Мф 15
15
15 ГЛАВА
1-20 Юмын кӱштымыжӧ да айдемын йӱлаже. 21-28 Ханаан калык ӱдырамашын ӱшанымыже. 29-31 Иисус еҥ-влакым паремда. 32-39 Ныл тӱжем еҥым пукшымаш.
1Тунам Иерусалим гыч Иисус деке фарисей ден закон туныктышо-влак толыныт да ойленыт: 2«Молан Тыйын тунемшет-влак ача-кочана-влакын йӱлаштым пудыртылыт? Киндым кочмышт деч ончыч кидым огыт муш». 3Иисус нунылан вашештен: «А молан те шке йӱлаланда кӧра Юмын кӱштымыжым пудыртылыда? 4Вет Юмо кӱштен: ”Ача-аватым пагале”, тыгак ”Кӧ шке ачаж але аваж нерген осал мутым ойла, тудым тек пуштыт”.#15:4 Исх 20:12, 21:17; Втор 5:16. 5А те ойледа: кӧ ачажлан але аважлан ”Мом тыланет пуышаш улам ыле, тидым Юмылан надыр шотеш пуэнам” манын каласа, 6тудо ачаж-аважым ок пагале гынат кертеш. Тыге те шке йӱлаланда кӧра Юмын кӱштымыжым ӧрдыжеш кодеда. 7Сайла кояш тӧчышӧ-влак! Кунам Исаия тендан нерген пророкла ойлен, чын лийын. Тудо каласен:
8”Тиде калык Мый декем мутшо дене лишемеш,
Мыйым йылмыж дене пагала,
но нунын шӱмышт Мый дечем мӱндырнӧ.
9Арам нуно Мылам кумалыт:
Мыйын туныктымем олмеш
айдемын кӱштымым веле туныктат”».#15:8-9 Ис 29:13.
10Иисус Шкеж деке калыкым ӱжын да каласен: «Колыштса да умылыза. 11Умшашке мо пура, тудо айдемым ок амырте, а умша гыч лекше – айдемым амырта».
12Тунам тунемшыж-влак лишемыныт да ойленыт: «Палет мо, ойлыметым колын, фарисей-влак ӧпкелалтыныт». 13Иисус вашештен: «Мыйын Пылпомышсо Ачам шынден огыл гын, кеч-могай кушкылымат вожге сомылат. 14Фарисей-влакым шотыш ида нал, нуно сокыр-влакын сокыр вӱден коштыктышышт улыт. А сокыр сокырым вӱда гын, коктынат вынемыш пурен каят».
15Петр Тудлан каласен: «Тиде туштен каласыметым мыланна умылтаре». 16«Теат але огыда умыло мо? – йодын Иисус. 17– Эшеат огыда ыҥле мо: умшашке пурышо – айдемын кӧргыж гоч эрта да тӱжваке лектеш, 18а умша гыч лекше – шӱм гыч лектеш, тидыже айдемым амырта. 19Вет шӱм гыч осал шонымо, пуштмо, еҥ вате дене коштмо, яжарланыме, шолыштмо, шойышт таныклыме, мыскылыме лектыт. 20Тидыже айдемым амырта, а кидым мушде кочмыжо айдемым ок амырте».
21Тушеч лекмеке, Иисус Тир ден Сидон кундемышке каен. 22Теве тиде кундемыште илыше Ханаан калык ӱдырамаш толын да Тудлан кычкырен: «Господь, Давидын Эргыже! Мыйым чамане! Ӱдырем осал шӱлыш дене шучкын орлана!» 23Но Иисус тудлан ик мутымат вашештен огыл. Тунемшыж-влак Иисус деке лишемыныт да йодыныт: «Кораҥаш тудлан кӱштӧ, почешна кычкыра». 24Иисус каласен: «Мыйым Израиль калык кокласе йомшо шорыкышт деке веле колтымо». 25А ӱдырамаш Иисус деке миен, кумык возын да ойлен: «Господь, полшо мыланем!» 26Тудыжо вашештен: «Йоча деч киндым шупшын налын, пийлан кудалташ сай огыл». 27«Господь, тидыже тыгак, – каласен ӱдырамаш. – Но пий-влакат озаштын ӱстембач камвочшо пудыргым кочкыт.» 28Тунам Иисус тудлан каласен: «О, ӱдырамаш, тыйын ӱшанымашет пешак кугу, тек тыланет шонымет семынак лиеш». Тудо жапыштак ӱдыржӧ паремын.
29Иисус тушеч каен, Галилей теҥыз деке толын, курыкыш кӱзен да тушан шинчын. 30Тудын деке моткоч шуко калык лишемын, пырля окшакым, сокырым, йылмыдымым, чолакым да шуко молым конденыт да Иисусын йол воктекше пыштеныт. Тудо нуным паремден. 31Йылмыдымым ойлаш тӱҥалшым, чолакым тазам, окшакым коштын кертшым, сокырым ужаш тӱҥалшым ужмеке, калык моткоч ӧрын да Израильын Юмыжым моктен.
32А Иисус тунемшыж-влакым Шкеж деке ӱжын да нунылан каласен: «Нине еҥ-влакым чаманем. Нуно ынде кум кече Мый денем улыт, а кочкашышт нимо уке. Корнышто ынышт ярне манын, нуным шужышым ынем колто». 33Тунемшыж-влак вашештеныт: «Тынар шуко еҥым пукшаш ситыше киндым ир мландыште кушто муына?» 34«Тендан кунар киндыда уло?» – йодын Иисус. «Шым сукыр кинде да икмыняр изи кол», – каласеныт нуно. 35Тунам Иисус еҥ-влаклан мланде ӱмбаке шинчаш кӱштен. 36Шым сукыр киндым да колым налын, Иисус тауштен пелештен да тодылын, тунемшыж-влаклан пуэн, а нунышт – калыклан. 37Чылан теммешке кочкыныт, кодшо катышым шым комдо тич погеныт. 38Ӱдырамаш ден йочам шотлаш огыл гын, кочшо еҥже ныл тӱжем лийын.
39Калыкым колтымеке, Иисус пушыш шинчын да Магдала кундемыш каен.
موجودہ انتخاب:
Мф 15: УС
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Библийым кусарыше институт, Хельсинки 2007
