “Mundii-dii aku yo boto so tiningkuangon nu Raja Maayo nu Ruum, om tuui yo su otoop pongobisora'an so aku. Ikau-o kondiri koilo nu d'ado ya sala' ku so lobuw Yaudi. 11Bang dai su mongowaid nu ukum om minomaal aku nu mutoop nu ukumon nu potoyon, olila' aku ya matoi. Nga bang dai ya obana topudan nosiro iitu no, ado ido koyuwan kopogbaya' so aku. Mokibisara' aku ya so tiningkuangon nu Raja Maayo nu Ruum!” koo si Paulus.
12Nokopuupakat-o po si Pistus nu moomontuduk so iyo ri, mutongaro yo iyo so si Paulus nu, “Pagka mokibisara' ko so tiningkuangon nu Raja Maayo nu Ruum, subai mian ko dii so iyo,” koo.
Pinokoilo ni Pistus si Raja Agripa
suat so si Paulus
13Dai olaid kiat nu iri, lumogaa yo si Raja Agripa#25:13 Agripa: Siowan Kamus Kitab. om si Borniki toudi niyo so Kaisaria sumambat so si Pistus. 14Kotinu-tinuan nosiro dii, obari yo ni Pistus si Raja Agripa suat so si Paulus nu, “Kuwai lobuw tuui ingoranan so si Paulus tinaan ni Pilik nu gobonor po iyo ri. 15Laid ku so Yirusalim-i, nopaabar wowaidon nu imam om wowaidon nu lobuw Yaudi suat nu lobuw oono, om minindamo nu nipoukum so aku. 16Nga sinumambut aku nu, mongowaid nu adat nu lobuw Ruum, dai kowasa ukumon lobuw notapud ong dai po koputitingkuang nu moonapud so iyo, om taakan nu kosiwatan musintapan, k'aku. 17Adi nokologa' yo po nosiro tuui so Kaisaria, dai ku ya inimatan nu olaid po. Susuab-i minian aku yo so pongobisora'an om nipoowit ku lobuw oono sumambat so aku. 18Nokoundii ongo moonapud-i paabar nu totapud nosiro, d'ado ya nokaabar nosiro nu koraayan soko ponokodan so inawo ku. 19Kopusondiang pongoorotian nosiro om suat-a so ugama nosiro kondiri, om suat nu ido koyuwan ingoranan so si Yisus, iri minatoi-i, nga, tongaron po bana ni Paulus nu lobuw oono miau-a. 20Pagka dai su koorati nu iri, duato ku yo sono si Paulus nu, ‘Moingin ko ka ong bisora'on ko so Yirusalim nu ponopudan so ikau oono?’ k'aku. 21Nga minokilila' iyo nu tumotog po mogol tuui musingkoopod-a nu pongobisora'an nu ono ni Raja Maayo. Ono yo ko', nipotaan ku po iyo tuui musingkologa' nu kikosiwatan aku poowit so iyo dii so Raja Maayo,” koo si Pistus.
22Mutongaro yo sono si Agripa so si Pistus nu, “Aku nga mokirorongou-a nu tuturan nu lobuw oono,” koo.
Sumombuto yo si Pistus nu, “Suab-a om orongou mu nai',” koo.
23Susuab-i mosuwo yo si Agripa om si Borniki, maid nu wowaidon nu soujar om lobuw kipangkat so bandar iiri so poomusombatan maayo ri, om sobana ko inorumat iyo nu kolobuwan dii. Si Paulus nga nipoowit ni Pistus masuw. 24Mutongaro yo si Pistus nu, “Oo Raja Agripa om kiawi' lobuw tuui, lobuw iitu yo su bana ko indomoon nu lobuw Yaudi tuui om so Yirusalim nu potoyon ku. Muap-luap nosiro mutangar nu lobuw iitu dai opatut miau po. 25Nga ado ya oilaan ku kosola'an niyo nu otoop pongukuman so iyo nu potoyon. Pagka mokibisara' iyo nu Raja Maayo, topuso ku yo sono nu nipoowit iyo dii. 26Nga, d'ado oilaan ku suraton ipoowit dii si Raja Maayo#25:26: Raja Maayo nu Ruum, ono yo Kaisar. Siowan Kamus Kitab. suat so iyo, indadi pinotingkuang ku sono iyo tuui, koido yo so ikau Raja Agripa, su' oilaan ku onu bana yo ponopudan so iyo om suraton ku sono, 27so' pikiran ku dai mutoop poowit dii so Raja Maayo nu ido koyuwan nojiil, ong d'ado ya otolang kosola'an niyo,” koo.
موجودہ انتخاب:
Pinongoorapan 25: TomPWPgLgPn
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023 (Active), Wycliffe Bible Translators, Inc. All rights reserved.