Mata 6
6
La Su ala Ndzǝ nam ada Bara ni
1 #
Mat 23:5
“Ka gǝri 'ya hankal ta gǝri ta ‘'ya kǝthlǝr kalkalkur gǝri’ akǝma ndzi, akuya ka dar wuti, ma gǝri 'ya apani gǝri adi aka wadzǝɓa adzǝ Tada gǝri nam atahyal wɛ.
2“Ani sakatǝ gǝ ata la su ala ndzǝ nam ada bara, ta gǝri ta waina ala ndzi, apa tǝ ndzǝr kǝlikatsaɗǝm ada 'ya akwa fǝr vǝkǝr sǝlai ala Hyal ba akwa whal yarɛ, akuya ka ndzǝ hǝm tǝ dar. Yi ada gha ala gǝri dzǝri, dar kǝ kurta dlutsi wadzǝɓar dar. 3Ama sakatǝ gǝ ada la su ala ndzǝ nam ada bara, ta gǝ ta ngyar ka tsi aghya gɛ zǝndi sǝ nam tǝ tsisǝma gǝ ada 'ya, 4ani ka hamnta sǝr ngɛ ka dzǝ ndzai akwa ɗǝwa-ɗǝwa. Antǝ Babar ngɛ nam ada wula sǝ nam tǝ ndǝ 'ya akwa ɗǝwa-ɗǝwa, dzǝ ata la gɛ wadzǝɓari.
Aduwa
(Luk 11:2-4)
5 #
Luk 18:10-14
“Ani sakatǝ gǝri ata 'ya aduwa, ta gǝri ta ndzai apa kǝlikatsaɗǝm yarɛ, kadǝbar tǝ dar yiɗɛ ka dar 'ya aduwa ata vui hyahyati akwa fǝr vǝkǝr sǝlai ala Hyal yarɛ ba akwa mǝndǝghɛ kadǝbar ka ndǝ wula tǝ dar. Yi ada nkǝrɛ ala gǝri dzǝri dar kurtaka dlutsi wadzǝɓar dar sang. 6Ama sakatǝ gǝ ata 'ya aduwa, ka gǝ lǝmbwar ngɛ, ka gǝ harti nyavǝr ka gǝ 'ya aduwa ala Babar ngɛ, nam kura ndǝ ada wula. Antǝ Babar ngɛ, nam ada wula sǝ nam tǝ ndǝ 'ya akwa ɗǝwa-ɗǝwa dzǝ ata la gǝ wadzǝɓari.
7“Ani sakatǝ gǝri ada 'ya aduwa, tá gǝri tá lǝkǝma aka thlǝvǝr nya apa ndzǝ nam kura ta zǝndi Hyal, akuya dar ada ɗǝnga apǝri ndǝ ata ngati tǝ dar atar nyar tsǝdzǝ nyar dar. 8Ta gǝri ta ndzai apa dar, akuya Tada gǝri zǝndi sǝ nam tǝ gǝri ada bara kabutu gǝri ta yu tǝni.
9“Əni, dzá, ani whal nam tǝ gǝri ata 'ya aduwa:
“ ‘Tada yar nam atahyal,
ka ndǝ vi sǝlaiyir thlǝma gɛ,
10kuhyikur ngɛ ka dzǝ si,
sǝ nam tǝ gǝ ada bara, ka ndǝ 'ya tǝni
akwa dunya ǝni, apa tǝ ndǝ ada 'ya tǝni atahyal.
11Ka gǝ la yar sǝr sǝmǝr ɓuktsi yar asǝna.
12Ka gǝ kyifǝnta ala yar bikǝr yar yarɛ,
apa tǝ yar tara kyifǝnta ala ndzǝ nam 'ya ala yar biku.
13Ba ta gǝ ta mwari aka yar akwa vui nkǝrti,
ama ka gǝ mbuli tǝ yar akwa tsiya ndǝ kulɗa.’
14 #
Mar 11:25,26 Akuya ma gǝri ada kyifǝnta ala ndzi sakatǝ tǝ dar 'ya ala gǝri biku, Tada gǝri nam atahyal ata kyifǝnta ala gǝri tsuwɛ. 15Ama ma gǝri ta kyifǝnta ala ndzi bikǝr dar wɛ, Tada gǝri adi ata kyifǝnta ala gǝri bikǝr gǝri wɛ.
Asam
16“Sakatǝ gǝri ada 'ya asam, ta gǝr ta mbǝmbǝrti kǝma gǝri apa tǝ kǝlikatsaɗǝm yarɛ ada 'ya mai, akuya dar ada takulti kǝma dar ka dar tsanti ala ndzi apǝri dar aka asam. Yi ada nkǝrɛ ala gǝri dzǝri, dar kurtaka dlutsi wadzǝɓar dar sang. 17Ama sakatǝ gǝ ada 'ya asam, ka gǝ kǝtsǝnta kǝma gǝ ka gǝ fau mal akwa kǝra gɛ, 18ani ka ta dzǝ ta ndzai ata babal ala ndzi apǝri gǝ ada 'ya asam ama ɗiɗi ala Babar ngɛ, nam kura ndǝ ada wula; ba Babar ngɛ nam ada wula sǝ nam tǝ ndǝ 'ya akwa ɗǝwa-ɗǝwa ata la gǝ wadzǝɓar ngɛ.
Tsaɓtsǝni Gǝna Atahyal
(Luk 12:33-34)
19 #
Yak 5:2,3 “Ta gǝri ta tsaɓtsǝni gǝna ala kǝr gǝri akwa dunya, vui nam tǝ mutaɓur aka kǝlamku ata sǝwati, ba vui nam tǝ ndzǝr hǝlɛ ata ɓǝlnta ka hǝlti. 20Ama ka gǝri tsaɓtsǝni gǝna ala kǝr gǝri atahyal, vui nam tǝ mutaɓur aka kǝlamku adi ata sǝwati wɛ, tsuwɛ vui nam tǝ ndzǝr hǝlɛ kura awa ɓǝlnta ka dar hǝlti. 21Akuya vui nam tǝ gǝnar ngɛ akwa, antǝ ɗǝfa gǝ yɛ ata 'ya akwanda.
22“Ntsɛ ani pitǝlar dzɛ. Ma ntsɛ gǝ yarɛ ɗaku, sanga dzá gɛ ata ndzai ghǝi-ghǝi aka paraku, 23ama ma ntsɛ gǝ kulɗa, sanga dzá gǝ ata ndzai ghǝi-ghǝi aka kuthlɛ. Ma apǝri paraku nam akwa gǝ ani kuthlɛ, mǝmi nggakur kuthlɛ nda!
24“Ndɛ adi nam ata mǝzi 'ya kǝthlǝr ala Thlaku sǝɗǝ wɛ. Tar ma dzǝ ngǝla pathlu ka dzǝ yiɗǝ pathlari, wala ka dzǝ tsu pathlu akwa kǝr ba ka dzǝ rutsǝni pathlari. Gǝ adi ata mǝzi kǝthlǝr ala Hyal gyapu aka kwapa wɛ.
Ta Gǝri ta Damitsǝnidzi
25“Kadǝbar ǝni Yi ada gha ala gǝri, ta gǝri ya damitsǝnidzi ata kǝra mpikɛ gǝri, sǝ nam tǝ gǝri ata sǝmɛ wala sa; wala ata kǝra dzá gǝri, sǝ nam tǝ gǝri ata hadzɛ. Mpikɛ adi ɓwalta sǝr sǝmɛ wɛ, ba dzɛ adi ɓwalta kari wɛ? 26Wulamɛ ika yarɛ nam ada ɗǝghǝti atahyal; dar adi ada thlǝka wala dli wala tsaɓtsǝni akwa bi yarɛ wɛ, wala apani Tada gǝri nam atahyal ada la dar sǝr sǝmɛ. Gǝri ta ngǝmba tǝ dar aka paida wɛ? 27Wa akwa ntsa gǝri atar damitsǝnidzǝrni awa mǝzi ka dzakti awur duku ala dzǝgamkur mpikari#6:27 Wala thlǝl duku ala dzǝgamkurni.?
28“Ba kami tǝ gǝri ada damitsǝnidzi ata kǝra sǝr hadzɛ yarɛ? Wulamɛ pugǝdlɛ yarɛ nam akwa ntaku whal nam tǝ dar ada kǝlí. Dar adi ada kǝthlǝr wala tsaka wɛ. 29#1Kuh 10:4-7; 2Sǝt 9:3-6Wala apani Yi ada gha ala gǝri apǝri wala Sulaimanu akwa dzǝgu dzǝrni sang dzǝ ta saga 'yati dzǝgudzi dzǝli nǝr duku akwa ntsa dar wɛ. 30Ma apǝri ani whal nam tǝ Hyal ada hadzɛ kari ala kusar nam akwa ntaku, nam tǝ asǝna dar aka mpikɛ ama arpɛ ka ndǝ ɗalu tǝ dar akwa u'u, ani kura dzǝ awa hadzɛ ala gǝri kari nam hang? Gǝri ndzǝ nam aka hamnta nam nkyiɗu? 31Ani ta gǝri ta damitsǝnidzi, ka nkǝrɛ, ‘Mǝ tǝ yar awa sǝmɛ?’ wala ‘Mǝ tǝ yar awa sa?’ wala ‘Mǝ tǝ yar awa hadzɛ?’ 32Akuya ndzǝ nam kura ta zǝndi Hyal ada bara sanga sǝ ǝni yarni, ba Tada gǝri nam atahyal zǝndi apǝri gǝri ada bara tǝ dar. 33Ama tangkǝma ka gǝri bara kuhyikurni ba kalkalkurni, ba sanga sǝ ǝni yarni ndǝ ata la gǝri tsuwɛ. 34Akuya ǝni ta gǝri ta damitsǝnidzi ata kǝra arpɛ, akuya arpɛ ata damitsǝnidzi ata kǝra kǝrni. Kǝlara vǝri aka bwanai tara mǝzi tǝni.”
موجودہ انتخاب:
Mata 6: CKL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©2023 Seed Company in collaboration with Language Developers and Bible Translators Association
