मत्ती 7
7
गुणू मा लागाळू
1“गुणू मा लागाळू ती तुमरे पोर बी गुणू नि लागाये. 2काहाकि जिना रितीसी तुमु गुणू लागाळतला, तिना रितीसी तुमरे पोर बी गुणू लागाळाय जासे; एने जिना मापोसी तुमु मापसु, तीना मापोसी तुमरेन कोरता मापाय जाये.
3“तू काहा तारा भाशोन डूवान कोचरा काजे देखतलु, एने तारा डूवान कोचरू नी सोमजतू?” 4जेतार तारात डूवामा कोचरू छे, ती तू तारा भाशो काजे कोसु कोय सोकतलु, “लाव मी तारा डूवान कोचरू निकाव दोम?” 5हे दोगावा, पेहेले तारा डूवामा गोथो मूसवो नीकाव ले, तेत्यार तू तारा भाशोन डूवान कोचरु वारला रितीसी देखीन निकाव सोकीस.
6“चुखला चीजे कुत्रा काजे मा आपु, एने आपना मोती सुवऱ्या ओगोव मा नाखू; ओसो नि होये कि चे तीनाक पायो तोवे रोंदवे एने पोछा पोलटीन तुमु काजे फाळ नाखे.”
परमेश्वर जु मांगनो एने हासील कोरनो
(लुका 11:9-13)
7“मांगु ती तुमुक आपायसे; हेरु ती तुमुक जोळसे; ठूकु ती तुमरेन कोरीन उगळी जासे. 8काहाकि जू कुदू मांगतलु, तीनाक आपनेमा आवसे; एने जू हेरतलु, तीनाक जोळतलो; एने जू ठूकतलु तेरेन कोरीन उगळाय जासे.”
9“तुमरेनचा ओसू कून माणूस छे, कि ओगर तेरु पुऱ्यु रुटू मांगे, ती चू तीनाक दोगळू आपे?” 10नि ती माछो मांगे ती तीनाक घोळसु आपे? 11ती जेतार तुमु भुंडा होयीन बी, आपना पुऱ्या काजे वारला चीजे आपने जानतेला, ती तुमुक सोरगोन बास तेरे जूव मांगणे वावा काजे वारला चीजे काहा नि आपे?
12इनान वोजेसी जो काहीन तुमुक लागे कि माणसे तुमरे साते कोरे, तुमु बी तिंदरे पुठी तोसोच कोरु; काहाकि शास्त्रान आग्या एने भविष्य कोरतान शिकवन जीत छे.
साकळी एने चोवळी वाट
(लुका 13:24)
13“साकळले वाटे जाणेन कोरु, काहाकि चोवळू छे चु झोपलू एने सुदी से जी वाट जी नाश काजे पुगाळतली एने घोणा जोना से जे तीनामा जाणेन कोरतेला. 14काहाकि साकेळलु चू झोपलु एने काठली छे वाट जी जीवन काजे पुगाळतली; एने थुलाक जोन छे जे तीनुक जोळतली.
जोसो झाड तोसो फोव
(लुका 6:43-44; 13:25-27)
15“झुटा भविष्य कोरतासी हुशारीमा रोयू, जे गाडरान भेसमा तुमरेनचा आवता, बाकीन ओवतेन चे फाळनेवावा कुल्या छे.” 16तिंदरा फोवो पोरसी तुमु उवखी लेसु. काय माणसे झाडक्यामा गोथा आंगुरोन नीती झळबेरीमा गोथो गुलोर तुडतला? 17इना रितीसी होर एक वारलो झाड वारलो फोव आपतलो एने बिन कामोन भुंडलो फोव लावतलो. 18वारलो झाड भुंडलो फोव नी लाव सोकतलो, एने नी बिन कामोन झाड वारलो फोव लाव सोकतलो. 19यो झाड वारलो फोव नि लावतलो, चो काटायीन आगठामा नाखायतलो. 20इना रितीसी तिनान फोवोसी तुमु तीनुक उवेखसु.
21“जे मेसेक, हे प्रभू! हे प्रभू! कोयतेला तिंदरे माहीन होर एक जोन सोरगोन राजोमा नी जाय, बाकीन चेत जे मारा सोरगोन बासोन मोर्जी पोर चालतला, 22तिने दाहळे माणसे मेसेक कोयसे हे प्रभू, हे प्रभू, काय आमु तारा नावोसी भविष्यवाणी नि कोऱ्या, एने तारा नावोसी भुंडली आत्मा काजे नि निकाव्या, एने तारा नावोसी लोकेत मोटला कामे कोऱ्या?” 23तेत्यार मे तीनु काजे खुलीन कोय दिस, मे तुमु काजे कोबी नि उवेखतलु, हे भुंडला कामे कोरणे वावा, मारेनचा गोथा जात रोयू.
ओकोल वावु एने बिन ओकल्यु माणूस
(लुका 6:47-49)
24इनान कोरता जू कुदू मारी वाते सोमवीन तीनुक मानतला, छे इना ओकोलवावा माणसो सारखु ठेरायसे जू आपनो घोर एक चाफऱ्या पोर बांध्यू. 25एने मोटलु पाणी पोळ्यु, एने पाणी वोयीन आयो, एने आंजी आवी, एने घोरो काजे आपठायी, ते बी चो नी पोळ्यो, काहाकि तेरु, पायु चाफऱ्या पोर बांधलु होतु. 26बाकीन जु कुदु मारा ये वाते सोमवतला एने तिनान अनसारे नि चालतला, चे तिना बिन ओकल्या माणसो सारखा ठेरायसे जू तेरो घोर रेवतामा बांध्यू. 27एने पाणी पोळ्यु एने खुदरा आया, एने आंजी आवी, एने तीना घोरो काजे आपठायी एने चे पोळीन सत्यानाश होय गोयो.
28जेतार येसु ये वाते कोय देदु, ती ओसो होयो कि भीळ तेरा सिकाळना पोरसी वाहराय गोया, 29काहाकि चू तीनुक शास्त्री सारखु नी बाकीन अधिकारी सारकू सिकाळतू होतु.
موجودہ انتخاب:
मत्ती 7: BFBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.