Апостолты хъуыддӕгтӕ 21
21
Балц Йерусалиммӕ
1Уыдонӕй куы фӕхицӕн стӕм, уӕд науы ацыдыстӕм Космӕ, дыккаг бон та — Родосмӕ, уырдыгӕй — Патарӕмӕ. 2Уым бацагуырдтам, Финикимӕ чи цыдис, уыцы нау, сбадтыстӕм дзы ӕмӕ ацыдыстӕм. 3Баввахс стӕм Кипрмӕ ӕмӕ йӕ фӕуагътам галиуӕрдыгӕй. Нӕ ных сарӕзтам Сиримӕ ӕмӕ бацыдыстӕм Тирмӕ. Ам хъуыди равдӕлон кӕнын нау. 4Мах ссардтам ахуыргӕнинӕгты ӕмӕ дзы баззадыстӕм авд боны. Уыдон, Сыгъдӕг Удӕй разӕнгардӕй, дзырдтой Павелӕн, цӕмӕй Йерусалиммӕ ма ацӕуа.#Хъуыд 20:23. 5Фӕлӕ афон куы ӕрцыд, уӕд мах араст стӕм дарддӕр. Ахуыргӕнинӕгтӕ се ’ппӕт дӕр ӕд устытӕ ӕмӕ ӕд сывӕллӕттӕ нӕ фӕдыл фӕссахармӕ рацыдысты. Денджызы былгӕрон ӕрзоныг кодтам ӕмӕ скуывтам.#Хъуыд 20:36. 6Кӕрӕдзийӕн «хӕрзбон» загътам ӕмӕ сбадтыстӕм науы, уыдон та аздӕхтысты сӕхимӕ.
7Тирӕй ӕрхӕццӕ стӕм Птолемаидӕмӕ. Уым фембӕлдыстӕм ӕфсымӕртимӕ ӕмӕ сӕм фестӕм иу бон. 8Дыккаг бон араст стӕм Кесаримӕ. Уым бацыдыстӕм, аргъуан цы авд лӕджы сӕвзӕрста, уыдонӕй иумӕ — Фарны Уац хъусынгӕнӕг Филиппы хӕдзармӕ, ӕмӕ уымӕ баззадыстӕм.#Хъуыд 6:5. 9Филиппӕн уыди, пехуымпариуӕг чи кодта, ахӕм цыппар ӕнӕцыд чызджы.#Хъуыд 2:17-18. 10Дзӕвгар рӕстӕг сӕм куы фестӕм, уӕд Иудейӕ иу пехуымпар ӕрцыд, йӕ ном — Агав.#Хъуыд 11:28. 11Уый нӕм бацыд, райста Павелы рон, сбаста дзы йӕ къухтӕ ӕмӕ йӕ къӕхтӕ, стӕй загъта: «Афтӕ зӕгъы Сыгъдӕг Уд: ацы рон кӕй у, уыцы лӕджы иудейӕгтӕ Йерусалимы мӕнӕ афтӕ сбӕтдзысты ӕмӕ йӕ ратдзысты муртаттӕгты къухтӕм».#Хъуыд 20:23; 24:27; 26:29; Эф 6:20; Флп 1:13; 2 Тим 2:9; Дзут 10:34.
12Уый куы фехъуыстам, уӕд, уым чи уыди, уыдонимӕ лӕгъстӕ кӕнын райдыдтам Павелӕн, Йерусалиммӕ ма ацу, зӕгъгӕ.
13Фӕлӕ Павел дзуапп радта: «Уый цытӕ кӕнут? Уӕ кӕуынӕй мын мӕ зӕрдӕ цӕмӕн риссын кӕнут? Ӕз цӕттӕ дӕн ӕрмӕст ахӕстоны сбадынмӕ нӕ, фӕлӕ Бардарӕг Йесойы номы сӕраппонд Йерусалимы амӕлынмӕ дӕр».#Хъуыд 20:24.
14Куынӕ йӕ басастам, уӕд банцадыстӕм ӕмӕ загътам: «Бардарӕджы куыд фӕнды, афтӕ уӕд!»#Мт 6:10.
15Уый фӕстӕ нӕхи срӕвдз кодтам ӕмӕ араст стӕм Йерусалиммӕ.
16Немӕ ма рацыдысты кесариаг ахуыргӕнинӕгтӕ цалдӕрӕй. Уыдон нӕ ӕркодтой фыццаг ахуыргӕнинӕгтӕй иумӕ — кипраг Мнасонмӕ, цӕмӕй йӕм бафысым кӕнӕм.
Йаковы уынаффӕ Павелӕн
17Йерусалиммӕ куы бахӕццӕ стӕм, уӕд ныл ӕфсымӕртӕ сӕмбӕлдысты ӕхсызгонӕй. 18Павел дыккаг бон немӕ ацыд Йаковмӕ; ӕрӕмбырд сты аргъуаны ӕппӕт хистӕртӕ дӕр. 19Павел сын салам радта ӕмӕ бӕлвырд радзырдта, йӕ куысты руаджы Хуыцау муртаттӕгты ӕхсӕн цы сарӕзта, уый тыххӕй. 20Уыдон ӕм байхъуыстой, арфӕ ракодтой Хуыцауӕн ӕмӕ Павелӕн загътой: «Ӕфсымӕр, уыныс, цал мин иудейаджы баууӕндыди, уый! Ӕмӕ се ’ппӕт дӕр ӕнувыд сты Моисейы Ӕгъдауыл.#Хъуыд 22:3; Ром 10:2. 21Дӕу тыххӕй сын радзырдтой, зӕгъгӕ, муртаттӕгты ӕхсӕн чи цӕры, уыцы иудейӕгты ды се ’ппӕты дӕр ахуыр кӕныс Моисейы Ӕгъдау ныууадзыныл, сӕ сывӕллӕттӕн сунӕт нӕ кӕныныл ӕмӕ не ’гъдӕуттӕм гӕсгӕ нӕ цӕрыныл. 22Ныр цы чындӕуа? Адӕм ӕнӕмӕнг [ӕрӕмбырд уыдзысты, уымӕн ӕмӕ] фехъусдзысты де ’рцыды кой. 23Уӕдӕ байхъус, цы дын зӕгъӕм, уымӕ: не ’хсӕн ис, Хуыцауӕн дзырд чи радта, ахӕм цыппар лӕджы. 24Акӕн сӕ ӕмӕ дӕхи ссыгъдӕг кӕн семӕ, сӕ хӕрдзтӕ сын дӕхимӕ райс. Уыдон адасдзысты сӕ сӕртӕ, ӕмӕ иууылдӕр фендзысты, дӕу тыххӕй цы фехъуыстой, уый ӕцӕг кӕй нӕу, ды дӕхӕдӕг дӕр Ӕгъдаумӕ гӕсгӕ кӕй цӕрыс. 25Муртаттӕгтӕй Бардарӕгыл чи баууӕндыд, уыдоны тыххӕй та рахастам уынаффӕ ӕмӕ сӕм ныффыстам, мӕнгхуыцӕуттӕн хаст нывӕндтӕй, туг ӕмӕ хӕдмӕл дзидза хӕрынӕй, стӕй хъахбайдзинадӕй сӕхи куыд бахизой».#Хъуыд 15:20.
Павелы ӕрцахстой
26Уӕд Павел ахуыдта уыцы лӕгты ӕмӕ дыккаг бон семӕ ссыгъдӕг кодта йӕхи. Уый фӕстӕ бацыди Кувӕндонмӕ ӕмӕ фехъусын кодта, сыгъдӕг кӕныны бонтӕ кӕд фӕуыдзысты ӕмӕ уыдонӕй алкӕй тыххӕй дӕр нывӕндтӕ кӕд ӕрхастӕуыдзӕн.
27Уыцы авд боны куы фӕуд кодтой, уӕд асиаг иудейӕгтӕ Павелы федтой Кувӕндоны, сардыдтой йыл ӕппӕт адӕмы ӕмӕ йӕ ӕрцахстой.
28Хъӕр систой: «Израилӕгтӕ, баххуыс кӕнут! Ацы адӕймаг алкӕй дӕр ӕмӕ алы ран дӕр ахуыр кӕны нӕ адӕмы, Ӕгъдауы ӕмӕ ацы бынаты ныхмӕ. Суанг ма муртаттӕгты дӕр бахуыдта Кувӕндонмӕ ӕмӕ фӕчъизи кодта ацы сыгъдӕг бынат!»#Хъуыд 24:6.
29Уымӕн ӕмӕ уымӕй размӕ Павелимӕ сахары федтой эфесаг Трофимы ӕмӕ ӕнхъӕлдтой, Павел ӕй Кувӕндонмӕ бахуыдта, зӕгъгӕ.
30Сахар ӕгасӕй дӕр базмӕлыд, ӕрӕмбырд бирӕ адӕм. Ӕрцахстой Павелы, лӕгдыхӕй йӕ ракодтой Кувӕндонӕй ӕмӕ уайтагъд сӕхгӕдтой дуӕрттӕ.#Хъуыд 26:21. 31Хъавыдысты йӕ амарынмӕ, фӕлӕ ӕфсӕддон хицаумӕ фӕхабар чындӕуыд, ӕгас Йерусалим базмӕлыди, зӕгъгӕ. 32Уый ӕфсӕддонтӕ ӕмӕ сӕдӕйыхицӕуттимӕ ӕвӕстиатӕй атындзыдта адӕммӕ. Уыдон ӕфсӕддон хицауы ӕмӕ йе ’фсӕддонты куы федтой, уӕд Павелы нал надтой.
33Ӕфсӕддон хицау бацыди Павелмӕ, ӕрцахста йӕ ӕмӕ бардзырд радта, цӕмӕй йӕ дыууӕ рӕхысӕй сбӕттой. Уый фӕстӕ бафарста: «Чи у ӕмӕ цы сарӕзта?»
34Адӕмӕй иутӕ иу хъӕр кодтой, иннӕтӕ та — иннӕ. Ӕфсӕддон хицауӕн змӕсты тыххӕй йӕ бон бӕлвырдӕй базонын кӕй ницы уыд, уымӕ гӕсгӕ бардзырд радта, цӕмӕй Павелы фидармӕ акӕной. 35Павел асинмӕ куы бахӕццӕ, уӕд ӕй ӕфсӕддонты бахъуыди хӕссын, уымӕн ӕмӕ йӕм адӕм лӕбурдтой.
36Йӕ фӕдыл хъӕргӕнгӕ цыди бирӕ адӕм: «Маринаг у!»
37Фидармӕ бацӕуӕны цур Павел ӕфсӕддон хицауӕн загъта: «Иу цыдӕр зӕгъыны бар мын дӕттыс?» Уый дзуапп радта: «Ды бердзенаг ӕвзаг зоныс? 38Ӕрӕджы уыцы змӕст чи сарӕзта ӕмӕ ӕдзӕрӕг быдырмӕ цыппар мин сикарийы#21:38 Сикарийтӕ — ромӕгты, стӕй ромӕгтимӕ ӕмдзӕхдон дзуттӕгты ныхмӕ тохгӕнӕг дзуттаг фыркарз националисттӕ. Се знӕгты арӕх мардтой хъамайӕ (латинагау «сика») — сӕ ном дӕр уыимӕ баст у. чи акодта, уыцы мысыраг нӕ дӕ?»#Хъуыд 5:36.
39Павел дзуапп радта: «Ӕз иудейаг дӕн, киликиаг зындгонд сахар Тарсы гражданин. Курын дӕ, ратт мын адӕмимӕ ныхас кӕныны бар».#Хъуыд 22:3.
40Бар ын куы радта, уӕд Павел, асиныл лӕугӕйӕ, адӕмӕн йӕ къухӕй ацамыдта ӕмӕ, куы ӕрсабыр сты, уӕд райдыдта дзуттагау дзурын:
موجودہ انتخاب:
Апостолты хъуыддӕгтӕ 21: ИрББЛ2022
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Российское Библейское Общество, перевод, комментарии, словарь, 2022
© Институт перевода Библии, перевод, комментарии, словарь, 2022
© Оформление. Российское Библейское Общество, 2022