Svun Mateo 2
2
Ja' li' yaloj ti ay yac'beic smoton unen Jesús ti p'ijil viniquetique
1Ti Jesuse tey i'ayan ta jteclum Belén ta Judeae. Ja'o ta sreyal ti Herodese. Ti c'alal ayanem xa'ox ti Jesuse, italic ta Jerusalén jayvo' p'ijil viniquetic ti sna'ic sq'uelel c'analetique, liquemic tal ta loq'ueb c'ac'al. 2Li' yul sjaq'uique:
―¿Bu i'ayan li yajreyic li jurioetique. Yu'un c'alal teyoticotic ta jnaticotic ta loq'ueb c'ac'ale. Iquilbeticotic señail ta jp'ej c'anal ti i'ayan xae, yu'un tal quich'ticotic ta muc' uc―xiic.
3C'alal iya'i ti Herodese, mu xa sna' c'usi tspas xchi'uc ti crixchanoetic li' nacajtic ta Jerusalene. 4Ti Herodese istac ta iq'uel scotol ti totil paleetique xchi'uc ti much'utic ta xchanubtasvanic ta smantaltac Rioxe. C'alal tsobolic xa scotolique, lic sjac' bu sc'oplal ch-ayan ti Cristoe. 5Ti totil paleetique xi iyalique:
—Sc'oplal ch-ayan ta Belén li' ta Judeae. Ja' ono'ox yech ists'iba ti yaj'alc'op Riox ta vo'nee:
6“Vo'ot Belén, ta yosilal Judá;
más muc' chac'ot chac c'ucha'al li yantic jteclumetique;
yu'un ja' tey ta xloc ta atojol jun Rey
ja' ta xlic scuentainoxuc vo'oxuc li j'israeloxuque.”
—Xi ono'ox —xi ti paleetique.
7Ti Herodese mucul istac ta iq'uel ti p'ijil viniquetique. Isjac'be c'usi ora lic yilic ti c'anale. 8C'alal laj sjaq'ue, xi i'albatique:
—Batanic ta Belén. Ba jaq'uic lec yo'to c'u cha'al xataic li unene. Mi ataique, x'ech' avalbecon yu'un chbat quich' ta muc' uc ―xi ti Herodese.
9C'alal laj albaticuc ti p'ijil viniquetique, ibatic. Ti c'anal iyilic ta loq'ueb c'ac'ale, ja' babe ech'el yu'unic. Ti c'anale tey ipaj ta stuq'uil jp'ej na yo buy ti unene, 10ti c'alal iyilic ti c'anale, xmuyubajic xa ta jmec. 11Tey i'ochic ti p'ijil viniquetique. Iyilic ti unene xchi'uc ti sme'e, ja' ti Mariae. Iyich'ic ta muc' ti unene. Isquejan sbaic, ja'o isnijan sbaic ta balamil noxtoc. Iyac'beic smoton: oro, bec'tal pom, xchi'uc muil pox mirra sbi. 12Ti p'ijil viniquetic ti sna'ic sq'uelel c'analetique, i'albatic ta svayichic yu'un ti Rioxe ti mu xa ya'uc ech' sc'oponic ti Herodese. Yech'o un c'alal isutic ta slumalique, jun xa o be istamic ech'el.
Ijatavic ech'el ta Egipto ti Josee
13Ti c'alal isutic xa'ox ti p'ijil viniquetique, ivaychin ti Josee. Isvaychin jun yaj ángel Cajvaltic. «Lican ta ora, ic'o ech'el li unene xchi'uc li sme'e. Jatavanic ech'el ta Egipto. Teanic o me. Ja'to mi lacalbeique xasutic tal. Yu'un li Herodese ta sa' li unene yu'un tsc'an tsmil.» —X'utat yu'un ti angele.
14Ti Josee, toj yulel xch'ulel ilic ta ora. Ta yac'ubalil no'ox ijatavic ech'el ta Egipto, iyic' ech'el li unene xchi'uc li sme'e. 15Tey inaquiic. Ja'to isutic tal c'alal icham ti Herodese. Ja' ic'ot ti c'usi iyal ti yaj'alc'op Riox ti ta vo'nee: «Ta Egipto ta xquic' loq'uel tal li jch'amale.» —Xi ono'ox.
16Ti Herodese, c'alal iyul ta sjol ti ilo'loat yu'un ti p'ijil viniquetique, icap tajmec. Isloq'ues mantal ti ac'u yich' milel scotol c'ox cremotic ti tey nacajtic ta Belene xchi'uc ti tey nacajtic ta sjoyobe. Ja' ti bu chib to sjabilalique xchi'uc ti más c'oxetique. Yu'un ti Herodese sna'oj c'usi ora iyilic c'anal ti p'ijil viniquetique. 17Ja' ic'ot ti c'usi iyal ti Jeremias yaj'alc'op Rioxe:
18«Chvinaj tsots oq'uel ta Ramá,
Ch-oc' xchi'uc chat yo'on ta jmec.
Ja' Raquel ti ta xoq'uita li yoltaque;
mu xa sbalin patbel yo'on
yu'un laj xa chamuc scotol.» —Xi ti Jeremiase.
19C'alal icham ti Herodese, ti Josee ic'oponat ta svayich yu'un jun yaj ángel Cajvaltic, c'alal teyic to'ox ta Egiptoe, i'albat:
20«Lican, ic'o ech'el li unene xchi'uc li sme'e. Sutanic ta alumalic yo' bu lachi'iltac ta israelale. Ti much'u tsmil ox li unene icham xa.» ―X'utat yu'un ti angele.
21Ilic ti Josee, iyic' sutel tal li unene xchi'uc li sme'e. Iyulic li' ta slumal Israele. 22Ti c'alal iya'i ti Josee ti ja' xa ochem ta reyal ta Judea screm ti anima Herodese, ja' ti Arquelao sbie; ixi', mu xa bu tey isut ech'el ta Judeae. I'albat ta svayich yu'un ti Rioxe ti ac'u ba nacluc ta yosilal Galileae. 23C'alal ic'otique, te ba naclicuc ta jteclum Nazaret. Ja' yo' xc'ot o ta pasel li c'usi yalojic ti yaj'alc'optac Riox ti ta vo'nee: ti “Jesus ta Nazaret”, xi tsbiine.
موجودہ انتخاب:
Svun Mateo 2: LeqAC
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Sociedad Biblica de Mexico AC
