མ་ཏི། 3
3
ཁྲུས་གསོར་པ་ཡུ་ཧན་ན་གི་ ལམ་སེ་བ༌ལ།
1ཨུ་ཉུ་གང་ཀ་ ཁྲུས་གསོར་པ་ ཡུ་ཧན་ན་བྱོན་ཐཱན་ ཡ་ཧུ་དི་ཡ་ག་ ས་ཏོང་པ་ནང་ཀ་ གསུང་བཤད་པེ་ གོ་ཙུག་པ༌ལ། 2སྡིག་པ་གེ་ལོག་ཅོ། ཧང་ཡ་དག་ནེ་ལ་ ཞིང་ཁམས་ག་རྒྱལ་སྲིད་ ར་ག་ཏེམ་པ་ཅ་དག་ཉི་ རོ་ཀི་གསུངས་མ༌ལ། 3ལུང་བསྟན་པ་ ཡ་ཤའི་ཡ་གི་ ཡུ་ཧན་ན་ག་ཀོར་གེ་ ཨོ་ཐེན་གསུངས་མ་ཆོ་ཝ་
སོ་ངོ་ཐུར་གི་ ས་ཏོང་པ་ནང་ཀ་ ཀཱན་ཤུག་ཨ་ཉི་ གཙོ་བོ་བྱོན་མེ་དེན་གེ་ ལམ་སེ༌བེ། ཉི་རོ་ཀི་ རོ་ཀ་ལམ་ཐྲང་པུ་ཅོད་པེ་#3:3 ཡ་ཤའི་ཡ་ག་དཔེ་ཆ་ 40:3 དག༌ཉི།
4ཡུ་ཧན་ན་ག་ ནམ་བཟའ་ཤོ་ ང་མོ་ག་པུ་གི་ ན་མ་ཆོ་ཝ༌ལ། ཉི་རོ་ཀ་ཤ་ཅི་ནང་ག་ མོང་ནང་ག་ཐེ་མུ་ ཆུ་ཝ་ཆོ་ཝ༌ལ། ཉི་རོ་ཀ་གསོལཝ་ཤོ་ ང་མེ་ན་ཁཱན་ ཏེག་ཏེག་པ་དང་ བོ་རང་མི་ཟུ་མ་ག་ཞིང་ གི་ཝ་ཆོ་ཝ༌ལ། 5ཡ་རུ་ཤ་ལེམ་དང་ ཡ་ཧུ་དི་ཡ་ ས་ཆ་ཐམས་ཅན་གེ་ ཉི་ཡར་དཱན་རི་དྲང་ར་ག་ཆོ་ཁཱན་ དུང་ཐམས་ཅན་ག་སོ་ངོ་བ་ ཡུ་ཧན་ན་གི་ བཤད་ཁཱན་གསུང་ ཉཱན་པེ་དེན་གེ་ ས་ཏོང་པ་ག་ཏཱན་ དི་ཝ༌ལ། 6ཉི་རོག་ཏེ་བ་ཀ་སྡིག་པ་ ཁ་དོག་ཁཱན་སོ་ངོ་བ་ རོ་ཀི་ཡར་དཱན་རི་དྲང་ག་ ཁྲུས་གསོར་གནང་མ༌ལ།
7དག་པ་ཀབ་ཉི་ ཕ་རི་སི་པ་དང་ ས་དུ་ཀི་པ་མང་པུ་ཐུར་ རོ་ཀེ་ཁྲུས་གསོར་ཞུ་ལེ་ག་ ཨོ་ཕ་ཐོང་མ་ཀབ་ཉི་ རོ་ཀི་ རོག་ཏེ་བ་ཀ་གསུངས་མ་ལ་ ནའི་རུ་གེ་ནང་བ་ དཀོན་མཆོག་གི་ ཁྲིམས་ཀེ་བེ་ཅམ་པ་ཀབ་ཉི་ ན་ཧ་བ་ ཨི་བི་གི་ གཱན་ཇོང་ཤོ་དག་ཉི་ ཡེག་ཆོ་ཝ་ཡ། 8གོ་མ་རང་ ལའི་ལེག་པུ་ཨ་ཉི་ སྡིག་པ་གེ་ལོག་པ་གི་ལ་དག་ཉི་ གེན༌ཤོ། 9ཨའི་ཨ་བཱརའ་ཧམ་ག་ རྒྱུད་པ་གི་ལ་ཨ་ཉི་ ཡེག་པེ་དག་ཉི་ ན་ཤི་མ་མི། ཇི་གི་ན་ཧ་ཡེག་པེ་ དཀོན་མཆོག་གི་ ཨོ་ཐ་ལུང་བ་ཀི་ཆང་ ཨ་བཱརའ་ཧམ་ག་ རྒྱུད་པ་ཅོད་གནང་མེ་རེ༌བེ། 10གི་ཚེ་གེ་ཤ་ བེང་ར་ ཤིང་ར་ཅི་བ་ཀ་པག་པ༌ཅ། ཉི་སེ་ལེག་པུ་ མ་སེ་ཁཱན་ཤིང་ ཐམས་ཅན་རང་དུན་ཐཱན་ མི་ག་གོག་པེ་གི་ལ་དག༌ཉི།
11སྡིག་པ་གེ་ལོག་ཁཱན་བ་ཀ་ ཇི་གི་རི་གི་ཨ་ཉི་ ཁྲུས་གསོར་ཕིན༌ཅ། དག་པ་ཀབ་ཉི་ ཇང་གེ་ཚིང་ཚིང་བྱོན་ཁཱན་ཁེ་པ་ ཇང་གེ་ཆི་ལུ་གི༌ལ། ཇང་ཏ་ རོ་ཀ་ཞབས་ལྷམ་ཐུར་རང་ བང་མེ་ག་ མ་རུང་ཁཱན་ སོ་ངོ་གི༌ལ། ཉི་རོ་ཀི་ ན་ཧ་བ་ དམ་པའི་ཐུགས་ཉིད་དང་ མི་གི་ཨ་ཉི་ ཁྲུས་གསོར་གནང༌མེ། 12རོ་ཀ་ད་ལ་ རོ་ཀ་ཕྱག་ཀ་བསྣམས་པ༌ཅ། ཉི་རོ་ཀི་ བུ་དང་ཡེད་ཐཱན་ ཁུ་ཐམས་ཅན་རང་ རོ་ཀ་རུང་ནང་ཀ་གོ་ཉི་ཐ༌ལེ། དག་པ་ཀབ་ཉི་ ཧོམ་ཐམས་ཅན་རང་ ཧ་ལ་རང་མ་ཤི་ཁཱན་ མི་ག་གོག་ཉི་གེ༌མེ༎
ཡི་ཤུ་གི་ཁྲུས་གསོར་བཞེས་ཝ༌ལ།
13ཡུ་ཧན་ན་གེ་ ཁྲུས་གསོར་བཞེས་ལེ་དེན་གེ་ ཡི་ཤུ་ ག་ལིལ་གེ་ ཡར་དཱན་རི་དྲང་ག་ བྱོན་མ༌ལ། 14དག་པ་ཀབ་ཉི་ ཡུ་ཧན་ན་གི་ ཡི་ཤུ་ག་ ཁྲུས་གསོར་ཕུལ་བེ་ག་ མ་ན་ལཱན་ ཞུ་ཝ་ལ་ ཇང་ཤོ་ ནཱན་གེ་ ཁྲུས་གསོར་ཞུ་ལེ་ཁེ༌ལེ། ཉི་ནཱན་ ཧང་ཨ་ཉི་ ཇང་ཆོ་ས་ག་ཏཱན་ བྱོན་ཅ་ཡ་དག༌ཉི།
15དག་པ་ཀབ་ཉི་ ཡི་ཤུ་གི་གསུངས་མ་ལ་ ཨོ་མ་ག་དེན་གེ་ ཨོ་ཐེན་རང་ཨ་ཁེ། ཧང་ཡ་དག་ནེ་ལ་ དེན་པ་ཐམས་ཅན་རང་ ཨ་ཤི་འགྲུབ་ཕེ་ཁེ་ལེ་དག༌ཉི། ཉི་ཡུ་ཧན་ན་གི་ ཡི་ཤུ་ག་ ཁྲུས་གསོར་ཕུལ་བ༌ལ།
16ཡི་ཤུ་གི་ ཁྲུས་གསོར་ལ་ཉི་ རི་གེ་ཕིས་ཀ་ཤོ་ཝ་ཐུར་ག་རང་ ཞིང་ཁམས་ཕེག་པ༌ལ། ཉི་དཀོན་མཆོག་ག་ཐུགས་ཉིད་ ཏི་ཏ་ར་ད་བུ་ཨ་ཉི་བྱོན་ཐཱན་ རོ་ཀ་ཐུང་ཀ་ཆག་པ་ག་ རོ་ཀི་གཟིགས་པ༌ལ། 17ཉི་ཞིང་ཁམས་གེ་དོང་ གསུངས་མ་ལ་ རོག་ཤོ་ ཇི་གི་ཕང་ཁཱན་ ཇ་ག་ཟ་གི༌ལ། ཉི་ཇང་རོག་ཀབ་ཉི་ གནམ་མེད་ས་མེད་ ངལ་རངས་པ་ཅ་དག༌ཉི༎
موجودہ انتخاب:
མ་ཏི། 3: TNTB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Tshangla New Testament
© 2023, The Bible Society of India
all rights reserved
