Jã 6
6
Kɩɛr Jeju ha tɩbɩla jɔɔ dɩkɔ
(Mat 14:13–21; Mar 6:30–44; Lu 9:10–17)
1A gele pɩ Jeju jaal Galile mɩɩr nɔ iiro, kɛ wɩ‐n wenɩ dakha Tɩbɛrɩadɩ mɩɩr nɔɔ. 2Dɩ tɩbɩla jɔɔ kpaaraarɛ, gɩdonɩ wɩ yɩrɛ nɔ kpaa thɩ̃ɛsɔɔkɛ a‐n cʋʋnɩ khodarara. 3Dɩ Jeju jʋʋn gɔ̃gʋɔna a too le nakha ɔɔ kpãkpãadara. 4Sɩ Pakɩɩkɛ dɔnɩ Juifisɔɔ fɛtɩ kɔɔ wɔrɔnɛ.
5Dɩ Jeju na‐n hɩɩn a yɩ tibil jɔ dɩ wa‐n pʋɔraa, dɩ bule Filipi: Ka sa yɩ dɩkɔ na the na ha tɩbɩla fɛʋʋkɛ? 6Sɩ a buleele thale a hɩɩn a jɩ mɔ̃ Filipi na tuni, gɩdonɩ ɔr Jejuu thɛthɛ jɩrɛ gɩrɛɛkɛ a na cʋʋnɩ. 7Dɩ Filipi birsee: Ado sɩ gbarakɛ wire taanyɔ thɔ̃ lɩmɩnɛɛ war a thena buru fɩɩfɩɩ sa tɩnɛ wɩ, sɩrakɛ ga taa wɩ bʋɔaˈ. 8Dɩ ɔɔ kpãkpãadaar bɩɛlɩkɛ wɩ‐n wenɩ Ãdireekɛ dɔnɩ Sɩmɔ̃ Pɩɛrɩ õkuun sʋʋraa: 9Kũubir hakɛ na buru yemɔɩɩkɛ dɔnɩ bɔdaardaa#6:9 Bɔdaar buru: Ga buru caale thɩ̃ɛɛkɛ n hɔnɩ jɔ wɩ‐n cʋʋ gɩ Jejuu bɔɔ, gɛr dɔ buruukɛ bɔdara n punoni dɩ wa‐n the. na thʋma yenyɔ, sɩ anye gɩrɛ na cʋʋ tibil jɔ thakɛ tə̃tə̃tə̃? 10Dɩ Jeju so: Nɩ cʋɛ tɩbɩlaalera wɩ too; sɩ hʋɔn kɔɔ jɔrɛ dapaale. Dɩ mɛ̃ wɩ too, sɩ wɩ kɔɔ daan kona gbɩlanɩ yemɔɩ. 11Dɩ Jeju gba buruulera. Ɔbɔɔkɛ a kɔɔ fʋɔrnɩ Thãgba pɛr pɩ, a tɩnɛnɛ welela tɔɔnɩ, dɩ mɛ̃ a tɩnɛ wɩ dakha thʋma mɔ̃ wɩ‐n ƴaalnɩ. 12Dɩ ɔbɔɔkɛ wɩ khonɩ fɛʋ a hi phi, Jeju sor ɔɔ kpãkpãadarara: Nɩ ule dakuruukɛ nɩ tɩnɛnɩ sa sɩ na‐n faa gɩ kʋɛaˈ. 13Dɩ wɩ uule a hi kpona yʋɔr yenyɔ bɔdaar buru yemɔɩɩlera wɩ tɩnɛ wɩnɩ, dɩ wɩ kho a hi sɩ dɩɩ sɩ.
14Tɩbɩlaakɛ yɛnɩ nɔ kpaa thɩ̃ɛɛkɛ Jeju cʋʋnɩ, wɩ sor: Sobɔr gɩ, ɔr dɔ Thãgbaa bobonɩlera , kɛ ɩnanɩ thɩɩra. 15Dɩ Jeju jɩrɛ dɩɩ do wa pɔr na tii na fãga, wɩ pɛr a do fãgadaar; gɛr gɩ dɩ bir faa wɩ wo sa ɩɩr dɩbara a jal gɔ̃gʋɔna.
Kɩɛr Jeju ɩɩr nyʋɔnna ƴũ
(Mat 14:22–33; Mar 6:45–52)
16Ɔbɔɔkɛ dɩɩ birəni, Jejuu kpãkpãadara gbune mɩɩr nʋɔra, 17a lõ gboroona a phɛl wa‐n jal Kapɛrnayʋm khʋra. Sɩ dɩɩ do dɩɩ ˈlire tɩɩn sɩ Jeju na caan wɩ paˈ. 18Dɩ jɩɛ kɔɔ ɩɩrɛ na fãga dɩ nyʋɔn na‐n ubiri. 19Sɩ wɩ kɔɔ phɛllɛ a dana kilə yemɔɩ agɩbo maadõsɔ, sɩ na jɩ a yɩ Jeju dɩ ɩɩr nyʋɔnna ƴũ da‐n pɔ a wɔrɔ̃ gborõo, dɩ maar fʋlɛ wɩ. 20Sɩ Jeju so war: Mɛr gɩ, na‐n do maar n fʋ naˈ. 21Dɩ wɩ kɔɔ ƴaalɛla a lona gboroona, sɩ dɩɩ do dapaara gborõo thʋrɛ ka wɩ‐n jalnɩ.
Tɩɩ jɔɔkɛ n ƴaalɛnɩ Jeju
22A dɩɩ wɩl tɩbɩlaakɛ kɔɔ sɛnɩ gɩ̃ iiro kɔɔ yɩɛrɛ dɩ gborõ bɩɛl sɛ le dɩbara, dɩ Jeju na kɔɔ lõ gboroonaale na ɔɔ kpãkpãadara ga, sɩ kpãkpãadara dɩbara kɔɔ jala. 23Sɩ yɛ̃ gborõsɔɔkɛ kɔɔ ther Tɩbɛrɩadɩ a pɔ jɩɩl khunə, ka Kɔ̃tɩn kɔɔ fʋɔrnɩ Thãgba a pɛ burura sɩ dɩ wɩ kho. 24Ɔbɔɔkɛ tibil jɔɔle yɩɛnɩ dɩɩ do Jeju na hale dɩ ɔɔ kpãkpãadara waˈ, wɩ kɔɔ lʋʋn gborõosɔraale dɩ wa‐n jal Kapɛrnayʋm Jejuu ƴaal pa.
Jeju dɔ buruukɛ n ˈlaanɛnɩ yire
25Dɩ ɔbɔɔkɛ tibil jɔɔle kɔɔ danɩ gɩ̃ mɩɩr nɔ iiro a yɩ Jeju, wɩ buleele: Dɩɩrdaar ya, ʋmɔ̃ bɔɔ fɩ dã kɩɛr? 26Dɩ Jeju birse wi: Sobɔr mɩ so nar gel, dɩkɔɔkɛ nɩ khonɩ a hi gɛr nɩ‐n ƴaal mar gɩrɛ wer, ga do nɔ kpaa thɩ̃ɛsɔɔkɛ nɩ‐n yɩnɩ gɛrra ga. 27Na‐n do thɔma dɩkorraakɛ n kʋɛanaˈ, sɩ na‐n dɔ thɔma dɩkorraakɛ na punoneni a na ˈlaa yire khorr, dɩ mɛr tibili Bikuun na hana nɩ dɩko caalera, gɩdonɩ Thãgba Thɩrɛ ha mɛr ɔɔ puno. 28Dɩ mɛ̃ wɩ bulee: Dɩ anye sa cʋʋ gɩrɛ kper gɩ do gɛr dɔ thɔmaakɛ Thãgba n ƴaalnɩ? 29Dɩ Jeju so war: Thɔmaakɛ Thãgba n ƴaal narnɩ dʋɔn nɩ pɩɛr ʋrɛɛkɛ a thɔnɩ haar. 30Dɩ wɩ bulee: Anyee nɔ kpaa thɩ̃ ca fɩ cʋʋ dɩ sɩ yɩɛ a na pɛ fɩ haar? Anye dɔ thɔmaakɛ fɩ‐n cʋʋnɩ? 31Asɩ mama thɩ kɔ̃tɩ̃sɔ kɔɔ khor maan bəənnə, mɔ̃kɛ gɩ kherenɩ Thãgbaa sɛbɛra ayɩ: “A kɔɔ ha wɛr buruukɛ thɛnɩ ƴũ dɩ wɩ kho.”#Thɩɩ 16:4, 15; Khɩ 78:24 32Dɩ Jeju so war: Sobɔr mɩ so nar gel, ga do Mʋɩjɩ kɔɔ hana nɩ buruukɛ kɔɔ thɛnɩ Thãgbaa dʋɔaˈ, sɩ ɩ̃ Thɩ n hana nɩ buru bɔɔkɛ thɛnɩ Thãgbaa dʋɔ. 33Gɩdonɩ buruukɛ Thãgba ˈlaanɩ dɔ ʋrɛ thɛnɩ Thãgbaa dʋɔ, a gbũ da‐n ˈlaa yire tɩbɩlala fɛʋ thɩɩra. 34Dɩ wɩ sʋʋraa: Kɔ̃tɩn, dɩ na hana sɩ ga buru caale wire wire.
35Dɩ Jeju so war: Mɛr dʋɔn buruukɛ n ˈlaanɛnɩ yire; ʋrɛɛkɛ n ɩna marnɩ kɔmɛr na fʋʋ yuuəˈ, dɩ ʋrɛɛkɛ pɛ mɩnɩ haar yɔlkhaa na fʋʋ kpɩɩ bã. 36Sɩ mɩ kɔɔ so narɛ ayɩ: Nɩ kɔɔ yɩ mɛr sɩ na‐n pɛ haaraˈ. 37Wɩrɛ fɛʋʋkɛ Thɩrɛ n ha mɩnɩ na‐n ɩ̃ marɛ, dɩ ma bo ʋrɛ n ɩna marnɩ na faa kpɩɩrakaˈ. 38Gɩdonɩ mɩ ther Thãgbaa dʋɔ a gbũ thɩɩra, ga do mɩ ɩnɛ ɩ̃ cʋʋ ɩ̃ tuurəˈ, sɩ mɩ ɩnɛ ɩ̃ cʋʋ ʋrɛɛkɛ thɔna mɩnɩɩ tuur. 39Dɩ nɩ hɩnɛ gɩrɛ dɔnɩ ʋrɛɛkɛ thɔna mɩnɩɩ tuurrə dʋɔn: Ma‐n faa wɩrɛ fɛʋʋkɛ a ha mɩnɩ bɩɛl n buəˈ, sɩ ɩ̃ cʋɛ wɩ wɩ ɩɩr wɩ the khirera pɩpɩɩ wire. 40Nɩ yɛ gɩrɛ dɔnɩ Thɩrɛɛ tuur wo: Gɛr dʋɔn tibil wo tibilikɛ n yɛnɩ Bikuun dɩ pɩɛ haar, a‐n hananɛ yire khorr, dɩ ma cʋgʋʋrɛ dɩ na ɩɩr na the khirera pɩpɩɩ wire.
41Sɩ Juifisɔ mar dɩ wa‐n hũhuun gɩrɛraakɛ Jeju sonɩ ayɩ, ɩnɛr dʋɔn buruukɛ thɛnɩ Thãgbaa dʋɔ a gbũ. 42Dɩ wɩ so: Jeju, ga do Jojɛfɩɩ bikuun a doaa? Sɩ jɩrɛ ɔɔ thɩ na ɔɔ nɩ, sɩ mɔ̃ gɩ fʋ sɩ dɩ so ayɩ, Thãgbaa dʋɔ ɩnɩ the a gbũ? 43Dɩ Jeju so war: Nɩ sɛrɔ hũhuuneekɛra nɩ‐n hũhuunni kha. 44Tibil bɩɛl na hale na puno na ɩ̃ mar saagado Thɩrɛɛkɛ thɔna mɩnɩ halaa gaagaˈ. Sɩ ma cʋgʋʋrɛ dɩ a na the khirera pɩpɩɩ wirera. 45Thãgbaa bobona kɔɔ khera thɩmɩɩrɩkɛ ayɩ: “Thãgba na dɩrɛ wɩ fɛʋ.” Tibil wo tibilikɛ n pɛnɩ Thɩrɛ nũu da‐n ˈlɛna ɔɔ dɩɩr n ɩ̃ marɛ.#Eja 54:13 46Ga do mɩ sonɩ thale waa mɩ yɩ tibil kɔɔ yɩrɛ Thɩraˈ, ʋrɛ dɩbara thɛnɩ Thãgbaa pa, ɔr yɛ Thɩrɛ. 47Sobɔr mɩ so nar gel, ʋrɛɛkɛ pɛ mɩnɩ haar, a hananɛ yire khorr. 48Mɛr dʋɔn buruukɛ n ˈlaanɛnɩ yire. 49Anɩ mama thɩ kɔ̃tɩ̃sɔ kɔɔ khor maan bəənnə sɩ wɩ khiire. 50Sɩ buruukɛ thɛnɩ Thãgbaa dʋɔ a gbũ dʋɔn buruukɛ tibil na khonɩ a na khi kpɩɩaˈ. 51Mɛr dʋɔn buruukɛ dɔnɩ yireekɛ thɛnɩ Thãgbaa dʋɔ a gbũ. Ado tibil kho buru caakɛra, a na hananɛ yire khorr; dɩ buruukɛra ma ˈlaanɩ ɩ̃ tomɩ gɩɩkɛ ma ˈlaanɩ, dɩ tɩbɩla fɛʋ thɩɩra na ˈlɛrɔ yire.
52Dɩ Juifisɔ kɔɔ ɩɩrnanɛ thɩ̃ banaa awɩ ha dɩ wa‐n so: Mɔ̃ kuunikɛ na puno na ha sɩ ɔɔ tomɩ dɩ sa kho? 53Dɩ Jeju so war: Sobɔr mɩ so nar gel, ado na kho mɛr tibili Bikuuni tomaˈ, dɩ a na yɔ mɛr tibili Bikuuni tɔmãˈ, nɛrɛɛ thɛthɛ na puno na hana yire anɩbara ga. 54Ʋrɛɛkɛ n khɔnɩ ɩ̃ tomɩ da‐n yɔna ɩ̃ tɔmɩ̃, a hananɛ yire khorr, dɩ ma ɩɩrʋʋrɛ khirera pɩpɩɩ wire. 55Gɩdonɩ ɩ̃ tomɩ dʋɔn dɩko bɔ gel, dɩ ɩ̃ tɔmɩ̃ dʋɔn thɩ̃ yɔna bɔ gel. 56Ʋrɛɛkɛ n khɔnɩ ɩ̃ tomɩ da‐n yɔna ɩ̃ tɔmɩ̃ n toore mɛrɛra, dɩ ɩ̃ haaraa dakha. 57Mɔ̃kɛ Thɩrɛɛkɛ thɔna mɩnɩ dɔnɩ yidaar, dɩɩ do dakha yireekɛ mɩ hananɩ Thɩrɛɛ pa gɩ the, mɛ̃ dakha ʋrɛɛkɛ na‐n khɔ mɩnɩ na hana yireekɛ na thɛnɩ mɛrɛra. 58Nɩ yɛ buruukɛ thɛnɩ Thãgbaa dʋɔ a gbũ, ga ho gɩrɛ anɩ mama thɩ kɔ̃tɩ̃sɔ kɔɔ khonɩ sa khiirəˈ. Ʋrɛɛkɛ na‐n khɔnɩ buruukɛ a na hananɛ yire khorr. 59Ɔbɔɔkɛ Jeju n dɩɩrnɩ tɩbɩla Kapɛrnayʋm Juifisɔɔ Thãgba fʋɔr cɔra, gɛr a mɩɩrɔ thɩmɩɩrɩkɛ.
Yire khorr thɩmɩɩr
60Ɔbɔɔkɛ tɩbɩla kɔɔ pɛnɩ Jeju nũu pɩ, ɔɔ kpãkpãadara jɔɔjɔɔ sor aa: Thɩmɩɩ ca gɩrɛ khɩɩrɛ kpɛ. Amɛ na punone na pɛ nũu? 61Mɔ̃ Jeju jɩnɩ dɩ ɔɔ kpãkpãadara n hũhuune kha gelelala, gɛr gɩ dɩ bule wi: Gelela do narɛ nɛ baradaa ya? 62Dɩ anye na so dɩphã, ado na yɩ mɛr tibili Bikuun dɩ ma jʋʋnna ka mɩ kɔɔ hanɩ mamara? 63Thu Phuu n ˈlaanɛ yire, tibil na‐n puno gele dɩ cʋaˈ. Thɩmɩɩrɩkɛ mɩ kɔɔ mɩɩ nɩnɩ, Thu Phuudaa gɩ dɩ ga‐n ˈlaa yire. 64Sɩ dɩ ɩkhasɔ nɛrɛra na‐n pɛr haaraˈ. Gɩdonɩ Jeju kɔɔ mãa jɩrɛ kɛkɛkɛrakɛ wɩrɛɛkɛ na‐n pɩɛrnɩ haaraˈ, na ʋrɛɛkɛ na lirenaanɩ. 65Sɩ a bire so wo: Gɛr gɩ mɩ kɔɔ so narɛ ayɩ: Tibil bɩɛl na puno na ɩ̃ mar saagado Thãgba hana ntɛ hʋɛaa ga.
66A fʋna ɔbɔɔlera waa ɔɔ kpãkpãadara bərəəm kɛrrɛ bir sa fagʋʋ, wa‐n kpaaraa bã. 67Dɩ Jeju bule ɔɔ kpãkpãadara yʋɔr yenyɔ ayɩ: Sɩ nɛrɛ dakha na‐n ƴaal nɩ jala ya? 68Dɩ Sɩmɔ̃ Pɩɛr birsee: Kɔ̃tɩn, amɛra sa jal? Fɛr hɩna thɩmɩɩrɩkɛ n ˈlaanɛnɩ yire khorr.#Mat 16:16; Mar 8:29; Lu 9:20 69Dɩ sɛrɛ, dɩ sɩ pɛr haar nɛnɛ̃ a jɩ dɩɩ do fɛr dʋɔn Tɩɩ phuukɛ thɛnɩ Thãgbaa pa. 70Dɩ Jeju birse wi: Ga do mɛr kɔɔ phire nɛr yʋɔr yenyɔaa? Sɩrakɛ tibil bɩɛl nɛrɛra dor kɔ̃tɛɛbuu. 71Judasɩɩkɛ dɔnɩ Sɩmɔ̃ɔ bikuun, kɛ thɛnɩ Karɩyɔtɩ a so. Gɩdonɩ Judasɩ dorrakɛ tibil bɩɛl kpãkpãadara yʋɔr yenyɔra, sɩɩ do ɔr na lirena Jeju.
موجودہ انتخاب:
Jã 6: LOBIRI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Burkino Faso 1985.
